دبلومة الفسيولوجى والكيمياء الحيوي علوم الاسماعيلية (جامعة قناة السويس)

بِسْــــــــــــــــمِ اﷲِالرَّحْمَنِ الرَّحِيم

هنتكلم فى هذا المقال من موقع « علومنجى دوت كوم »  عن كل شئ يخص دبلومة الفسيولوجى والكيمياء الحيوي جامعة قناة السويس (علوم الاسماعيلية) ، ايه هى الاوراق المطلوبه والمصاريف الاداريه والمقررات الدراسيه .

ميعاد التقديم

• التقديم اول شهر 8 حتى اخر شهر 9 
• التقديم كل يوم ماعدا السبت 
• اللى يروح الخميس يروح بدرى قبل الساعه 12.

التقديم لهذا العام اعتبارا من الثلاثاء الموافق 2020/8/4 وحتى الخميس الموافق 2020/10/1 ، ولازم تسجل الكترونى من خلال هذا الموقع .

دبلومة الفسيولوجى والكيمياء الحيوي علوم الاسماعيلية (جامعة قناة السويس)

تجربة شخصية

تجربة شخصية لعبد الرحمن ناجى:

لو نزلت ف الموقف ف الموقف ف ضهرك والجامعه قدامك فيه نفق قصاد الموقف متعديش الطريق بتدخل من البوابه الرئسيه هى بعيده شويه بس عادى

بتسأل ع مبنى الجوده ده فيه التنسيق وفيه كل حاجه تقريبا بتدخل تسحب استمارة وتسجل اسمك بتنده عليك استاذه هناك بتاخد منك اصول.

شهادة الميلاد

صوره شخصيه.

شهادة الجيش او مايعادلها من الافاده.

شهادة التخرج.

بيان الدرجات.

ده كله اسكنر بس.

فيه غرفة استراحه ف نفس المكان. بيجيى واحد ينادى بالارقام اللى ع الاستمارة اللىاخدتها قبل كده.

بتروح وتقدم بالبطاقه بس.

لو طبعطلك التسجيل الايكترونى تمام مطبعتوش تحاول تفتح من فونك او اى مكان وتطبعه ف اى مكتبه.....فيه مكتبه عند قسم كيميا اعارها هاديه بتدفع 30ج وتقله عايز ورق الدبلومه وتعمل ورقه تقديم كمان هناك وبيديك اقرارات لازم تمضيها كلها وخلى بالك منهم اتنين عربى وانجليزى لازم تكتب اسمك عربى وانجليزى.

وتدبس ثورك وانت واقف هناك.

باقى انك تروح مكتب الدراسات العليا خلى المكتبه ف ضهرك اول باب ع يمينك قدم ورقك كله. خد اذن دفع والحق الخزنه هتسلم الوصل والملف بعد مايتراجع.

هتاخد اول مواصله نازله بلدكم وتروح.

الاوراق المطلوبه

1. عدد 2 صوره البطاقه الشخصيه (الرقم القومى) .
2. شهاده الميلاد كمبيوتر " اصل – صورتين".
3. شهاده التقدير 4 سنوات (شهادة بيان الدرجات) "أصل – صورة" (يقال ان بيان الدرجات عادي صورة مش لازم الاصل).
4. عدد 6 صور شخصيه .
5. شهاده التخرج "أصل وصورتين".
6. شهادة البكالريوس المؤقته.
7. موافقه جهة العمل او اقرار بعدم العمل "أصل وصورتين".
8. شهادة تأديه الخدمه العسكريه او الاعفاء منها (صوره شهادة التجنيد) "أصل وصورتين".
9. دمغه 12ج للطالبات و 13ج للطلاب هتشتريها من الدور الارصى بمبنى الشئون.
10. مظروف بداخلة استماره هتشتريها من مكتبة قرطبه اللى عن الكلية

تملى كل الاستمارات فى الشئون امام الموظفين "ناس محترمه" وتسلمهم المظروف وبداخله كل الاوراق وتستنى التنسيق ، ولازم الاوراق المطلوبه تجبها كامله.

