أعلن مجلس النواب عام 2019 عن موافقته علي قانون التأمين الصحي الجديد والمقدم من قبل الحكومة ويتألف من 67 مادة فما هو القانون وما تأثيره علينا كعلميين ، وكذلك من له حق التعاقد وكيفية التعاقد وهل ده لكل المحافظات أم لمحافظات معينة ، تقدر تقول اننا فى موقع « علومنجى دوت كوم » هنوضحلك كل ما يخص القانون.
دا أخر حاجة وصلها القانون بتاريخ 2019/7/30:
ده التوصيف الوظيفى للكيميائى والتكنولوجيست (الفنى) + سنتين دراسات تخصصية العلمى معاه دكتوراه او ماجستير او اى دراسات عليا متساوي تماما مع الفنى فى التأمين الصحى الشامل الذى نفذ فى بورسعيد وسيعمم على باقى مصر تباعا (بعد ١٥ سنه هيكون طبقوة ف الحمهوريه كلها يعني كل سنه بيطبقوه ف محافظه او اتنين وتاتي القاهرة والجيزة والقليوبية ف اخر المحافظات) ... فعلا مهزلة كبيرة يعيشها الان علميين بورسعيد والطبيب كلينكال باثولوجى يدير تلك المنظومة واللى مش عاجبه يشرب من البحر.
خلاصة الورق اللى فات:
التوصيف مكتوب بالانجليزيه ممكن تقرأه المشكلة أنه ووضعنا مع الفنيين فى سلة واحدة ولايفرق بين الكيمياء الحامل دكتوراه الكيمياء الحيويه وخريج معهد فنى سنتين حيث أن مرتبات التأمين الصحي في المناطق اللي هيطبق فيها القانون الجديد الكيميائي (حتى لو معاه دكتوراه) فوق الفني وتحت التمريض والصيدلة والطب.
وخدين بالكم من الاهانة باعتبارنا اقل من التمريض ... مش مهتمين بينا اصلا وبيعتبرك وانت معاك دكتوراه اقل من حديث التخرج من تمريض.
رابطة المدافعين عن حقوق العلميين عشان تواجه تعديات موظفي التأمين الصحي على العلميين وتضمينهم لينا كوظائف فنية ؟؟؟
(1) أعلن عدد من أعضاء مجلس النقابة (بصفتهم النقابية) الآتي أسماءهم بعمل محضر قسم شرطة في رئيس هيئة التأمين الصحي (بصفته) لإجباره على سحب الإعلان وعمل آخر جديد متضمن وضع كافة الفئات العلمية المخاطبة بالقانون : (كيميائيين - ميكروبيولوجيين - باثولوجيين) والالتزام بقوانين الدولة: * د. محمد شعبان - ممثل فرع بني سويف
* د. هناء أحمد - ممثل فرع سوهاج
* د. أحمد سامي - ممثل شعبة العلوم الطبية
* د. أميرة الحسيني - ممثل شعبة العلوم الطبية
* د. السعيد شعبان - ممثل فرع دمياط
* د. محمد السيد - ممثل فرع وسط الدلتا (طنطا وكفر الشيخ)
(2) البدء في تحريك دعوى قضائية لإلزام رئيس هيئة التأمين الصحي بالقانون وسحب الإعلان
(3) شن حملة صحفية بالميديا لمواجهة تعديات موظفي الدولة على قوانين الدولة ...... وإجباره عن سحب الإعلان ، ثم الاعتذار ، ثم وضع إعلان آخر مطابق للقانون.
وعلقت دكتورة / Salwa Dahesh (مرشحه سابقه لمنصب نقيب العلميين):
معقوله سنه امتياز بعد بكالريوس التمريض تخليهم يخدوا مرتب اعلي منا ب ٢٠٠٠ جنيه كل شهر يعني ٢٤ الف جنية كل سنه ... طب ليه ميخلوش أول سنه بنشتغلها تقابل سنه الامتياز و مرتبنا يزيد بعدها ٢٠٠٠ جنية كل شهر طول العمر .... كمان الدبلومه إللي كل الناس اخدوها وعاملين بيها ترخيص دي ليه مش بيحبوها سنه دراسيه و نأخد بيها ٢٠٠٠ جنية زياده يعني مظلومين في ٤٠٠٠ جنيه كل شهر.
