كيفيه السفر والإقامة والعمل فى مجال التحاليل الطبية بدولة الكويت؟

بِسْــــــــــــــــمِ اﷲِالرَّحْمَنِ الرَّحِيم

بداية احب ان اوضح ان هناك اختلافات كثيرة بين كثير من الدول فى التوصيف الوظيفى لخريجى كليات العلوم الطبية والعلوم الاساسية من العاملين فى مجال التحاليل الطبية ايضاً هناك اختلاف فى من يحق له استخراج تصريح مزاولة المهنة فى مجال التحاليل الطبية من خريجى الكليات العلمية خصوصاً وان هذا المجال يتم تدريس المواد الخاصة به فى العديد من الكليات العلمية "طب - صيدلة - علوم - علوم طبية - بيطرى" لذلك سأوضح لحضراتكم فى هذا الموضوع كل النقاط الخاصة بمن يحق له العمل والمسمى الوظيفى وخطوات التقدم لوظيفة اخصائى تحاليل طبية حسب ما هو متبع فى دولة الكويت.

وفى اكتر من موضوع اتكلمنا فيهم عن السفر والعمل فى الخارج فى مجال التحاليل الطبيه :

1- معلومات هامه عن مجال التحاليل الطبية بين مصر والكويت 

2- كيفيه السفر والعمل والإقامة بدولة الإمارات العربية المتحدة 

3- كيفية العمل فى مجال التحاليل الطبية بالمملكة العربية السعودية ؟ 

4- حلم السفر "عاوز تسافر ووضعك يكون صح" 

طريقة مجانية 100% لتساعدك على الحصول على عقد عمل بسهولة

اهم المواقع التى تنشر بشكل يومى عن فرص العمل الموجودة بدول الخليك بشكل عام

1- موقع حفار الظائف

2- موقع Naukrigulf

3- موقع وظايف

4- موقع وظائف للمقيمين خارج الكويت

5- جروب وظائف لأخصائيين المختبرات الطبية

التصنيف والمسمى الوظيفى لخريجى العلوم والعلوم الطبية بالكويت

- اولاً التصنيف الوظيفى :-

الكليات التى يحق لخريجيها إستخراج تصريح مزاولة المهنة بالكويت هم خريجى كليات "العلوم الطبية - العلوم - البيطرى"

1- خريجى كلية العلوم الطبية:-

- يحق لخريجى كلية العلوم الطبية قسم المختبرات الطبية استخراج تصريح مزاولة المهنة بالكويت بالكالوريوس فقط دون الحصول على دبلومة أو ماجستير.

- تحتسب سنة الإمتياز كسنة خبرة فى المجال.

2- خريجى كليات العلوم الاساسية:-

- قسم الكيمياء وفروعة:-

* الكيمياء الحيوية + دبلومة البايوكمسترى أو مايكروبيولوجى أو ماجستير فى اى منهما.

* الكيمياء التحليلية + دبلومة البايوكمسترى أو مايكروبيولوجى أو ماجستير فى اى منهما.

* الكيمياء العضوية + دبلومة البايوكمسترى أو مايكروبيولوجى أو ماجستير فى اى منهما.

- قسم البيولوجى وفروعة:-

* قسم الحيوان + دبلومة دبلومة البايوكمسترى أو مايكروبيولوجى أو ماجستير فى اى منهما.

* قسم النبات + دبلومة البايوكمسترى أو مايكروبيولوجى أو ماجستير فى اى منهما.

* قسم المايكروبيولوجى + دبلومة البايوكمسترى أو مايكروبيولوجى أو ماجستير فى اى منهما.

* علم الحشرات (لا يتوفر معلومات اكيده حتى الان).

- التخصصات المزدوجة:-

اى تخصص مزدوج احد فروعة يحق له إستخراج مزاولة مهنة والاخر لا يحق له يستطيع ان يتقدم بالاوراق المطلوبة لإستخراج مزاولة المهنة بدون اى معوقات شرط ان يكون حاصل على دبلومة البايوكمسترى او دبلومة المايكروبيولوجى او ماجستير فى اى منهما.