دبلومة الفسيولوجى والكيمياء الحيوي علوم الاسماعيلية (جامعة قناة السويس)

خطوات التقديم

خطوات هذا العام 2021/2020

أولا التسجل الكترونى هذا العام 2021/2020 من خلال هذا الموقع علماً بأن التسجيل الكترونياً وورقياً ولايعتد بأي منهم علي حدى.

خطوات التسجيل الإلكتروني

خطوات العام الماضى

1- يقوم الطالب بالتقديم عبر الرابط التالي (لمعرفة كيفية التسجيل الإلكتروني اضغط هنــا) ... وممكن لما توصل الجامعه تسجل هناك الكتروني .

التسجيل الالكتروني للساعة 1.30 والدراسات العليا للساعة 2.30 وبالنسبة للاحد اجازة ، وممكن تروح مكتب ال IT تسجل الكتروني وتاخد الاستماره اللي هيعطوها ليك مع الورق وتقدمه ف الدراسات .

2-بعد الأنتهاء من التقديم يقوم الطالب بطباعة استمارة إثبات التقديم ويتوجه الطالب مباشرة إلى مكتب الدراسات العليا بالكلية مع استمارة اثبات التقديم + الأوراق المطلوبة كاملة.

3- بتقدم الطلبات دى فى شئون الدراسات العليا  وتسحب الدوسيه ب50 ج (بيديك وصل بـ 50 جنيه تدفعه في الخزنه). 

4-  وبعدين تروح مكتبه قرطبه تقول لهم عاوز استماره دبلومة الكيمياء الحيوية بتملاها ويطلعولك استمارات فـ حدود 35 جنيه.

5- لما تقبل في شهر 10 بتروح تدفع المصاريف 2300 لحد دلوقتي. 

فى مظروف بداخله استمارات هتشتريه من مكتبة قرطبه اللى جنب قسم الكيمياء ودمغات هتشتريها من الدور الارضى بمبنى الشئون الإدارية وتملى كل الاستمارات فى الشئون أمام الموظفين الموقرين والمحترمين وتسلملهم المظروف بكل اوراقك وتستنى التنسيق.

نصيحه لوجه الله : يا جماعه مكتبة قرطبة بيستغلوا الناس جدا يعنى تسجيل بياناتك ع موقع الكليه ب ٣٠ ج وطباعة الورق ده ب ٣٠ ج ويصورلك الشهادات والورق اللى معاك ويديك الفايل ب ٣٠ ج اللى يعرف يعمل الحاجات قبل ما يروح يقدم هايوفر كتير عن ال ٩٠ ج اللى بيدفعوا ع الجاهز كده بتوع الشئون النهارده قالولنا انتوا اللى بتستسهلوا وتسيبوا الناس تشتغلكوا لو سجلت بياناتك فى بيتك وروحت اى سايبر طبعت اوراقك وصورت ورقك هاتروح تقدم ع طول من غير ماتقف فى طوابير وتدفع فلوس مالهاش لازمة.

ملحوظة:

الناس اللي لسه مخلصه كليه وشهاده الكليه مطلعتش او مش معاهم بيان درجات ، ممكن ينتظرو لحد اخر ايام التقديم لحد شهادتهم ما تطلع او ينتظروا قرار وكيل الكليه ف حقهم .

مصاريف الدبلومة

• كانت فى 2019/2020 بـ 2319+50 رسوم تقديم الكترونى + 50 جنية للمظروف 
• هتدفعها يوم القبول
• تعديل الدمغات بتكون تنميه موارد ودمغات ب 90 قرش أو 30 قرش.
• الكتب 900 جنية

للعلم المصاريف كانت فى 2018/2019 بـ 2300 جنية" وكانت فى 2017/2018 بـ 1469.25جنية

 

ورقه جهه العمل عشان تطبعوها اسكنر وتملوها بدل ما تروحوا مرتين وتملوها بدل ما تروحوا مرتين

سؤال وجواب

اولا بالنسبة لللناس اللي عملت الدبلومة وبتسال ع الشهاده؟؟ 

ف عشرة بعد ما كل التقديمات تخلص سواء بايو او ميكرو . 

