سلسله حلقات مصنع مصر (الحلقه الحاديه عشر)

بِسْــــــــــــــــمِ اﷲِالرَّحْمَنِ الرَّحِيم

 
دى سلسلة حلقات سميتها " مصنع مصر " بشرح لكم فيها معظم ما يتعلق بالعمل فى المصانع من أول ما ندخل من باب المصنع لحد ما نبقي كيميائيين - أخصائيين زى ما الكتاب بيقول والحلقات هتبقى مركز خصوصا على الخريجين الجدد أو الطلبة اللى لسة بيدرسوا فى الكلية و حابين يستفيدوا.

أولا هنبدأ الحاجات العامة اللى تهم كل الناس اللى شغالين فى كل المجالات فى المصانع المختلفة ثم هنبدأ نتدرج شوية شوية لحد ما نوصل للكورسات لبعض  التخصصية اللى تهم كتير مننا بردو و هحاول على قد ما اقدر اشرح فى كل حلقة بمثال عملى موجود و الناس شغالين به علشان نقرب الكلام النظرى أكتر.

بسم الله الرحمن الرحيم

الحلقة الحادية عشرة

حلقة النهاردة يا شباب عن ال FSSC 22000 Food Safety System Certification 22000 .

سنة 2001 منظمة الأيزو حبت تعمل Standard أو نظام كدة لصناعة الأغذية عموما قائم على مبادئ ال HACCP اللى كنا اتكلمنا عنها فى حلقة قبل كدة فعملوا نظام اسمه ISO 22000 لسنة 2005 حطوا فيه متطلبات نظام سلامة الغذاء اللازم توافرها فى صناعة العذاء عموما لكن ال ISO 22000 متقبلش من منظمة تانية اسمها Global Food Safety Initiative (GFSI) دوروا عنها على النت و سبب الرفض كان علشان الأيزو 22000 مكانش فيه Pre-requisite Programs البرامج الإشتراطية و دى هى البرامج العالمية المتعارف عليها يعنى الموضوعة للتحكم فى العملية التصنيعية فى وسط بيئي آمن ... و ساعات بيستعيضوا عنها بال SOP بتاعة الشركة نفسها المطبقة بالفعل أو بيضيفوا عليها حسب كل صناعة و البرامج اللى محتاجاها.

سنة 2008 جت مجموعة من الشركات العالمية الكبيرة وضعوا ملحق سموه(PAS 220 Publicly Available Specification) عملوا فيه البرامج الإشتراطية دى اللازمة للأيزو 22000 فقامت منظمة ال GFSI اللى انتوا دورتوا عليها على النت وافقت على الأيزو 22000 مع الملحق بتاعه دة.

و بعدين جت مؤسسة ال Food Safety Certification جمعت النظام بالملحق بتاعه فى Standard  واحد و سموه FSSC 22000 و وافقت عليه منظمة ال GFSI أخيرا و لله الحمد سنة 2010 و بكدة بقى عندنا نظام بيجمع متطلبات سلامة الغذاء اللى موجودة فى ال HACCP & GMP فى نظام ادارة سلامة غذاء واحد بيغطى جميع العمليات اللى بتلامس المنتج سواء بطريقة مباشرة أو غير مباشرة.

طيب لية نظام الFSSC 22000  نظام مهم جدا فى مجال سلاة الغذاء ؟؟

لأنه أشمل نظام إدارة سلامة غذاء Food Safety Management System (FSMS) اتعمل لحد دلوقتى و جمع كل مميزات الأنظمة السابقة ليه كلها فى نظام قياسي واحد قابل للتطبيق و المراجعة عليه سواء داخليا من داخل الشركة بأن الشركة تراجع على نفسها يعنى تعمل Auditing لنفسها أو عن طريق مراجعين خارجيين من الشركات المعتمدة من منظمة الأيزو و اللى ليها صلاحية منح الشهادة دى للشركات اللى طبقت النظام و تتابع تطبيقه باستمرار.

من ضمن مميزات ال FSSC 22000 كمان :-

1- انه عمل تكامل بين نظام ادارة سلامة الغذاء اللى اتعمل علشانه مع نظم الادارة الأخرى زى نظام ادارة البيئة EMS و نظام ادارة الجودة QMS و نظام ادارة السلامة و الصحة المهنية OHSAS  و كل دول اتكلمنا عنهم قبل كدة فى حلقات فاتت.

2- انه كمان عمل دمج كامل لل ISO 22000 و لل PAS 220 و لل HACCP مع الخطوات التشغيلية للصناعة بتاعتى أيا كان هي اية.