مثال توضيحى:-

شخص تخرج من قسم الكيمياء والفيزياء أو كيمياء حيوية ونبات مثلاً ... يمكنة استخراج مزاولة المهنة لأن احد الفرعين "الكيمياء والكيمياء الحيوية" يحق له استخراج المزاولة اما بالنسبة للفرع الاخر فلا يؤثر مع وجود الدبلومة المطلوبة.

اما باقى اقسام الكلية الموجودة مثل "الجولوجيا - الفزياء - الرياضة والحاسبات - الفلك والارصاد" فليس لدى معلومات اكيدة عن امكانية استخراج مزاولة المهنة ولكن اغلب الظن لا يمكن استخراج مزاولة وإن توفرت لدى معلومات موثوقة غير ذلك سيتم تحديث التدوينة على اساسها.

نقاط توضيحية

- العمل بالتحاليل الطبية بالكويت اسهل من حيث الإجراءات.

- بعض التخصصات التى لا يحق لها مزاولة المهنة يمكنها العمل فى مجالات اخرى مثل "الجودة" مثلاً.

- المقياس فى استخراج مزاولة المهنة ومن يحق له العمل فيها هو المواد التى تمت دراستها فى مرحلة الكلية او مرحلة الدبلومة لذلك يتم طلب بيان الدرجات الخاص بالدبلومة او الدراسة.

------------------

- ثانياً المسمى الوظيفى:-

المسميات الوظيفية بالمعمل فى جميع دول العالم تنقسم الى

- مدير المعمل

- اخصائى تحاليل طبية

- اخصائى تقنية المختبرات

- فنى تحاليل

- فنى سحب العينات

1- مدير المعمل - Medical Lab Director

هو اخصائى التحاليل الطبية الطبيب او الغير طبيب الحاصل على دبلومة ، ماجستير، دكتوراة + خبرة كافية فى مجال العمل وإدارة المعامل.

2- اخصائى التحاليل الطبية - Medical Lab Specialist - Medical Lab Supervisor

هو اخصائى المختبرات الطبية الحاصل على درسات عليا الدبلومة او الماجستير وهو المشرف على المعمل ومن حقة التشخيص المعملى.

3- اخصائى تقنية المختبرات - Medical Lab Scientist - Medical Lab Technologist

هو خريج كلية العلوم او العلوم الطبية الحاصل على درجة البكالوريوس فقط فى علوم التحاليل أو فى احد تخصصاتها وهو يخضع لإشراف جزئى لاخصائى التحاليل الطبية او مدير المعمل ومن حقة إعطاء الرأى المبدئى فى التشخيص المعملى.

3- فنى التحاليل الطبية - Medical Lab Technician

هم خريجى المعاهد الصحية وتكون مدة الدراسة سنتين ويكون مساعد لأخصائى التحاليل الطبية فى تحضير العينات دون القدرة على التشخيص المعملى.

4- فنى سحب العينات - Phlebotomy

هو الحاصل على دبلوم صحى او ثانوية عامة مع تدريب معتمد لا يقل عن سنتين فى سحب العينات.

بالنسبة للكويت فالمسمى الوظيفى بالجهات الحكومية:-

- خريجى كليات العلوم الطبية والعلوم المستوفون للشروط يكون المسمى الوظيفى فى بداية التعيين "ممارس مبتدئ" وبعد سنتين خبرة يصبح "ممارس" وبعد خمس سنين اخرى يترقى الى "ممارس اول" وهكذا الى ان يصل الى درجة "اخصائى".

- حسب ما اخبرنى احد الزملاء فإن الترقى من "ممارس مبتدئ" الى "اخصائى" يستغرق فى حدود 15 سنة فى جهة العمل الحكومية.

- فى حال حصولك على درجة الماجستير او الدكتوراة تتم الترقية من "ممارس اول" الى "اخصائى" فى حوالى 7 سنين فقط.

- تدرجك الوظيفى يجعل المهام المطلوبة اكبر مع الإحتفاظ بمهامك الرئيسية.

المسمى الوظيفى بالجهات الخاصة:-

حسب المستشفى التى اعمل بها وايضاً العديد من الزملاء فإن المسمى هو "فنى مختبر" والترجمة الموجودة بالإنجليزية "Medical Lab Technologist" اعلم بأن الكلمة بالإنجليزية تختلف عن العربية ولكن لا اعلم لماذا فى الخاص التسمة بهذا الشكل.

