المعلومات الكامله عن كليه العلوم جامعه عين شمس (علوم عين شمس)

بِسْــــــــــــــــمِ اﷲِالرَّحْمَنِ الرَّحِيم

نقدم لكم فى هذا المقال من موقع « علومنجى دوت كوم » المعلومات الكامله عن كليه العلوم جامعه عين شمس (علوم عين شمس) التى إنشئت في شهر يوليو 1950 ضمن إجراءات إنشاء جامعة إبراهيم باشا الكبير وبدأت الدراسة بمنطقة الأورمان بالجيزة ثم انتقلت في عام 1951 إلى المنطقة المحيطة بقصر الزعفران وشغلت بعض المباني حول القصر، وبذلك تكون كلية العلوم هي أول كلية تشغل مبانيها منطقة الزعفران، وقد بدأ إنشاء المبنى الرئيسي للكلية في عام 1962 واستكمل في بداية السبعينات، كما تم إضافة مبنى جديد للكلية عام 2000 وقد بدأت علوم عين شمس تبدأ تطبيق نظام الساعات المعتمدة بداية من العام الدراسي القادم 2016/2017.

التخصصات والتشعيب

سنة اولى فيها 4 شعب: 

1. جيوفيزياء
2. جيولوجيا
3. بيولوجي
4. طبيعية

(1) جيولوجيا : 

أي حد ممكن يدخله و ليهم تنسيق (بيعتمد على مجموع ثانوي) بياخد اعلى مجاميع في ثانوية عامة نظرا لأن عدد الطلبة بالقسم بيكون اقل من الاقسام التانية.

(1) جيوفيزياء : 

أي حد ممكن يدخله و ليهم تنسيق (بيعتمد على مجموع ثانوي) بياخد اعلى مجاميع في ثانوية عامة نظرا لأن عدد الطلبة بالقسم بيكون اقل من الاقسام التانية.

(3) علوم بيولوجية: 

لعلمي علوم بس

(4) علوم طبيعية: 

لعلمي علوم وعلمي رياضة

والقسمين دول بياخدوا بالأختيار مش بتنسيق داخلي اللي انت بتختاره بتدخله

كدا خلصنا سنة اولى 

شروط الالتحاق باقسام كليه العلوم جامعه عين شمس

فى خلال السنة الثانية والثالثة هيبقى فى تخصص رئيسى وهو الأتى

أولاً: سنة تانية

(1) بالنسبة لجيوفيزياء: 

بيفضلوا جيوفيزياء على طول (طول الاربع سنين).

(2) بيولوجي:

القسم بيدخله علمي علوم ،نبدأ بقي من الاول خالص ونتخيل سوا لما تكتب في (ورقة رغباتك) بيولوجى ويجيلك ، الرحلة هتبتدي ازاى
أولا: في سنة اولى ترم اول وتانى ، هتدخل تاخد في كل ترم 7 مواد (كمبيوتر ولغة وكيمياء (فيزيائية وعضوية وغيرعضوية) ، فيزياء ، رياضة ، نبات ، حيوان ، ميكروبيولوجي ، الفيزياء والرياضة ).

ثانيا: في سنة تانية هتدرس الترم الاول فيزياء والترم التاني رياضة ، وخلاص مش هتشوفهم تاني بعد كده ، سنة تانية هتدرس نفس المواد بتاعة اولى بالاضافة لمادتين جداد الي هما الكيمياء الحيوية والحشرات ، وفي خلال رحلتك في السنتين الاولى هتكون جمعت قدر كويس من المعلومات عن كل قسم وقدرت تحدد ميولك علشان تبدا رحلة التخصص في السنتين التالتة والرابعة.