ثانيا الناس اللي بتسال ينفع للتقديم بالافادة عشان النتيجة لسه؟؟ 

للاسف مش هينفع وللاسف لازم بيان الدرجات الاربع سنين. 

ثالثا بيان الدرجات 

ممكن صورة لاننا صورناه وخدوا الصورة وادونا الاصل. 

رابعا هل الدبلومة معتمدة

الدبلومة معتمده داخل وخارج مصر ده الكلام اللي قاله استاذ رضوان ف الشئون . 

خامسا بالنسبه للناس اللي جيشهم فى شهر أكتوبر 

بتجيب اثبات تجنيد او حاجه شبه كده بتقدمها مع ورقك عشان ساعة الامتحانات يبعتوا ورق طلب اجازتك .

الاقسام المقبولة

• -الدبلومه لطلبة كيمياء مزدوج (كيمياء حيوى, كيمياء/ميكرو , كيمياء/نبات , كيمياء/حيوان , كيمياء/حشرات) .
• - متاحة لكيمياء اسبشيل و قسم علم الحيوان.
• - من الاخر كل الاقسام ما عدا الاقسام اللى لم تدرس بيولوجى خلال فترة الدراسة زى فيزياء. جيولوجيا. رياضه. كيمياء فيزياء. كيمياء رياضه. كيمياء جيولوجي
• - مش متاحه لزراعه.
• - يقال ان اي قسم ينفع لو واخد بيو (نركز ان بيو اللي يقصدوها اي مادة من قسم حيوان لو مش واخد اي فرع حيوان للاسف مش هينفع ) .

التجنيد والجيش

بيقبلوك عادى بشرط تجيب موافقه من قائد وحدتك وبيراعوا موضوع الحضور بالنسبه للناس اللى عندهم ظروف تمنعهم من الحضور.

ملحوظه: 

بالنسبة للطلاب الذكور أن يكونوا قد أدوا الخدمة العسكرية أو أعفوا منها ولا يقبل الضباط الإحتياط الذين قضوا السنه الإلزاميه الأولى .

وفى كل الأحوال إذا تجاوز العدد المتقدم الحد الأقصى المطلوب قبوله حسب طاقة الكليه يرجح التقدير الأعلى من جيد أولا ثم سنة التخرج الأحدث فالذى يلية ثم يؤخذ فى الإعتبار عامل السن كأساس آخر للترجيح فى حالة تساوى التقدير العام وسنة التخرج بحيث يقبل الأصغر سنا .

بالنسبة للتجنيد: 

بيقبلولك عادي بشرط تجيب موافقة من قائد وحدتك وبيراعوا حته الحضور بالنسبة للناس اللي عندها ظروف تمنعها م الحضور .

أعتماد الدبلومة

اخدت الاعتماد سنه  2016 .

الدبلومات المعتمدة فى الكيمياء الحيوى والميكروبيولوجى

الحد الادنى للقبول

1. التقدير بيبقى على حسب العدد اللى مقدم وتقديرهم لكن غالبا بيبقى من حد ادنى جيد واحتمال كبير جدا يطبقوا فيه النسب.
2. جميع اقسام علوم ماعدا الاقسام التى لم تدرس بيولوجى خلال فترة الدراسه.
3. فى 2019 اخدت من جيد جدا.