هذا كل مايخص التسمية والحق فى التصنيف بالكويت وفى حال تم تغيير او وجد احد الزملاء اى معلومة مغلوطة ارجو ان يراسلنى لتصحيحها فهذة المعلومات إجتهاد شخصى ونقلا عن زملاء لى فى المجال.

خطوات التقدم لوظيفة اخصائى تحاليل طبية بالكويت

قبل ان اذكر ما هى الاوراق المطلوبة للإلتحاق بسوق العمل بالكويت يجب ان تعلم ان الحصول على الفرصة للعمل بمستشفى او مختبر بالكويت يتطلب منك بعض الجهد والحذر

1-  الجهد فى متابعة الإعلانات المنشورة بالجرائد والمواقع بصفة يومية وان تطلع على الموثوق منها والسعى فى البحث فى المواقع الخاصة بالمستشفيات والمراكز الطبية والمختبرات الموجودة بالكويت ومراسلتها بصورة مباشرة دون وسيط مع عرض خبراتك بصورة مقنعة لصاحب العمل

2-  الحذر من مكاتب السفر التى تستدرج الشباب الطامح بالسفر وتحقيق الذات لا اقصد هنا كل المكاتب ولكن وجب عليا ان احذرك وان تأخذ كامل إحتياطاتك وألا تدفع شيئاً حتى تتحقق من مصداقية المكتب وان تطلع على عقد العمل المرسل وان تسأل احداً بالكويت عن حقيقة وجود المؤسسة التى ستلتحق بها وحاول ان تتواصل معهم ايضاً إن امكن.

اما عن الاوراق المطلوب تجهيزها:-

اولا مطلوب تجهيز بعض الاوراق والشهادات من الجامعة والنقابة:

- شهادة التخرج المؤقتة.

- شهادة التخرج الكرتونية (يمكنك ان تسأل عنها فى شؤون الطلبة بجامعتك – تستخرج حسب جامعتك لكن غالبا بعد سنتين او سنة من التخرج).

-شهادة الدبلومة (لخريجى كلية العلوم الحكومية)

- شهادة الإعفاء من الخدمة العسكرية اوالتأجل(للذكور فقط).

- شهادة خبرة سنتين على الاقل

ملحوظه: يفضل ان تكون شهادة الخبرة من مكان حكومى او مستشفى او مختبر مشهور او حاصل على إعتماد دولى معترف مثل الايزو او الكاب مثلا ولكن إذا لم يتوفر فلا توجد مشكلة المهم ان يتوفر شهادة خبرة سنتين على الاقل .

- صورة جواز السفر

- شهادة حسن سير وسلوك من النقابة

- شهادة مزاولة المهنة من النقابة ايضاً

- صورة شخصية حديثة ذات خلفية بيضاء أو زرقاء 4x6))

ملحوظه: قدر الإمكان حاول نسخ حوالى 20 نسخة من الصورة لأنك سوف تحتاج إليها مستقبلاً وبصفة عامة إحتفظ بعدد من الصور لديك لأنها ضرورية فى إنهاء الاوراق الخاصة بك سواء فى مصر او خارجها.

هذة تعتبر الاوراق الرسمية المطلوبة منك للتقدم للوظيفة بالكويت بصفة عامة

لا تنسى توثيق كل هذة الشهادات من الخارجية حتى يعترف بها بالخارج.

لاتنسى إرفاق السيرة الذاتية الخاصة بك مع الاوراق الرسمية ايضاً إذا كنت قد حصلت على شهادات تدريبية فى اى من مجالات التحاليل الطبية او حتى خارج مجالك على سبيل المثال فى التنمية البشرية او اللغة الإنجليزية يفضل ان ترفقها ايضاً مع اوراقك بحيث يكون الملف الخاص بك شامل لكل ما حصلت علية من خبرات .

ملحوظة :- إذا كنت تخشى فقدان اوراقك او سرعة فى إرسال الاوراق يمكنك الإحتفاظ دائماً بنسخة ضوئية على جهاز الكمبيوتر الخاص بك او حتى جهازك المحمول ايضاً يمكنك الإحتفاظ بها فى الإيميل الخاص بك لسهولة إرسالها الى الجهات المعنية.

