دبلومة الميكروبيولوجى علوم شبين الكوم جامعة المنوفية

بِسْــــــــــــــــمِ اﷲِالرَّحْمَنِ الرَّحِيم

تبعا لان ناس كتير بتسأل عن الدبلومات وخاصه دبلومة الميكروبيولوجى فحبيت اعملكوا مقال فى موقع « علومنجى دوت كوم » عن  دبلومة الميكروبيولوجى فى علوم المنوفيه والتى تقبل أعداد كبيرة من الطلبة .

قرار هام لعام 2021

غير مسموح لطلاب المجندين بالانضمام إلى الدبلومات فى شبين حيث لابد من تقديم جواب الاعفاء او نهائة الخدمة العسكرية.

ميعاد التقديم

التقديم فى نص شهر 8 حتى نص شهر 9.

التقديم لهذا العام 2021/2020 هيكون بداية من منتصف شهر اغسطس حتى آخر شهر سبتمبر.

أعلان دبلومات الميكروبيولوجى ، وعلم الدم ، والتحاليل الوراثية والكيمياء الحيوى

الاوراق المطلوبه

1- عدد 2 صوره البطاقه الشخصيه (الرقم القومى) . 
2- شهاده الميلاد كمبيوتر " اصل – صورة". 
3- شهاده التقدير 4 سنوات (شهادة بيان الدرجات) "أصل –صورة" . 
4- عدد 7 صور شخصيه . 
5- شهاده التخرج "أصل وصورة". 
6- أفادة تسجيل على النت "رابط التسجيل الالكترونى أو  رابط آخر" .
7- موافقه جهة العمل او اقرار بعدم العمل. 
8- اصل شهادة تأديه الخدمه العسكريه او الاعفاء منها (صوره شهادة التجنيد). 
9- عدد 2 ملف بلاستيك. 
10- شهادة البكالريوس المؤقته. 
11- أستمارة الكشف الطبى من الادارة العامه للشؤن الطلابيه "الادارة الطبية"
12- شراء ملف من ادارة الدراسات العليا بالكلية. 

 الكشف الطبى بيتعمل من الادارة الطبيه وأول سنه يتنفذ كانت فى 2017 ، وبتخلصها من الادراه الطبيه عند كلية تربيه فى البر الشرقى وبتدفع 200 جنية طوابع زى اللى فى الصورة اللى تحت. 

تعليمات هامة

• هتوصل الكليه هتطلع الدور الرابع عند شئون الدراسات العليا هتاخدوا اذن دفع تنزل بيه تدفع فى الخزنة فى الدور الارضى (200 جنية مقابلة + 150 لسحب الملف) وهتطلع تانى تسحب ملف التقديم (كده أنت طلعت الدور الرابع و نزلت الارضى ثم طلعت الرابع ثاني و على رأي المثل "ياطالع التاني مسيرك تنزل تاني") وبيكون فيه شهاده صحيه بتخلصها من الادراه الطبيه عند كلية تربيه فى البر الشرقى ولازم تروح بدرى شويه قبل الساعه 1 علشان تخلص كله فى يوم واحد ... ماينفعش اي مكان تاني غير الادراه الطبيه ومواعيدها من 9 ل 1. 
• بالنسبه للتقديم فيه أفادة تسجيل على النت "التسجيل الالكترونى" بتطبعها وتجبها وانت جاى أو بتروح تسجل وتطبع فى اى مكتبة جنب الكليه عادى ب 5 او 10 جنيه. 
• تمهيدي كيمياء حيوي كان قفل سنة 2018-2019 في كلية علوم شبين الكوم جامعة المنوفيه. 
• الناس اللى مطلعتش لسه الشهاده ومش معاهم غير افاده فهما قالوا مش هيقبلوه بتعليمات من العميد فلازم العميد يتواصل مع رئيس الجامعه علشان يقبلوا الافادات وهتكتب تعهد على نفسك انك تسلم الشهاده وده برضه كلام رئيس قسم الكيمياء. 
• لازم شهاده التخرج يكون فيها النسبه المئويه للتقدير بتاعك والإ هتترفض. 

مصاريف الدبلومة

• مصاريف التقديم: 590 جنيه (لان فى مصاريف مقابله شخصيه "200 جنية" ومظروف "150 جنية" وكرنيه "35 جنية" وكشف طبى "200 جنية" ورسوم دخول امتحان "5 جنية" ) .
• مصاريف الدبلومة: بـ 1500 جنيه.
• مصاريف الكتب: حوالى 1000 جنية.

 للعلم! المصاريف بتندفع كامله وانت بتقدم ومفيش تقسيط أو تاخير لحد القبول لان طالما ملفك اتسلم فانت كدة غالبا قبلت.