قسم فيزياءحيوي (بيوفيزياء): 

ده بتتخصص فيه من تانية بيولوجي و تكمل فيه ده بياخد 10 طلاب بس ، اكتر 3 متميزين من بيولوجى واكتر7 متميزين من علوم طبيعية بحد ادنى جيد جدا ، بتدرس مواد ليها علاقة بالفيزياء والمواد البيولوجية ، الترم الاول هتاخد (نبات ، حيوان ،

فيزياء ، فيزياء حيوى ، كيمياء عضوية ، تكامل محدد)

ثالثا: فى سنة تالته هتختار تخصص من 10 تخصص وهما : 

المنفرد (الخاص - الاسبشيل) : 

1. الميكروبيولوجي 
2. الكيمياء الحيوية
3. النبات
4. الحيوان
5. الحشرات

المزدوج: 

1. كيمياء/ميكروبيولوجي
2. كيمياء/كيمياء حيوي
3. كيمياء/نبات
4. كيمياء/ حيوان
5. كيمياء/حشرات.

(3) علوم طبيعية:

سنة تانية بالنسبة لك هيكون عندك 4 خيارات: 

1. رياضيات 
2. كيمياء
3. فيزياء
4. كيمياء/فيزياء

لو أخترت كيمياء/فيزياء: يبقى هتكمل كدا تالتة ورابعة

لو أخترت رياضيات: فى تخصصات هتكملهم فى تالتة ورابعة وهم 

1. احصاء/ حاسب
2. رياضيات/حاسب
3. رياضيات بحتة تطبيقية

لو أخترت كيمياء: فى تخصصات هتكملهم فى تالتة ورابعة وهم  

1. كيمياء تطبيقية 
2. كيمياء سبيشيل

لو أخترت فيزياء: فى تخصصات هتكملهم فى تالتة ورابعة وهم 

1. فيزياء/مواد
2. فيزياء/حاسب
3. فيزياء سبيشيل

(4) قسم الجيولوجيا :

  بياخد عدد قليل وليه تنسيق داخلى فى الكلية ، يعنى لازم تكون جايب مجموع معين عشان تدخله (نفس فكرة تنسيق الثانوية العامة)

الجيولوجيا بتاعة الكليةاكبر بكتير من الجيولوجيا اللى بتتاخد فى الثانوية العامة ، جيولوجيا الثانوية العامة هى 20 صفحة من اول كتاب بتاخده فى الترم الأول فى سنة أولى

فىسنة أولى بتبقى قسم جيولوجيا

أول ترم بتاخد ( جيولوجيا - كيمياء - فيزياء - حيوان - رياضة ) ، الترم التانى نفس اسماء المواد

فى سنة تانية بتتخصص فى حاجة من الاثنين دول: 

1. جيولوجيا سبشيل
2. جيوفيزياء.

لو دخلت جيولوجيا سبشيل: بيتخصص فى سنة تالتة لناس بتكمل 

1. جيولوجيا سبشيل ( جيولوجيا سبشيل بياخد من تقدير معين وبياخد 3 او 4 )
2. جيولوجيا وكيمياء

لو دخلت جيوفيزياء: بتكمل زى ما انت لحد ما يتخرج إن شاء الله .

الاقسام الخاصه

قسم المواد وعلوم النانو 

قسم جيوفيزياء البترول

قسم التكنولوجيا الحيوية (لائحة البرنامج من خلال هذا الرابط)

معلومات عن الأقسام

كدا خلصنا التشعيب بتاع الكلية نخش على الاقسام

 ( قسم الحيوان )

