سلسله حلقات مصنع مصر (الحلقه الرابعه)

بِسْــــــــــــــــمِ اﷲِالرَّحْمَنِ الرَّحِيم

 

دى سلسلة حلقات سميتها " مصنع مصر " بشرح لكم فيها معظم ما يتعلق بالعمل فى المصانع من أول ما ندخل من باب المصنع لحد ما نبقي كيميائيين - أخصائيين زى ما الكتاب بيقول والحلقات هتبقى مركز خصوصا على الخريجين الجدد أو الطلبة اللى لسة بيدرسوا فى الكلية و حابين يستفيدوا.
أولا هنبدأ الحاجات العامة اللى تهم كل الناس اللى شغالين فى كل المجالات فى المصانع المختلفة ثم هنبدأ نتدرج شوية شوية لحد ما نوصل للكورسات لبعض  التخصصية اللى تهم كتير مننا بردو و هحاول على قد ما اقدر اشرح فى كل حلقة بمثال عملى موجود و الناس شغالين به علشان نقرب الكلام النظرى أكتر.

بسم الله الرحمن الرحيم

الحلقة الرابعة

الحلقة دى هنتكلم فيها عن أول كورس من الكورسات الى اتفقنا اننا هنشرحها و دة مش بيفيد مجال المية بس لالالالا دة بيفيد كل المجالات و أى صناعة لازم يبقى فيها الكورسين دول مطبقين و اللى بيهتم بتطبيقهم كل الناس على العموم و الجودة على الخصوص و هما كالآتى:- 

 1- Good Manufacturing Practice GMP

2- Good Laboratory Practice GLP

أولا ال GMP:-

 و دة يا شباب عبارة عن مجموعة من الممارسات اللى لازم تكون موجودة و مطبقة فى العملية التصنيعية Manufacturing Process علشان تخليها منضبطة و سليمة و المنتج اللى خارج منها على أعلى درجات الجودة و مش بيعرض العاملين عليه أو المستهلكين ليه لأى خطر من أى نوع و كل فرد فيها يبقى عارف دوره كويس و يشتغله على أكمل وجه .. و حالا ان شاء الله هنتكلم عن القدر الأدنى من الممارسات دى الى لازم تبقى متوفرة و ممكن أى صناعة تضيف ليها اى حاجة تانية حسب احتياجها.

1. Hygiene  أو النظافة العامة للمكان :- 
و دى أى صناعة محتاجاها على العموم علشان تبقي بيئة العمل فى خطوط الإنتاج أو المخازن أو أى مكان فى المصنع نظيفة و مفيهاش كراكيب ولا قاذورات و بتوصل حتى للنظافة الشخصية للعاملين و الزى الرسمى للشغل و الأظافر ... الخ و دة علشان متبقاش قاعد مكبر دماغك فى الشغل و سايب خط الانتاج يضرب يقلب و هوب تلاقي مديرك داخل عليك و يتخانق معاك و يقولك انت متعرفش حاجة عن ال Hygiene كمتطلب من متطلبات ال GMP و خصوصا لو كانت الصناعة اللى انت فيها صناعة أغذية أو أدوية أو أى صناعة تتعلق بيهم ... جيب عمالك و شغلهم بس من غير تنطيط على خلق الله علشان الكل يحبك و خلوا بالكم .

2. Controlled Environment أو التحكم فى البيئة :- 
علشان متلاقيش بردو و انت شغال فى وردية بلليل و ماشي فى خط الانتاج بتتابع الشغل و تلاقى عش عصافير فوق المواسير ولا قطة معدية من جمبك ولا فار بيجرى من تحت رجلك - القوارض والحشرات - عموما أو الماكينات مش نظيفة و متعملهاش تعقيم و الشغل داير ولا حد حاسس بحاجة و اقلب يا جدع أو الجو ذات نفسه مترب و الهناجر بتاع المصنع مفتوحة من كل ناحية و بالتالى منتجك متعرض للتلوث أو المدخنين جمب الخطوط و هى شغالة و أى حاجة تشوف انها تأثر على جودة المنتج نتيجة بيئة عمل غير مهيئة للشغل كل دة داخل فى التحكم فى بيئة الانتاج علشان المنتج يبقى فى النهاية صالح للإستخدام الآدمى.

