المعلومات الكامله عن كليه العلوم جامعه القاهره

بِسْــــــــــــــــمِ اﷲِالرَّحْمَنِ الرَّحِيم

كليه العلوم جامعه القاهره تعد من أوائل كليات العلوم على مستوى الجمهوريه وهى رابع كليه من حيث النشأه فى جامعه القاهره ويُذكر أن كلية العلوم جامعه القاهرة كانت قد حصلت علي الإعتماد في الفتره الأخيرة .

الاوراق المطلوبة للتقديم

1. اصل شهاده الثانويه العامه
2. اصل شهاده الميلاد
3. صوره البطاقه الشخصية
4. نموذج 2 جند (للطلاب الذكور فقط)
5. عدد 6 صور شخصية الطالب
6. مصاريف دراسية  + طوابع
7. صوره لبطاقة الترشيح

ميعاد التقديم

غالبا بيكون من منتصف شهر 9 حتى آخر شهر 10 من كل عام

مصروفات الكلية

حوالى 1600 جنية لعام 2022/2021 .

تنسيق الكلية

فى عام 2022/2021

علمى علوم

340.0

علمى رياضة

291.0

فى عام 2021/2020

علمى علوم

394.5

علمى رياضة

351.5

فى عام 2020/2019

علمى علوم

394.0

علمى رياضة

365.0

فى عام 2019/2018

علمى علوم

387.5

علمى رياضة

363.5

فى عام 2018/2017

علمى علوم

382.5

علمى رياضة

 347.5 

خطوات تقديم الملفات للكلية

خطوات تقديم الملفات للكلية

استمارة التحاق بكلية العلوم

استمارة التحاق بكلية العلوم1

استمارة التحاق بكلية العلوم2

تعمل بنظام الساعات المعتمدة وبها 24 قسم ، والتخصص فيها بيكون من سنة تانية بعد ما تنجح فى اولى .

سنة اولى

- بتدرس 7 مواد اساسيه .
- 3 منهم اجباري (المادة بـ 3 ساعات معتمده يعنى ساعتين نظرى و 3ساعات عملى) هتاخدهم سواء كنت علمي علوم او رياضة وهم (رياضة - كيمياء - فيزياء)
- 2 اختياري (المادة بـ 3 ساعات بردو) من الاتى بيأهلوني للقسم اللي انا عايز ادخله في سنة تانيه وهم: 

• مواد اختياريه لطلبة عملي رياضه فقط: (جبر - احصاء - ميكانيكا - جافا).
• مواد اختياريه لطلبة علمي علوم فقط: (حيوان - نبات - حشرات - بيولوجي - بيوفيزياء).
• مواد اختياريه مشتركه لطلبة علمى علوم ورياضة: (جيولوجيا - جيوفيزياء - فلك).

- كده هيبقي فاضل ليك 4 ساعات في الترم الأول وزيهم ف الترم التاني .. ودول بقي لحاجة اسمها " المتطلبات " كل الناس بتاخدها سواء رياضة او علوم ،و4 مقررات اسمها متطلبات جامعة: انجلش + حقوق انسان + كمبيوتر + مادة رابعة اختيارية من ( ثقافة بيئية ، تاريخ وفلسفة ، مبادئ قانون ، مبادئ الإدارة والمحاسبة ) ودول لازم تاخدهم فى اى سنة من الاربع سنين بس كنصيحة خدهم فى سنة أولى لانك عندك ساعات فاضية ولان اولى اسهل سنة ، بتاخد 2 ترم أول و2 ترم تانى. 

سنة تانية

علوم القاهرة فيها 24 قسم بتتخص فى واحد منهم حسب رغبتك وعلى حسب التخصص بتاعك بتدرس مواده .

التخصص في سنة تانية بعد ما تنجح فى اولى وعلى حسب رغبتك ماعدا خمسه أقسام بيطلبوا جيد فما فوق غالبا وهم: ((كيمياء منفرد ، كيمياء حيوي ، كيمياء / جيولوجيا ، جيوفيزياء ، فيزياء منفرد ، جيولوجيا منفرد.)) .

