تكمله لسلسله "تجروبتى مع كليه العلوم" هحكى ليكم النهارده عن تجربه جديده لزميله لينا فى سنه رابعه قسم كيمياء / حشرات ... اتمنى تستفيدوا.
واللى حصل معانا فى سنة أولى علوم كالتالى :
1- بعد الفرحة بالبالطو الجديد وأدوات الكميا والذى منه عاوزه أتكلم عن أول أسبوع محاضرات كان حاجة أستغفر الله مش علشان صعوبة المواد خالص لكن عشان كله كان بالأنجليزى.
2- كل الدكاترة داخلين بيتكلموا أنجليزى وأنا كنت مدارس عربى مش لغات وطبعاً تعبير انى مش فاهم حاجه كان مسيطر بشكل وحش وبالرغم من انى كنت مبخرجش من المحاضرة بأكتر من 20% فهم بس كنت بحضر.
3- بعد اول أسبوع بالظبط هاتك يا تخبيط بقى , بتقعد طول اليوم معامل , ميد تيرمات بالهبل , شيتات للدكاترة و فروع بتخلص وفروع بتبدأ و أحنا لسه مفتحناش القديم ! والتيرم جرى و أنا معرفش حاجة عن المنهج النظرى وجيه الفاينال (حبيب الملايين) ... هنا بقى مكنتش عارفه هتصرف إزاى ومكنتش حاسة أنى ممكن أنجح أصلآ .... بس أنا كـ ليلى بحب أعمل اللى عليا للأخر وأسيب الباقى على ربنا .
4- وبالفعل بدأت مذاكرة النظرى وكنت بفتح الكتب وكنت بترجم الكلام كلمة كلمة (وللعلم بالشئ مكانش عندنا WiFi ولا كان معايا آندرويد وكنت بفتح ع الرصيد ) كنت بدخل الأمتحان بأكتر فرعين أو 3 عليهم درجات ومكنتش بلحق أذاكر باقى الفروع بسبب البطئ فى المذاكرة اللى كان بسبب اللغة والحمد لله نجحت أول تيرم وجبت جيد مرتفع وموضوع اللغة بعد كدة بقى بيتحسن تلقائى.
5- بالمنسابة بعد سنة أولى أشتغلت مدرسة علوم وبدأت ادى دروس خصوصيه فى science كمان (^_^).
الخلاصة بقى
- علوم_مش_سهلة
- المناهج_مبتتلمش_أخر_شهر
- أعمل_اللى_عليك_على_قد_ما_تقدر
- مش_أى_عقبة_تحبطك
- عافر_هتوصل
يشكر فريق الموقع صاحب التجربه Laila Gamal
