المعلومات الكامله عن كليه العلوم جامعه حلوان

بِسْــــــــــــــــمِ اﷲِالرَّحْمَنِ الرَّحِيم

تأسست كلية العلوم عام 1980، وكانت انطلاقة كلية العلوم عام 1995 حيث تم تأسيس باقى أقسامها العلمية: قسم النبات والميكروبيولوجى – قسم علم الحيوان والحشرات – وقسم الجيولوجيا، وقدمت الكلية 23 برنامجاً تعليمياً فى مرحلة البكالوريوس و41 برنامجاً تعليمياً فى مرحلة الدراسات العليا .

الاوراق المطلوبة للتقديم

1- شهادة الثانوية (اصل + 5 صور)

2- صور شخصية 4*6 (6 صور)

3-شهادة ميلاد كمبيوتر(اصل+5صور)

4-استمارة 2 جند من المديرية (للبنين)

5-استمارة 6 او 7 جند من القسم التابع له الطالب (للبنين)

6-المصاريف (كانت فى 2018 بـ 890 جنية وكانت فى 2016 بـ 292.5 وكانت فى 2015 بـ 242.5 جنية وكانت فى 2014 بـ 287.5 جنية ).

للعلم! لو انت 18 سنة فيما فوق فهتجيب نموذج 6 جند ، اما لو انت اقل من 18 فهتجيب نموذج 2 جند ، اما لو انت بنت فمش هتيجى اى حاجه خالص

التقديم لعام 2015

الاوراق المطلوبة لعام 2016

يوم التقديم

اولا التقديم لسة مفتحش بيفتح علي اول تسعة كدة

طبعا لازم تكون جايب الورق المطلوب و تكون مجهزه

انصحك حاول تيجي بدري و مش لازم علي فكرة اول يوم تقديم تروح لانه بيبقي زحمة

هتقف طابور تقدم ملفك في شئون الطلبة و بعدين هتروح تعمل كشف طبي ماتخفش ملوش لازمة هو اصلا عبارة عن كشف العين (يمين شمال فوق تحت) و بعدين كشف الالوان يقولك قولي الرقم اللي في البطاقة دا كام وبعدين تعمل كشف الاسنان ودا كمان مالوش لازمة

بعدين تروح تدفع المصاريف في الخزنة ودي هتلاقيها شباك جنب شئون الطلبة

وهتلاقي هناك طبعا مجموعة شباب من الاسر الطلابيه بيعرفوكوا برضو عن الكلية

و الاسر دي بقي بتعمل ايفينتات و انشطة هنبلغكوا بيها اول ما تتعمل.

نظام الكلية

تعمل الكليه بنظام الساعات المعتمدة

الكلية حصلت فى 2018 على الاعتماد من الهيئة القومية لجودة التعليم.

التخصص والتشعيب

فى سنة اولى بتدخل وبتتقسم على حسب 3 شعب براحتك هم:

1. العلوم الفيزيائية. 
2. علوم الارض. 
3. علوم بيولوجية.
4. برامج مميزة (بمصروفات)

كل شعبة فيهم بيتشعبوا لاقسام متعددة بتخصصات كتير ، التشعيب فى سنة تانية على اساس تقديرك فى سنة اولى

في قسم علوم فيزيائية وعلوم ارض التشعيب بيكون فى سنة تانيه اما بيولوجى بتتخصص فى اقسامه فى سنة تالته كالتالى :

1. ( علوم فيزيائية )

لما تيجى تطلع سنة تانية بتتخصص فى ( كيمياء او فيزيا او رياضة )
الكيمياء شرطها عشان تدخلها انك تنجح فى مادة الكيمياء فى سنة اولى
فيزيا ورياضة مالهمش شروط
قسم فيزياء بينقسم لاقسام متعددة: علوم حاسب ، فلك ، فيزياء منفرد ، علوم الفضاء ، فيزياء حيوية وطبية (بيوفيزياء)

2. ( علوم ارض )

ده فى سنة تانية ممكن تختار اما جيوفيزيا او جيولوجيا ومالهمش شروط
مجالات شغلهم ف البترول و الحفر والتعدين (القسمين)

