سلسله حلقات مصنع مصر (الحلقه السابعه)

بِسْــــــــــــــــمِ اﷲِالرَّحْمَنِ الرَّحِيم

دى سلسلة حلقات سميتها " مصنع مصر " بشرح لكم فيها معظم ما يتعلق بالعمل فى المصانع من أول ما ندخل من باب المصنع لحد ما نبقي كيميائيين - أخصائيين زى ما الكتاب بيقول والحلقات هتبقى مركز خصوصا على الخريجين الجدد أو الطلبة اللى لسة بيدرسوا فى الكلية و حابين يستفيدوا.

أولا هنبدأ الحاجات العامة اللى تهم كل الناس اللى شغالين فى كل المجالات فى المصانع المختلفة ثم هنبدأ نتدرج شوية شوية لحد ما نوصل للكورسات لبعض  التخصصية اللى تهم كتير مننا بردو و هحاول على قد ما اقدر اشرح فى كل حلقة بمثال عملى موجود و الناس شغالين به علشان نقرب الكلام النظرى أكتر.

بسم الله الرحمن الرحيم

الحلقة السابعة

فى الحلقة دى هنبدأ نتكلم عن سلسلة شهادات الأيزو ... الحلقة كويسه جدا يا شباب و محتاجة ناس مصحصحة فياريت اللى مكلش ياكل و اللى مشربش شاي يشرب علشان تعرفوا تركزوا معايا كويس و اثناء الكلام الكتير دة و هتلاقوا أمثلة علشان تشرح لكم الكلام دة عملى باختصار كدة يعنى .

يعنى اية ISO : 

دى يعنى International Organization for Standardization المنظمة الدولية للمعايير ( دي اللى بتحط متطلبات الجودة العالمية لأى صناعة و بيبقى ليها مراكز معتمدة حول العالم بيدوا الشهادات لأى شركة مطبقة المتطلبات دى) زى شركة فى مصر هنا اسمها SGS  و النهاردة هنتكلم عن أول شهادة ألا و هى متطلبات الجودة لأى مصنع عايز يطبقها عنده طبقا لما جاء فى متطلبات شهادة ال ISO 9001 : 2008 و اللى حددت 8 مبادئ أساسية لأى صناعة عايزين نطبق فيها نظام ادارة جودة QMS حقيقي بغض النظر عن مجال هذة الصناعة ايا كان.

و الشهادة دى ليها كذا اصدار منها :-

1-  ISO 9000 : 2005  
ودى ذكروا فيها شوية أساسيات و مفاهيم عن الجودة.

2- 2008 : ISO 9001  
اللى هنتكلم عنها النهاردة لأنها أهم واحدة فيهم و هيا اللى بيدوها كشهادة و اللى بتتكلم عن مبادئ نظام ادارة الجودة.

3- ISO 9004 :2009  
ودى ذكروا فيها ازاى نخلى ننظام الجودة فعال و مؤثر لما يتم تطبيقه وذكروا على كدة شوية أمثلة.

نيجي بقى للمهم إية هما ال 8 متطلبات بتاعة ال ISO 9001 اللى لو طبقتها عندى فى مصنعى يبقى أنا كدة جودجى بريمو :-

1. Customer focus :-  
يعنى أشوف تركيز العملاء بتوعى فى منتجي رايح لفين لأن هما المؤشر الرئيسي اللى بيقولى اذا كان منتجى كويس و جيد ولا أى كلام و مفيش صناعة و منتج من غير عملاء بيستهلكوا المنتج دة أيا كان هو اية ... طب أعمل الكلام دة ازاى ؟

عن طرق شوية حاجات زى :- انى ادور على احتياجات العملاء و المستهلكين بتوعى و احاول ألبيها بإستمرار ، و احط من ضمن أهداف منظمتى أو مصنعى انها تلبي متطلبات العملاء بتوعى و توقعاتهم ، و احصل على توقعاتهم من خلال عمل احصائيات خارجية علشان تقيس مدى رضاهم عن المنتج ، و اوجد علاقات كويسة و متينة مع العملاء اللى بيستهلكوا منتجى و فى نفس الوقت أوازن بينها و بين باقى اساسيات شغلى زى الموظفين و اصحاب رأس المال و الاسهامات المجتمعية و هكذا .