أقسام كلية العلوم جامعة القاهرة والموجودة بمعظم جامعات الجمهورية 24 قسم:

1. 7 اقسام متاحة لطلبة علمى علوم فقط
2. 8 اقسام متاحة لطلبة علمى رياضة فقط
3. 9 اقسام مشتركة لطلبة علمى علوم وعلمى رياضة

شروط القبول بالتخصصات المختلفة لعام 2020

اولا: 7 اقسام لطلبة علمي علوم فقط

1. ( كيمياء / كيمياء حيوي ):

لازم عشان تدخل القسم تاخد مادة حيوان ومعاها اي مادة تانية حسب اللي تحبه (بيوفيزياء .. فلك الخ ..... ) من شروط القسم طبعا نجاح الحيوان .. والكيمياء بتقدير جيد جدا بتاخد فيه الاورام وعلم المناعة والهرمونات والانزيمات وعلم الخلاياا وشغله بيكون فـ معامل التحاليل وشركات الادوية والمستشفيات.

2. ( كيمياء / كيمياء ميكروبيولوجي ):

هنا لازم تاخد نبات (في سنة اولى) بقي ومعاهاا اى مادة تانية بردو شرط القسم تنجح فـ النبات في (سنة اولى) وفيه بتدرس الفسيولوجي بتاعت الحاجات المعديه زى البكتريا وفيروسات وحياتها و تأثير الميكروبيولوجي على الانسان والامراض اللي بيسببها و الانزيمات و السموم الميكروبيه و الهرمونات النباتيه .. وشغله فـ معامل التحاليل ومراكز السموم وشركات الكيماويات.

3. ( كيمياء / حيوان ):

وده لازم تاخد حيوان فيه وش ومعاه اى مادة تانية عادي وعشان تدخل القسم لازم تنجح حيوان بس هناا بقي بياخدوا علم الاجنة والفيسيولوجي بتاعة الانسان والحيوان وعلم الدم وفيه تشريح وبتدرس الفقاريات واللافقاريات وعلم الوراثة وشغله فـ معامل التحاليل ومراكز السموم والمستشفيات وشركات الادوية والكيماويات ومعامل الاجنة.

4. ( كيمياء / نبات ):

لازم تكون واخد نبات اكيد واى مادة تانية وتنجح فـ النبات بس هو شبه كيمياء حيوان بس الفرق انه بيدرس الفيسيولوجي في النبات والطحالب وفيه تشريح نبات بردو و شغله بقي في معامل الابحاث و التحاليل و شركات الادويه.

5. ( كيمياء / حشرات ):

لازم اختار ( حيوان و حشرات ) اي ماده اختياريه من علمي علوم بتفتحه- شرط نجاح فى الكيمياء بدرس في القسم ده البيولوجي بتاع الحشرات و تشريح انسجه الحشرات و المورفولوجي بتاع الحشرات و تصنيفات و تقسيمات الحشرات اكيد و علم بيئه الحشرات و علم الطفيليات و الوبائيات و التحاليل الطفيليه و الفيسيولوجي بتاع الحشرات و مكافحه الافات و السيطره عليها و المناعه و الميكروبيولوجي و الباثولوجي للحشرات و علم السموم و شغله بقي في معامل البحوث الزراعيه و معامل التحاليل و الشركات زي الادويه.

6. ( بيوفيزياء منفرد ):

هنا بقي لازم تاخد ( بيوفيزياء وحيوان او بيولوجي ) وعشان تدخل القسم لازم تنجح الاتنين بتدرس تطبيق الفيزياء فـ البيولوجي بشكل عام وكمان القوانين الفيزيائية اللي بتأثر في الجزيئات الحيوية والعمليات الحيوية ... دراسة وظائف العين والاذن والاجزاء التانية من للجسم و كمان ليها تطبيقات في الطب عشان بتفسر للعلاقات الوظيفية بين أجزاء الجسم و في دراسة نظام المناعة ضد الامراض وشغلها فـ معاهد علوم الليزر ومراكز بحوث الاشعاع والبحوث النووية وكمان بيشتغلوا فـ المستشفيات.