هل قسم فيزياء ورياضه وجولوجيا وصيدله وطب بيطرى وطب بشرى وزراعه متاح ليهم الحصول على الدبلومه :

للاسف لا

مواصلات الاسكندرانية

ازاي نيجي من اسكندريه إلى الاسماعيليه - اقرب طريق وكام ساعه:

قدامك 2 options

1. قطر بور سعيد بس محتاج حجز قبله بفترة بيتحرك من اسكندرية 4.5 الفجر بيوصل الإسماعيلية 10 الصبح يعني قبل المحاضرات .

2.مواصلات من اسكندرية للقاهرة '' المرج '' من الموقف الجديد ، و من المرج تركب الإسماعيلية .

القطار اريح بس وقت كبير ... المواصلات إنجاز بس إرهاق.

أرقام شئون الدراسات العليا 

عشان لو حد محتاج شيئ او استفسار: 

1. ا.سيد /01012528866 
2. ا.فاروق/01028109101 
3. ا.رضوان/01208879754 

واختاروا اوقات مناسبة للاتصال

المقرارات الدراسية

المواد 4 مواد كل ترم كل ماده ب 100 درجه : 

ترم اول ( بيو _ فسيولوجي _ عملي بيو _ غدد) 

ترم ثاني (بيو _ مناعة _ عملي بارا وميكرو _ هيماتولوجي) 

العملي : بيكون نظري مافيش سكاشن 

الكتب: كل دكتور بينزل كتابه ونشتريه 

الغياب : عادي في ناس غابت كتير ودخلت الامتحان

الترم اول

1. كيمياء حيوى ١
2. غدد صماء
3. فسيولوجى وباثولوجى
4. عملى كيمياء حيوى١

الترم تانى

1. هيماتولوجى
2. مناعه
3. كيمياء حيوى ٢
4. عملى2 

المحتوى العلمى للدبلومة

مذكرتش اسماء الدكاتره لان احتمال كبير يحصل فيهم تغيير

قديما قالوا إن اسماعيليه اسهل دبلومه وبتاخد شهادتك وانتى ماشى من جنب سور الجامعه للاسف الكلام دا ماطبقش السنة الى فاتت ولا هيتطبق بعد كدا لان الكليه اخدت الاعتماد وظهر تشديد على المناهج والحضور من بعض الدكاتره السنادى فكل المطلوب منك انك تهتم شويتين لو ناوى تقدم وتكمل الطريق للاخر وتحاول تحضر على قدر المستطاع لأنه هيفيدك جدا جدا.

الطلاب الراسبين

فى حالة ان حد يكون شايل مواد والاجراءات فى الحالة دى كالتالى:

• اللى شايل مادتين هيدفع ٢٦٠ ج للماده
• واللى شايل تلاته هيدفع مصاريف سنه كامله
• واللى شايل ماده كان شايلها قبل كدا للاسف سوف تلغى الدبلومه 

محاضرات د.هند معروف

لقد قمنا بتجميع محاضرات عملى الكيمياء الحيوى للدكتورة الفاضلة هند معروف بدبلومة الكيمياء الحيوى والفسيولوجى جامعة قناة السويس بالاسماعلية لما فى هذة المحاضرات من أهمية للأخصائى التحاليل الطبية لانها تشرح أهم الاخطاء التى تواجه من يقوم بالتحاليل المعملى قبل التحليل واثناء التحاليل وبعد التحاليل (كتابة التقرير) كما انها تشرح الكثير من الامور التى تضيف للمتخصص فى هذا المجال:

رابط التحميل

محاضرات د.محي الدين عبد الفتاح

لقد قمنا بتجميع محاضرات الكيمياء الحيوى للدكتور الفاضل محى الدين عبد الفتاح بدبلومة الكيمياء الحيوى والفسيولوجى جامعة قناة السويس بالاسماعلية ، وقد قمنا بتجميعها لما فيها من أهمية للأخصائى التحاليل الطبية لانها تشرح تقريبا جميع ابواب الكيمياء الحيوية الاساسية كما انها تشرح الكثير من الامور التى تضيف للمتخصص فى هذا المجال.

رابط التحميل