دبلومه الكيمياء الحيوي علوم كفر الشيخ

بِسْــــــــــــــــمِ اﷲِالرَّحْمَنِ الرَّحِيم

هنتكلم فى الموضوع ده عن ايه هى الاوراق المطلوبه وميعاد التقديم والمصاريف وبتاخد تقدير إيه والمصاريف كام و نظام الدراسه و كام يوم فى الاسبوع والمقررات الدراسيه لدبلومه الكيمياء الحيويه "البيو" كلية علوم كفر الشيخ والموضوع يتم تجديده باستمرار ولو عندك اى معلومات اضافية تفضل بطرحها وهيعمل فريق الموقع على اضافتها.

الدبلومة كانت أول سنه تفتح كانت عام 2017 .

ميعاد التقديم

• التقديم بيفتح فى شهر 8 "غالبا على أخر الشهر" 
• وكذلك فى اخر شهر 2 "فى الترم الثانى- فتره شتوية" 
• السنة دى 2021/2020 التقديم فتح من 18 أغسطس لمدة اسبوعين.

صحيح يقال ان التقديم كان فتره شتويه سنة 2018 (فى اخر شهر 2) كان استثنائي علشان ما فتحتش في شهر ٩ وعملوها فى شهر ٣ واخدوا فيها التيرم التاني وكان العدد الصغير واللي هيقدم في شهر 9 هينضم للناس اللى بدأوا فى شهر 3 وهم هياخدوا معاهم تيرم اول. 

الاوراق المطلوبه

1. عدد 2 صوره البطاقه الشخصيه (الرقم القومى) .
2. شهاده الميلاد كمبيوتر " اصل – صورة".
3. شهاده التقدير 4 سنوات (شهادة بيان الدرجات) "أصل – صورة" .
4. عدد 7 صور شخصيه .
5. شهاده التخرج "أصل وصورة".
6. شهادة البكالريوس المؤقته.
7. موافقه جهة العمل او اقرار بعدم العمل.
8. اصل شهادة تأديه الخدمه العسكريه او الاعفاء منها (صوره شهادة التجنيد).
9. عدد 2 ملف بلاستيك.

للعلم! ممكن تقدموا بالافاده عادى وبتمضى اقرار بالورق الناقص وحاولوا تجهزوا الورق قبل اخر يوم للتقديم ... وده لان فى طلبة سألتنا وقولنالهم "لإفادة ممكن تنفع تقدم بيها فى بعض الجامعات وهناك جامعات أخرى بتوع الشؤن بيتحكموا ويقولك عايزين شهادة مؤقتة ومبيردوش بالافادة". 

انت بتقدم غالبا هتدفع 100 جنية تقديم وعادي اي حد يقدملك اخوك او واحد صاحبك عادي بس ياريت هناك ما يقولش انه بيقدم لحد تاني. 

 

2021/2020

2021/2020

للعلم! لأول سنة 2021/2020 تفتح دبلومة التحاليل البيولوجية بكلية العلوم جامعة كفر الشيخ

التسجيل على موقع الكليه

تقدر تحمل ملف فية شرح الطريقة بالصور من هنا وطريقة التحميل فى الصورة دى

 

او اتبع التعليمات زى ما احنا كاتبين هنا:

اولا تدخل على الموقع وهو www.kfs.edu.eg بعد كده بتختار خدمات الكترونيه ... انت بتدخل الرقم القومي والرقم السري إلى هو (123456) وبعد كده بتدخل البيانات بتاعتك كلها وفي جزئيه مهمه جدا أن لما تختار سنه التخرج بختار السنة اللى قبل التقديم "بمعنى لو هقدم فى 2019 يبقى اكتب 2017-2018 عشان اللى بيكتب السنة الحقيقة بتاعته هتلاقيه بيطبعلك البيانات فاضية وهيقولك في مشكلة فالبيانات" عشان الموقع يكمل الاجراءات وبعد كده طباعه التقرير الكلام ده تعمله في أي مكان او البيت ولو حابب تقدر برضو تعملة فى مكتبه طارق أو مكتبة فؤاد ... وتطبعها بقى وتأخد نسخه ليك ونسخه لشؤون وتدفع الفلوس وتأخد منها نسختين كراسه الإرشاد هتكتب اول وتالت صفحه تملي البيانات فيهم بس وبعد كده هتجيب الملف بتاعك منهم وتطلع تلت صور ... اتنين هيتدبسوا في الكراستين والتالته تكتب عليها الاسم وهي هتاخدها منك وضروري الوصل بتاع دفع المصاريف الأصفر هيبقى معاك والبمبي هيتدبس في الملف برده وبعدين تحط صوره التسجيل في الملف برده وترجعه ليها وبس كده .