7. ( جيولوجيا منفرد ):

لازم تاخد بقي هنا ( حيوان وجيولوجيا ) وتجيب تقدير جيدجدا فـ الجيولوجياا وتقدير عام جيد جدا وهنا بتدرس علم الارض والصخور والمعادن والبترول و شغله فـ شركات البترول و شركات المياه و جهاز شئون البيئه و قطاع الاثار.

ثانيا: 8 اقسام لطلبة علمى رياضة فقط

1. ( علوم حاسب منفرد ):

بص يا سيدي القسم ده انت بتدرس لغات برمجه جافا و هي سوفت و ير و رغم ان حاسبات و معلومات فيها سوفت و ير و هارد وير لكنها احسن لأنها بتدي المواد التطبيقيه في الواقع لكن في علوم حاسب بتاخد نظري كتييييير صحيح دماغك بتبقي اعلي في علوم حاسب لكن المشكله في المواد نفسها لكن انت لو خدت كورسات بره بتبقي اعلي من بتاع حاسبات و معلومات بكتير و "بيني و بينكم بقى " انت اي حاجة هتعملها في اي قسم او حتى اي كلية لو مخدتش فيها كورسات اونلاين و دربت نفسك بنفسك عمرك ما هتبقى حاجة و عشان تخش القسم ده لازم تختار مواد ( احصاء - جبر- جافة - ميكانيا ) .

2. ( رياضيات منفرد ):

هنا لازم تختار ( احصا وجبر ) شرط نجاح ف رياضة عشان تدخل القسم ده لازم تكون بتعشق حاجة اسمها رياضة بكل فروعها وشغله قليل فـ مصر بس احسن حاحة انهم يبقوا ""معيدين"" و براحة مقدمهمش غير كدا.

3. ( رياضة / علوم حاسب):

ده بقي برضه نفس الكلام بس نص المواد من رياضه و نصها من علوم الحاسب .

4. ( رياضة / احصاء ):

نفس الكلام بالظبط زي رياضه و احصا و نفس الواد .

5. ( رياضة / فيزياء ):

قسم اعتبره للعباقره فقط و شغله دكتور اومدرس او في معامل الابحاث بس و شروطه اخد جبر و اختار ماده من ( احصا – فلك – جيولوجيا – جيوفيزيا ) و لازم انجح جبر.

6. ( فلك منفرد ):

زي رياضه فلك بس مش هاخد رياضه الا قليل قوي و نفس المواد الاخياريه رياضه و فلك و نفس الشغل برضه و انجح في الفلك.

7. ( فضاء منفرد ):

هو هو فلك منفرد بالظبط و نفس الشروط و المواد الاختياريه بس الفرق ده فلك و ده علوم جويه.

8. ( رياضة / فلك ):

بدرس مواد رياضه و مواد فلك و شغله في مصر في مرصد حلوان بس و قليل جدا و عشان اخشه لازم اختار ( جبر – فلك ) و انجح في الجبر و الفلك.

9- احصاء منفرد :

نفس كلام رياضيات منفرد و نفس المواد الاختياريه 

ثالثا: 9 اقسام مشتركه متاحة لطلبة علمي رياضه و علمي علوم فى بعض الكليات

1. ( كيمياء منفرد ):

و ده برضه من افضل الاقسام لعلمي رياضه و اكيد برضه ينفع لعلوم زي ما قولنا و الكيميا بقي انتو عارفنها عضويه و حراريه و كهربيه و تحليليه و حاجات كتييييييييييير هتدرسوا كيميا لحد ما تحلموا بيها و انتو نايمين و شغل القسم ده بقي في كل شركات مصر مافيش شركه من غير كيميائي من ادويه و اسمده و مستحضرات التجميل و الشيبسي و البيبسي و كل حاجه لازم يخشفيها كيميائي و طبعا ليه معامل تحاليل برضه يشتغل فيها و شروط القسم اني اختار اي مادتين و اجيب جيد في الكيمتين و جيد تقدير عام و بيختار اعلي 60 طالب متوفره فيهم الشروط و كاتبين اول رغبه كيميا منفرد.

