سنحدثكم فى هذا المقال من موقع « علومنجى دوت كوم » عن خطوات التقديم فى المدينة الجامعية بجامعة بنى سويف ، نرجو من اللى عندة اضافة يزودها فى التعليقات واحنا هنضفها علشان الناس تستفيد.
اولا التقدم الكترونى
بيكون على موقع الزهراء للمدن الجامعية ودا غالبا مش بياخدوا بيه وحدة لازم تقديم ورقى.ثانيا التقديم الورقى
- تحمل من اللينكات اللى جاية ﺍﻟﺼﻔﺤﺎﺕ ﺍﻟﻠﻰ ﻋﺎﻭﺯﺓ ﺍﺧﺘﺎﻡ ﻭﺗﻤﻀﻰ ﻣﻦ ﺑﻠﺪﻙ.
- ( الأوﻻﺩ ) تحمل هذا ﺍﻟﻤﻠﻒ
- ( البناﺕ ) تحمل هذا ﺍﻟﻤﻠﻒ
- 7 صور شخصية.
- صورة بطاقة وايصال كهرباء (بس كل سنة بيشوفوا صورة البطاقة او ياخدو شهادة الميلاد وخلاص ).
- فيش وتشبيه للأولادوالبنات هتحتاجوه وقت التسكين فى المدينة اللى هو صحيفة الحالة الجنائية.
تنوية: إوعى تروح يوم السبت اوعى ، السبت أجازة فى الكلية ، وروح السجل المدنى طلعلك بتاع 8 شهادات ميلاد كمبيوتر هتحتاجهم بعدين والله وصور بطاقتك وبطاقة ولى أمرك كل واحد 4 صور مش عاوزك تضيع وقت هناك ع الفاضى تقعد تدور ع تصوير.
صحيح من اول التقديم لغاية ما يخلص وتبقى عامل حسابك ع 1000 ج وشوية بس للحوار ذهاب وعودة واكل وتقديم وغيره ... دا علشان تبقى فى الأمان ومترجعش ع حاجه وتغرم فلوس اكتر !!
المواصلات إلى بنى سويف
☆ أسهل طريقة لو انت من بحرى تحجز قطر درجة تانية مكيفة للقاهرة مش غالى انا بركب من المنصورة ب 27 ج وتحجز معاها من نفس المكان القاهرة لبنى سويف ب 22 ج هتنزل فى المحطة ... او تحجز من القاهرة لبنى سويف بس وتركب من محافظتك لموقف عبود فى القاهرة ومن عبود لمحطة مصر فى رمسيس وانا بفضل الاولى علشان معاد القطر ثابت وهتوصل فى المكان بالظبط ياريت تبقى هناك على بيات وهتلاقى جنب المحطة لو سألت أماكن تبات فيها (فنادق شعبية بس لطيفة الليلة ممكن ب 30) ... أو الحل اللى بفضله لو انت ولد قضيها ف المحطة عادى وظبط نفسك انت بال 30 ج .ممكن تحجز أول ما توصل عودة من بنى سويف تانى يوم على قطر الساعة 4 تانية مكيفة للقاهرة ب 22 ج برده او تتصرف من موقف محى الدين فى بنى سويف.
الناس اللى من بحرى تاخد بالها ... حجز قبلى من القاهرة طبعا اكيد complete بسبب العيد اللى داخل علينا دا لكن من محافظات بحرى للقاهرة متاح على ما اعتقد .
فيه حلين :
- ممكن تركب من رمسيس او تركب المترو وتنزل المنيب وتركب من هناك ... المنيب بمجرد ما تطلع من محطه المترو هتلاقي الناس بتركبك العربيه لوحدها عافيه ... والطريق بياخد ساعتين سواء من رمسيس او المنيب.
- اللي جاي عربيه لعبود يقول للسواق ينزله ف المؤسسه ويركب المترو وينزل المنيب او رمسيس .... واذا كان قطر عادي من محطه رمسيس بيبقي كويس برضو مش زحمه ولا حاجة لان بيطلع من رمسيس نفسها مش بيبقي محمل قبل كدا ... انا جربته مرتين ولقيت مكان .. والقطر بياخد يجي ساعه ونص او ساعتين الا تلت.
- القطر اللى المفروض كنت هتحجزه من القاهرة لبنى سويف ... تركب فيه برده واقف مش لازم تقعد هتدفع تمن التذكرة وغرامة 6 ج تقريبا ( بس تقف فى المكيف مش تروح العادى هتتنفخ أقسم بالله احنا فى فترة عيد وكمان قطر قبلى ) وكلها ساعتين الا ربع وتوصل بنى سويف على كل خير.