هنا وبعد تجهزك لكل هذة الاوراق ستبدء فى متابعة إعلانات التوظيف التى تنشر فى الجرائد مثل (الاهرام - الجمهورية - .... الخ) أو مواقع التوظيف المتخصصة .

(جارى حصر إميلات المستشفيات والمراكز الطبية والمختبرات  لسهولة إرسال الاوراق والتواصل معها)

تحديث 2016

من الاوراق المطلوبة حالياً للتقديم على مزاولة المهنة فى الصحة الكويتية

- شهادة الدرجات / العلامات لكل مواد الدراسة من الكلية لكلية العلوم الطبية وشهادة الدرجات / العلامات للدبلومة لكلية العلوم الاساسية مختومة وموثقة من الخارجية.

- شهادة الدرجات / العلامات للثانوية العامة مختومة وموثقة من الخارجية.

بالنسبة لخريجى كليات العلوم من جامعة الازهر يكتفى بشهادة درجات "بيان درجات" الدبلومة فقط .

إذاى اسافر الكويت؟؟

طرق السفر للكويت من مصر "حسب ما انا اعرف" بمعنى ممكن يكون فية طرق تانية وانا معرفهاش.

مبدئياً السفر للكويت محتاج تكون مميز مش شرط تكون ممتاز قوى لكن على الاقل مميز فى عملك أو عندك خلفية بأغلب النقاط فى شغلك وبما اننا اخصائيين تحاليل وعملنا متفرع على اقسام كتير فأنا هتكلم بشكل عام على كل الاقسام.

1- علشان اكون منصف مش كل الاقسام تتساوى من حيث المعلومات فمثلاً حاول يكون عندك خلفية عن الاساسيات فى كل قسم بدءً من سحب العينات "عارف انها مش وظيفتك بس لازم برضة تتقنها" مروراً بقراءه الميكرسكوب فى عينات البول والبراز والسائل المنوى وانتهاءً بقراءه افلام الهيماتولوجى اما عن المايكرو فغالباً بيكون فيه متخصص فية والمتخصص ميكرو فى الغالب برضة لا يهتم بباقى الاقسام.

2- خلينا نتكلم عن طرق السفر

ا- اللى اولها بتكون عبارة عن الاتصال المباشر بالشركة ودة ممكن تلاقية عبارة عن اعلانات فى الجرايد"اهرام - اخبار - جمهورية" او على المواقع المختصة بالتوظيف ودى كتير قوى على النت حضرتك بتاخد الإيميل المكتوب على الاعلان وبتتواصل مع الشركة اللى ناشرة الاعلان وتشوف متطلباتهم والاوراق المطلوبة وتبعتها عن طريق الإيميل وتنتظر الرد.

ب- اما الطريقة التانية هتكون عن طريق الشركات وبصراحة طريق الشركات سمعت فية عمليات نصب كتير الصراحة وكتير ناس بعتتلى انهم سافروا على شركة للعمل بالقطاع الحكومى فى الكويت ولكن طبعاً وعدوهم بمرتب كبير وانهم يقدروا يحولوا اقامتهم "بمعنى يغيروا مكان العمل" ولكن الواقع كان غير كدة ولما وصلو كان الرد "هو دة اللى قدامنا واستنى القوانين يمكن تتغير".

طريق الشركات مشكلتة انك مش عارف اى حاجة فى العقد مجرد صورة انت بتشوفها واحياناً مبيكونش ذى ما شوفتة علشان كده عندى كام نقطة لازم تاخد بالك منهم فى الموضوع دة علشان ميتنصبش عليك:

اولاً:- لازم تشوف العقد بتاعك وتشوف كل البيانات اللى فيه العقد المفروض يكون شامل كل شئ "المرتب - السكن - الموصلات - مدة العقد" واى شئ مش واضح لازم تسأل عنه.

ثانياً:- لازم تتأكد اذا كان المكان اللى انت هتسافر علية موجود اصلاً ولا لأ علشان متجيش ويطلع فنكوش فى الاخر.

