السمر كورس (الترم الصيفى) ونظام التشعيب

بِسْــــــــــــــــمِ اﷲِالرَّحْمَنِ الرَّحِيم

بعد سنه ف الكلية خلاص بقيتوا خبره وعارفين ان الدراسه عندكوا ماشيه بنظام الساعات المعتمده (يعني مفيش ان حد يشيل ٣ مواد فيعيد السنه والكلام ده) لكن فى حاجة اسمها سمر كورس (ترم صيفى) وده اللى هنوضحة فى المقال دا من موقع « علومنجى دوت كوم » وكمان هنتكلم عن التشعيب ... الموضوع متجدد وهيتم اضافة نظام التشعيب والسمر كورس بباقى كليات العلوم على مستوى الجمهورية قريباً.

 اسعار ساعة السمر كورس فى الجامعات التى تطبق نظام الساعات المعتمده

1.  كلية العلوم جامعة زويل ساعة السمر بـ 3000 جنية 
2.  كلية العلوم جامعة القاهرة ساعة السمر بـ 200 جنية
3.  كلية العلوم بنات جامعة عين شمس ساعة السمر بـ 150 جنية
4.  كلية العلوم جامعة بنى سويف ساعة السمر بـ 150 جنية
5.  كلية العلوم جامعة طنطا ساعة السمر بـ 100 جنية
6.  كلية العلوم جامعة المنصورة ساعة السمر بـ 100 جنية
7.  كلية العلوم جامعة الزقازيق ساعة السمر بـ 100 جنية
8.  كلية العلوم جامعة عين شمس ساعة السمر بـ 75 جنية
9.  كلية العلوم جامعة المنوفية "شبين" ساعة السمر بـ 50 جنية
10.  كلية العلوم جامعة العريش ساعة السمر بـ 50 جنية
11.  كلية العلوم جامعة السويس ساعة السمر بـ بلاش

كلية العلوم جامعة طنطا

-عشان نعدي من اولي ل تانيه لازم اكون ناجح ف مواد عدد ساعتهم ٢٠ ساعه .. بغض النظر عن هم كام ماده ولا انا شايل كام ماده .. يعني حضرتك كده ممكن تكون شايل ٥ او ٦ مواد و بقيت ف تانية وبم إن الحد الاقصي للتسجيل ف الترم العادي هو ١٨ ساعه بس (اللي هما مواد الترم اللي مجبر تاخدهم) فعملوا السمر كورس عشان تخلص فيه موادك اللي شيلتها.

نيجي بقي للسمر كورس "الترم الصيفى": 

- بيكون عباره عن ترم عادي جداً سكاشن ومحاضرات واعمال سنه وغياب وحضور وشيتات وامتحان عملي وشفوي ونظري .

- مدة الدراسه: مدة الدراسه فى السمر شهرين ع الورق ..والواقع شهرين الا اسبوع.

- طب التسجيل: التسجيل فى السمر بيكون ف الغالب تسجيل ورقي ف الكليه لأنك بتدفع مبلغ مالي و بتدخل بعدها ع الموقع تتاكد ان المواد اتسجلت .

بيتم التسجيل ورقياً وليس عن طريق موقع الكليه من خلال شئون الطلاب .. بيتم استلام نموذج ورقي عباره عن نصفين متماثلين بيتم كتابة فيه البيانات الشخصية بالاضافه الي (اسم الماده كامل ، عدد ساعاتها ، كود الماده ) ولازم نتاكد من صحة البيانات دي وبتتكتب في النصين يعني النص الاول دي النص التاني .. بيتم تسليم النموذج لشئون الطلاب و بتستلم اذن دفع بتروح بيه الخزنه وتدفع هناك ... والخزنه هتديك وصل انك دفعت .  

ملحوظة: مهم جدا جدا انك تحتفظ ب ورقه التسجيل ووصل الدفع حتي انتهاء الفصل الدراسي الصيفي. 

- طب بدفع كام : المبلغ ده ١٠٠ جنيه للساعه الواحده يعني لو انت هتسجل ماده ب ٣ ساعات يبقي ٣٠٠ جنيه و ده كان المبلغ بتاع السنه اللي فاتت .

- طب اقدر اسجل كام ساعة: الحد الاقصي للتسجيل ف السمر هو ٩ ساعات بس ..

- امتى بيبدأ السمر كورس: عادةَ التسجيل بيبدء ف نص ٧ و الدراسه بعده باسبوع 

والامتحانات ف اول شهر ٩. 