اهم المواد اللى هندرسها فى القسم (على مدار السنتين) : بندرس موآآد كتيير يدرس الانسان وكل ما يتعلق بالمملكه الحيوانيه فيدرس الفسيولوجى (علم وظائف الاعضاء) والامبريولوجى (علم الاجنه) والهيماتولوجى (علم امراض الدم) والسيريولوجى (علم المناعه) والاناتومى (علم التشريح) والباراسيتولوجى (علم الطفيليات) والهستلولوجى (علم الانسجة) البيولوجي بتاع الحيوان والفقاريات و اللافقاريات وعلم الوراثه وعلم الانسجه ، وعلم البيئة والتوصيف وعلم سلوم الحيوان ، علم الوراثة الخلوية ، علم الغدد الصماء ، الايض ، البيولوجيا الاشعاعية ، التطور ، علم التشريح المقارن ، بيئة حيوانية ، بيئة ميآه عذبة ، اوليات حيوانية متقدمة ، المصايد السمكية ( وبتتعلم فيها ازاى تعمل مزرعة سمك ) ، علم تشوهات الاجنة ، الكـآنسر(دراسة السرطآن ) ، دراسة دورة كريبس بالتفصيل ، حيوآنات ، البيئة المصرية ، المحميآت الطبيعية دى معظم المواد اللى هندرسهآ فى الحيوآن ، هو فى تآنى اكيد غير ده ^_^ بالنسبة للدبل بقى بالآضآفة لموآد الكيمياء : الفيزيائية والكهربية ، العضوية وغير العضوية ، التفريق اللوني هي طريقة لفصل وتنقية المواد الكيميائية المختلطة ، علم التآثر بين الاشعاع طرق التحلية المختلفة ، الكاربوهيدرات

الفرق ما بين اسبيشيآل ومزدوج (دبل) :

عمومآ اللى بيخش اسبيشيآل بيكون عايز يتعين فى القسم .. الفرق ما بينهم بسيط جداا فى مواد قليلة اووى على مدار السنتين فى اسبيشيأل بيدرسوآ كورس #كيميآ_حيوى وبيدرسوا من 2 الى 3 كورسآت صغيرين زيآدة عن الدبل فى الزوو الدبل بيتعين منه نآس على القسم برده زى الاسبيشيال بس هما بيشوفوآ اعلى تقدير تقدير على مستوى الشعبتين وبيتعينوآ ممكن عدد اللى جايبين تقدير اعلى فى اسبيشيال يكون اكتر من الدبل وسآعتها بيتعينوا من اسبيشيآل بس الدبل طبعآ افضل بكتير لانك بتمسك العصآيا من النص .. ممكن تشتغل بالكيمياء وممكن تشتغل بالحيوان بيتعين كآم وآحد فى القسم : بتختلف من السنة للتآنية بس بتكون فى حدود اربعة او خمسة للقسم والقسم كبيير جداا وممكن يتعين نآس كتير

شروط القسم: متغيرة من سنة لسنة ، الحيوآن اسبيشآل: تقدير عام جيد وتقدير جيد جدا على الاقل (على مستوى الترمين ) فى مآدة التخصص الحيوآن والكيمياء : بدون شروط ، بس اهم حاجة بدون تخلفات فى مادة التخصص علم الحيوان بحد اقصى 60 طآلب والعدد متغير من سنة لسنة.

( قسم رياضة )

شروط دخول القسم : سابقا لا يوجد شروط لدخول القسم ، لكن حاليا فى شروط وهى نجاح فى مواد الرياضه

المواد التى يتم دراستها فى سنه تانيه

الترم الاول : استاتيكا من 75.. ديناميكا من 100 .. جير خطى من 100 .. تحليل رياضى من 150 .. فيزياء من 150

الترم الثانى : ديناميكا تحليليه من 100 ..معادلات تفاضليه من 100 ... فيزياء من150 .. كهرومغناطيسيه من 75 ... هندسه و احصاء من 125 حاسب من 50 و الحاسب معمل فقط و يتم دراسه برنامج ال matlab و الvisual basic ، في مواد الحاسب بندرس لغة برمجة C++ من البداية للنهاية , لغة الجافا في السنة الرابعة , قواعد البيانات , نظام التشفير وفك الشفرة ,ألية عمل الأجهزة كبرمجة , اللغات البدائية ( ما قبل الكمبيوتر ) , الألجورزمات.