2. Leadership  :- 
و دى مشكلة بنعانى منها حاليا فى أغلب شركاتنا و هى ان مفيش حد عايز يبان انه بيفهم فى كل حاجة غيره هو و بس مفيش حد بيربي من تحته قائد حقيقي يقود الناس فى غيابه .. كل الناس فى أماكن شغلهم مديرين و ليسوا قادة مع ان تربية القادة فى أى مؤسسة بتخلى الناس عندهم قابلية أفضل لتطوير شغلهم و تحسين انتاجيتهم و يبقوا فعالين فى المؤسسة اللى هما شغالين فيها... طب ازاى أعمل كدة ؟؟

عن طرق شوية حاجات زى :- إنى أحط رؤية واضحة للشركة بأهدافها و اتجاهاتها و تكون واضحة لكل الناس علشان يعرفوا هما بيعملوا اية و لية ، و اضع تحديات و اهداف أثناء شغلى فى العملية التصنيعية بتاعتى يعنى مثلا أنا أنتجت 1000 متر مية الشهر دة و أهدرت 100 متر لأ أقول الشهر الجاى للناس اللى معايا احنا عايزين ننتج 1100 متر و نخسر 10 متر بس و هكذا ، أحفز الناس و ادربهم و ازود من مهاراتهم و اشجعهم على المشاركة ان لم يكن فى وضع خطة العمل يبقى فى المشاركة فى وضع آليات تنفيذه بحيث ميبقاش العامل سواء فنى أو كيميائي أو حتى مدير مجرد آلة بتشتغل لمدة 8 ساعات و خلاص لأ اخليهم يتحملوا المسئولية معايا.

3. Involvement of people :-  
يعنى اشراك الناس بفاعلية فى تحقيق أهداف الشركة و استغلال مهاراتهم و ابداعاتهم فى تطوير مسار الشركة و تحسين آداءها بإستمرار ... طب نعمل كدة ازاى ؟؟  عن طرق شوية حاجات زى :- ان كل واحد شغال فى الشركة يعرف قيمته بالظبط و اهمية دوره و مشاركته و يحس ان الشركة واقفة على مجهوده و مستنية منه اكتر ، توقع و تقبل حدوث المشكلات أثناء الصناعة و فى نفس الوقت تقبل المسئولية لحلها ، تقييم أدائي بالمقارنة مع اهداف الشركة هل كويس ولا محتاج تحسين ، افضل أدور دايما على الفرص لتحسين مهاراتى و كفاءتى فى شغلى و اشارك معلوماتى و خبراتى مع زمايلي زى ما بنعمل دلوقتى كدة و أناقش معاهم مشكلات الشركة و كيفية حلها و نسيبنا شوية من قصة هو انت اللى هتعدل الكون دى لأنها موديانا فى داهية زى ما انتوا شايفين كدة حواليكم فى الدنيا.

كدة خلصنا مما يتعلق بدور الأفراد فى الشركة و دلوقتى هنتكلم عما يتعلق بالعملية التصنيعية و ازاى اديرها فى اطار واضح من نظام الجودة :-

4. Process approach :-  
يعنى منهج التعامل مع العملية التصنيعية بتاعتى فى اطار نظام ادارة الجودة و دة بيفيدنى فى تقليل تكلفة الصناعة بتاعتى و تقليل الدورة بتاعة المتتج على خط الانتاج و بيحسن المنتج اللى بحصل عليه و بيركز لى على نقاط الضعف اللى محتاجة تحسين و تطوير مستمر .. طب أعمل كدة ازاى ؟؟ من خلال شوية حاجات زى :-

تعريف واضح و صارم لكل نشاط أو خطوة بعملها من أول دخول المواد الخام للمصنع لحد خروج المنتج فى صورته النهائية و اللى لو عملتها منتجى يخرج فى أعلى درجات الجودة و دى اللى كنا سميناها فى الأول لو فاكرين و بتذاكروا SOP Standard Operation Procedures  ، أحط قدام كل نشاط أو خطوة مين اللى مسئول عن تنفيذها هل الفنى ولا الكيميائي ولا رئيس القسم و المدير و هكذا و اشوف قدارت كل واحد و كفاءته فى تنفيذ الخطوة دى أو الاشراف على تنفيذها ، أركز على الحاجات اللى هترفعلى مستوى المنتج و الصناعة بتاعتى عموما زى جودة المواد الخام و بساطة العملية التصنيعية و قلة تعقيدها و تعظيم الاستفادة من الموارد و رأس المال بتاعى و عدم اهداره و توفيره قدر المستطاع للإستفادة منه فى خطط التطوير للشركة زى مثلا اضافة خط انتاج جديد او اقامة فرع جديد ليا فى منطقة فيها عملاء بس خارج التغطية بتاعتى و كل دة بيساعد نى انى اقدر انافس فى السوق ، و كمان حاجة مهمة جدااااا ألا و هى تقييم المخاطر اللى ممكن تحصل أثناء الصاعة بتاعتى فى كل خطوة منها و توقعها وضع حلول ليها بحيث متشكلش خطر على العاملين فيها زى مشاكل الصيانة و خطوط الانتاج أو التعامل الخاطئ مع الكيماويات أو حتى تشكل خطر على المستهلك او العميل من قلة جودة المنتج او تعرضه للتلوث عندى علشان بئية شغلى مش نظيفة بدرجة كافية.