3. Process Is Controlled and Well Defined أو التحكم فى العملية التصنيعية و تعريفها و تصنيفها جيدا ً :- 
و دة بيتم عن طريق حاجة اتكلمنا عنها قبل كدة و هى ال Standard Operation Procedures SOP اللى فيها بتعَرّف بالتفصيل الممل كافة مراحل العملية التصنيعية بتاعتى داخلة منين و خارجة منين و بتبدأ منين و بتنتهى فين و اية اللى بضيفه علشان يطلع لى اية باختصار اتعامل مع العملية التصنيعية كأنها مراتك أو زوجك   و بكدة أضمن انها متخرجش عن الاطار اللى أنا حاطه ليها علشان لو حصل أى لخبطة أعرف حصلت لية و ازاى و أعالجها ازاى كمان بحيث المنتج يخرج مطابق للمواصفات كل دة لازم ببيقي موجود عندى بالتفصيل و كذلك الحال بردو مع الاختبارات اللى بعملها على المنتج أثناء انتاجه علشان أتابعه .. لازم أكون عارف طريقتها كويس و عندى وثائق رسمية بيها ميبقاش الشغل ماشي بالحب غلط جداااااااااا.

4.  Daily & Historical Recordsالتقارير اليومية أو الارشيف :- و دى كارثة لوحدها لأن المفروض ان كل واحد فى موقعه سواء عامل أو فنى أو كيميائي أو حتى مدير معاه أو بيجيله تقرير أو مجموعة تقارير عن سير العملية دى المشكلة بقى فى تسجيل التقارير دى هل هى فعلا تم أخذها كقراءات حية Live Records من ال Field يعنى من على خط الانتاج مباشرة أو من المنتج اللى خارج منه اثناء المتابعة ولا مضروبة زى ما كنا بنضرب الميل فى الرسم البيانى بتاع سكشن العملى بالخبرة و اعتمادا على ان الشغل ماشي و الدنيا فى اللذيذ و محدش فاهم حاجة  ... لأنها لو كانت مضروبة و حصل أى انحراف فى المنتج عن اللى مكتوب فى ال SOP هتبقى كارثة على الكل لأن اللى حصلت الكارثة فى ورديته هيتحاكم محاكمة عادلة و يُعدَم لأن المنتج هيترمى و الخسائر قد كذا و استدعاء للمنتج من السوق تانى و سمعة الشركة تبوظ و مش عارف اية أو خلينا نقول محصلش كارثة بس أنا بضرب النتايج و خلاص من غير ما اتابع و عمال يحصل عندى هبوط تدريجي فى كفاءة المنتج أو الماكينات و انا مش عارف سببه رغم ان كل النتايج مظبوطه و داخل المواصفات زى ما هو مكتوب فى الورق و ارجع للأرشيف أدور و ملاقيش أى انحرافات Deviations ساعتها على طول تعرف ان المشكلة مش فى التقارير المشكلة فى اللى بيضرب التقارير فى آخر نص ساعة من ورديته و سايب المنتج لما باظ فى الخطوط و الماكينات من غير متابعة لحد ما كفائتها قلت و قيس على ذلك أى مشكلة داخل فيها الإهمال.

5. Man Power :- 
الناس اللى بيشغلوا خطوط الاتناج على كافة المستويات من أول العمال اللى بينظفوها مرورا بالفنى اللى بيشغلها أو اللى بيصلحها لحد حضرتك اللى بتابع المنتج عليها و حتى رئيسك و رئيس رئيسك لغاية مدير المصنع لازم يكونوا مدربين تدريب تام و عندهم وعى كامل بالمتطلبات دى كلها و بيعرفوا يطبقوها كويس علشان كفائتهم هى جزء لا يتجزأ من كفاءة المنتج اللى خارج لأن الماكينات ما هى الا آلات بتطحن فى بعضها لكن الاعتماد كله على العنصر البشرى فى المتابعة و التقييم .

ثانيا ال GLP :-

 نفس االكلام هى مجموعة من الممارسات اللى أنا مطالب أنى أنفذها و اطبقها و انا شغال فى معملى علشان تضمن لى كفاءة و جودة و موثوقية فى آداء و متابعة شغلى سواء فى التعامل مع المنتج اللى انا بنتجه لو كان التعرض ليه بيسبب خطر أو الكيماويات نفسها اللى انا بستخدمها بتعرضنى لخطر و ازاى احمى نفسي من الخطر دة عن طريق ارتداء مهمات الواقية الشخصية ال PPE و هى :-

 Personal Proteective Equipments:- 
زى الـ(Eye Goggles , Hair net , Gloves , Face Mask , Lab coat , Safety Shoes) و ال GLP كمان بتساعدنى فى إنى أحصل على نتايج تعكس الواقع على أرض الانتاج من خلال متابعة النتائج اللى بحصل عليها و تسجيلها زى ما قلنا بطريقة صحيحة Live Recording .

و مبادئ ال GLP كالآتى :-

1. Personal Commitment أو الالتزام الشخصي:- 
حاجة كدة بينك و بين نفسك انك تشوف شغلك بما يرضى الله يعنى ان كل واحد يكون عارف مسئولياته كويس و يقوم بيها على أكمل وجه من أول أصحاب رأس المال و الادارة و انتهاءا بينا و فنيين المعامل سواء كان فيه فنيين معامل فى الشركات المحترمة أو اذا كنا احنا اللى بنشيل الليلة كالعادة.