( وظائف خريج قسم الرياضيات )

1-الاوائل بيتعينوا معيدين فى الكليه

2-تقديرات امتياز و جيد جيدا اللى متعينوش فى الكليه يتقبلوا معيدين فى الجامعات الخاصه

3- هيئات الأرصاد الجويه

4- مراكز الإحصاء والمتابعه

5- مجالات عمل الحاسب الألي

6- مدرس حاسب

7- مدرس رياضيات

8- خبير إحصائي في جهاز التعبئة والإحصاء

9- محلل بيانات

10- باحث

11- في البنوك

12- مسؤول قواعد بيانات في أي مكان

13- الشغل كمبرمج في شركات الكمبيوتر

نصيحة: ما تكتفيش بدراسة الكلية عشان احنا متأخرين أوي في الكلية عن باقي الشعوب اتعلم لوحدك ع النت استفيد بوقتك عليه اليوتيوب مليان كورسات بس ما تقولش كفاية عليا الي باخده في الكلية ، الشغل في القسم ده بالكفاءة مش بس بالتقدير .. في ناس معهاش شهادة اصلا و بتتعلم اونلاين بس و بتشتغل.

(قسم كيمياء / فيزياء )

لا يوجد شروط للقبول بالقسم

التشعيب جوه القسم بيكون ازااي ؟؟

مفيش تشعيب اول ما تبقي فيزيا كيميا هتتخرج و انت فيزيا كيميا برضو

هدرس ايه فى القسم ده ؟

هتدرس مواد كيميا و فيزيا و رياضه مادة حاسب تيرم اول و نفس الكلام الترم التاني مع استبدال الحاسب بمادة جيولوجيا ، سنه تالته ورابعه بتدرس كل تيرم 3 مواد فيزيا و 3 مواد كيميا

( مجالات العمل ) : 

بيشتغل نفس شغل قسمي الكيمياء والفيزياء

( قسم الكيمياء الحيوية )

من امتع الاقسام في الكلية , بيدرس كل حاجة عن كيمياء وبناء الجسم وكل تفاعل حيوي بيتم .

شروط القبول في القسم : 

بتختلف كل سنة على شكل العرض والطلب واقبال الطلبة على دخول القسم او لا .. وغالبا بتكون تقدير عام جيد وتقدير جيد على مستوى الترمين في مادة التخصص "الكيمياء الحيوية " والعدد حوالي 60 الى 70 طالب والعدد قابل للتغيير من سنة للتانيه ..

التعيين للقسم: 

التعيين بيكون الاتنيين الاوائل "اواكتر حسب حاجة القسم" سواء من خاص او مزدوج

المقررات الي هتدرس خلال السنتين: 

أيض الدهون ، أيض المواد غير العضوية ، كيمياء الغذاء ، فيتامينات،إنزيمات ، أيض السكريات والطاقة ، كيمياء الأمراض (موضوعات مختارة) ، سوائل بيولوجية، طرق تحليل دقيقة وكروماتوجرافى ، بيولوجيا جزيئية وهندسة وراثية ، سوائل بيولوجية ووظائف حيوية ، شوادر حرة ومضادات أكسدة ، بيولوجيا بيئية وبيولوجيا الإشعاع ، مناعة وبيولوجيا الأورام ، تكنولوجيا حيوية وضبط الجودة ، كيمياء حيوية نباتية وفيروسات .

بالنسة للاقسام المزدوجة هيدرسوا بعض المقررات دي بالاضافة لفروع الكيمياء الي هي " العضوية والغير عضوية والفيزيكال " وما يندرج تحتها من فروع ..

( قسم فيزياء )

عددوا دايما صغير وكلهم عارفين بعض التخصص بيكون من سنه تانيه بعد ما بيكون في اولى علوم طبيعيه واخد فكره عن الفيزيا اصلا في تانيه بتكون فيزيا عامه بيبقى الترم الاول ٥ مواد والتاني ٦ الترم الاول بناخد فيه circuit, electrostatic , optics, computer على خفيف

