سلسله حلقات مصنع مصر (الحلقه الخامسه)

بِسْــــــــــــــــمِ اﷲِالرَّحْمَنِ الرَّحِيم

 

دى سلسلة حلقات سميتها " مصنع مصر " بشرح لكم فيها معظم ما يتعلق بالعمل فى المصانع من أول ما ندخل من باب المصنع لحد ما نبقي كيميائيين - أخصائيين زى ما الكتاب بيقول والحلقات هتبقى مركز خصوصا على الخريجين الجدد أو الطلبة اللى لسة بيدرسوا فى الكلية و حابين يستفيدوا.
أولا هنبدأ الحاجات العامة اللى تهم كل الناس اللى شغالين فى كل المجالات فى المصانع المختلفة ثم هنبدأ نتدرج شوية شوية لحد ما نوصل للكورسات لبعض  التخصصية اللى تهم كتير مننا بردو و هحاول على قد ما اقدر اشرح فى كل حلقة بمثال عملى موجود و الناس شغالين به علشان نقرب الكلام النظرى أكتر.

بسم الله الرحمن الرحيم

الحلقة الخامسة

الحلقة دى هتبقى حلقة خفيفة كدة و لذيذة عن كورس مهم من الكورسات اللى هنشرحها سوا و الكورس بتاع النهاردة اسمه Lean Manufacturing and 5S Implementation و معناها الاصطلاحى مش الحرفى هو تقليل اى شيء يمكن اعتباره خسائر أثناء الصناعة و كيفية تطبيق ذلك من خلال ما يسمى بال 5S ... و قبل ما نعرف يعنى اية 5S  مهم الاول اننا نعرف اية هي الخسائر أو ال Waste اللى ممكن تقابلنا اثناء الصناعة علشان نتغلب عليها بال 5S :-

1. Transportation :- 

يعنى أو وقت أو جهد ممكن يضيع أثناء نقل الموظفين أو المنتج من مكان الى آخر داخل المصنع من الخطوط الى المخازن أو خارج المصنع الى السوق.

2. Inventory :- 

يعنى أى وقت أو جهد بيضيع فى تخزين المنتج أو قطع غيار اى ماكينة عندى لأنى خزنتها و كومتها غلط  فوق بعض فتاهت فى بعض زى دولاب هدومك كدة أو لأنى معنديش بيها قائمة واضحة.

3. Motions :- 

يعنى أى وقت بيضيع فى إلتفافات أو انحناءات أو مشي أو توقفات ملهاش داعى لأن المصنع مش مترتب و مفيهوش أماكن مخصصة للمارة و أماكن مخصصة لمرور السيارات أو ما الى ذلك.

4. Waiting :- 

انتظار أى حاجة ممكن تعطلنى عن الانتاج زى تعليمات متأخرة ولا ادوات متأخرة ولا خامات متأخرة أو موظفين متأخرين و هكذا.

5. Over Production:- 

و دة لما انتج كميات زيادة عن حاجة السوق اللى عندى بحيث تفضل من غير تسويق عندى فى المخازن و تتعرض لتلف.

6. Over processing:- 

يعنى أى خطوة أو إضافة للعملية التصنيعية أنا مش محتاجها ولن تسبب أى تحسين ملحوظ فى المنتج و هتعقد العملية التصيعية زيادة.

7. Defects:- 

زى ما قلنا أى أخطاء حصلت فى العملية الانتاجية هتخلينى أرمى المنتج أو أستدعيه من السوق أو أدخله من أول و جديد فى الخط تانى علشان أصلحه بيسموها Rework أو عندى تقارير مكتوبة غلط و هكذا أو ماكينة اتصلحت غلط أو أى اهمال نتج عنه أى خطأ.

8. Skills :- 

و دى مهمة و أغلب ألاخطاء اللى فوق بتبقى منها ألا و هى إسناد المهام لأشخاص غير مدربين عليها أو غير مؤهلين لأدائها فيضيعوا الوقت من غير ما ينجزوا المهمة أو يعملوها اى كلام بدون أى اجادة فنضطر نشتغلها تانى فالوقت يضيع.

و دلوقتى هنتكلم عن ازاى ممكن نتغلب علي الحاجات اللى فوق دى عن طريق ال5S 

يعنى اية 5S :- دى عبارة عن خمس كلمات بيبدأوا بحرف ال S بيلخصوا كيفية التخلص من اى Waste عندى فى العملية التصنيعية و ممكن نتطبقها حتى كمان فى حياتنا اليومية :-

1. SORT:- 
يعنى شيل أى حاجة ملهاش علاقة بالمكان اللى انت شغال فيه و مسببة زحمة و واخدة حيز على الفاضى بس مترميهاش فى حتة تانية أو على قسم تانى أو خط انتاج تانى بحيث تسبب نفس الزحمة و تاخد ننفس الحيز ، لأ انت بتوديها أو تجيب حد يوديها للمكان المخصص لل Waste و بتعلق عليها حاجة اسمها Red Tag يعنى كارت أحمر كدة مكتوب فيه اية البتاعة اللى انت تخلصت منها دى و بتستخدم فى اية و تاريخ التخلص منها و هل ممكن استخدمها تانى فيما بعد ولا لأ و هكذا .. استخدموا مخيلتكم يعنى.