2. ( كيمياء / جيولوجيا ):

ده بقي من افضل الاقسام ده بقي بيشتغل بالجيولوجيا زي ما قولنا فوق ان الجيولوجيا هي علم دراسه الارض و ده بقي شغله الموجود في شركات البترول و شركات المياه و جهاز شئون البيئه و قطاع الاثار و حاجات كده لقي قسم جميل كله بقي شغل صحرا و سفر وحاجات جميله كده و ممكن نشتغل operation ( عمليات يعني ) في المكتب و ده بقي اللي بيعمل الخرايط مش الجغرافيه لأ خرايط تانيه هتعرفوها قدام شويه و مش كده بس ده كمان بيدرس كيميا و بيشتغل بيها و شغل الكيميا بقي في معامل التحاليل و شركات الادويه و الاسمده و ..... قولناها كتير بقي و شروطه اني اختار جيولوجيا و اي ماده تانيه و انجح في الجيولوجيا و كيمياء بتقدير جيد .

3. ( كيمياء / فيزياء ) :

ده بقي قسم مخلط بين الكيميا و الفيزيا نص مواده كيميا و نصها فيزيا و شغله بقي زي اي قسم بيدرس كيميا بقي في معامل التحاليل و شركات الادويه و الاسمده و ..... و بيشغل بقي في الفيزيا في معامل الابحاث و شركات الالكترونيات و الحاجات ديه بقي و القسم مالهوش شروط اختار اي مادتين و اطلع تانيه و خشه علي طول.

4. ( فيزياء / فلك ):

القسم ده برضه زي فلك منفرد و كده بس باخد شويه فيزيا بقي مع مواد الفلك و شغله زي ما قولنا في مرصد حلوان و شروطه اني اختار ماده فلك واي ماده تانيه من باقي المواد الاختياريه.

5. ( فيزياء / علوم جويه ):

القسم ده برضه زي فلك منفرد و كده بس باخد شويه فيزيا بقي مع مواد الفلك و شغله زي ما قولنا في مرصد حلوان و شروطه اني اختار ماده فلك واي ماده تانيه من باقي المواد الاختياريه.

6. ( فيزياء منفرد ):

اقسام العباقره القسم ده عاوز واحد بيعشق فيزيا - شرط نجاح ف الفيزياء بطريقه بشعه المهم دراسته طبعا فيزيات بس كهربيه و حراريه و حدث ولا حرج اكيد انتو عارفين و شغله بقي في معامل الابحاث او دكتور في الجامعه او تاخد سنتين تربيه و تبقي مدرس و في مصانع الاجهزه الكهربيه و شركات بقي تانيه و شروطه اني اختار اي مادتين عادي و اجيب تقدير عام جيد.

7. ( جيوفيزياء ) :

الجيوفيزيا هي تطبيق لقوانين الفيزيا علي الجيولوجيا اللي هي علوم الارض يعني و هي بقي في شغله تعتبر التنقيب اولي قبل ما احفر عشان اطلع الحاجه اللي انا عاوزها من تحت الارض ( بترول - مياه - معادن - ......... ) و طبعا مطلوب في الشغل في شركات البترول و شركات المياه و تبع الاثار كمان بس البترول هو الاكثر شيوعا و شروط القسم اني اختار جيولوجيا و جيوفيزيا و اجيب فيهم جيد.

8. (كيمياء / حشرات) 

يقال انه أصبح مسموح للشعبتين بدايه من 2016

كان فى قسم أسمه فيزياء اتصالات : القسم ده مكنش موجود في مصر كلها غير في جامعه القاهره ( لكن القسم ده اتقفل دلوقتى )

رابعا البرامج الخاصة (متاحه للشعبتين):

برنامج علوم البترول الجيولوجية وبرنامج البيوتكنولوجي (القسم ده بياخد علمي علوم وعلمي رياضة بس بنسبة 2:1 العدد الاكبر من نصيب علمي علوم) ، والتخصص فيهم بيكون من سنة اولى بدون شروط .