الجزاء التاني اللي في الدولة وبعد كدة الكلية او الجامعة وبعد كدة المؤهل هو يقصد الكلية اللي متخرج منها ولا جامعة كفر الشيخ اللي هي مكان الدبلومة:

اللي متخرج منها.

المربع التانى فى التسجيل دا خاص بالبكالريوس "شبعة المؤهل أو القسم الى اتخرجت منه" ولا يقصدوا قسم الدبلومه "اللى هو كميا حيوى" :

خاص ببيانات البكالوريوس بتاعك.

لو حصل ومش عارف تطبعهم فى ورقة واحدة :

حوليها بى دى اف وهتنطبع ورقة واحده.

بخصوص شعبة المؤهل:

يقصد بيها تخصصك سواء كيمياء او كيمياء حيويه او او .

وجامعة ايه دى يقصد بيها:

جامعتك اللى اتخرجت منها واختار من بين الجامعات اللى موجوده ولو مش موجوده اختار اقرب حاجه ليها عادي.

ملحوظه: التسجيل ملهوش علاقه بالدفع خالص.

طيب الورقه اللي طبعتها لازم يبقي معايا منها نسخة ليه؟؟

مش لازم بس يفضل تبقى معاك نسخه عشان الامان بس.

لو الوصل الاصفر وقع؟

الوصل الاحمر معاهم يعني بيثبت انك دافع.

شهادة إدارية لغير العاملين دى اجيبها منين:

بتوقع عليها هناك عندهم.

بيان الحاله هو هو بيان الدرجات ولاايه والمجلد منين؟؟

بيان الحاله هو بيان درجات والمجلد من اي مكتبه عادي قوليله عايزه مجلد 40 ملف

مصاريف الدبلومة

• كانت فى 2020/2019 بـ 4000 من غير الكتب (كانت فى 2018 بـ 2760 جنيه).
• وبتندفع بعد ما تقبل ... بتدفع بس 100 جنية للتقديم.

الاقسام المطلوبة

• الدبلومه لطلبة كلية العلوم اقسام منفردة زى كيمياء حيوى وحيوان منفرد ونبات منفرد واقسام الكيمياء المزدوج (كيمياء/كيمياء حيوى , كيمياء/ميكروبيولوجى , كيمياء/نبات , كيمياء/حيوان) 
• يقال انها بتقبل حيوان اسبشيل ونبات اسبشيل بشرط ان يكون في بيان درجات يثبت انك درستي كيمياء حيوي.
• بتقبل كلية طب بيطرى وكلية صيدلة 
• ومش بتقبل زراعة.

ملحوظة: فى كفر الشيخ بيعتبروا قسم كيمياء/ميكروبيولوجى زيه زى كيمياء/نبات علشان كده مذكروهوش فى الورق اللى متعلق لكن بيقبلوه.
ملحوظة: كيمياء/فيزياء و كيمياء/حشرات مقبلتش السنة اللي فاتت في الاول قالوا هتقبل كل الاقسام وبعد ما الناس ضربت المشوار رفضوهم.

طب لو انت قسم من اللى بيقبلوهم فوق ولنفرض ميكروبيولوجى/ كيمياء او حيوان / كيمياء هل يفرق معاهم اذا كان الرئسيى كيمياء أو الرئيسى ميكروبيولوجى؟؟

لا مش هتفرق.

نقلا عن الانسة ندا خالد:

موضوع الاقسام اللى هتتقبل سواء كيمياء/فيزياء او كيمياء /حشرات فى شئون الدراسات العليا مفيش اى حد بيفيدك بيقولوا زى ما مكتوب على الورق احنا ما نعرفش وللاسف انا مالقتش حد فى قسم الكيمياء اساله فطلعت قسم النبات لقيت رئيس القسم واتكلمت معاه وقال ان المشكله انهم اول سنه للدبلومه ومش عارفين يرتبوا ولا ينظموا امورهم والورق المفروض هيتفرز فى قسم الكيمياء ف فالغالب هيفضلوا اللى رئيسى كيمياء والله اعلم وقال كمان انهم الترم اللى فات كانوا بيقبلوا كل الناس الترم ده الشروط غلسه عشان مش عايزين عدد لغيت ما يرتبوا نفسهم واكدلى ان الدبلومه هتفتح ترم تانى فى شهر 2 فكل اللى مش هيتقبل الترم ده ليه فرصه اكبر الترم الجاى.

