تكمله لسلسله "تجروبتى مع كليه العلوم" هحكى ليكم النهارده عن تجربه جديده لزميل لينا لسه فى سنه رابعه لكن بيحب الكليه شويه.
من صغرى وانا بحب مادة العلوم وعندى حب استطلاع اعرف أى حاجة وليه بتحصل وازاى.
- كنت استلم الكتب بتاع العلوم وأفضل أقراها كلها وبالذات المعلومات الاثرائية إلى كانت بتبقى زيادة ملهاش علاقة بالمنهج وكبرت وأنا بحب العلوم طبعا فى 3 ثانوى كله بيبقا نفسه ف أعلى حاجة وكنا بنذاكر كتير ولما ظهرت النتيجة والتنسيق لقيت نفسى جايب علوم مع ان الواحد كان زعلان أنه فوت كليات زى هندسة و صيدلة وطب إلا انى كنت فرحان انى هدخل كلية هدرس فيها الحاجة إلى بحبها من صغرى.
- ودخلت علوم والناس كلها تقول أنها صعبة والناس بتشيل مواد ومحدش بياخدها فى أربع سنين والكلام إلى احنا عارفينه ده إلا انى كنت بتجاهل اى كلام سلبى زى ده وأول سنة طبعا كله بيبقى تايه وانجلش فى أنجلش والمحاضرة فين والسكشن وشرح ضفادع وأروح المغرب وملحقش اذاكر فكنت لما أحضر حاجة أركز فيها وخلصت السنة ولقيت نفسى جيد جدا بشوية مذاكرة صغيرين مع شوية تركيز ف السكاشن والمحاضرات ( دا الموضوع طلع سهل اهو ☺)على عكس الناس كلها إلى تقول علوم صعبة.
- علوم مش صعبة علوم مفتاحها الفهم وعدت تانية وثالثة بجيد جدا مرتفع الحمد لله من غير ما أذاكر 24 ساعة ولا أموت نفسى ولا حاجة ومش انا بس وزمايل كتير اوى ليا إلى هيخش الكلية دى هيحس اد ايه العلم مهم وليه قيمة وقيمتك انتا كمان كطالب فى علوم.
- إبعدوا عن اى حد يحبطكوا غالبا الناس دى بتبقى فاشلة فى حياتها وعاوزة الناس تبقا زيها علوم كلية من أروع الكليات ولو رجع بيا الزمن وجبت مجموع طب هدخل علوم برده وربنا يوفق كل واحد يدخل الكلية دى بجد انتا احسن من ناس كتير اوى.
#علوم_كنز_للى_يفهمها
#علوم_تتحب