2. SET IN ORDER:- 
يعنى أشوف الحاجات اللى فضلت بعد ما شلت اللى ملوش لزمة و أبدأ ارتبها كل حاجة مع اللى شبهها لو أنا مثلا فى معمل يبقى ارتب الماصات لوحدها و الفلاسكات لوحدها و البيكرات لوحدها و الكيماويات الحامضية لوحدها و القاعدية لوحدها و السحاحات لوحدها و أنابيب الإختبار لوحدها و الأجهزة لوحدها و أبدا احدد مكان لكل حاجة منهم على حدة و ألزق عليه Label أو ملصق يقول ان دول كذا و دول كذا و دول كذا علشان الوصول ليهم بعد كدة يكون سهل و أى حد يقدر يميزهم بسهولة.

3. SHINE:- 
يعنى أبتدى بقى بعد ما شلت اللى ملوش لزمة و رتبت اللى ليه لزمة أبتدى انظف المكان من حواليهم " علشان النفس طبعا " زى ما الكلمة بتقول كدة ألمع المكان و ألمع الحاجات اللى أنا رتبتها دى و أوفر للعمال اللى معايا الأدوات اللى هينظفوا بيها لأن الشغل فى مكان نظيف و مترتب بيخليك مقبل على الشغل و على الحياة عموما و بيقلل الخناقات مع زمايلك.

4. STANDARDIZE:- 
يعنى أخلى كل الثلاث خطوات اللى فوق دول عادة يومية عندى بحيث أعملهم بإستمرار و اخليهم من ضمن واجبات العمل كل يوم و اعمل بكل اللى فوق دة Check List  يعنى قائمة مراجعة و اللى يتعمل منها أحط قدامه صح بحيث اتابع تنفيذهم دايما بوثيقة رسمية مش بالنظر كدة و خلاص و هكذا و اعمل بيها كمان خطوات لكيفية تنفيذها على الوجة الصحيح.

5. SUSTAIN :-  
يعنى أفضل أفكر و أشوف أية اللى ممكن اطور بيه العمل حواليا فى ضوء الاربع خطوات دول يعنى مثلا بدل ما ارتب الحاجات و انظفها على البنش من فوق لأ أنا ارتبهم تحت فى ال Cabinet او الدولاب اللى بيبقى تحت البنش أو أحط علامات ارشادية للناس فى المصنع كنوع من التوعية بفوائد ال 5S   و أهميتها و أدرب الناس عليها كل فترة علشان مينسوهاش لغاية ما تبقى أسلوب حياة مش مجرد روتين شغل و صدقونى اللى بيعمل الحاجات دى بيرتاح فى حياته كتير و الله ... و دى صورة توضيحية لل 5S  :-

 

آية الحلقة :-  يقول الله تعالى { بَلْ هُوَ آيَاتٌ بَيِّنَاتٌ فِي صُدُورِ الَّذِينَ أُوتُوا الْعِلْمَ وَمَا يَجْحَدُ بِآيَاتِنَا إِلا الظَّالِمُونَ (49)} سورة العنكبوت

باقى حلقات مصنع مصر

الحلقة الأولى من سلسله حلقات مصنع مصر

رابط الحلقة

الحلقة الثانية من سلسله حلقات مصنع مصر

رابط الحلقة

الحلقة الثالثة من سلسله حلقات مصنع مصر

رابط الحلقة

الحلقة الرابعة من سلسله حلقات مصنع مصر

رابط الحلقة

الحلقة الخامسة من سلسله حلقات مصنع مصر

رابط الحلقة

الحلقة السادسة من سلسله حلقات مصنع مصر

رابط الحلقة

الحلقة السابعة من سلسله حلقات مصنع مصر

رابط الحلقة

الحلقة الثامنة من سلسله حلقات مصنع مصر

رابط الحلقة

الحلقة التاسعة من سلسله حلقات مصنع مصر

رابط الحلقة

الحلقة العاشرة من سلسله حلقات مصنع مصر

رابط الحلقة

الحلقة الحادية عشر من سلسله حلقات مصنع مصر

رابط الحلقة

الحلقة الثانية عشر من سلسله حلقات مصنع مصر

رابط الحلقة