نقلا عن الانسة وئام الزعفرانى: 

بتقول "انا التخصص الرئيسى ميكرو سألت الوكيل قالى لا مش هتقبلك" ... بس انا كعلومنجى مش مع الكلام ده.

هل الدبلومه معتمده

معتمده ومعتمده يعنى معتمده من وزاره الصحه وتقدر تاخد الترخيص من غير قضيه. 

الدبلومات المعتمدة فى الكيمياء الحيوى والميكروبيولوجى

التقدير المقبول

تقدير بيبقى على حسب العدد اللى مقدم وتقديرهم لكن غالبا اخدت السنة اللى فاتت من مقبول.

نظام الدراسة

راى الطلبة اللى اخدوها:

اولا الدبلومه كويسه هو بس عشان لسه فاتحة جديد فكان في ضغط شويه للمنهج والامتحانات وان شاء الله هتتظبط بعد كده ... وبتحتاج شوية مذاكره برضو ... من الاخرعاوزة مذاكرة يا جماعة تفضيلها نفسك كانك في الكلية .
ثانيا المحتوي الدراسي بيفيدك فعلا بعد كده في شغل المعمل وبالذات جزء دكتور ابراهيم حلمي "استاذ الانزيمات بالدبلومه" من اكتر الدكاتره حرصا علي انك تاخد معلومه وتشتغل بايدك.

مواد الدبلومة:

التيرم الاول: إنزيمات - مناعه - ميتابوليزم - باراسيتولوجي- طب شرعي.
التيرم التاني: تكنولوجيا DNA - ايض البورفرين - التكنولوجيا الحيويه - الأيض والعيوب الوراثية - كيمياء المضادات الحيويه.
ودى بعض مواد الدبلومة: كيمياء الانزيمات "د.ابراهيم حلمى و د.مروة غلاب" واساسيات علم المناعة "د.أشرف الشهاوى و د.هبة صهبون" والكيمياء الطبية الشرعية "د.محمد الششتاوى" وباراسيتولوجى "الطفيليات" والاضطرابات الكيمياء الحيوية "د.عادل عطية" والامراض والعيوب الوراثية والتكنولوجيا الحيوية وايض البورفرين و وغالبا محاضرات المواد دى فى مكتبة اباظة ... وبعض المقررات دى بيدرسها دكاترة من صيدلة ودكاترة من طب بشرى.

دة راى طالبة اخرى: 

اللى يشيل مادة يدفع نص المصاريف تانى "مصاريف ترم كامل يعني 1350 جنيه" ... وقالت "انا مش شايفة ان النتيجة تبقى حكم ليكوا لان اكيد كل واحد بياخد حقه مهو مش هنكون مش مجاوبين وننجح يعنى ... المشكلة فى حتة المصاريف الجديدة دى حاجة مش حلوة والمفروض الجامعة كانت تعرف الناس بكده وازاى مفيش سمر كورس رغم ان النظام نظام ساعات معتمدة".

نظام الحضور

فيه تشديد على الحضور بس درجات الحضور مش كتيره كانوا بيقولوا عليه 5 درجات اعمال سنه بس مش بيأثر علي حد ... وغالبا يومين يومين "يوم نظري ويوم عملي" غالبا من 9-4 مساءا والدراسه اخرها الساعه 4 ... الامتحانات كانت سهله جدا ومباشره ومن المحاضرات.

طيب اللى لسه متخرج والشهاده مش هتلحق تطلع الافاده تنفع لوحدها ولا لازم الشهاده:

معظم الكليات بيطلبوا الشهادة المؤقته مش بيقبلوا الافاده لكن تقدر تروح وتسأل فى الكلية او تسأل على الرقم ده "رقم تليفون وكيل الكلية للدراسات العليا - د.حسن احمد زيدان" 0473215177 .

الدبلومات الموجودة فى علوم كفر الشيخ

1. الكيمياء الحيوى
2. الميكروبيولوجى
3. التحاليل البيولوجية

سكن للطالبات

صحيح فى حاجة حلوه عملتها جامعة كفر الشيخ:

بالنسبة للبنات اللى بتسافر وعايزة تسكن في المدينة الجامعية فترة الامتحانات بسبب ظروف السفر بيقبلوهم وبيكون اليوم بعشرة جنية وميزة المدينة الجامعية انها جوه المجمع وقربية للكلية .

للأستفسار والتواصل

ده رقم تليفون وكيل الكلية للدراسات العليا "الدكتور حسن احمد زيدان" للى حابب يستفسر عن حاجة :

تليفون : 0473215177
البريد الالكتروني

شكر خاص من فريق الموقع للدكتور د.محمد بكار.