5. System approach to management :- 
و دى بتتعلق بالعمليات المتداخلة مع بعضها و ازاى اعرفها كلها تعريف دقيق و واضح فى إطار نظام واحد يسهل متابعته و ادارته بأفضل طريقة ممكنة تحقق لى أفضل النتايج طب اعمل كدة ازاى ؟؟ عن طريق شوية حاجات زى :-

تأسيس نظام شركتى بحيث انه يحقق أهدافها من خلال طرق فعالة و ذات كفاءة و اهم هذه الطرق تقليل مركزية القرارات فى الشركة و اعطاء الصلاحيات لكل واحد فى موقعه لإدارة شغله بالطريقة المناسبة فى اطار خطة العمل اللى سبق و تم وضعها و هنا بتكلم عن المرونة المنظمة فى الشغل مش التحجر و رفض تحمل المسئولية و إلقاءها على الغير ، الفهم الموحد لأهداف الشغل و خطة العمل بحيث ميحصلش عندى Cross- Functional Barriers يعنى عوائق ناتجة عن سوء فهم الاهداف المشتركة للخطة بين العمليات المختلفة مثلا انا عندى مصنع فيه 3 خطوط انتاج و الخطة محطوطة ان الخط الأول هينتج لأنه جاهز و الثانى هيتعمل له تجهيز خلال ساعة مثلا و يلحقه و الثالث هيشتغل نص يوم بس علشان هيدخل عَمْرَة ميجيش بقى المشرف على الخط الأول يقول انا هنتج كمية المنتج اللى فى الخطة كلها لوحدى اللى هيا مثلا 10000 عبوة مياة معبأة لأن الخط الثانى احتمال يتأخر و الثالث احتمال يعطل و يعمل كدة من دماغه بدون تعليمات واضحة أو يجي مشرف الخط الثانى يقولك اتأخر يا جدع فى تجهيز الخط ما هو كدة كدة عدنا خط رقم 1 شغال اهو أو يجي مشرف الخط الثالث يقولك أنا هوقف انتاج بدرى و اهو عندهم خطين اتنين شغالين محاريت أهو  ... غلط جدا الكلام دة بدون تعليمات واضحة مفهومة للجميع من مدير الانتاج ان كل واحد ملف بمهمة ينجزها فى اطار خطة العمل و مفيش شغل بالمزاج ... طيب اللامركزية تتطبق هنا ازاى ؟ عن طريق اعطاء مشرفين الخطوط الصلاحية فى حل اى مشكلة تعترض سير العمل و حلها بدون الرجوع للمدير فى كل شيء الا فى حالة مشكلة يصعب عليه حلها لوحده زى مثلا الخط رقم 3 عطلت فيه ماكينة مهمة و مش راضية تشتغل تانى علشان يكمل خطة الإنتاج بتاعته قبل ما يدخل عمرة و يكمل الخطة بتاعته هنا لازم يرجع للمدير علشان يقرروا تحويل باقى خطة انتاج الخط رقم 3 و لنقل انها كانت 2000 عبوة على الخطين التانيين بالتعاون مع الادارات التانية زى الجودة و الادارة الهندسية لتقييم الموقف تقييم شامل.

6. Continual improvement :- 
باينة من اسمها التحسين المستمر لكل حاجة مواد خام و منتج و عملية تصنيعية و أداء و كفاءة الموظفين و دة نعمله عن طريق :- ان يكون التطوير المستمر هو هدف لكل واحد فى الشركة و يشتغل عليه كويس ، توفير التدريب المستمر للموظفين على العمليات اللى هما مكلفين بيها و طرق اداء وظيفتهم على أكمل وجة ممكن ، و زى ما قلنا تحسين جودة المواد الخام اللى بستخدمها و تحسين العمليات المختلفة اللى منتجى بيمر بيها بحيث فى النهاية أخرج بمنتج عالى المواصفات و يبقى هو دة الهدف بتاعى دايما التحسين المستمر ، و لو حصلت على انجاز معين و عملت تطوير و تحسين حقيقي لازم اسلط الضوء عليه و أوضحه للناس علشان يبقى نموذج و قدوة للباقيين و حافز يشجع باقى الناس على التطوير.