مصاريف القسم: كانت فى 2019 بـ 25 الف وكان  بـ 24 الف جنية 2018 وكان بـ 22 ألف فى 2017 وكان فى 2016 بـ 14 الف جنية وكان فى 2015 بـ 12 الف فى السنة + 10% زيادة سنوية .

9. ( علوم البترول الجيولوجية )
10. ( بيوتكنولوجي ) 

ملحوظه: علوم القاهرة تقدر فيها تقدم طلب لوكيل الكلية بانك عايز تتدخل قسم من اقسام علمى رياضة وانت علمى علوم او العكس وهيمتحنك فى احياء او رياضة ثانوي امتحان بسيط وبعدها يتيح ليك انك تاخد مواد القسم اللى انت عايزه فى سنة اولى وتدخل القسم اللى انت عايزه فى 2 .

نظام الساعات المعتمده

بص يا سيدى انت دلوقتى مثلا بتاخد مادة الرياضه ، بتاخد كل اسبوع محاضره وبتاخد سكشن ، المحاضره بتبقى ساعتين والسكشن 3 ساعات فاحنا بنحسب حاجة اسمها الساعات المعتمده للماده كالاتى ان اى محاضره الساعتين بتوعها بيتحسبوا بساعه معتمده ، وان اى معمل او سكشن الساعتين او 3 ساعات بتوعهم بيتحسبوا بساعه واحده معتمده فكده تعالى نحسب الساعات المعتمده بتاعة الرياضه ، محاضره ساعتين = ساعتين معتمدتين ، سكشن تلات ساعات = ساعه واحده معتمده ، يبقى مادة الرياضه كده ب 3 ساعات معتمده ، لو حسبتها فى الخمس مواد هتلاقى انك بتاخد فى التيرم الاول 15 ساعه معتمده بس كده ، يعنى هى طريقه لتحويل المواد الى ساعات معتمده ، ولو اخدت متطلبات جامعة المتطلب الواحد = ساعتين معتمدتين (لان مفيهاش عملى هما نظرى بس) ، ولما تيجى تطلع تانيه مش هيقولك انت معدى كام ماده عشان تطلع تانيه لا هيقولك انت معدى كام ساعه معتمده بس اهم حاجة تكون نجحت فى 18 ساعة معتمدة من مجموع ساعات الترمين "من غير المتطلبات" عشان تطلع سنة تانية (الكلام ده على سنتنا احنا علوم القاهرة 2014 السنة دى كان فى كلام من ادارة الكلية انهم هيزيدوا) .

السمر كورس

هو فصل دراسى للطالب الذى رسب فى مادة او مادتين او ثلاث مواد خلال السنة الدراسية الواحدة ، وذلك بمقابل مادى 600 جنية للمقرر الواحد ابو 3 ساعات اى ما يعادل 1800 جنية لثلاث مواد بتسعة ساعات معتمدة يدرس فيها الطالب المقرر(ات) لمدة 5 اسابيع بمعدل محاضرتين وسكشنين فى الاسبوع الواحد للمقرر الواحد ، ويبدأ الفصل الصيفي بعد اسبوعين من اعلان النتيجة مع العلم ان النتيجة تعلن بعد الامتحانات بيوم واحد فقط ، وتعتبر ادارة الكلية الفصل الصيفي فصلا اختياريا للطالب ، وهو كذلك ، ولكنه فى الواقع يعتبر اجبارى للطالب الذى يرغب فى التخرج من الكلية فى 4 سنوات فقط وليس اكثر ، ملحوظة: السمر كورس للمقرر الواحد كان منذ 5 سنوات ب 50 جنية ثم اصبح ب100 ثم 400 فى سنوات 2012 ، 2013 ، 2014 ثم 2015 اصبح ب 600 جنية للمقرر الواحد صاحب الثلاث ساعات المعتمدة اى بمعدل 200 جنية للساعة المعتمدة الواحدة.

