سلسله حلقات مصنع مصر (الحلقه السادسه)

بِسْــــــــــــــــمِ اﷲِالرَّحْمَنِ الرَّحِيم

 

دى سلسلة حلقات سميتها " مصنع مصر " بشرح لكم فيها معظم ما يتعلق بالعمل فى المصانع من أول ما ندخل من باب المصنع لحد ما نبقي كيميائيين - أخصائيين زى ما الكتاب بيقول والحلقات هتبقى مركز خصوصا على الخريجين الجدد أو الطلبة اللى لسة بيدرسوا فى الكلية و حابين يستفيدوا.
أولا هنبدأ الحاجات العامة اللى تهم كل الناس اللى شغالين فى كل المجالات فى المصانع المختلفة ثم هنبدأ نتدرج شوية شوية لحد ما نوصل للكورسات لبعض  التخصصية اللى تهم كتير مننا بردو و هحاول على قد ما اقدر اشرح فى كل حلقة بمثال عملى موجود و الناس شغالين به علشان نقرب الكلام النظرى أكتر.

بسم الله الرحمن الرحيم

الحلقة السادسة

الحلقة دى مهمة جدا لأننا هنتكلم فيها عن موضوعين مرة واحدة ان شاء الله هما :-

  Microbiology Guidelines and Root Cause Analysis و الحلقة دى هتبقى حلقة دسمة جدا ( مفيش دايت فى المعلومات على فكرة  ) فركزوا معايا جامد.

أولا :- Root Cause Analysis

و دة تدريب مهم جدا والمعنى الاصطلاحي ليه :- تحليل الأسباب الجذرية لمشكلة ما بتقابلنى فى شغلى أو حتى فى حياتى عامة بس هنركز أكتر على الشغل يعنى .. خلينا نبسط الكلام أكتر لو مثلا قدامى واحد ذراعه مكسور و عايز أعالجه هل المفروض إنى أسيب الكسر و أديله مسكن للألم و خلاص و أقول انى كدة عالجته ولا أعمله جبيرة و اجرى بيه على المستشفى علشان يجبس ذراعه ... دة بالظبط هو المقصود بحل المشكلات بحل أسبابها الجذرية ، طب أنا ازاى هحل مشكلة معينة من غير ما اعرف أسبابها الأول طبعا مينفعش علشان كدة قالك احنا هنقسم أسباب المشكلات ل 3 أسباب رئيسية :-

1.  Physical causes :- 
يعنى الأسباب الفيزيائية أو خلينا نسميها الأسباب المؤدية لخلل فى العملية التصنيعية زى مثلا ماكينة اتعطلت أو مادة خام باظت أو منتج خارج المواصفات و هكذا  ..

2. Human causes :- 
معروفة دى يعنى كوارث الفهلوة أو قلة الخبرة أو قلة التأهيل للناس اللى عملوا المشكلة.

3. Organizational causes :- 
يعنى أسباب تتعلق بالمؤسسة نفسها و دى أغلبها بتتركز فى دوائر صنع القرار فى الشركة مثلا فى الإدارة زى عدم وضوح التعليمات أو حتى تأخر صدورها و بالتالى كل واحد يشتغل على مزاجه !

انا بقي كراجل فاهم علشان أعرف ازاى أحل المشكلة لازم أعمل تحليل للأسباب السابقة دى علشان أعرف السبب الحقيقي الجذرى للمشكلة اللى لو حليته المشكلة تنتهى تماما و بعمل كدة من خلال الخطوات التالية :-

1.  Define The Problem :- 
تعريف المشكلة دى يعنى اية اللى حصل بالظبط من خلال المشاهدة العينية أو من خلال الظواهر اللى حاصلة قدامى زى مثلا ماكينة عطلت علشان موتور اتحرق .. و هكذا.

2.  Collect Data:- 

يعنى أجمع معلومات عن المشكلة و ملابسات حدوثها يعنى حصلت امتى و استمرت قد اية و تأثيرها اية على العملية الانتاجية عندى و استعين بالناس الاكثر خبرة منى لو المشكلة كانت فنية بعيد عن تخصصى زى مشاكل خطوط الانتاج و كدة ... من الآخر طلع وكيل النيابة اللى جواك .