7. Factual approach to decision making :- 
يعنى منهجية حقيقية لاتخاذ القرار يعني اية بردو ؟ يعنى تبقى قراراتى اللى بتخذها علشان امشي شغلى نابعة من معطيات حقيقية على أرض الواقع طبقا للعملية التصنيعية بتاعتى و معطياتها و النتائج اللى بحصل عليها منها طب أعمل الكلام دة ازاى ؟

كالآتى :- أول حاجة انى أتأكد إن كل بيانات و سجلات العملية التصنيعية بتاعتى حقيقية و دقيقة و موثوق فيها مش مضروبة ولا متألفة لأن هيتبنى عليها قرار سواء للتطوير أو للصيانة لو فى مشاكل أو غيره ، ان جميع البيانات دى تكون متاحة لكل الناس اللى محتاجينها علشان يدرسوها و يتخذوا قراراتهم بناءاً عليها مش تتعامل معاملة الأسرار العظمى و كل واحد يخبيها عن التانى ! ، الخطوة اللى بعد كدة هى تحليل البيانات دى تحليل دقيق بطرق حديثة زى مثلا احد أهم الطرق انى احط بياناتى دى فى رسومات بيانية و Charts علشان تبقى Visualized يعنى معروضة قدامى بوضوح و ياحبذا لو كانت البيانات دى مثلا لمدة شهر فات أو اثنين أو ثلاثة محطوطة قدامى فى رسم بيانى واحد زى مثلا قيم ال pH للمنتج لمدة 6 شهور فاتت فى Chart واحدة هقدر من خلالها أعرف هل انا ماشي صح ولا لأ و أقارن النتايج دى مع بيانات الاستهلاك للكيماويات و أشوف هل فى استهلاك زائد أو ناقص عن حاجتى .. كل دة بعرفه لما بقارن النتائج دى كلها مع بعضها و أحطها قدامى مرسومة فى رسم بيانى مثلا على الإكسل .

8. Mutually beneficial supplier relationships :- 
يعنى اعتماد مبدأ المنفعة المتبادلة فى علاقة شركتى مع الموردين و دة هيخلي شركتى و شركات الموردين ليهم قدم ثابتة فى السوق لأنه هيدينى مادة خام جيدة فبالتالى أنا هجيب منه على طول فقيمتنا احنا الاتنين فى السوق ترتفع و نقدر نساعد بعض فى الاستجابات السريعة المشتركة لمتطلبات السوق اللى احنا موجودين فيه سوا و بيحقق لى أفضل استخدام للموارد بتكلفة قليلة ... طيب أعمل كدة ازاى ؟؟

كالآتى :- أول حاجة أحط خطة مع المورد أحدد فيها بالظبط المكاسب القريبة و المكاسب البعيدة و نشوف ازاى نقدر نحققها سوا من خلال أهدافى و أهدافه ، تجميع الخبرات و الموارد بيني و بين المورد بحيث يبقى شغلنا كله فى نظام واحد مش أنا فى اتجاه و هو فى اتجاه تانى و دة بيتم عن طريق توفير المعلومات اللى عندى و عنده للكل و وضع خطط مشتركة للإنتاج طبقا لمعطيات السوق اللى احنا فيه ، و وضع خطط تطوير مشتركة على أساس المنتج بتاعى و بتاعه و دى هيساهم فيها البيانات الدقيقة اللى قلنا عليها فى المبدأ السابع و احصائيات استطلاع رأى العملاء اللى فى المبدأ الأول ، و أخيرا لما التعاون اللى بيني أنا و المورد يكلل بنجاح ما أو تطوير إيجابي معين أسلط الضوء عليه و أظهره كويس علشان يبقى أرضية صلبة لأ تعاون قادم و يكبر الشراكة بيني و بينه.

الكلام اللى فوق دة كله كان عبارة عن نظرة سريعة جدا على ال 8 مبادئ فى نظام QMS Quality Management System  اللى فى ال ISO 9001 لكن جوا كل مبدأ منهم تفاصيل كتييييييييييير جدا بتختلف من شركة لشركة و من صناعة لصناعة لكن هما دول كدة الأساس اللى بيتبنى عليهم أى نظام جودة عموما.

آية الحلقة :-  { وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُونَ (153)} سورة الأنعام

باقى حلقات مصنع مصر

الحلقة الأولى من سلسله حلقات مصنع مصر

رابط الحلقة

الحلقة الثانية من سلسله حلقات مصنع مصر

رابط الحلقة

الحلقة الثالثة من سلسله حلقات مصنع مصر

رابط الحلقة

الحلقة الرابعة من سلسله حلقات مصنع مصر

رابط الحلقة

الحلقة الخامسة من سلسله حلقات مصنع مصر

رابط الحلقة

الحلقة السادسة من سلسله حلقات مصنع مصر

رابط الحلقة

الحلقة السابعة من سلسله حلقات مصنع مصر

رابط الحلقة

الحلقة الثامنة من سلسله حلقات مصنع مصر

رابط الحلقة

الحلقة التاسعة من سلسله حلقات مصنع مصر

رابط الحلقة

الحلقة العاشرة من سلسله حلقات مصنع مصر

رابط الحلقة

الحلقة الحادية عشر من سلسله حلقات مصنع مصر

رابط الحلقة

الحلقة الثانية عشر من سلسله حلقات مصنع مصر

رابط الحلقة