ثالثاً:- متدفعش ولا قرش للمكتب غير لما تخلص كل حاجه وتتأكد من كل حاجه وتأكد طول ما فلوسك فى جيبك هما اللى هيجرو وراك.

رابعاً:- اسأل عن سمعة الشركة كويس جداً وهل حد سافر عليها ولا لأ وإية الوضع معاه ... ودى تقريباً اهم النقاط اللى لازم تاخد بالك منها فى الوقت الحالى.

جـ - الطريقة التالتة بقى لو انت (ى) لك حد قريبك من الدرجة الاولى فى الكويت دة ممكن ينفعك فى 3 حاجات علشان تلاقى فرصة عمل

الاولى:- ممكن يعملك فيزا سياحة وفى الحالة دى انت بتظبط ورقك وتيجى كدة شهر تشوف وضع البلد وتلف على المعامل والمختبرات علشان تحاول تلاقى عقد عن اى واحد منهم وطبعاً لو انت متميز ممكن يطبعولك الفيزا وتاخدها معاك وانت مروح "حصلت" او تخلى قريبك يتابع معاهم لو انت خلاص اتفقت على حاجة معينه.

التانية:- الالتحاق بعائل ودة لو كان جوزِك شغال فى الكويت ويقدر ياخدك معاه فى الحالة دى تقدرى تطلعى على اسمة وتدورى براحتك على الشغل بس طبعاً حسب القوانين لغاية 2015 مش مسموح تشتغلى بصة رسمية فى اى مكان وتنقلى اقامتك عليه إلا إذا اتممتى سنه كاملة على اقامة جوزك.

التالتة:- انك تبعت الورق بتاعك لحد هنا وهو يدورلك على فرصة عمل كويسة الموضوع فقط يحتاج لحد عنده علاقات كويسة وخلاص مش اكتر وطبعاً انت تكون ضامنة 100% مش يقولك على حاجة وبعدين تيجى هنا تلاقى حاجة تانية يعنى يفضل يكون قريب من المجال الطبى.

د- فى طريقة رابعة شوفت ناس عملتها هنا ولكن تخضع لإحتمالين وهى انك تيجى البلد على اى شغل مثلا موظف استقبال أو أى وظيفة من اللى هى مطلوبة كتير وبتيجى كتير فى الجرايد ودى تكون فقط طريقك لدخول البلد علشان منها تدور على شغل فإنت بتدخل البلد كموظف أستقبال مثلاً وبعد ما عقدك ينتهى تقدر تدور على أى شغل تانى لكن خد بالك لازم تتأكد ان الوظيفة اللى هتيجى عليها قابلة انك تحول منها لوظيفة تانية وكمان الطريقة دى هتستهلك على الاقل سنتين من عمرك ممكن متقدرش تحقق فيهم حاجة لكن فية ناس عملتها وعدت ودلوقتى وضعهم أحسن بكتير.

هـ - الطريقة الخامسة بقى انك تشترى فيزا حرة بإقامة سنتين ودى معنديش معلومات كتيرة عنها لكن خليك منتبة فى حاجة ذى دى لأنك هتدفع فلوس كتير وممكن فى الأخر تروح عليك فالافضل تشوف حاجة ضررها اقل بدل المجازفة.

اسئلة امتحان مزاولة مهنة اخصائى تحاليل بالكويت

تجميع لاسئلة الإمتحانات السابقة لإمتحان مزاولة مهنة أخصائى تحاليل الطبية بالكويت منذ عام 2011 حتى عام 2014 حسب ما رواة اصدقاء لى دخلوا الامتحان.

يمكنك تحميل المحتوى على هيئة كتاب إليكترونى .

سؤال وجواب فيما يخص التحاليل الطبية بالكويت

دول اجابه الاسئلة المطروحة على الجروب الخاص بـ الجالية المصرية لأخصائى التحاليل الطبية بالكويت ونشرتها علشان تكون مرجع للزملاء دائم ان شاء الله للرجوع الية قبل السؤال او الاستفسار وفى حال سؤالك غير موجود يسعدنى اجاوبك اذا كانت الاجابة عندى ان شاء الله

1- اللي طلع ترخيص قريب  ايه الشهادات اللي اجبها اللي بتكون متوثقة ؟؟

يفضل لأى مسافر لسه هيدور على شغل انه يوثق اى شهادات معاه يمكن توثيقها لأن فى حال طلب توثيق شهاده بعد سفرك هيكون المبلغ عالى ومُكلّف فالافضل توثيق اللى تقدر علية من الشهادات.