3. Identify Possible Causes:- 

يعنى ابدأ دور على سبب المشكلة الجذرى اللى خلاها تحصل و دة عن طريق مجموعة استراتيجيات للتفكير منها :-

 1- 5 Whys :- 
يعنى اقعد اسأل لية حصل كذا .. ثم لية .. ثم لية ومش لازم 5 مرات بس لا على قد ما تقدر لحد ما توصل لسبب تشوف انه سبب حقيقي.

2- Drill Down :- 
يعنى فتت المشكلة لشوية فتافيت صغيرة و امشي ورا كل فتفوتة بالتفصيل الممل لحااااااااااااااااد ما تجمع كل التفاصيل فى صورة واحدة كبيرة للمشكلة اللى عندك.

3- Fish Bone :- 
و دى طريقة مشهورة جدا و اسمها جاى من انى بعمل Diagram على شكل هيكل عظمى لسمكة و دى من أسهل الطرق علشان بتقسم المشكلة لتخصصات يعنى تحط عنوان رئيسي كدة زى :-( Materials, Methods, Machines, Measurements, Man Power, Environment ) وابدأ احط تحت كل عنوان رئيسي الاسباب المتعلقة بيه اللى ممكن تخلى المشكلة تحصل أى سبب مهما كان تافه يعنى بإختصار نعمل حاجة اسمها Brain Storming  يعنى عصف ذهنى و بعدين لما اخلصهم كلهم أبدأ اناقش الاسباب دى مع ذوى الخبرة و المتعاملين المباشرين مع المشكلة لحد ما اوصل أنا و هما للسبب الجذرى ليها.

و دى صورة لتوضيح كيفية عمل تحليل لمشكلة بإستخدام ال Fish Bone Diagram  :-

 

4. Identify the Root Cause :- 

يعنى أول ما تعرف اية هو السبب الحقيقي للمشكلة أمسك فيه بإديك و سنانك و شوف هو اية بالظبط و اعرف أسباب وجوده و فصص الأعراض الناتجة عنه و حلل علاقته بالأسباب الفرعية للمشكلة علشان توضح الصورة قدامك أكتر و تقدر تحل المشكلة من جذورها.

5. Recommend and Implement Solutions :-  

يعنى حط توصيات للحل بناءاً على تعريفك للسبب الجذرى للمشكلة والحلول بتنقسم لنوعين :-

النوع الأول :- 
حلول تصحيحية Corrective Actions و دى بعملها بسرعة علشان أعالج الأعراض زي ما عملنا جبيرة للراجل اللى ذراعه مكسور - فاكرينه  - علشان امشي شغلى و معطلش انتاجى

النوع الثانى :- 
حلول مانعة أو جذرية Preventive Actions و دى بوصلها بعد ما اعمل التحقيق اللى فوق دة و أبدا أحط لنفسي خطة عمل و أجزأ الحل أجزاء و أدى لكل تخصص الجزء بتاعه و أسجل دة فى جدول كدة المشكلة و الحل و الشخص المسئول عن الحل و هيخلص امتى و ازاى هنفذه و كل دة علشان أمنع تكرار حدوث المشكلة دى ذات نفسها تانى ما انا مش فاضيلها بقى ورانا مشاكل تانية عايزين احلها بردو .. ولا اية ؟؟

دة كان بالمختصر المفيد ( الزتونة يعنى ) بتاع ال Root Cause Analysis و اللى عايز زيادة يكتب بس الثلاث كلمات دول فى جوجل و هيلاقى من خيرات ربنا كتيييييير ...  و فيه لينك جامد جدا فى  المراجع لشرح الطرق دى بردو و زيادة عليها كمان للى يحب يطلع عليه.