3. ( علوم بيولوجية )

بتتخصص ف اقسامه من سنة تالته
اقسامه اللى مالهاش شروط: كيميا / نبات ، نبات خاص ، كيميا / حيوان ، حيوان خاص
الاقسام اللى لها شروط: كيميا / كيميا حيوى ، كيميا حيوى / ميكروبيولوجى ، ميكرو سبيشل 

البرامج المميزة :

هى برامج بمصروفات حوالى 10 الالاف جنية فى العام وهم 

• قسم الكيمياء الحيوى والميكروبيولوجى
• قسم الوراثة الجزيئية
• قسم البيوتكنولوجى

1. قسم البيوتكنولوجى :

التخصص من سنة اولى ومصاريفه حوالى 10 الالاف فى السنة تقدر تدخله من علمى رياضه او علوم وبيشتغل نفس شغل حيوي وميكرو وحيوان.

2. قسم الكيمياء الحيوى والميكروبيولوجى:

التخصص من سنة اولى ومصاريفه حوالى 10 الالاف فى السنة تقدر تدخله من علمى علوم فقط وبيشتغل نفس شغل قسم كيمياء حيوي وميكروبيولوجى.

3. قسم البيولوجيا الجزيئية:

بكالوريوس جديد مميز بدأ فى عام 2021 ويهدف لتخريج اخصائي علمي في تشخيص الامراض الوراثيه والجينية واختلالات ال DNA وفهم كيفية نشوء الامراض الطفيلية والامراض المعدية وتشخيصها وتصنيع الامصال واللقاحات والعقاقير المختلفه.

ملحوظه: علوم حلوان معظم الناس بتروح بالمترو ولو عندك مشكلة مع المترو .. فالمترو الجديد المكيف دا هيخليك تبات في المترو .

الاسئلة اللى بتتكرر كتير من الدفعه الجديدة

انا علوم رياضة مينفعش احول قسم تانى ولا كدا قسم رياضه خلاص ؟

معنى علوم رياضة ان انت داخل الكلية من علمى رياضه ف الثانوى وبيكون متاح ليك قسم علوم فيزيائية او علوم ارض او برنامج البايوتكنولوجى

الكشف الطبى ميعاده امتى وفين ؟

الكشف الطبى بيكون ف الكلية نفسها وبيكون فى اليوم اللى هتيجى تقدم فيه وملهوش مواعيد محدده وقت م تيجى تقدم هتكشف

هل الاقسام لها علاقة بدرجات الثانوية ؟

الاجابة : لا

شرح لبعض الشعب والأقسام

قسم البيولوجي :

اولا عندنا اقسام دوبل كورس واقسام اسبيشيال.. الاتنين ليهم شغل وكل حاجة بس كل ما الفرص بتكون متاحة ادامك اكتر بيبقي احسن عشان كدة الاقسام الدوبل( اللي معاها كيميا ) بتزود فرصك في الشغل لانك بتقدر تشتغل بالكيميا في اي مكان وكمان وبتقدر تشتغل بمادة التخصص( سواء نبات.. حشرات.. حيوان.. الخ )

مثلا يعني هنتكلم عن مجالات العمل لقسم حيوان /كيمياء "كمثال" و طبقو نفس الكلام على باقي التخصصات عشان منطولش عليكو

العمل للقسم بعد التخرج :

احنا قولنآ ان الدبل بتمسك العصآيا من النص ,, هتشتغل بالكيمياء زى ..

1-معامل التحاليل (ممكن تشتغل فى معمل وممكن تفتح معمل باسمكبعد الدبلومة )

2-شركآت الادوية

3-المركز القومى للبحوث

4-العمل في وزارة الصحة والمختبرات الصحية والبحثية

5-مجال الصناعات الكيميائية زى ..

- إنتاج الكحولات .

- إنتاج بعض الغازات الصناعية والطبية .

- إنتاج الأحماض العضوية المختلفة مثل حمض الاستيك وحمض الستريك.