2- كم متوسط مرتبات الفنيين والاخصائيين فى الكويت ؟؟

المرتب يعتمد بالاساس عليك انت على خبراتك ودراساتك وكمان حاجه المكان ليك واتفاقك مع المكان ولكن المرتب فى الايام الحالية بسبب التنافسية العالية حالياً ممكن يكون 350 مثلاً وممكن يقل او يذيد حسب المكان دى بالنسبة لخريجى كليات العلوم الطبية والعلوم الاساسية اما الزملاء من خريجى معهد فنى فممكن اقصاه يكون 250 دينار لان هما بيكونوا مساعدين وسحب عينات فقط.

3- هل الشغل فى الكويت شيفت واحد ولا شيفتين ؟؟

 برضة على حسب المكان اللى هتقدم فية النظام فى الاغلب بيكون شيفت واحد 8 ساعات متصلين ولكن برضة بيكون فية 4 ساعات الصبح و 4 ساعات بعد العصر وفى الاغلب نظام الشيفت المنفصل بيكون فى المستشفيات لأن فى اوقات العيادات بيكون مطلوب عدد اكبر نظراً للازدحام.

4- تصنيفى اية فى الكويت "او" المسمى الوظيفى اية فى الكويت ؟؟

السؤال دة تقريباً بتسأله يومياً المسمى الوظيفى فى الكويت باللغة العربية "فنى" حسب القانون المنظم للمهن الصحية بالكويت لخريجى كليات العلوم والعلوم الطبية ومع ذلك بيتكتب فى بعض المعامل والمستشفيات "ممارس" ويترقى الى "ممارس اول" وهكذا الى ان يصبح "اخصائى" ولكن ده بعد درسات عليا وخبرة طويلة وفقط فى مستشفيات الوزارة.

5- هل بيقبلوا التصنيف المزدوج وأى قسم افضل ؟؟

" كيمياء حيوى - مايكروبيولوجى - كيمياء مايكرو" الاقسام اللى كتبتها دى تمشى ذى الصاروخ فى التراخيص ولا غبار عليها يعنى مش ناقصة غير الدبلومه وسنتين الخبرة وبس اما الاقسام المزدوجه التانية بقى فيها اقوال من الوزارة وحسب ما يحددو هما.

6- هل شهادة بيان الدرجات مهمه واذى ممكن اطلعها ؟؟

شهادة بيان الدرجات مهمة فى التقديم على المزاولة بالكويت من ضمن الاوراق المطلوبة وكيفية استخراجها من شؤون الطلبة وفى حال الطلبة اللى مش قادرين يستخرجوها للبكالوريوس ممكن يستخرجوا بتاعت الدبلومة وهتأدى نفس الغرض.

7- هل لازم شهادة الخبرة تتوثق ؟؟

شهادة الخبرة لازم بسنتين والافضل توثيقها لو تقدر ولكن علشان صعوبة توثيق الشهادات دى فى مصر فممكن تستعملها بدون توثيق وان شاء الله هتتقبل بدون مشاكل وبالنسبة لطلبة العلوم الطبية سنة الامتياز بتتحسب خبرة ولكن يفضل انك تاخد على الاقل شهاده سنتين بعده كخبرة.

9- دبلومة البيو ولا الميكرو أهم ؟؟

مفيش دبلومه مميزة عن التانية الاتنين تقدر من خلالهم تطلع ترخيص مزاولة بمعنى ادرس القسم اللى انت راغب فية ومتقلقش ولكن خللى بالك الدبلومة اللى هتاخدها هتكون هى القسم بتاعك فى الشغل بمعنى لو انت واخد مايكرو فى الاغلب هتمسك المايكرو بشكل اكبر وهكذا.

