ادارة الجوده الشامله فى المعامل الطبيه -علومنجى دوت كوم-

بِسْــــــــــــــــمِ اﷲِالرَّحْمَنِ الرَّحِيم

 الموضوع ده بيناقش كل ما يخص ادارة الجوده الشامله فى المعامل الطبيه و ايه مراحلها ومعلومات عن كل مرحله وخصوات كل مرحله واهميتها ايضا.


ادارة الجوده الشامله فى المعامل الطبيه: هى التحسين المستمر لجميع خطوات التحليل لارضاء وتلبية متطلبات المريض والطبيب المعالج

تنقسم عملية ضبط الجوده الى ثلات مراحل :
1. مرحلة ماقبل التحليل…preanalytical phase
2. مرحلة التحليل…analytical phase
3. مرحلة ما بعد التحليل….postanalytical phase

اولا : مرحلة ما قبل التحليل:
عاوزين نفكر مع بعض شويه… ايه الاخطاء اللى ممكن نوقع فيها قبل ما نبدا حتى نعمل التحليل واللى بتؤدى الى ان الدنيا كلها تخرب والنتيجه تطلع غلط وسمعة معملك تضيع ؟؟؟؟؟؟

1. اخذ العينه :
ايه الاخطاء اللى ممكن تحصل فى اخذ العينه؟؟
كتييير بص ياسيدى:
1. عدم تحضير المريض : يعنى لو مهيأتش المريض بشكل جيد ممكن متقدرش تسحب العينه منه أصلا
2.جمع العينات ف الوقت الغير ملائم : يعنى تحليل محتاج صيام أخدت العينه حضرتك وهو فاطر ولسه وأكل فول  أو سوشى على حسب مكان المعمل…!!!
3.عدم صحة التعرف على المريض وعدم اكتفاء بياناته : يعنى مثلا السن وكده …لان الريفرنس بيختلف!!
4.عدم كفاية حجم العينه المسحوبه …او ان العينه اتلوثت بميه مثلا
5. لخبطة مواد التجلط …. طبعا انا مبهزرش فعلا .. تكون عينه عاوزينها اديتا حضرتك تسحبها على فلوريد او سترات او على شوية ميه بقى ما اهو خلاص بقت هيصه… لا طبعا التركيز فى الحاله دى فيرى امبورتنت


2. تحضير العينه :
ودى مفيهاش رغى كتير …. ايه الاخطاء اللى ممكن نوقع فيها اثناء تحضير العينه:
ممكن يكون حصل للعينه hemolysis  او تخزين العينات لفترات طويله فى درجات حراره غير مناسبه او تعرضها للضوء او الرطوبه زى البليروبن مثلا :
حد يقولى ليه البليروبن عينته لازم تتلف فى ورق فويل؟؟؟؟
الا بجد (هو البليروبن ده ايه؟؟؟ شغلو الميمورى كده وقولولى انواعه وبنعمله ليه؟؟والجسم بيتخلص منه ازاى ؟؟ ويعنى ايه طفل عنده صفرا؟؟ انا مش هجاوب لكن ده موضوع هطرحه فى وقت لاحق)
نرجع لموضوعنا ….