بعد ما وصلت بنى سويف تعمل ايه ؟؟
النهاردة يوم التقديم ... من 8 الصبح تصحصح كدا علشان ننجز قضيها تاكسى علشان مش تضطر تقعد يوم كمان.1 - تاخد تاكسى ( ب 10 ج ومتدفعش أكتر من كدا وتنح مع السواق مهما كان العدد وارميله الفلوس وسيبه مش هيجرى وراك وخصوصا لو بنت ) وتقوله مجمع تعليم صناعى شرق النيل وينزلك قدام البوابة بتاعة المجمع ... تورى الأمن بطاقة الترشيح وتدخل ... بص هتتعب شوية على ماتوصل للكلية بس معلش مش تكرهها من دلوقتى أسأل عليها هيدلوك ... جنب طب أسنان.
2 - اول ما توصل الكلية تطلع شئون الطلاب فوق . تقريبا هتشترى مظروف وانت فوق ..مش فاكر بكام بس اعمل حسابك على 60 ج .. تاخد المظروف هتلاقى مكتوب عليه المطلوب تحط الورق فيه وتقدمه هيعطوك تقريبا ايصال على ما أذكر باستلام أوراقك حافظ عليه أكتر من والدك احنا فى بلد الورق وانت هناك بقه تخلص الآتى تاخد ورقة كشف طبى 《 لو فى كشف طبى شغال 》 معاك من الكلية هتحتاجها وتختم صور من الكلية ع ضهر الصورة علشان المدينة ... اختم ع اد ماتقدر 8 صور كدا ولو عاوز تدفع الرسوم ادفعها مش عاوز استنى براحتك ... هى تقريبا 236.5 ج اعمل حسابك عليهم برده وممكن يزيدوا او يقلوا ... ممكن لازم تدفعهم وقتى.
3 - خلصت ورق المدينة ؟؟ تمام اطلع قدام بوابة مجمع تعليم صناعى خد تاكسى ( ب 10 ج بس وتنح تانى ) وقوله الإدارة العامة للمدن الجامعية فى عبدالسلام عارف جنب مدينة الطالبات فى عبدالسلام عارف جنب السجل المدنى.
4 - بعد ماتوصل الادارة العامة للمدن الجامعية ومعاك ورقك جاهز من بلدك هتشترى الملف بتاع التقديم من هناك واعمل حسابك ع 100 ج وهتعطى للشئون الملف وصورك والورق اللى مخلصه من بلدك وكليتك للمدينة هما هيظبوهم وهيعطوك ايصال استلام تحافظ عليه زى ما قولنا احنا فى بلد الورق.
5 - 《 لو فى كشف طبى 》وقالولك ف الكلية غالبا بيبقى فى علوم ... انت جبت ورقة الكشف الطبى ... تاخد تاكسى من عبد السلام عارف ( ب 5 ج وتنح ) وتقوله الجامعة غرب - بوابة علوم .. تدخل من البوابة وتعمل نفس حوار الأمن تسأل على العيادات وتعمل الكشف الطبى وتاخد الورقة وتختم صوة من الكلية للكشف قبل ماتروح، وغالبا هتدفع 50 أو 75 ج تبرع واسأل هتختم الورق من كبيرة الأطباء فى حقوق أو لأ !!.
6 - بعد ما تخلص الكشف تاخد تاكسى ( ب 10 ج وتنح انت خلاص بقيت تنيح كبير ) تقوله مجمع تعليم صناعى شرق النيل قدام البوابة وتروح الكلية بورقة الكشف الطبى وتسلمها.
كدا تقريبا على ما أذكر انت خلصت كل حاجه وهتخلص ع الساعة 1 او 1.5 حاول تنجز ومتتأخرش عن كدا الحكومة بتقفل 2.
طب ارجع ازاى ؟؟
انت حجزت قطر ؟☆ حجزت تمام اطلع بقه خد تاكسى من قدام بوابة تعليم صناعى وقوله محطة بنى سويف غرب وهاتلك شيبسى واكل وعيش بقه لغاية معاد قطرك الساعة 4 للقاهرة او ع حسب انت منين فى قبلى وحجزك الساعة كام !!
☆ محجزتش ! تمام اطلع بالتاكسى ( 10 ج بس ) ع موقف محى الدين هتلاقى هناك عربيات للقاهرة ب 20 ج تقريبا بس مش احب دا لأن الجو حر القطر افضل.
واللة انت عسل اللي كتب ده
ردحذفحبيبى شكرا لمرورك ❤️
حذف