3- معتمد من منظمة GFSI اللى قلنا عليها فوق.

4- بيعمل تحكم و بيقلل من الأخطار اللى ممكن تأثر لى على سلامة المنتج الغذائي بتاعى و بيحسن من عمليات التصنيع و الجوانب و المفاهيم المرتبطة بيها.

5- بيساعد المؤسسات على اتباع الأساليب القانونية فى عملها سواء القوانين المحلية أو الدولية.

6- بيزود الشفافية على طول العملية التصنيعية سواء على مستوى الخطوات أو الأفراد المشغلين أو الإدارة أو حتى بين المؤسسة أو الشركة و بين محيطها اللى هى فيه.

7- بيساعد المؤسسات و الشركات الصغيرة أو الغير متطورة فى بنيتها الأساسية و التصنيعية انها يبقى عندها نظام ادارة متكامل تشتغل بيه.

و دلوقتى بقى هنتكلم عن محتويات ال FSSC 22000 ، النظام دة ليه 8 عناصر رئيسية كالآتى :-

1-  SCOPE او مجال النظام :-

و فيه ان النظام دة معمول علشان يعمل تحكم فى العمليات التصنيعية للمنتجات الغذائية بشكل عام بحيث يتأكد ان كل عملية منهم بتعمل صح على أكمل وجه بما يناسب متطلبات العملاء اللى بيستهلكوا النتجات دى تجنبا لأى خطا يؤدى الى أى كارثة.

2- Normative Reference :-

الجزء دة بيوضحوا فيه المصادر اللى فيها المصطلحات المرتبطة بنظم الأيزو زى نظام إدارة الجودة و نظام إدارة السلامة و الصحة المهنية و نظام إدارة البيئة و الGMP  و ال HACCP و اللى تم دمجها كلها فى نظام ال FSSC 22000 .

3- Terms and Definitions :-

و دة عملوا فيه تعريفات للمصطلحات موجودة فى النظام دة و الأنظمة السابقة ليه علشان يعملوا توحيد لفهم المصطلحات دى عند الناس كلها بحيث ميحصلش خلط عن المشغلين للنظام و كل واحد يفهم النظام و يفصله على مزاجه.

4- Food Safety Management System :-

 الهدف من الجزء دة هو تأسيس و توثيق و تفعيل و الحفاظ على نظام ادارة سلامة الغذاء ... الأربع حاجات دول مهمين جدا يا شباب لأنهم بيتضمنوا الخطوات و النتائج الموثقة ليها بعد تفعيل الخطوات و اللى هتاخد بإيدي فى النهاية لعمل التطويرات اللازمة للنظام بتاعى و عملياتى التصنيعية اللى أنا شغال بيها و بالتالى أفضل فى حركة مستمرة و مراقبة مستمرة لنفسي بنفسي و يفضل منتجى فى تحسن مستمر.

5- Management Responsibility :-

آآآآآآآه رجعنا تااااانى بقى لو فاكرين لما قلنا ان كل نظام بيطلع من الأيزو لالالالالازم يكون من ضمن أجزاؤه حاجة اسمها التزام و مسئولية الإدارة العليا لتنفيذ النظام  لأن بدون التزام و ارادة من الإدارة العليا للتطبيق مفيش حاجة هتتطبق فلازم يكون فى مدير مخصوص لإدارة سلامة الغذاء فى المؤسسة أو الشركة و يكون متحدد لها سياسات و أهداف و مسئوليات و محطوط لها خطط طواريء و كل دة بالتوازى مع وجود أساليب تواصل فعالة مع حاجتين :- الموردين بتوع الخامات ، و العملاء اللى هيستهلكوا المنتج .. و بعدين بعد ما اعمل كل دة أبدأ أعمل خطة مراجعة للكلام دة كله لضمان الإستمرارية فيه و اتخاذ الإجراءات اللازمة لتصحيح الخطوات أو الأشياء الغير مطابقة علشان يبقى فى تحسين مستمر للمؤسسة.

6- Resource Management :-

و دى ليها علاقة بالإدارة العليا بردو و بتتطلب منهم توفير مصادر و ميزانيات و عاملين لتشغيل النظام دة بفاعلية و مش بس كدة لأ كمان لازم يتعمل لهم تدريبات دورية على شغلهم و على النظام دة و يبقى عندهم وعى بيه و بأهمية الإلتزام بتنفيذه ثم تقيميمهم بناءاً على درجة التزامهم بس لازم أكون موفر لهم بيئة عمل مناسبة فيها احتياطات السلامة ليهم علشان أعرف أحاسب المخطيء بعد كدة.