- إنتاج البلاستيك الحيوي وهي مرحلة متقدمة من التخليق الحيوي للمنتجات .

6-الصناعات الغذائية :

- صناعة الألبان ومشتقاتها .

- صناعة اللحوم والمعلبات .

- صناعة الخمائر الغذائية .

- صناعة الزيوت الغذائية .

- الصناعات الغذائية المرتبطة بإنتاج الحبوب .

- صناعة المثلجات والمشروبات الخفيفة .

وفى حآجاآت تانية كتييير ...

من الحيوآان : ممكن نشتغل ..

1- اطفأل الانآبيب (مستشفى آدم فى المهندسين )

2-المعهد القومى للاورام_ معهد الابحاث المتوطنة والكبد_ المعهد القومي للتغذية

3-مراكز بحوث الصحرآء

4-مرآكزالورآثة

5- مرآكز الطآقة الذرية ( سواء من كيمياء او حيوان )

6-بنوك الدم

7- مراكز المصل واللقاح

8-المراكز الطبية التابعة لعلم الاجنة<< بعد ماتحضر دبلومة ودراسات عليا في علم الاجنة( الامبريولوجي)

قسم الميكروبيولوجى

_____________________

عندنا ميكروبيولوجي اكلينيكية وميكروبيولوجي تطبيقية وعامة

اولا << الميكروبيولوجى الإكلينيكي تخصص اخر في التحاليل الطبية وده بيبقي خاص بدراسة الامراض الميكروبية سواء امراض فطرية او بكتيرية او فيروسية والتحاليل الخاصة بيهم في اي منطقة في الجسم

فرص عمل الفرع ده انك تكمل دراسات عليا وماجستير ودكتوراه وكدة وتتجه للتدريس في الجامعات المصرية او الأجنبية.. او تفتح معمل تحاليل باسمك

________________________

ثانيا << الميكروبيولوجى التطبيقية او العامة

1_ مجال تصنيع الادوية << ومنها ممكن تشتغل فب انتاج الادوية المختلفة زي المضادات الحيوية والفيتامينات والادوية الخاصة بالسرطان وانتاج اللقاحات والامصال من البكتيربا والفطريات المختلفة

2_انتاج المواد الحافظة والانزيمات << يعني شركات الاغذية

3_ تنقية المياه من البكتريا والفطريات << يعني شركات المباه

ملحوظة <<<< ممكن الواحد يربط مابين الفرعين دول( الميكروبيولوجى الإكلينيكي والتطبيقية ) بمعني انه ممكن يحضر ماجستير في مرض معين وكيفية الوقاية او العلاج منه.. مثلا مرض التنيا وانتاج مضاد حيوي ليه

