الأنشطه الطلابية (Student-Activities)

بِسْــــــــــــــــمِ اﷲِالرَّحْمَنِ الرَّحِيم

 

الناس التايهه واللى مش عارفه هيا رايحه فين وجايه منين الموضوع ده ممكن يسهلك الأمر شويه وحاول تنجز قبل الدراسه متدخل عليك (الشريحه المستهدفة للموضوع ده : هما الناس الجديده فى العمل التطوعى) "رجاءا : الناس القديمه اللى عنده إضافه ميبخلش علينا".

لو تلاحظ إن أى حد فاهم ﻻزم ينصحك بإنك ﻻزم تدخل أى نشاط طلابى فى جامعتك وأنا رأى الشخصى إن أى حد اتخرج ولم يلتحق بأى نشاط طلابى (فهو فاته كتير بس مش كتير قوى يعنى).

المهم :

1) للناس اللى مش عارفه يعنى إى نشاط طلابى (Student Activities)؟

- مجموعة شباب داخل جامعة ما عندهم نفس الهدف والرؤية والرسالة وبيسعوا مع بعض لتحقيق نفس الرؤية.

- أغلب الأنشطه الطلابيه متقسمه إلى (لجنة العلاقات العامة ، لجنة الموارد البشرية ، التسويق والسوشيال ميديا ، اللوجيستك والديكوريشن .... الخ ).

2) هستفيد أنا إى لما أتطوع فى أى نشاط طلابى ؟؟

أوﻻ : بلاش أى نشاط والسلام اسأل كويس قبل ماتقدم هل النشاط ده هيفيدنى فعلا وهو نشاط محترم وينفع يمثلنى وأمثله ؟

ثانيا : بلاش تطوع فى عشرين مكان ، هو مكان واحد او اتنين بالكتير ولو حابب تغير بعد كدا اشطه عشان تشوف ثقافات مختلفه داخل الأنشطه.

ثالثا : ودى الأهم هتستفيد إى ؟

1- طبعا إنت لما تطوع فبتدخل ف أى لجنه من دول فبتكتسب فيها خبره كويسه جدا ..مثلا اتطوعت فى لجنه العلاقات العامه (PR) بتلاقى نفسك بعد كم شهر اكتسبت فيها خبره كويسه جدا مع تظبيط اللغه تقدر تشتغل PR بفلوس فى شركات .. وكذلك باقى اللجان .. يعنى كدا أول حاجه هتفيدنا من العمل التطوعى إنى ممكن أشتغل بفلوس فى شركات بنفس التخصص اللى كنت فيه فى النشاط (اشتغل PR,Designer, HR , Social media فى شركات ...الخ ) أو فرى ﻻنس من وانت فى بيتك وممكن ابقى مدرب ف المجاﻻت دى وأفيد بيها الطلاب فى الجامعة !

2- الناس اللى معاك بتلاقيهم فى نفس الدايره بتاعة سوق العمل فبتسأل براحتك بقى وبيوصلوك وبيفتحوا عينك على حاجات كويس جدا.

3- العمل او اﻻنشطه الطلابيه هيا جزء مصغر من الشركات يعنى وانت فى النشاط الطلابى هتحس انك فى شركه .. من تاسكات وميتنج وتنفيذ شغل وأهداف وهيكله فريق ...الخ .. ودا هيعودك قدام على الشغل اللى بفلوس(الشركات).

4- فى ال CV بتاعك التطوع له دور قوى وبيقوى سيفيهك جدا.

5- منه هتعرف تعمل Relationship محترمة فى مجالك وغير مجالك وسكه بتفتح لسكه وبعلاقاتك هتبقى برنس فى نفسك.

6- أنت ممكن تكتسب خبره قويه تؤهلك إنك تأسس نشاط بيخدم على نقطه معينه وبعد فتره دا يؤهلك إنك تأسس شركتك الخاصه بيك أو مشروعك الخاص.

7- منه هتشوف الدنيا بنظره مختلفه وتحس إن الجامعه مش مرحلة سكشن ومحاضره .. دى مرحله بناء واستكمال شخصيتك (مرحلة تعلم فعلا).

8- هيحللنا مشكله ال Presentation وال Communication للناس اللى بتتكسف تتكلم قدام حد (وفى اى قاعده .. منورين) .

9- القياده هتزيد عندك خاصه لما تمسك رئيس لجنه.

10- المسؤليه هتزيد عندك لما تلتزم بتاسكات ومواعيد.

11- السفر والمنح التطوع هيفرق معاك.

12- وانت بتعمل انترفيو التطوع هيفرق مع اﻻتش ار HR اللى بيعملك اﻻنترفيو.

13- ليه فوايد أكتر من كدا طبعا بس دا اللى ف دماغى.

3) طاب أنا هعرف الأنشطه الطلابية دى ازاى ؟

أنا عشان جامعة طنطا فمعرفش باقى الجامعات إي اﻻنشطه اللى فيها فأنت هتسئل كتير على كل الجروبات اللى عندك بتاعة الجامعه وتسئل صحابك إيه اﻻنشطه الكويسه فى جامعتنا اللى ينفع اتطوع فيها ؟ وقدم فى أغلب اﻻنشطه دى ولما يكلموك انك accepted معاهم اختار انت على مزاجك واحد بس أو اتنين كمل فيهم (يبقى أنت كدا عملت انترفيوز كتير واستفدت كتير من ده وكسرت خوف او حاجز اﻻنترفيو) يعنى ممكن تخلى أول 20 يوم ف الدراسه لف فى اﻻنشطه الطﻻبيه .

4) طاب اتطوع فى لجنه إى ؟

على حسب رغبتك .. اقرأ عن كل لجنه شويه وشوف نفسك فين لكن أنا انصح بلجنه العلاقات العامه PR ويليها ال HR ولو أنت حابب مجال الديزاين والسوشيال ميديا فدوس فيهم طبعا ﻻنك لو حاببهم واتطوعت فى كذا نشاط بيهم .. هتلاقى قدامك فرص شغل كتير والله وبفلوس.

#نصيحه

قدم فى النشاط اللى بيخدم على كريرك على سبيل المثال عندنا فى ABT لجنه ال PR لما يعمل Deal مع شركات ومدربين فهو كدا استفاد بشغل البى ار واستفاد انه كون علاقات فى مجاله !

هيأثر على دراستى ؟

1- ممكن لو انت مش ذكى بمعنى دى حاجه اضافيه لشخصيتك لكن مش هى شخصيتك يعنى اديها على قدر حجمعا  ومع ذلك بالعكس أغلب اللى فى التطوع تقديراتهم كويسه جدا ودى بترجع لطبيعتك ، انت لو عايز تذاكر هتذاكر.

2- زائد ان الناس اللى معاك كلهم طلاب فبتراعوا محاضرتكم.

3- مقابل اللى هتكتسبه وتغير وجهه نظرك عن حاجات تافهه كتير يبقى طظ فى الكم درجه الزياده دول .

متنساش .. لو اتخرجت من غير متطوع هتخسر كتير والله