7- Planning and Realisation of Safe Products :-

 و هنا الجزء دة بيهتم بتطبيق مباديء ال GMP و ال HACCP اللى اتكلمنا عنهم فى حلقات فاتت بالإضافة بقى للبرامج أو الخطوات الإشتراطية اللى هى ال SOP بتاع الصناعة بتاعتى اللى اتكلمنا عنها فى أول حلقة لو فاكرين و اللى قلنا عليها فوق حسب الصناعة بتاعتى اللى هى لازم تبقى موجودة و مطبقة زى مثلا :-

برامج التدريب .. برامج أو خطوات التعقيم للمعدات فى المصنع .. برامج الصيانة و العمرات .. برامج التتبع للنتائج بتاعتى لضمان أعلى مستوى من التأكيد عليها .. برامج مراجعة الموردين و خاماتهم سواء عندى لما الخامات تيجي أو أعملهم زيارات أشوف بيصنعوا الخامات اللى بيوردوها لى ازاى .. كمان برامج التحكم فى المنتج الغير مطابق للمواصفات بعمل فيه اية حسب كل صناعة ... و أخيرا برامج استدعاء المنتج من السوق فى حالة لو فلت منى من المصنع و هو غير مطابق للمواصفات.

8-Validation, Verification and Improvement of the Food Safety Management System :-

اللى هو ازاى أخلى نظام ال FSSC 22000 صالح دائما للتطبيق فى شركتى و ازاى أتأكد من كدة و ازاى أحسنه بإستمرار و دة بيحصل عن طريق انى اتأكد ان كل الخطوات و الوسائل اللى بنفذ بيها النظام سليمة و صحيحة علميا و كمان لازم أعمل تخطيط و توثيق مستمر و منتظم لنتائج التدقيق اللى بعمله على الخطوات اللى بنفذها فى صناعتى يعنى مثلا أنا جيت عملت معيرة لجهاز معين بمحاليل المعايرة بتاعته و طلع لى نتائج المعايرة مظبوطة الصح انى مينفعش أكتفى بكدة لأ بجيب كمان عينة من محلول قياسي Standard Solution بكون عارف قيمته و بروح مخلى الجهاز يقيسه لى تانى دة اسمه تدقيق لنتيجة المعايرة أو Verification و بعمل كدة علشان أبقى متأكد ان الجهاز دة أو أى خطوة تانية من خطوات الصناعة ماشية تمام و حسب المواصفات.

الكلام كبير قوى أنا عارف و مكلكع بس دة لأنه دمج كل اللى فات كله من أنظمة الجودة فى نظام واحد فلازم اللى يدوس فيه يبقى عنده خلفية الأول عن باقى شهادات الأيزو اللى طلعت قبله و اللى شرحناها قبل كدة لأنى لما اترشحت له كمتدرب مفهمتش حاجة بردو إلا لما جبت كل الكلام اللى قبله.

آية الحلقة :-  يقول الله تعالى :- { وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ ۖ وَإِن يُرِدْكَ بِخَيْرٍ فَلَا رَادَّ لِفَضْلِهِ ۚ يُصِيبُ بِهِ مَن يَشَاءُ مِنْ عِبَادِهِ ۚ وَهُوَ الْغَفُورُ الرَّحِيمُ (107)} يونس

باقى حلقات مصنع مصر

الحلقة الأولى من سلسله حلقات مصنع مصر

رابط الحلقة

الحلقة الثانية من سلسله حلقات مصنع مصر

رابط الحلقة

الحلقة الثالثة من سلسله حلقات مصنع مصر

رابط الحلقة

الحلقة الرابعة من سلسله حلقات مصنع مصر

رابط الحلقة

الحلقة الخامسة من سلسله حلقات مصنع مصر

رابط الحلقة

الحلقة السادسة من سلسله حلقات مصنع مصر

رابط الحلقة

الحلقة السابعة من سلسله حلقات مصنع مصر

رابط الحلقة

الحلقة الثامنة من سلسله حلقات مصنع مصر

رابط الحلقة

الحلقة التاسعة من سلسله حلقات مصنع مصر

رابط الحلقة

الحلقة العاشرة من سلسله حلقات مصنع مصر

رابط الحلقة

الحلقة الحادية عشر من سلسله حلقات مصنع مصر

رابط الحلقة

الحلقة الثانية عشر من سلسله حلقات مصنع مصر

رابط الحلقة