موضوع بيحكى عن قصه حياه طالب حقيقيه مر بيها من
اول دخوله الكليه حتى تم تعيينه وأنا وفريق علومنجى دوت كوم سمناها بالاسم
ده لانها فعلا تعتبر حكايه (قصه زى بتاعه طه حسين كده) .
والهدف من الحكايات
دى اولا الافاده يعنى هتفهم انت ممكن تمر بايه وازاى تتغلب عليه وثانيا
تفادى أخطاء الغير وثالثا خبرات مش بتيجى فى يومين لا دى خبره سنين زى ما
بيقولوا ... اتمنى تستفيدوا وتفيدوا الغير بالسلسله دى تحت مسمى "فيد
واستفيد".
# نصيحة
لكل الخريجين الجدد والطلاب (حكايه طالب)
انا
مين ؟ انا ايه سيد حديثه التخرج من علوم عين شمس شعبه ج/جف ... بعمل
ايه هنا ؟ هحكى حكايتى من بدايه دخولى علوم لدلوقتى باختصار
طبعا دخلت علوم زى ناس كثير مش طايقاها
بس كعادتى قلت هعمل اللى عليا والباقى على ربنا... كنت احضر المحاضرات و اذاكر عادى
مش بفحت نفسى مذاكرة زى ما الناس فاكرة بفهم
الحاجة و اذاكر قبل الامتحانات الطبيعي يعنى
أفتكر اول نتيجة ليا كنّا بدانا الترم التانى و نتيجه الترم الاول طلعت و الناس
كلها خرجت تشوفها الا انا و كام حد كمان و جيه واحد من الدفعه قال تحبوا اجبهالكوا؟
قلتله لا شكرًا جيه بعديها ب شويه قال انا جبتها و غالبا كده يا ايه انتى الاولى ما
شاء الله قعدت اضحك ضحك!!! لا يمكن طبعا أكيد
بيهزر انا اصلا كنت بخرج اول ما نص مده الامتحان تعدى و كنت بحل اللى عارفاه و اسيب
الباقى! أفتكر فى امتحان الجيولوجيا خرجت بعد نص المده لقيت د/عادل رمضان بيقولى انتى
متاكدة انك حليتى حاجة ؟؟ ... والصدمة
ان كلام الولد طلع صح و كنت الاولى .. حسيتها رساله و اخدت النيه انى هكمل على النهج
دا مع الأخذ فى الاعتبار شويه مقاييس تانيه ( انا هفضل زى7 ما ما انا ايه ب اسلوبها
ب شخصيتها مش هخبى على حد معلومة لانه كلام فارغ مش هضايق حد هفضل بشوشة و اضحك فى
وش الناس حتى لو جوايا كلاكيع ) ... قضيت
الأربع سنين كده و كل سنه كنت بنضج اكثر طبعا علما و فكرا و اجتماعيا و كل حاجة
... اول أسباب نجاحى هو اليقين فى الله يليه
اهلى و اقرب الناس ليا
وحاجة كمان ، ايه هى ؟ متبخلش
على حد ... بمعنى لو بإيدك تساعد حد فى حاجة مترددش ... أفتكر
كان فى محاضرات كنت بكتب فيها باستفاضة مميييييته لمجرد بس ان الناس اللى محضرتش و
جت تقرا تحس انها فاهمه كل حاجة و مفاتهاش حاجة من المحاضرة فى حين انى مش مضطرة اعمل
كده! بس حقيقى كنت بلاقى ربنا فتح على و يسر لى أمور كنت مستصعباها و كده .. أبقى
مضايقه و الاقى حد زعلان و كده اروح اهديه و أتكلم كثير فى حين انى محتاجة انا اسمع
الكلام دا اصلا! .. و ارجع فى المقابل الاقى فجاة نفسيتى ارتاحت و هديت وهكذا... خلصت
رابعه بنفس النهج و حققت اللى كنت عايزاه بفضل الله و انا هدفى انى عايزة أنفع ب علمى
الامه و الاسلام و المسلمين و هيفضل أن شاء الله لحد اخر يوم فى عمرى .. عدى
حوالى ٣ شهور من الاجازة و ابتديت أزهق كنت بتعلم حاجات بس كله فى البيت اونلاين باخد
كورسات او أدى دروس انجليزى و كده .. لقتنى
مخنوقه قمت صليت ركعتين قبل الفجر و دعيت انى عايزة حاجة أوصل بيها لهدفى .. عايزة
أقف على اول الطريق..كنت حاسه انى مقصرة اوى .. فجاة و بدون مقدمات قلت اما افتح اقدم
اونلاين على الشركات فى مجالنا جايز و فعلا قدمت فى شلمبرجير و كده ... خلال وقت قليل
جداا لقيت إيميل ان شلمبرجر عايزنى اعمل انترفيو! اتوترت ايه دا هو الموضوع قلب جد
كده ليه .
فى نفس ذات الوقت الأمل كلموني عشان الامتحان
الأونلاين و هوبا امتحنت و هوبا نتيجة الناس كلها طلعت الا انا متبعتليش إيميل ولا
حد عبرنى فين و فين كلمت ناس من الأمل و سألتهم
قالولى للأسف الscore بتاعك كان قليل و معدتيش و
الحياة مشيت موقفتش بل بالعكس حبيت التجربه و اتعلمت منها و مش كل حاجة لازم تجيلك
خليك على يقين ان ربنا كاتب لك اللى فيه الخير و شايلك الاحسن
بعد ما شلمبرجر كلمونى اتعملى اول انترفيو
و عديت و جيه معاد التانى اتوترت أكثر بس رجعت قلت هيجرى ايه يعنى ؟ هروح أقول الكلمتين
اللى عارفاهم و اجى مش هموت يعنى !
كنّا حوالى ١٠ و اتعملى الانترفيو ااااخر
واحدة ناقصه توتر بقى
فضلت كثيييير مستنيه رد منهم فوق الشهر
و أكثر وابتديت افقد الأمل و قررت أبدا أفكر فى طريق تانى و فعلا بدأ يدخل فى دماغى
التدريس و دى حاجة انا بحبها .. و لسه هكمل فى الموضوع .. هوب هوب لقيتهم بيكلمونى
من الشركة
You are accepted !
ايه دا ؟؟ و امتى و فين و ازاى ؟ كلها
اساله لحد دلوقتى انا معرفش إجابتها بس يقينى فى الله بيقولى انها من الطرق اللى هتوصلك
للى انت عايزاه .
حاجات كثير حصلت و بتحصل و هتحصل و كثير
بنتخيل انها ممكن متحصلش بس مع شويه تعب و ثقه بتبدا تتحط على اول السلم
طب انا حكيت على الحاجات الحلوة ، هل
دا معناه ان الحياه وردى ؟ لا خالص فى وسط الحاجات اللى قلتها واللى مقلتهاش كان فى
زحاليق كثير و وقعت كثييير وتعبت و مواقف عدت عليا خلتنى حرفيا مدمرة و كنت قربت ارجع
للصفر من تانى و اخد قرارات مش صح.. بس الفكرة انك متسبش نفسك ل دا ، قوى نفسك حصن
نفسك و خلى حواليك ناس مصدر طاقه و دفعه وابعد عن الناس اللى تجيبك ورا .. الحياه
متعبه و محتاجه مجهود و دا امر مفروغ منه بس احنا لازم نتعب و نجتهد عشان فى الاخر
نشوف نتيجه الحصاد اللى غرسناه "ولقد
خلقنا الانسان فى كبد" ... متياسوش
و عافروا و بقول الكلام دا لنفسى قبلكم