- طب بيحصل اية للتقدير: بالنسبة للـ gpa فهو ممكن يزيد او يقل بعد السمر ..

وبتبقى زيادة قليلة بشرط انك تجيب تقدير عالي ف السمر ( امتياز وجيدجداَ ).

نيجي بقي للتشعيب "للفرقة الاولى": 

في التشعيب انت قدام وضع من اتنين على حسب نجحت ف 20 ساعه قبل السمر كورس ولا لأ

1- إذا كنت معدي ف 20 ساعه (يعني اتنقلت للمستوى التاني ) .. التشعيب بيكون قبل السمر كورس ... ولو دخلت سمر وتقديرك زاد ممكن تقدم التماس للتحويل من قسم للتاني.

2- اذا كنت مش مكمل 20 ساعه ( يعني محتاج تدخل السمر عشان تكمل ال20 وتتنقل للمستوي التاني ) .. بيبقى التشعيب بتاعك بعد السمر.

كلية العلوم جامعة المنصورة

علشان تعدي من سنة اولي ويتكتبلك مستوي تاني لازم تعدي 18 ساعة "نص المواد يعني" وده بردو في الترمين وبالسمر كمان ، طب نفرض ماعدتش 18 ساعة ف سنة اولي هيتكتبلك ف الكارنيه سنة اولي تاني .. نيجي بقي لو انت مش طايق الكلية وماعديتش ال 18 دول ف تاني سنة ليك بسمرهم كده الكلية تقولك مع السلامة وتتفصل ... ولما تطلع سنة تانية بقي ليك فرصة تقريبا 3 سنين بدل 2 ولازم تعدي ف 42 ساعة تقريبا علشان تطلع تالتة وهكذا بقي باقي السنين..عدد الساعات ف ال 4 سنين 146 ساعة تاخدهم بقي ف 5 سنين وله 6 وله 7 المهم تخلصهم.

نيجي بقي للسمر كورس "الترم الصيفى": 

 بالنسبة لما تشيل مواد تاخدهم امتي... فى السمر كورس بقي وده فى الصيف وبيكون متاح ليك 9 ساعات كل صيف تسجلهم من المواد اللي عليك الساعة ب 100 ورسوم دخول المادة ب 100 يعني مثلا عليك مادة ب 3 ساعات دول يعني 400 ج .. لو مهدد بالفصل وشرحنا امتي بتكون مهدد بالفصل بيتفتحلك 12 ساعة او لو هتتخرج بردو ممكن بردو تاخدهم بونص "زياده" في رابعة وده ليه شروط بردو هو عامة البونص 8 ساعات اقصي حد فى الترم 6 ساعات يعني مثلا ترم اول تاخد 6 والتاني 2 او 4 و 4 وكده يعني بس بردو لازم قبل ماتخش رابعة تكون معدي 96 ساعة وقبل ماتخش الترم التاني في رابعة تعدي 112 تقريبا او بقي تاخدهم ف سنة خامسة وسادسة وكده. 

كلية العلوم جامعة كفر الشيخ

علشان تعدي من سنة اولي ويتكتبلك مستوي تاني لازم تعدي 18 ساعة "نص المواد يعني" وده بردو في الترمين وبالسمر كمان ، طب نفرض ماعدتش 18 ساعة ف سنة اولي هيتكتبلك ف الكارنيه سنة اولي تاني .

نيجي بقي للسمر كورس "الترم الصيفى": 

 بالنسبة لما تشيل مواد تاخدهم امتي... فى السمر كورس بقي وده فى الصيف 

1- التقديم اعتبارا من اول شهر 7 الى نصف الشهر غالبا اى بعد ظهور النتيجه باسبوعين. 

2- يسمح للطالب بالتسجيل فى 9 ساعات معتمده ويكون ثمن الساعة الواحده 100 جنيه وبالنسبة للمستوى الرابع بيسمح له ب12 ساعه بدلا من 9 فقط.

3- بشرط لايقل عدد الطلاب فى اى مقرر فى برنامج الكيمياء عن 8 طلاب للمستويات الاول والثانى والثالث وعن 3 طلاب فى جميع البرامج الاخرى لنفس المستويات اما طلاب المستوى الرابع فيسمح باى عدد بشرط التخرج.

4- التسجيل فى الفصل الصيفى اختيارى وليس اجبارى

5- طلاب المستوى الاول والثانى والثالث يسجلون فى المواد السابق رسوبهم بها اما طلاب المستوى الرابع فيسمح لهم بالتسجيل فى مواد سبق او لم يسبق لهم الدخول بها .