ثانيا :- Microbiology Guidelines

الجزء الثانى من الحلقة عبارة عن Guidelines أو خطوط عريضة كدة فى شغل الميكروبيولوجى للمهتمين و أنا حاولت على قد ما ربنا يقدرنى أنى أذكر معلومات صحيحة من خلال خبرتى فى شغل مجال معالجة المياة و من خلال قراءتى لأنى أنا مش تخصص ميكروبيولوجي أنا كيمياء خاصة و أنا حطيت صور للشرح علشان اللى مشتغلش ميكروبيولوجي قبل كدة يعرف احنا بنتكلم فى اية و دلوقتى يالا نبدأ :-

بداية أنا لية بعمل Micro test للمنتج بتاعى أو المادة الخام خاصة لو كنت شغال فى صناعة غذائية أو دوائية أو أى حاجة تمس الصحة العامة للمستهلك .. علشان أطمن ان مفيهاش أى ميكروبات ضارة مسببة للأمراض زى التايفويد أو الكوليرا أو حتى فيروسات مختلطة بالمنتج بتاعى فتسبب للمستهلك مشاكل صحية و بالتالى دة هيعود بالضرر المحقق على منتجى و سمعتى فى السوق و و و و ... الخ ، طب هل أنا أقدر اعمل تحليل دقيق مستمر للمنتج علشان أشوفه خالى من الميكروبات الضارة دى ولا لأ ؟ الاجابة ان دة محتاج مجهودات معملية ضخمة و مكلفة .. طب الحل اية قالك احنا ندور على بكتيريا أخدها كعلامة بحيث من تواجدها أعرف ان مثلا عينة المية اللى بحللها دى مختلطة بحاجة لوثتها زى مياة الصرف الصحى - أجَلّكم الله - مثلا .. طب اية البكتريا اللى هتقوم بدور ال Bio-Indicator أو الدليل البيولوجي على التلوث ليا ... قالك احنا هنختار ال E.Coli Escherichia coli و دى بكتيريا يكثر وجودها فى مياة الصرف الصحى - أعزكم الله - فلو لقيتها فى مية الشرب عندى أعرف انى بروح فى داهية دوغري  ...  طيب اية الخطوات اللى بقوم بيها علشان أعمل اختبار مايكرو على المية بتاعتى ؟؟

أول حاجة لازم أعرفها هى اية ال PPE Personal Protective Equipments اللى لازم أكون لابسها و انا داخل معمل المايكرو زى(Hair Net, Face Mask, Face Shield, Polyethylene gloves, Lab coat, Safety Shoes)  وبعد ما البس كل دة اروح على محلول تعقيم Sanitizer و اعفم ايدي كويس و اقول بسم الله و ادخل برجلى اليمين.

1. Collecting Samples أو تجميع العينات :- 
و دى بكون أنا مجهز الزجاجات اللى هجمع فيها العينات و معقمها كويس فى جهاز اسمه Autoclave بدخل فية الزجاجات و املاه مية لحد علامة معينة كدة فيه علشان تغطى ال Heater اللى هو ملف السخان اللى جواه يعنى ( دة النوع اللى أنا اشتغلت عليه مش عارف فيه أنواع احدث ولا لأ بصراحة ) و بقفل على الزجاجات جوة جامد و اظبط تايمر الجهاز على الوقت بتاع التعقيم ممكن 15 دقيقة كفاية تحت درجة حرارة 121 درجة مئوية و ضغط 2 بار و بعرف من مراقبة عدادات الحرارة و الضغط و اول ما التعقيم يخلص بفتح ال Autoclave بالراحة كدة و أنا لابس جوانتيات زى بتاع المطبخ علشان السخونة و اخرج الزجاجات و اسيبها تبرد شوية و بكون عارف انا و محدد مسبقا نقاط التجميع اللى هجمع منها العينات سواء مياة معالجة أو مياة خام جاية من البئر و عايز أكشف عليها ... بروح لنقطة التجميع و معايا حاجتين لهب و كحول فى الاول برش كحول على مقدمة الحنفية كدة علشان أطهرها و بعدين أعرضها للهب شوية دقيقتين كدة علشان أموت أى تجمعات بكتيريا جاية من الهواء فى الحنفية و بعدين أسيب الحنفية مفتوحة شوية دقيقتين بردو قبل التجميع علشان أضمن ان Bacterial Content المحتوى البكتيري اللى هيطلع لى فى ال test جاى من المية اللى هجمعها فقط  ودى صورة لل Autoclave  :-

 

2. بروح المعمل عندى بكون مجهز ال Petri Dishes او الاطباق اللى فيها ال Agar Media اللى هزرع فيها البكتيريا و كل نوع بكتيريا لية Agar معين هقول ليه كمان شوية يعنى مثلا ال E.Coli and Coliforms الآجار بتاعها اسمهTergitol-7  و عندى مثلا ال Pseudomonas Aeruginosa الآجار بتاعها اسمه Pseudomonas Agar و عندى ال Yeast and Mold الآجار بتاعهم اسمه Yeast Extract Agar و هكذا...