أول يوم جامعة

بالنسبه لبيولوجي... او عموما لطلبه علوم

هكلمكم عن اول يوم جامعه .. تعملوا ايه وتتعاملوا ازاي.... بصوا

مبدئيا لما بتدخلوا الجامعه من البوابات الامن بيبقي عاوز حاجتين منك عشان تدخل اول حاجه وصل المصاريف اللي بتاخده من الشئون او ورقه التنسيق اللي مكتوب فيها علوم ده لو لسه يعني مستلمتش الوصل... تمام وكمان بتوريله البطاقه او شهادة الثانويه العامه.... ده بالنسبه لدخول الجامعه.... بعد كده هيبقي حضورك اعتقد هيبقي زينا في مدرج اسمه 18 وده فييه منه و) ط) كده حسب مكتوبلك في جدول يومك هتحضر في مدرج 18 ايه... والمدرج ده هتلاقوه ورا مطعم كبير كده بتاع فول وطعميه وكل حاجه كريب وكله... اسمه ويتش. نصيحه مني لو حابين تجيبوا اي اكل هاتوه من ويتش وبس لانكم هتلاقوا مطاعم كتيير بس افضلهم علي الاطلاق ويتش ... اما للمعامل فدي بتلاقيها قبل ويتش ومدرج 18 مباشرة... طب بالنسبه لاماكنهم انت عندك الجامعه ليها بوابتين بوابه كده لما بتنزل سلم الجامعه بتبقي في يمينك .. وبوابه بتمشيلها شويه كده بعد اول بوابه مسافه 20 متر... البوابه الاولي والرئييسيه دي الي اول نا بتنزل بتلاقيها لو دخلت منها بعديها بتحود شمال تفضل ماشي كده وهتلاقي علي شمالك اول حاجه هتقابلك الفصول والمعامل ودول هتلاقي متقسمين زي نظام شقتين قدام بعض.. بمعني اول ما هتدخل هتلاقي معامل الكيميا علي يمينك وشمالك بعديها علطول مطعم وبعديه معامل الحيوان شمال ويمين وبعديها معامل النبات شمال ويمين وبعديها اخر حاجه معامل الفيزياء شمال ويمين... بالنسبه للمدرج بعد ما تمشي كده وتعدي من علي المعامل هتلاقي مطعم علي ايدك الشمال اسمه ويتش ودايما هتلاقي عليه زحمه كده... وراه علطول هتلاقي مدرج كده لييه طلعتين طلعه سللالم وطلعه كده نظام كوبري ونازل كده لتحت... المهم ده مدرجك مدرج 18 ... اما لمبني الكليه اللي فييه هيبقي السكاشن بتاعه الرياضه او الامتحانات فيما بعد... بعد ما تمشي من قدام المدرج وويتش هتلاقي علي يمينك كده مبني كليه علوم هتمشي فييه عامل زي مغاره كده يمينك وشمالك هتلاقي الاقسام مره قسم كيميا وقصاده فيزيا كده.... ودي المباني اللي بيبقي فيها مقر الدكاتره بتوع المواد....

انت لما تدخل اول يوم الجامعه متقلقش متقعدش تسأل كتيير وكده ... انا وصفتلك اماكن دراستك فيين . بالنسبه للسنتر اللي في ناس بتحب تروح تجيب منه اكل او لعب كوتشينه وكده من المكتبه او ملازم او تصوير ده هتلاقوه كده في وش المعامل هتمشوا علطول علطول وهيقابلكم كده مبني تجاره في الطريق وبعديها كملوا مشي لحد ما هتلاقوا سلالم علي يمينكم ودي اللي بتوديك علي بوابه الجامعه علي شمالكم بقي السنتر ده وطبعا لما تروح ناحيه السنتر بتلاقي سنتر ابن سينا بتاع الملازم وكده ده في تاني دور... علي اليمين... وطبعا جمب السنتر كده بتمشي علطول يعني يمين السنتر بتلاقي الملاعب بتاعه الكوره... للشباب :D ..... فلما تدخل اول يوم ادخل احضر محاضرتك متقلقش اه هتلاقي كله انجلش وهتحس انك هاجرت امريكا بس متخافش مع الوقت هتاخد علي ده ولو فهمت من الدكتور بنسبه 40 في الميه اول يوم كويس جدا... المهم انك متعقدش نفسك خاصه اول اسبوع... لانك بتبقي لسه خارج من دراسه كلها عربي وكده بالنسبه لبتوع اللغات هتبقي سهله بالنسبالهم بس ده ميمنعش انكم كلكم اجمع هتعانوا من المصطلحات العلميإ في الاول وبعديها هتاخدوا عليها صدقوني... فمتتخضوش... واول يوم تشريح الضفدعه ممكن هيبقي تاني يوم في الكليه او تاني اسبوع... متتخضوش ولا تقرفوا .. هو طبيعي اللي هيرجع واللي هيقرف من الريحه والي هيقول لنفسه يستحيل اشرح وكده... معلش كلنا كنا زيك كده ومع ا لوقت الضفادع دي هتبقي صحابك :D وهتاخد علي كده... اما انت بالنسبالك فخليك مهتم بمظهرك وكده لانك في كليه علوم مهما كان من كليات القمه تاني كليه قمه في جامعتنا لانك عندك اللي فوقيك علطول صيدله... فبالتالي خليك كده تمام... وبلاش شغل ابتدائي تدخلوا تتخانقوا علي اللي يقعد في الاول في المدرج ... وبالنسبه للولاد يقعدوا جمب بنات وكده عادي والله مفهاش كسوف... انتوا في كليه علميه .. في اول اسبوع او اتنين هتبقوا منفصلين بنات لوحديهم وشباب لوحديهم... بس بعد كده هتتعرفوا علي بعض وتقعدوا جمب بعض عادي.. وبلاش شغل انا مبحبش اتعرف علي ولد ده وانه هيعاكسني لو سلم عليا وكده... لانه صدقوني مش اسلوب متحضر الولد ده ممكن هو اللي يديكي محاضره مهمه انتي محتاجاها والكلام برضو للولاد... فعيشوا طبيعي انكم كلكم حاجه واحده تخدموا بعض.. محدش يقلق من التاني... بس ومتهزروش كتيير مع الدكتور ممكن المعيد لكن الدكتور لا لان معظمهم قفل :D.... الا ما رحم ربي...