2. Quality Control and Assurance التحكم فى الجودة و توكيد الجودة :- 
و دى مهمة لأن فى فرق بين الاتنين ، التحكم فى الجودة QC هو مراقبة المنتج من خلال مطابقته للمواصفات اللى انا حاططها ليه أو المواصفات المحلية و الدولية للمنتج دة من خلال بعض الاحتبارات اللى بعملها عليه و بسجل نتائجها و اذا كان فى انحراف عن المواصفات بصلحه ، أما توكيد الجودة QA فهو العمل على تحسين جودة المنتج بأخد النتائج بتاع التحكم فى الجودة و دراستها كويس و علشان أعرف قد اية العملية الانتاجية بتاعتى ماشية Smooth من غير مشاكل داخل المصنع و قادر اتحكم فيها كويس و أعملها تأكيد كمان Verification يعنى اتأكد من نتايجي من جهاز معين بإنى أجيب عينة معلومة و أقيسها على الجهاز و أشوف هيقرأها مظبوط و لا لأ و أضع ضوابط لضمان الاستمرار على كدة و كمان من خلال حاجة مهمة و هى شكاوى العملاء اللى بتجيلي بدراستها علشان أعرف القصور جاى منين و بالتالى أحسن أكتر فى المراقبة أو فى الانتاج.

3. Facilities and Equipments التجهيزات و الادوات :- 
و دة بتشمل كل حاجة عندى فى المعمل من مواد كيميائية زى ال Reagents أو أجهزة أو أدوات شغل ( كلنا عارفين أدوات المعامل ) أو أدوات الحماية الشخصية ليا أثناء شغلى و تعاملى مع الكيماويات.

4.  Test System and Reference طريقة الاختبارات و المرجع بتاعها :- 
و دى مهمة جدا بردو زى ما قلنا مينفعش أشتغل الاختبارات اللى بعملها كدة من غير ما اكون عارف الطريقة بالظبط علشان اضمن ان النتائج هتكون صحيحة و موثوق فيها علشان كدة لازم اشتغلها من Reference  او مرجع ليها خاص بالشركة متسجل فيه طرق عمل الاحتبارات سواء كيميائية أو ميكروبيولوجية علشان أنا و غيري يبقى عندنا طريقة واحدة معتمدة فى الشغل و بالتالى نتائجنا تبقى على Track واحد و بالتالى يسهل عليا انى ألاقى أى انحراف فى المنتج بتاعى بسهولة.

5.  Documentation Managementإدارة الوثائق :- 
و دى لزمتها انها بيكون فيها كل المراجع أو ال SOP بتاع شغلى و بتتابع أى تطوير حصل فيها و بتعمل اصدارات للتطوير دة كل فترة علشان الناس يبقى عندهم توعية بإستمرار بأى تطوير بيحصل و بالتالى رفع كفاءة ال Man Power و ال Production على حد سواء.

آية الحلقة :- يقول الله تعالى { وَنَضَعُ الْمَوَازِينَ الْقِسْطَ لِيَوْمِ الْقِيَامَةِ فَلَا تُظْلَمُ نَفْسٌ شَيْئًا ۖ وَإِنْ كَانَ مِثْقَالَ حَبَّةٍ مِنْ خَرْدَلٍ أَتَيْنَا بِهَا ۗ وَكَفَىٰ بِنَا حَاسِبِينَ(47)} سورة الأنبياء

باقى حلقات مصنع مصر

الحلقة الأولى من سلسله حلقات مصنع مصر

رابط الحلقة

الحلقة الثانية من سلسله حلقات مصنع مصر

رابط الحلقة

الحلقة الثالثة من سلسله حلقات مصنع مصر

رابط الحلقة

الحلقة الرابعة من سلسله حلقات مصنع مصر

رابط الحلقة

الحلقة الخامسة من سلسله حلقات مصنع مصر

رابط الحلقة

الحلقة السادسة من سلسله حلقات مصنع مصر

رابط الحلقة

الحلقة السابعة من سلسله حلقات مصنع مصر

رابط الحلقة

الحلقة الثامنة من سلسله حلقات مصنع مصر

رابط الحلقة

الحلقة التاسعة من سلسله حلقات مصنع مصر

رابط الحلقة

الحلقة العاشرة من سلسله حلقات مصنع مصر

رابط الحلقة

الحلقة الحادية عشر من سلسله حلقات مصنع مصر

رابط الحلقة

الحلقة الثانية عشر من سلسله حلقات مصنع مصر

رابط الحلقة