تكمله لسلسله "تجروبتى مع كليه العلوم" هحكى ليكم النهارده عن تجربه جديده لزميل لينا شغال وهو لسه بيدرس.
أنا حاليا بتدرب ككيميائى فى شركه معالجه مياه و كيماويات كبيره اسمها YAS Group لسه داخل سنه رابعه (علوم بنها - كيمياء سبيشيال) .
- كنت داخل علوم مش طايقها بصراحه بس حاسس انى هقدر اثبت نفسى فى اى مكان (احسن ما ادفع دم قلبى و ادخل كليه خاصه بعد ما عملت جمع وحى وحاويح).
- أنا مش من المتفوقين اوى و الناس اللى بتطلع من الاوائل رغم انى جايب اخر سنه جيد جدا , بس انا فهمت الكليه صح , وعرفت سوق العمل محتاج أيه و أشتغلت على نفسى سنتين عمال اتعلم حاجات ف مجال الكيمياء و غيره , عملت علاقات هايله مع معظم الدكاتره و المعيدين خارج و داخل جامعتى , لما بحتاجهم بلاقيهم .
- إتطوعت فى انشطه كتير جدا منها تجليات عالم و مصر تعمل و مسكت فرق فى مسابقات تبع وزاره الاتصالات , نظمت مؤتمرات كبيره و قابلت وزراء , سنه كامله مشارك فى 8 مشاريع و مدخلش جيبى ربع جنيه.
- اتدربت فى ميكروسوفت و باكين و فى شركات كبيره غيرهم عملت منها علاقات كتير جدا اهم من العلم اللى خدته من هناك ... حاليا بفضل الله بقيت كل يوم اقعد مع مديرى شركات بعدد شعر راسى .
- اهم معلومه استفدتها من كل ده ان تكوين العلاقات شئ مهم لاقصى الحدود , حاجه زى الميه و الهوا كده ... انا جالى فتره بعد ما كنت بجيب تدريب بالذل و المرمطه فى المناطق الصناعيه دلوقتى بقى الموضوع يخلص بتليفون واحد ... خلى كل اللى حواليك ناس واعيه لان دول اللى هيرفعوك لفوق , غصب عنك وانت وسطهم لازم تعمل حاجه تنفعك و هتبقى زى الدينامو .
- من احد امنياتى انى اقف اتكلم قدام طلبه علوم كلها و اغيرهم فعلا و اغير تفكيرهم , اتاحت ليا فرصه صغيره فى عين شمس السنه اللى فاتت بس انا نفسى يكون الموضوع على نطاق اوسع بكتير , جايز تكون سنتى الاخيره فى الكليه مخبيالى شئ عظيم اخر .
ربنا مخلقناش عبثاً , فاتعلم , اتعلم , اتعلم .
شكر خاص من فريق الموقع لصاحب التجربه محمد هشام