الدكه اسمها بنج.. مسمهاش دكه عشان محدش يضحك عليكم... اللي يسقط اسمه دبلر مش سقط.... كلمه صافي يعني واحد ناجح ممعهوش مواد ... كلمه اسكيما معناها ورقه كده بيبقي فيها التجربه بتاعه معمل الكيميا ... وطرق تنفيذها.....

هكمل كلامي النهارده عن باقي مواد قسم بيولوجي اللي هتدرسوها في سنه اولي.. امبارح اتكلمنا تفصيلا عن مادتين النبات والحيوان... النهارده هنتكلم عن مادتين الكيميا والفيزيا + مواد بتدرسوها بتاعه سقوط ونجاح بس.......

بالنسبه للكيميا دي بتدرسوا فيها ترم اول فرع واحد فرع اسمه in organic ودي كيميا غير عضويه بتدرسوا فيها الالكترونات وازاي بنملاها في مستويات الطاقه وكده حاجه شبيهه للفيزياء الحديثه بتاعإ ثانوي... اما تاني فرع فهو ال physical chemistry دي ماده كيميا فيزيائيه بتدرسوا فيها حاجات بتاعه ثانوي مش هتكلم عنها لانها ببساطه سهله جدا ... وتعتبر فرع كده لوحديه اسبيشيال من الكيميا.اما الترم التاني فبتدرسه الكيميا علي هيئه فرع ال organic العضويه وده بتدرسوه في جزئين كل جزء ليه الدكتور الخاص بيه جزء اليفاتك وجزء اروماتك واظنكم عارفين انه ده نفس اللي درستوه في ثانوي عام بس الفرق هيبقي في تفاصيل زياده مش اكتر وكده كده بتدرسوا الكيميا الفيزيائيه ترم اول وتاني بس في التاني توضيح بسيط عنها هي بتبقي عباره عن الكيميا في اول ابوابها بتوع الحساب الكيميائي و الاتزان والكهربائيه ونفس الكلام حرفيا ونفس المنهج بس طبعا بالانجلش :D.. اما بالنسبه لتاني ماده وهي الفيزيا فدي بتدرسوا فيها ترم اول ماده heat الحراره يعني دي بتدرسوا فيها قوانين الحراره كلها ونيوتن وكله من ثانوي بس في اضافات بسيطه... اما الترم التاني بتدرسوا ماده الفيزيا في هيئه ماده اسمها optics ودي صراحة متعبه اوي... بس محتاجه اللي يفهم جدا لانها ببساطه عباره عن اثباتات وبس المنهج من اوله لاخره فيها عباره عن اثباتات وقوانين النظري فيها يكاد يكون منعدم ...اما بالنسبه للمواد اللي بتاعه نجاح بس هي الانجلش وده بتدرسوه ترم اول ... اما الماده التانيه بتدرسوها في الترم التاني هي ماده ادبيه ماده حقوق الانسان ودي هتذاكرها ليله الامتحان حفظ وبس لمنظمات وكده..... بس وبكده خلصنا المواد اللي بتدرسوها في سنه اولي.