10- اية رئيك فى المعامل الصغيرة ؟؟

فى رأى المعامل الصغير قليله الامكانيات والفروع الخاصة بالاماكن الكبيرة الشغل فيها اكتر من سنتين هو مضيعة للعمر والمستقبل المهنى لأن مفيش من وراها ميزة تعود عليك يعنى انت لا بتتعلم ولا كمان بتكسب خبرة كويسة فالافضل انك تتعلم فيها الاساسيات وتشوف غيرها.

دى اشهر الاسئلة اللى بتوصلنى دائماً

المعيشة فى الكويت السكن والمصروفات

مبدئياً تختلف رؤية ووجهات النظر بين شخص والاخر فى الحكم على مكان معين حسب الإحتياجات والمتطلبات لذا سيكون كلامى مبنى على تجربة شخصية أو تجارب اصدقاء فى المجال الطبى عموماً وفى مجال التحاليل خصوصاً وسيكون الكلام عن الموضوع منقسماً لقسمين الاول وهو للعزاب والقسم الاخر سيكون للمتزوجين وسأحاول قدر إستطاعتى ان اجمع كل النقاط التى تهم كل الشباب والمهتمين بالعمل فى الكويت.

اولاً:- بالنسبة للشباب العازب

واقصد هنا اى شخص سوف يقيم فى الكويت بمفردة (بدون زوجة واطفال) واعتقد بالنسبة للعازب سيكون الوضع جيد جداً

1- السكن

بالنسبة للسكن تنقسم الوحدات السكنية بالكويت الى ثلاث اقسام:-

* شقة غرفتين واحدة صغيرة والاخرى كبيرة بحمام مخصوص وصالة ومطبخ وحمامين مساحة فى حدود 45 - 50 متر ويبلغ إجارها بين 250 - 280 دينار.

* شقة غرفة وصالة ومطبخ وحمام فى حدود 40 متر ويبلغ إيجارها حوالى 160 - 200 دينار.

* استديو او ملحق وتكون غرفة بها حمام صغير وجزء بسيط جداً للمطبخ وبها ايضاً يكون النوم ويبلغ إيجارها فى حدود 90 - 110 دينار.

1- تعتبر هذة المساحات هى الموجودة والمتاحة والاكثر تناسباً مع العزاب بالنسبة للشقق يكون لها مميزات بحيث ان الشقة يمكن لك ان تتنقل بين الغرف او الصالة مما يعطيك إحساس بالراحة اما بالنسبة للإستوديو فهو ضيق فى الحقيقة حيث انها غرفة واحدة فيها كل ما تحتوى علية الشقة.

2- اما بالنسبة للخصوصية فأهم نقطة دعنى انبهك لها هى شريك غرفتك حاول ان تكون جاد من اللحظة الاولى وان يكون الجزء المخصص لك هو ملكك لا يمكن لأحد التعدى علية فى وجودك أو غيابك لأن عن تجربة شخصية ستقابل من أنواع الناس الكثير فى غربتك أما اصدقائنا الذين اختارو الاستوديو فبتأكيد لا يزيد العدد عن 2 والافضل ان تكون بمفردك إذا كنت تحب ان تحافظ على خصوصياتك.

3- الاسعار التى قد تدفعها شهريا فى السكن قد تتراوح بالنسبة للشقق بين 45 : 50 دينار شهرياً وسيكون معك واحد او اثنين بالغرفة اما بالنسبة للاستوديو كما ذكرت سابقاً سيكون 90 : 110 دينار.

وانصحك قبل السكن ان تسأل جيداً عن العدد الموجود بالشقة والإيجار وأيضاً إذا كانت مفروشة بالكامل أم تحتاج اغراض (ادوات مطبخ - غساله - ثلاجة ... وغيرها) وهناك اشياء يجب عليك شراؤها (مخدة - مرتبة - سرير) ايضا ان كنت مدخن او غير مدخن اسأل اولاً واختر ما يناسبك ولا تقبل شئ يحتمل ان ينغص عليك سكنك فأنت فى النهاية ستسكن لتستريح من ضغط العمل وضع منهج معين للتعامل مع زملاء السكن حتى لا يتعدى احد على الآخر.