كده طبعا ده غير مواد الرياضه فالترمين لان احنا عارفين ان الرياضه والفيزيا جزء لا يتجزا من الاخر نيجي بقا ع الترم التاني بناخد magnetism , waves , modern , heat , بتبقى زي تأسيس وفكرة عامه قبل التخصص بتيجي بقا تدخل تالته بيبقى عندك اربع اقسام الاول special وده بيتطلب نجاح كل مواد فيزيا لانو بيدرس كل الفروع وبيبقى عندك معملين في الاسبوع وبيتاهد منها معيدين التاني material ودي بتدرس المواد باستفاضه وبتاخد الناس اللي جايبه اعلى درجات وبتاخد معيد واحد بس التالت electronics ودي بقا من اسمها تعتمد ع الكهربا وبردو بتاخد معيد واحد بس وبردو نسبة المعيدين نسبيه ع حسب حاجه الكليه فالوقت بتاعك واخر قسم ده فيزيا حاسب وده ملوش شروط قسم محترم بيحتوي الناس اللي شايله فيزيا عادي بس عايزه حد بقى غاوي حاسب عشان هتعيش مع البرمجه والاكواد والتخصص اللي بتدخلوا في تالته هو نفسه اللي هتكملوا في رابعة

( قسم الميكروبيولوجي )

يعتبر من الاقسام المميزة في الكلبية ومن احدث الاقسام واجددها , الدراسة ليها علاقة بالكائنات الدقيقة زي البكتيريا والفيروسات والطفيليلت , بيضم شعبتين الأولى شعبة الميكروبيولوجي/ كيمياء (المزدوجة) ، و التانية شعبة الميكروبيولوجي (الشعبة الخاصة)

الي بتدرس الميكروبيولوجي بصفة أساسية ومقررات مكملة فى الكيمياء والفيزياء الحيوية والطفيليات والبيولوجيا الجزيئية والكيمياء الحيوية وفسيولوجيا الحيوان.

 المقررات الي بيتم دراستها: 

الميكروبيولوجيا التطبيقية وتشمل الميكروبيولوجيا البيئية وميكروبيولوجيا الأغذية ، الميكروبيولوجيا الأساسية وتشمل البكتريا والفطريات والفيروسات ، والميكروبيولوجيا الصناعية والميكروبيولوجيا الطبية وتشمل البكتريا الطبية والفيروسات الطبية والفطريات الطبية وعلم المناعة ، فسيولوجيا الكائنات الدقيقة و الأيض الميكروبى و التحولات الميكروبية والهندسة الوراثية والتلوث البيئي وتقسيم البكتريا والتحكم فى الكائنات الدقيقة.

شروط القبول للقسم: 

الشعبة الخاصة بتشترط عدد قليل 10 طلاب والشعبة المزدوجة 40 طالب والاولوية للطلبة الاعلى تقدير الي عايزين يدخلوا القسم .

( قسم النبات )

يعتبر من اقدم الاقسام في الكلية بيدرس كل ما يخص عالم النبات من جوه ومن بره بشكل تفصيلى بالإضافة إلى دراسة الظروف المحيطة والمؤثرة على النبات وعلاقات النبات بالنبات والحيوان والحشرات و الإنسان.

بعض من المقررات الي هيتم دراستها:

تصنيف النباتات , طحالب , ارشيجونيات , وفسيولوجيا النبات , خلية ووراثة , البيئة بالنسة للاقسام المزدوجة هيدرسوا بعض المقررات دي بالاضافة لفروع الكيمياء الي النباتية ,ا لارشيجونيات , الحفريات ، الكيمياء هي " العضوية والغير عضوية والفيزيكال " وما يندرج تحتها من فروع .

شروط القبول في القسم:

غالبا القسم المزدوج مش بيشترط عدد ولا تقدير , والقسم الخاص بيشترط تقدير عام ، جميع الشروط قابلة للتغيير من سنة للتانية ,جيد في مادة النبات ، التعيين بيكون الاتنيين الاوائل او اكتر حسب حاجة.

مجالات العمل:

نفس المجالات هتكون متاحة لخريج القسم المزدوج الي ممكن بشتغل بالكيمياء

وكمان مراكز البحوث ووزارة الزراعة والمؤسسات والشركات الزراعية ..

