ليه أحب علوم وأكمل فيها فى هذا المقال من موقع « علومنجى دوت كوم » هنوضح اجابة السؤال لكل طالب سواء جديد (سنه اولى) او طالب قديم فى الكليه ، وهنناقش السؤال ببساطة باسلوب علمى عملى وهنوضحلكوا اهميه كليه العلوم وانها مش زى ما المجتمع مصورها ليه .
طاب هنبدأ كلامنا بطريقه شغل البياعيين ولو مش عاجبك يبقى ال Sales وهو كالآتى :
ال needs وال Benefits
س / يا عم الطالب أنت محتاج كليه عامله إزاى ؟
ج / والله عايز حاجه بدخلى فلوس كتيييييير وأجيب
عربيه واعدى بقى
الحل / بس كدا طلبك عندى
1) هو فيه خريج بدايه مرتبه من 3500 جنيه وطالع دا ان مكنش فى
بعض الشركات 4000 جنيه وعربيه وبدل وأخر شياكه ومعاك وقت كتير تتعلم فيه حاجات
تانيه بتحبها وده بيسمى (ميدكال ريب) "وشغله على قفا مين يشيل زى ما
بيقولوا".
ج / طالب تانى محتاج مكانه علميه محترمه
الحل / بس كدا طلبك عندى
1) تشتغل فى البحث العلمى فى مستشفى 57357 والمصل واللقاح
والمركز القومى للبحوث ، ومركز بحوث البترول ، هيئه الرقابه الدوائيه....الخ بس
خليك برنس فى نفسك وقوى نفسك كمعلومات فى تخصصك مش التقدير بس !
2) الناس الدحيحه اللى بتتعين فى الكليه ، طاب اللى محلفهوش
الحظ ومافيش تعين أنت متعرفش إن سيادتك مطلوب فى جامعات خاصه ، اه والله ، بس ليهم
شروط معينه أعرفها من دلوقتى (هنتكلم عنها فى موضوع قادم).
3) ركز فى دى أبوس إيدك ، أنت متعرفش إن كل الوزارات بتطلب
خريج علوم ! وده موجود فى موضوع وظائف المتاحه لكليه علوم على الموقع ، بس طبعا
اﻻلتحاق بيها له شروط معينه ونتفق إن فيه نوع من الكوسه بس اتحرك أنت بس.
4) التمهيدى والماستر والدكتوراه والسفر بره يا دكتور يا عالم
!
ج / طالب تالت نفسى ومحتاج أبقى دكتور وأفيد
المرضى
الحل / بس كدا طلبك عندى
1) هو فيه حد وهو لسه طالب فى كليه ممكن يشتغل فى معمل وياخدله
1000 جنيه بجانب دراسته ولو شد حيله شويه وبدأ بدرى ممكن يفتح معمل وهو لسه طالب!
طاب إزاى ى عم ؟!
أقولك .. أبدأ من سنه اولى او تانيه ركز جدا فى التحاليل لمده
سنه ل سنتين الخبره عندك هتزيد جدا لو وصلة للمرحله دى قدامك طريقتين اﻻولى هتأجر
تصريح من 400 ل 500 جنيه أو تدخل شريك فى معمل (هو أنت مش خبره سنه او سنتين ومعاك رأس مال !) التانيه تدخل قسم من أقسام الكيمياء واول ما تتخرج تاخد دبلومة لمدة سنة وتفتح معمل بأسمك ...مستنى إى ؟!! وممكن تفتح سلسله معامل وتطورها وتبقى براند محترم وبتدخل فلوس
كتيييير جدااا.
ج / طالب رابع محتاج ابقى رائد أعمال
الحل / بس كدا طلبك عندى
1) شغل البيوتكنولوجى بقى والمشاريع الخاصه Composting , Biogas ,
Recycling ... الخ
2) هو فيه خريج أول ما بيتخرج بيشتغل بتخصصه على طول ك كميائى
أو بيولوجيست فى شركات اﻻدويه ومصانع اﻻغذيه ومرتبها من 3000 جنيه وطالع.
3) ودى بعض من مسميات الوظايف اللى بتشغلها ال QC وال
RO وال QA وال
Production
Specialist و ك Chemist .
4) أنت متعرفش إن مافيش شركه فى مصر اللى وﻻزم تلاقى فيها خريجى
علوم (عشان نظام الجوده) واتكلمت فى النقطه دى مره فى موضوع إزاي ادخل مجال السلامة والصحة المھنیة؟ وكمان موضوع ادارة الجوده الشامله فى المعامل الطبيه
وكمان موضوع سلسله
حلقات مصنع مصر.
5) هو أنت متعرفش أنك لو حابب شغل المصانع ممكن تأسس مصنع
ﻻنتاج منتج معين (خبره + رأس مال) ، انا عارف إن الكلام سهل بس والله ممكن تعمل
كدا فعلا.
ج / طالب خامس محتاج ابقى مدرس وأدى كورسات
الحل / بس كدا طلبك عندى
12) الناس اللى حابه مجال التدريس والكورسات دا أنت لو متمكن
ممكن تاكل الشهد من الكارير ده والله وسهل جدا تثبت نفسك فى النقطه دى وشغلك بقى ف
ال Co-working
Space وعيش.
#ختاما
حابب أختم بالجمله اللى كلنا بنرددها دايما وهيا يا عم بتاع طب
بيتقله يا دكتور وبتاع هندسه بيتقله يا باشمهندس وبتاع علوم بيتقله إيه ايه ؟!
سيبك من المسميات أبوس إيدك ، المهم أنت بتعمل إى ؟ وهتعمل إى
؟
نصيحه و هنقولها علنا ، أفضل أقسام علوم فى السوق هيا :
1) أى دبل كورس ودا بتدخله من بيولوجى
2) بيوكميسترى وكيمياء (دبل كورس)
3) ميكروبيولوجى سبيشيال
4) ميكروبيولوجى كيمياء (دبل كورس)
5) بيوكميسترى اسبشيل
يا جماعه الناس الدبل كورس زى حيوان كميا وحشرات كميا ونبات
كميا انت كدا برنس فى السوق والله وهتشتغل ك كميائى إنما الناس اللى عايزه تتعين
فى الكليه خليكوا فى ال special
والله العظيم
شغل علوم كتير جدا ومجالها فظيع بس احتكوا بالناس النضيفه اللى فاهمه الكليه.
السلام عليكم أرجو الرد سريعا انا طالبة في رابعه تربيه رياضيات خاص المنصورة حلمى ادرس برمجه بعلوم المنصورة و اكون معيده فيها فهل لو عملت دبلومه فى علوم الى هيا عباره عن دراسة ثالثه و رابعه احصا وحاسب بعلوم وازاى بيتم حساب المعادله مع العلم ان تقديراتى مش عاليه وازاي بتتعادل المواد الى درستها قبل كده
ردحذف