3. بشغل جهاز ال Laminar Air Flow :- 
و دة الجهاز اللى كل شغلى بيبقى جواه زى الصورة كدة لأنى مينفعش أشتغل كدة و انا معرض اطباق الميديا للهواء حتى لو جوه المعمل لأنها ممكن تلقط بكتيريا و تديني نتايج غير حقيقية و بيبقى مع الجهاز دة لمبة UV و ليها تايمر كدة بظبطه مثلا على 10 دقائق أو 15 دقيقة تعقيم للجهاز و اشغل اللمبة و أحاول أبعد عنها على قد ما اقدر و معرضش نفسي ليها لأن UV Rays Are Carcinogenic مسببة للسرطان عافانا الله و اياكم.

 

4. بعد ما التعقيم بال UV يخلص بيكون فى جهاز Vacuum أو بيسموه جهاز الفلترة Filtration اللى بيبقى مكون من مجموعة من الكاسات المدرجة بالحجم و ابتدى اوزع عليها ال Filter Papers و احط الكاسات ثم أحط مية من العينات اللى أنا جمعتها و أشغل Vacuum Pump علشان تسحب لى المية من خلال أوراق الترشيح دى اللى بيبقى الثقوب بتاعتها حوالى 0.45 ميكرون علشان تحجز لى البكتريا على سطحها و بعدين ابدأ آشيل اوراق الترشيح دى بالملقاط علشان أزرعها فى اطباق الميديا اللى البكتيريا هتنمو فيها و بعد ما ازرعها لازم أقلب الطبق على ظهره بحيث يبقى غطاه تحت علشان يبقى محكم الغلق على ورقة الترشيح اللى جواه و بيقولوا ان دة هو الوضع الصحيح لنمو البكتيريا و الله اعلم.

 

5. التحضين Incubation :- 
و دة على حسب نوع البكتيريا اللى أنا زرعتها بحطها فى حضانات عند درجات حرارة مختلفة علشان أوفر للبكتيريا بيئة شبة مثالية للنمو مثال على كدة ال E.Coli دى بتتحضن عند درجة 36 درجة مئوية لمدة 48 ساعة و بعد كدة اكشف عليها.

 

6. بعد انتهاء مدة التحضين بخرج الطبق من الحضانة و افتحه و ابدأ اعد كل المستعمرات Colonnies اللى اتكونت لى بعد نمو البكتيريا و بكدة أعرف ان المية بتاعتى فيها bacterial content  المحتوى بكتيري قد اية علشان أعرف هيحتاج منى اية من وسائل التعقيم هل أحط كلور ولا اركب وحدة UV ولا أعقم بالأوزون وهكذا و دى اللى بيحددها مصممين المحطات ... و خصوصا فى المياة الخام قبل ما تدخل على وحدات المعالجة اللى شرحناها قبل كدة فى الحلقات اللى فاتت.

7. التخلص من الاطباق المستخدمة :- 
و دى مهمة جدا لأنها مصدر تلوث فظيع جدا و التخلص منها بيكون عن طريق انى بشتري أكياس كدة مخصوصة بتتحمل درجات الحرارة العالية و الضغط و احط فيها الاطباق المستخدمة دى اللى خلاص كشفت عنها و عديت اللى فيها و بعدين أحطهم فى ال  Autoclave تحت ضغط 2 بار و درجة حرارة 121 درجة مئوية علشان أموت المستعمرات بتاع البكتيريا و اتخلص من الكيس بعد كدة فى صندوق قمامة مخصص لكدة اكتب عليه من برة Hazard Waste  يعنى مخلفات خطيرة علشان بتجي شركات اعادة التدوير بعد كدة تشيل الكلام دة كله.