ناك بعض المواقع والتطبيقات فى اندرويد قد تمكنك من معرفة بعض التفاصيل عن اسعار السكن مثلاً 
- موقع السوق المفتوح ويمكنك تحميل التطبيق ايضاً هنا. 
- موقع الوسيط ويمكنك ايضاً تحميل التطبيق من هنا. 
فقط اختار دولة الكويت واطلع على الاسعار الموجودة ويمكنك ايضاً عمل حساب عليها إذا اردت الإستفسار عن اى شئ.

هناك بعض المواقع والتطبيقات فى اندرويد قد تمكنك من معرفة بعض التفاصيل عن اسعار السكن مثلاً

    - موقع السوق المفتوح ويمكنك تحميل التطبيق ايضاً هنا.

    - موقع الوسيط ويمكنك ايضاً تحميل التطبيق من هنا.

فقط اختار دولة الكويت واطلع على الاسعار الموجودة ويمكنك ايضاً عمل حساب عليها إذا اردت الإستفسار عن اى شئ ... اعتقد ان هذة النقاط هى اهم النقاط التى يمكنك التركيز عليها وإذا كان لديك سؤال فقط اكتبة فى التعليقات اسفل الموضوع.

2- المصروفات

بالنسبة للمصروفات فهى نسبية من شخص للأخر لكن بمعدل 50 الى 60 دينار للشخص شهرياً اعتقد ستكون كافية جداً لشخص واحد وتشمل

الاكل:- 30 دينار

المياة:-  10 دينار

الانترنت:- 10 دينار

ملابس:- 10 دينار (إختيارية)

بعض النقاط ايضاً اريد ان اوضحها

1- إذا كنت مسافر للمرة الاولى للعمل فى الكويت ولا تعرف اى شخص هناك يمكنك الدخول على المواقع السابقة والإتفاق مع الشخص الذى ستسكن معه وتأخذ منة العنوان وتعطية لأى سيارة اجرة وستصل هناك بسهولة اما إذا كنت قادم على عمل مباشرة فلا تقلق فقط ارسل للمؤسسة التى ستعمل بها ميعاد وصولك وستجد مندوب منهم فى انتظارك.

2-  لا تستهين بموضوع السكن فى العقد الخاص بالعمل وإن كان غير مدرج اسأل عنه او عن بدل السكن مناسب للأسعار فى مكان قريب من عملك.

3-  حاول ان تسكن فى البداية مع اشخاص من نفس بلدك او جنسيتك حتى تتعرف على البلد بعدها يمكنك الإختلاط بباقى الجنسيات (اقصد العربية).

عموماً بالنسبة للمصاريف والسكن لا يمكن قياس شخص بالأخر فهى ستكون حسب إحتياجاتك فى الاول والاخير.

ثانياً:- بالنسبة للأسرة

سواء انت وزوجتك او انت وزوجتك واطفالك (بالطبع الاطفال سوف تغير المعادلة)

1- السكن

هى نفس التقسيمة الموجودة بالاعلى ولكن هنا تختلف بعض الشئ فالافضل إن كنت فقط انت وزوجتك ولم تنجبا بعد فستكون الشقة الصغيرة (غرفة وصالة) او الاستوديو افضل لكما فى المصاريف كما انها ستفى بالغرض اما فى حالة وجود طفل فالافضل ان تتجه الى الشقق الاكبر (غرفتين وصاله) ويجب ألا يقل راتبك عن 350 – 450 دينار.

2- المصروفات

اعتقد المصروفات نسبية ايضاً لكن فى حالة وجود زوجة سيكون هناك امور إضافية لها سواء متعلقات شخصية او حتى فى المصروفات العادية لكن بالنسبة لشخصين اعتقد ان 100 : 150 دينار كافية جداً للمصروفات عموماً فى الوضع الروتينى دون اى طارئ.

لا تقلق بالنسبة لأغراض المنزل بجميع انواعها فجميعها يمكنك شرؤها بسهولة هنا فى الكويت والاسعار ستكون فى متناولك او حتى تقسيطها سواء اكانت جديده او مستعملة.

الموضوع متجددة لو فية سؤال جديد هضيفة

فى حالة وجود اى استفسار ارجو كتابتة بالتعليقات وسيتم الرد عليه ان شاء الله

بالتوفيق للجميع...

مصادر:- (( د.احمد سامى محمد - د.هالة البرولوسى - د.احمد جابر))