( قسم كيمياء / حشرات او حشرات منفرد )

القسم واضح من أسمه أن التعامل كله مع الحشرات من أول شكلها الظاهري وتصنيفها و الطريقة اللي البيئة بتأثر بيها عليهم مروراً بدراسة جسم الحشرة من جواه في التشريح

أيوا بيشرحوا صراصير وبعدين بيدرسوا بقي أنهي حشرات بستفيد منها إقتصادياً وإزاي أربيها وأنهي حشرة مضرة إقتصادياً وأزاي أعملها مكافحة بكل الطرق والحشرات اللي بتنقل أمراض للأنسان والحيوان وبرضو إزاي أعملها مكافحة وكمان كورس سموم وخلية وجينات و بيولوجيا جزئية ، في حالة انك كورس مزدوج بتدرس مواد الكميا جنبهم

الشغل : 

خريج القسم مبدأياً بيقي باحث في مركز البحوث ، مراكز المصل واللقاح ، وزارة الأثار ، مركز بحوث الحشرات الطبية ، مركز بحوث الصحراء ، وله نفس شغل قسم كيمياء.

جيوفيزياء بترول

قسم فتح عام 2013 ، يتم التعامل في القسم  بنظام الساعات المعتمدة ، عدد الطلاب به يتراوح من 50 ل 70 طالب ، القسم له عيوبه وله مميزاته .

مواد السنة الاولي : 

جيولوجيا فيزيائية -فيزياء عامة -كيميا عامة -جيوفيزياء عامة – رياضة – فيزياء بصريات – كيمياء عضوية وغير عضوية

وفي السنة الثانية نبدأ التعمق اكثر في مجال الجيولوجيا والمقررات المهمة في مجال البترول .

 

معلومات سريعه عن علوم عين شمس

1. موجودة فالعباسية مش ف عين شمس
2. كانت ارض تابعة لقصر الملك فاروق (الزعفران حاليا)
3. فيها معامل كانت اسطبلات خيول ايام عهد الاحتلال البريطانى
4. شكلها متغيرش من حوالى اكتر من 40 سنة
5. خرج من معاملها المادة اللى منعت النابلم من الانفجار فى حرب 73
6. يوجد بها افضل دكتور جامعى على الأطلاق (د/محمد السيد طنطاوى)
7. بتعمل كل سنة فان داى يوم تاريخى لا ينسى
8. بييجى ليها طلبة حقوق واداب يقعدوا فيها عشان الهدوء
9. فيها متحف جيولوجيا ومتحف حيوان (فيه حيوانات محنطة )
10. اشهر شهيدين فيها (محمودالكردى) و محمد نجم رحمة الله عليهم
11. فيه قدام الكلية اكبر شجرة معمرة فجامعة عين شمس
12. ليها جزء تانى (بنات فقط) اسمه علوم بنات عين شمس فى مصر الجديدة
13. البالطو فيها هو الزى الرسمى
14. فيها مكتبة عملاقة
15. ارخم ناس ممكن تتعامل معاهم (شئون الطلبة والخزنه )
16. اشهر مكان فيها هو الاسكوير
17. ريحة الكيماويات هى اول حاجة هتاخد بالك منها اول ماتدخلها
18. بها اربع مدرجات كبيرة  (نوح وهلال ) (حجازى وحماد)

من أشهر دكاترتها

• د/ ماجد شفيق (الكل يخرس ف محاضرته )
• د/ فتحى الشحات (ابسااااااااااى)
• د/ عادل طه (برنس قسم رياضيات)
• د/ صلاح ابوالعينين و د/سيد ثابت (الاساطير)
• د/ مصطفى خليل (الأب الروحى )
• د/ محمد صبرى عبدالمطلب (العالم الجليل)

الدكاترة الشباب المحترمين جدا 

• د/محمد امين 
• د/ وائل ابو المجد
• د/بيومى (الأسوء على الإطلاق)  
• د/تريز 
• د/للى

المعيدين المحترمين 

• د/مجدى الطويل
• د/محمود فوزى و د/ عمرو بيومى
• د/ احمد رضوان 

العنوان

الخليفة المأمون – العباسية – القاهرة – الحرم الجامعى – كلية العلوم

  

الموقع الرسمي لكلية علوم  جامعة عين شمس :

رابط الموقع