فكرة عن المعامل

النهارده هنتكلم عن المعامل اللي هتدخلوها وتنفذوا كل شيء عملي... بصوا المعامل ثابته هتبقي لمواد الفيزيا والكيميا والحيوان والنبات... بالنسبه لمعمل الكيميا بيبقي لمادتين الكيمياالفيزيائيه.. وده هتخشوا المعمل هيتشرحلكم ازاي تحضروا المواد وكده المهم انكم تسجلوا وتفهموا كل حاجه هتتقال .. وفي الفرع ده بتعملوا التجارب في الغالب في نظام مجموعات من 3 ل4 افراد حسب انتوا هتقسموها ازاي سوي.... اما لتاني فرع وهو الكيميا الغير عضويه اللي هتاخدوها ترم اول او كيميا عضويه ترم التاني فكلهم هتعملوا ااتجارب كل واحد لوحدوا... اما لتاني ماده وهي الفيزياء نفس الكلام كل واحد لوحدوه ... اما لتالت ماده وهي الحيوان فدي هتدخلوا في ترم اول هتشرحوا ضفدعه... وترم تاني مش هتشرحوا حاجه .. بس بالنسبه للتشريح هقلكم علي قواعده في اخر البوست مع قواعد المعمل..... وطبعا في ماده الحيوان اهم شيء انكم هترسموا ورا الدكتور لحد ما ايديكم تورم :D في ناس بترسم في الكتاب العملي علطول وفي ناس بترسم في كشكول ولما تروح بتظبض في كتاب العملي المهم ترسم في كتاب العملي وطبعا البيانات مطالب انك تحفظها بالرسمه... عشان ساعة امتحان العملي... اما بالنسبه لرابع ماده وهي النبات برضو نفس الكلام هتدخل تدرس النبات كويس ورسمته ترسمها والبيانات وبعديها هتتعرف علي عينات منها تحت الميكرسكوب ومنها هتبقي قصاد عينك ... ونفس الكلام ده لماده الحيوان....

قواعد المعمل: 1-يكون معاك بالطو زيه زي ضلك ميفارقكش

2-بالنسبه لمادة الحيوان تجيب بوكس كده فييه ادوات تشريح وهي فورسبس يعني ملقاط و دبابيس لتثبيت الضفدعه وهتجيب خيط وهتجيب مشرط وامواسه.. وهتجيب مقص رفيع ومقص تخين ... وعشان متوجعش دماغك ادخل علي محل تحت في القصر العيني قله انا عاوز بوكس التشريح كامل....

3-بالنسبه لماده النبات هتجيب سلايدس و cover و بس

4-بالنسبه لماده الكيميا لازم تجيب كونيكال و سحاحه و Droper و انابيب اختبار بتاع 12 واحده مثلا... و هات ماسك بيمسك الانبوبه في حاله التسخين وهتجيب فوطه كده البرتقاني دي وبالنسبه للاسماء الغريبه عليكم هتعرفوها لما تجيبوها تحت من القصر العيني...

4-بالنسبه لماده الفيزياء هتجيب منقله و الاله الحاسبه وبس... اما ادوات اللي هتشتغل بيها هتروح لاوضه كده جمب المعمل تديله البطاقه و هو يديك الادوات وفي الغالب ممكن تخلي ناس صحابك تشتغل معاك او لوحدك عادي....

بالنسبه للتشريح قواعده: 1-تمسك الضفدعه كويس

2-قلبها ميقفش منك بانك تيجي جمبه وتعوره

3-اعصابك تبقي ثابته عشان متقطعش عرق وتبوظ الدنيا

4-اسمع كويس المعيد بيقلك ايه واحفظ خطوات التشريح ولو حسيت نفسك هتتلبخ في خطوه متشغلش دماغك واسأل المعيد

5-هات gloves البسها في ايدك ودي لك مطلق الحريه ممكن تشتغل بيها او من غيرها .. عادي

وسائل الاتصال بالكلية

فاكس 002025552468 تيلفون 1802/002025590000-- 1856/002025590000

1805/002025590000 - 3502/002025590000 - 1863/002025590000

الموقع الالكترونى للكليه http://www.helwan.edu.eg/Science-Ar