تانيا: مرحلة التحليل:
ايه الاخطاء او الكوارث ان صح التعبير اللى ممكن اقع فيها اثناء التحليل:
1. اختلاط العينات: يعينى ع الصبر…. ازاى نحل المشكله دى اننا لازم يكون عندنا تكويد للعينات ف المعامل الكبيره باركود.
2.استخدام جهاز او طريقه غير ملائمه : هى النقطه دى فيها كلام كبير جدا بس خاص بالمعامل الكبيره.. المهم يعنى مينفعش تحليل اساسه كالاروميترى اروح اعمله تربيدوميترى مثلا …. حد فاهم حاجه؟؟؟؟
ابسطهالكم .. يعنى لازم اعمل التحليل على الجهاز بتاعه …. وللى جاى هيوضح اكتر
3. استخدام محاليل منتهية الصلاحيه: لذلك لابد التاكد من الصلاحيه
4. الاجهزه المستعمله لاتعمل بكفائه: يعنى لازم اتاكد ان الجهاز مضبوط ومعموله صيانه دوريه وكاليبراشن وكواليتى كونترول.
عندك.
ف المعامل الكبيره  في حاجه اسمها عينات ضمان ضبط الجوده الداخليه وعينات ضمان ضبط الجوده الخارجيه واللى بيهم نقدر نتلاشى الاخطاء اللى بتحصل اثناء التحاليل ” مرحلة التحليل ” واللى بتبقى ناتجه عن عيب ف الجهاز
اوضحهالكم اكتر:
1. internal quality con.
هى عباره عن عينات معلومة التركيز يتم ادخالها على الاجهزه قبل ادخال عينات المرضى يوميا وأذا اعطت نتائج ف حدود المسموح يبقى تحط عيناتك وتشتغل وانت مطمن وأما اذا اعطت نتائج خارج المسموح يبقى لازم تشوف العيب فين بدأ من صيانة الجهاز والتاكد من سلامة المحاليل ….. الخ المهم تضرب الارض تطلع نتايج ف المدى المسموح والا ماتشتغلش على الجهاز ده اساسا.

حديث جانبى :
هو ايه القصه دى : القصه دى عباره عن مواد معلومة التركيز ف المستوى الطبيعى والمرضى مثال precinorm & precipath   النورم كعينة شخص سليم معلومة التركيز والباس كعينة شخص مريض برده معلومة التركيز احطهم على الجهاز بعد عمل الكاليبريشن طبعا واشوف النتايج لو طلعت ف المدى المسموح اقدر احط عيناتى وانا مطمن… ولكم ان تتخيلوا لو اخدنا مثال بالسكر مثلا عملنا الكاليبرشن وبعدها الكواليتى بالنورم والباس … فمثلا النورم المدى المسموح بتاعه من 10-25 مثلا طلعت نتيجته 30 اذن كل نتايج السكر اللى هتتحط على الجهاز هتطلع اعلى من الطبيعى بنسبة ال 5 الزياده لو لم نعالج الخطا …. وهكذا ف النقص.

2. external quality con.
منها نظامين:
أ.نظام الجوده الامريكى CAP excel
وده اختصار لاي حد يعرف…. انا مش عارفه؟؟؟
ب. نظام ضبط الجوده البريطانى RIQAS
من اسمه يعنى بريطانى
العينات دى بترسل من الخارج للمعامل يعملوا لها التحاليل وترسل النتايج ليهم تانى يقارنوها بالنتايج عندهم  والتى لها نفس الظروف كالجهاز والطريقه
عرفتو بقى يعنى ايه ريكس وايزو اللى واجعين دماغنا بيهم؟؟؟
طبعا المعامل الصغنونه تعمل برضه ريكس وايزو بس مع المعامل اللى جنبها يعنى بتاع الشرابيه يبعت امبابه وبتاع المنشيه يبعت المطريه وزيتنا فى دقيقنا وكده…. وربنا يستر!!!!!

ثالثا : مرحلة مابعد التحليل:
من الاخر كده المشكله ف الجزء ده…. هى نتايج غلط
ونحلها كالتالى:
1. لازم حد يكون متمكن وفاهم صح يراجع نتيجة التحليل كويس ويمضى عليها.
2. لازم تكون النتايج متوافقه مع بعضيها ومع السجل المرضى ومع النتايج السابقه…. الخ
3. لازم تكون النتيجه خاليه تماما من اى اخطاء هجائيه او املائيه…انتو فاهمين طبعا .
نختم بقى عشان انتو اكيد اتخنقتو منى :
يعنى ايه ايزو ISO   ؟؟؟؟
بالبلدى كده ومن غير تعقيد ده نظام مراقبه وجوده بتطبقه المعامل الكبيره عشان تتاكد ان القواعد اتطبقت على التلات مراحل للجوده اللى احنا قولناهم… وكمان بتعمل دورات مستمره للتدريب العاملين وبتراقب الاداره وأدائها.