إزاى تشتغل من غير واسطة

بِسْــــــــــــــــمِ اﷲِالرَّحْمَنِ الرَّحِيم

 

هذا المقال هو وجهة نظر فريق الموقع عن موضوع هام وهو العمل من غير واسطة ومهم لكل طالب يضعه فى اعتباراته ، كل اللى مطلوب منك تفهم اللعبة بتتلعب إزاى وإزاى توصل من غير واسطه صح مش كلام على الهوا زى ما بيقولوا وبدون تطويل ندخل فى الموضوع.

أول حاجة لازم تبقى عارف إنه فيه 4 طرق للتعيين لأى شركة أو مؤسسة مش من ضمنها الواسطة:

1. التعيين من داخل الشركة – Internal Hiring:

حوالي 5% من التعيينات بتتم بالطريقة دي واللي بيحصل فيها إن الشركة بتعمل إعلان للموظفين بتوعها لو حد فيكم عنده المؤهلات الفلانية للوظيفة كذا يقدم عشان تديهم فرصة يطوّروا من نفسهم ويكبروا.

2. البحث المباشر:

دي بقى بتمثل حوالي 10- 15% بيبدأ شارلوك هولمز الشركه المعروف بـ “الـHR “ يبحث بنفسه عن أشخاص عندهم مؤهلات للوظيفة المطلوبة سواء على مواقع التوظيف الكتيرة أو موقع LinkedIn الشهير أو في اللى كانوا باعتين الـCV بتاعهم قبل كده.

3. الإعلانات:

اللي إحنا بشوفها بقى كل يوم دي في الجرايد ومواقع التوظيف وغيرها ودي كلها بتمثل من 20-30% بس.

4. نيجى بقى لمرحلة الوحش :

شبكة العلاقات أو بنقول عليها الـNetworking ودي بتمثل حوالي من 60-65% من إجمالي التعيينات اللي بتم في معظم الشركات.

• مبدئيا لازم نفرّق بينها وبين الواسطة اللى بتبقى مش معتمدة على الكفاءة وبيبقى فيها فساد ... في الـNetworking اللي بيحصل إن شخص في دايرة علاقاتك بيشوفك كفء للوظيفة الفلانية لأنه اشتغل معاك وعارف قدراتك فبيرشحك للمدير ، وبرضه المدير هو اللى هيوافق أو لأ.
• الـ Networking بتكون معتمدة أساسًا على المهارات الاجتماعية ليك والاحترافية في التعامل مع الأخرين.
• الـ Good Connection إنك تبقى عارف أشخاص ومعارف فى المجال بتاعك ومجالات تانية كمان.
• الـ Bad Connection إنك تعرف الناس بس عشان مصلحتك ، وتكون أناني ومستغّل للى قدامك.
• على عكس ال Good one فأنت بتتعرف على ناس وتشوف تقدر تتعاون معاهم إزاى ، وأكيد كل الناس عاوزة تفيد وتستفيد فزىّ ما بتطلب خدمات المفروض تقدّم خدمات فى المقابل.
• الـ Networking مهارة مش هتتعلمها ألا بالممارسة.
• Network everywhere سواء فى أى ايفينت تحضره أو عمل طلابي أو مؤتمر أو على النت أو فى أى عمل تطوّعي.
• مهم تعمل Personal Branding أو تسويق لنفسك ويبقى فيه ناس كتيرة خاصة اللي في مجالك عارفين إنك شاطر ومن أفضل الناس في المجال ده.
• Always ask for information and never ask for a position or a job لأنه لو شايفك أصلًا تستحق الوظيفة هيرشحك ليها من غير ما تطلب.
• متبقاش زنّان فى طلبك.
• خليك واثق فى نفسك إنت مش بتشحت.
• لو مساعدته وصلتك للي أنت عاوزه: لازم تحط فى اعتبارك إنهم مش مجرد مرحلة عابرة فى حياتك وطالما خلّصت مصلحتك منهم تختفى وخلاص ، دى عملية مستمرة طول الـ career بتاعتك ، ويا عالم هتحتاجهم إمتى تانى ، مينفعش تختفى مرة واحدة ، وفجأة تظهر لما تكون محتاج حاجة (متبقاش شبح) .

ها عرفت هتعمل إيه ولا لسه؟ مستنيين ردودكم ، دى مجرد وجه نظر.