تحديث: السمر كورس لعام 2016 اصبح ب 500 جنية للمقرر 3 ساعات و400 للساعتين و200 للساعة الواحدة 

اعمل ايه عشان منزلش سمر كورس بفلوس او انى اتخرج متاخر؟

بص هقولك انت ادامك 3 اختيارات:

1. انك تذاكر اول باول فتنجح صافى وبتقدير كمان.
2. متذاكرش اول باول فتنزل فى مادة او اكتر وساعتها هتضطر تنزل سمر.
3. متذاكرش اول باول فتنزل فى مادة او اكتر وتختار انك متنزلش سمر وساعتها هتتاخر فى التخرج عن 4 سنوات.

ليه بقى؟ لان المادة اللى انت نزلتها دى مش هينفع تاخدها فى سنة تانية لان كل الساعات اللى عندك مليانه يا اما تاخدها ومتاخدش بدالها مادة من مواد سنة تانية وساعتها بردو هتضطر تاخدها فى السمر بتاع سنة تانية او تاجلها هى كمان لسنة تالتة وهكذا.
وفى مادة بتوقف بعدها مادة تانية او اكتر ، يعني ايه بتوقف؟ يعني مينفعش تاخدها الا لما تنجح في الاولانية اللى بتوقفها مثال: رياضة 1 بتوقف رياضة 2 ورياضة 2 بتوقف رياضة 3 ، فلو انت جيت نزلت فى رياضة 1 واخدتها ترم تانى فهتضطر بعد ماتنجحها انك تاخد رياضة 2 فى السمر كورس ب 500 جنية ولو اخترت انك ما تدخلهاش فى السمر هتاخدها فى سنة تانية ترم اول وبكدا هتاجل مادتين من تانية ترم اول ، دوامه هتدخلها ومش هتخرج منها الا بعد 5 او 6 سنين من الكلية لمجرد انك مش قادر. 

نظام التقديرات ايه ؟ النجاح من 60 ، مقبول 60 - 64 ، جيد 65 - 74 ، جيد جدا 75 - 84 ، امتياز 85 – 100 .

هى الجداول بتنزل امتى وازاى بعرف جدول محاضراتى؟

انت اللى بتختار موادك وانت اللى بتعمل جدولك هما بس بينزلولك على موقع الكلية المواعيد المتاحة لكل ماده انت بتختار المواعيد اللى انت عايزها وتظبط جدولك وتسجله على موقع الكليه وبتطبعه وبتمضى عليه وتخلى اى دكتور فى الجامعة يمضيلك عليه وتصوره نسخة تسلم الاصل للشئون والنسخه التانية تخليها معاك وطبعا الطلبة الاكبر منكوا هتساعدكوا فى عمل الجدول ده متقلقوش

ايه نظام الدراسه ؟

كل ماده من 100 درجه متقسمه كالاتى 10 درجات على الميدتيرم وبيكون بعد شهر ونص بالظبط من بداية الدراسة ، وبعد 3 اسابيع بيبدأ العملى وده عليه 30 درجه ، اسبوع او اتنين بالكتير ويبدأ امتحان الفاينل وده الامتحان اللى فى اخر الترم خالص ب 60 درجة ، بس ال 30 درجه بتوع العملى بالنسبه للرياضه لانها ملهاش عملى بيبقى فيه ميدتيرم تانى ب 20 درجه و10 درجات على الكويزات (امتحانات صغيرة بتتعمل فى السكشن) .

أسعار الكتب

شروط التحويل للكلية من كليات آخري

شروط التحويل الي كليه العلوم من الكليات الاخري

مكاتب فورى فى العديد من المحافظات

رابط المكان

خطوات تسجل المقررات

خطوات تسجُل المقررات

( صورة 1 ) فيها المواد اللى لازم تختارها عشان تدخل القسم

( صورة 2 ) جميع مدرجات ومعامل الكلية ولازم تبقي معاك لحد ماتتخرج

( صورة 3 ) خريطة الكلية جوه الجامعة المبانى المظلله دى كلها تبع كلية العلوم

( صورة 4) دى شروط كل قسم عشان تدخله

( صورة 4 ) باقى شروط كل قسم عشان تدخله

الشروط الجديده للقبول بالاقسام لعام 2016

باقى الشروط الجديده للقبول بالاقسام لعام 2016

ده الموقع الرسمي للكلية : http://sareg.sci.cu.edu.eg/