مصاريف الدبلومات لعام 2020

طابع كشف طبى

أفضل مكان لنيل الدبلومه من استطلاع للحاصلين على الدبلومه  في علوم :

اسكندرية (أشهر دبلومة تحاليل في الجمهورية وبتخرج كل سنة 700 أخصائي)

شبين الكوم ( بدأت تشتهر برضه بتخرج حوالي 700 )  

الإسماعيلية ( بتخرج حوالي 1000 أخصائي) .

طيب إيه أرخصهم وأسهلهم ؟؟؟

احذر هؤلاء : المنصورة (معقدين أوي )

تحاشى هؤلاء : اللي بيدخل ما بيطلعش إلا نادرا  

شبين (خرجت سنه 2017 من اعتماد وزاره الصحه علشان تاخد التراخيص لان محتواها سئ) - طنطا (البعض بيقولوا صعبة لكن انا بقولك انها سهله لكن محتواها مش عالى)

ارشح لك دول : الزقازيق و الإسماعيلية (سهله) - اسكندرية (كويسه) - بنها ( وأنت واقف).

نظام الدراسة

الحضور مش مهم غير لو فى ميدترم

الدراسة بتكون يومين او 3 أيام

المقررات الدراسية

الأعتماد

للأسف دبلومه ميكروبيولوجى علوم شبين الكوم خرجت سنه 2017 من اعتماد وزاره الصحه علشان تاخد التراخيص لذلك لابد للحاصلين عليها من رفع قضية للحصول على تراخيص فتح معمل.

دبلومه ميكروبيولوجى معتمده فى حلوان والقاهرة والمنصورة وبنها وبنى سويف وبورسعيد والأزهر.

الدبلومات المعتمدة فى الكيمياء الحيوى والميكروبيولوجى

للتواصل والأستفسار

رقم تليفون شئون علوم شبين

ت: 0227921085
ت: 0227921091
علشان تبقي تتصل وتسأل

بعض الأسئلة وأجابتها

ثانيا هتعملى ايه دبلومة الميكرو دى لما اخدها ؟؟؟ يعنى هل دبلومة الميكرو بيولوجى ممكن افتح بيها معمل ؟؟؟؟

طبعا اه .. بس بعد حوارات اسمع ايه هى الحوارات دى :

لازم ثم لازم انك تكون دارس كيميا  ف البكاليريوس  يعنى + اى حاجه تانى

طاب لو انا مش دارس كيمياء  اعمل ايه ؟؟؟

فكك من الموضوع ده اصلا واكتفى بانك تشتغل ف معمل او تشارك حد عنده تصريح لو عندك طموح ف حدوتة فتح المعمل

يعنى ايه متعصبنيش مانا درست كيمياء كتير ف اولى وتانيه ؟؟؟؟؟

يعنى تعمل معادله و تدرس سنتين تانى كيميا وبعد السنتين  لو انت بكالريوسك نبات مثلا  هتبقا كيميا ونبات .. ويدينا ويديك طولة العمر

طب لو قولت عادى نستحمل سنتين تانى بس يبقا عندى معمل ؟؟؟؟؟

خلى بالك حتى لو عملت المعادله  مع دبلومة الميكروبيولوجى  هتاخد ترخيص بالميكروبيولوجى بس.

يعنى ايه معمل ميكروبيولوجى بس دى كمان ؟؟؟؟؟؟؟

يعنى تفتح معمل عشان تعمل فيه اليورن والاستول والسيمن والمزارع وبس ولو جاتلك وزارة الصحه ولقتك بتعمل  تحليل سكر مثلا او عندك جهاز كيميا  او اى شىء من هذا القبيل  هتقفلهولك وش ….

لكن الحل واضح وصريح  وهنقول مثال للتوضيح :

لو انت نبات سبيشيال او ميكرو سبيشيال او  او   اى حاجه مفهاش كيميا وبتعمل دبلومة الميكرو  وبتدرس خميره  … الخ

 اليك الخطوات التاليه :

1. بعد ماتخلص الدبلومة تقدم على معادلة كيمياء
2. بعد ماتعمل معادلة الكيميا تعمل كارنيه النقابه عشان يكتبلك اخصائى كدا ف الكارنيه وتحس انك بقيت حاجه
3. بعد ما خلصت معادلة الكيميا  اللى هى سنتين وعملت الكارنيه وكله تبدأ تعمل دبلومة بيو .
4. انت كدا ودرست ف الكلية اربع سنين + دبلومة ميكرو سنه +  معادلة كيميا  بقا سنتين المهم قلنا 4+1+2  = 7   وكمان دبلومة البيو سنه  يبقا 8  سنوات.

ولو لسه فيك الروح بقا هترفع القضيه  هتكسبها بعد سنه ونص على الاقل  يبقا  الحساب كام؟ 

الاجابة  9 سنوات بعدها هتفتح معمل ويبقا مرخص لممارسة البيو والميكرو  فقط .

يعنى ايه ؟؟؟؟ 

يعنى تشتغل فيه كل حاجه خاصه بالتحاليل الطبية  ماعدا الباثولوجى (اللى هو زى التحليل السريرى "الامراض يعنى").