ملحوظة مهمة يا شباب :-  

فى مجال الصناعة بيبقى أفضل كتييييييير بعد ما عملت تقييم بيولوجي كامل للمية اللى عندى و عرفت اية البكتريا اللى هتعامل معاها فى صناعتى و علشان موضوع المجهودات المعملية المكلفة اللى قلنا عليها فوق بيبقي أفضل لو جبتSelective Agar Media يعنى آجار مخصص لكل بكتريا منهم زى ما قلنا فوق كدة بالظبط يعنى مزرعش البكتريا اللى فى عينة المية كلها مثلا على Nutrient Agar تنفع لكل البكتريا لأ أنا بحاول أكون متخصص علشان أوفر على نفسي مجهود الكشف التأكيدي عليها ب Comfrimation Tests بإنى أبقى عارف نوع البكتريا اللى بشتغل عليها اية من الأول وعارف شكل الcolony  بتاعتها لما بتتزرع فخلاص مش محتاج أكشف عليها تانى … أما فى حالة لو عندى عينة خارجية مثلا مش عارفها ولا حاجة جديدة colony طلعت لى فى الأطباق غير الشغل الروتيني اللى أنا متعود ألاقيه مش عارفها بردو هعمل الخطوات اللى فوق دى و بعدين أعزل Colony منها على Nutrient Agar علشان أكترها لما اجى اشتغل عليهم اختبارات تأكيدية علشان أعرف هل هى Gram+ or Gram- هل هى مثلا عصوية Bacillus ولا كروية Coccus و هكذا و فى تحت جدول بيوضحهم ... و بعدين أبلغ بقى مدير الجودة بالبكتريا الجديدة اللى لاقيتها فى الطبق و هو بدوره هيبلغ ادارة المصنع كله علشان يقعدوا يشوفوا حل فى المصيبة الجديدة اللى طلعت دى. 

و بمناسبة البكتريا اللى بتظهر فى الصناعات الغذائية عموما هسيب لينك جامد جدا فى المراجع لملف عامل حصر كامل للبكتريا المتوقعة فى مجال الأغذية و الأدوية عموما للمتخصصين أنا بس هنا بحاول أفتح سكة و هضطر أسيب شرح الإختبارات التأكيدية للمتخصصين بردو علشان منقطعش على بعض.

 

آية الحلقة :- يقول الله عز و جل :- { وَإِذْ بَوَّأْنَا لإِبْرَاهِيمَ مَكَانَ الْبَيْتِ أَنْ لا تُشْرِكْ بِي شَيْئًا وَطَهِّرْ بَيْتِيَ لِلطَّائِفِينَ وَالْقَائِمِينَ وَالرُّكَّعِ السُّجُودِ (26) وَأَذِّنْ فِي النَّاسِ بِالْحَجِّ يَأْتُوكَ رِجَالا وَعَلَى كُلِّ ضَامِرٍ يَأْتِينَ مِنْ كُلِّ فَجٍّ عَمِيقٍ (27)} سورة الحج

باقى حلقات مصنع مصر

الحلقة الأولى من سلسله حلقات مصنع مصر

رابط الحلقة

الحلقة الثانية من سلسله حلقات مصنع مصر

رابط الحلقة

الحلقة الثالثة من سلسله حلقات مصنع مصر

رابط الحلقة

الحلقة الرابعة من سلسله حلقات مصنع مصر

رابط الحلقة

الحلقة الخامسة من سلسله حلقات مصنع مصر

رابط الحلقة

الحلقة السادسة من سلسله حلقات مصنع مصر

رابط الحلقة

الحلقة السابعة من سلسله حلقات مصنع مصر

رابط الحلقة

الحلقة الثامنة من سلسله حلقات مصنع مصر

رابط الحلقة

الحلقة التاسعة من سلسله حلقات مصنع مصر

رابط الحلقة

الحلقة العاشرة من سلسله حلقات مصنع مصر

رابط الحلقة

الحلقة الحادية عشر من سلسله حلقات مصنع مصر

رابط الحلقة

الحلقة الثانية عشر من سلسله حلقات مصنع مصر

رابط الحلقة