أخر حاجة وصلها القانون بتاريخ 2019/6/16:
اولاً: أخيرا ورسميا العلميين دخلوا قانون التأمين ويمكن لأي معمل مرخص من معامل العلميين أن يتعاقد مع التأمين الصحي بقرار من الهيئة العامة للاعتماد والرقابة الصحية .... بعد ما خرجت اللائحة التنفيذية للقانون في 8 مايو الماضي .
ثانياً: المواصفات اللي نزلت امبارح اتسحبت تاني النهاردة عشان هيتعمل فيها بعض التعديلات غير المؤثرة لأنها ليست تعديلات جوهرية ، وهتنزل المواصفات النهائية إن شاء الله خلال شهر يوليو ... والغريب ان التأمين الصحى تم اقراره فى سنه واحدة .
ثالثاً: تابعوا الموضوع دا هشرح لكم إن شاء الله موضوع قانون التأمين الصحي ومن له حق التعاقد وكيفية التعاقد وهل ده لكل المحافظات أم لمحافظات معينة.
أهم نقطة : أرجو أن تهتموا بالموضوع لأن التعاقد هيتفتح لكل المحافظات من أول يوم مش للمحافظات اللي هيبدأ فيها بس تطبيق النظام، وبمجرد التعاقد مع الهيئة في القاهرة هتقدر تشتغل مباشرة مع التأمين الصحي في محافظتك.
اشتراطات الدخول في المنظومة الطبية للتأمين الصحي :
1- التسجيل : تسجيل المؤسسة علي موقع الهيئة ويعتبر التسجيل مقدمة لدخول المنظومة والاعتماد من الهيئة وتمنح المؤسسة مدة سنة مابين التسجيل والاعتماد لتوفير جميع المعايير طبقا لكل مؤسسة ويتضمن التسجيل 5 اشتراطات :
1- الترخيص : بالنسبة لهذا البند الهيئة ستقوم بزيارة المؤسسة وفحص توافر اشتراطات الترخيص بمعني لو المنشأة لم يتم ترخيصها لأنها حكومية مثلا او تحت الترخيص والأوراق في الوزارة مثلا الاهم توافر شروط الترخيص علي أرض الواقع من مباني وتهوية وإضاءة ومباة وطفاية حريق شروط الجودة لكل مهنة حسب متطلبات كل منها
2-National safety requirement NSR
تم وضع 30معيار لابد من توافرهم لضمان حماية المريض داخل المنشأة
3-Operating manual for all organization
لكل مؤسسة يتم وضع مانيوال خاص ويتضمن الأتي
Programs- Planes- Polices-Procedures- Methods
قامت الهيئة بوضع 1741 موديل ليتم التطبيق واختيار مايناسب المؤسسة
4-Leader ship requirement
5-Work force
العنصر البشري أو العمالة ومدي كفاءتها طبقا للمعايير
2- الاعتماد: بمجرد التسجيل بعد تخطي ال 5 نقاط المؤسسة أصبحت داخل المنظومة وخلال عام لابد من إكمال الاعتماد ... جميع المعايير ستكون طبقا لنظام ال GCI.
3- الاسعار: بمجرد التسجيل والاعتماد ستسري علي المؤسسة اسعار التأمين الصحي وسيتم وضع نظام محاسبي الكتروني باكواد معينة وقوائم الاسعار لم يتم الانتهاء منها الي الآن.
* سحب الاعتماد من أي مؤسسة:
يعني خروج المؤسسة من منظومة التأمين الصحي أما بالاخلال بشروط التعاقد أو طلب صاحب المؤسسة .
* وضع المعامل الخاصة المرخصة والمملوكة لغير لأطباء (معامل العلميين)؟؟
الإجابة: سيتم وضع معايير للمعامل ومازالت اللجنة لم تنتهي من وضعها ولن يتم التفريق بين معمل علمي أو طبيب طالما مرخص ويطلق عليه المعايير .
صحيح: اللي مرخص كيمياء هيشتغل كيمياء واللي مرخص ميكرو هيشتغل ميكرو ... يعنى المريض يجي يتحاسب كيمياء بلائحة التأمين الصحي وهيعمل التحاليل الباقية في معمل تاني (×_×).
نص القانون
هفهمك باختصار شديد جدا يعني ايه القانون الجديد ده:
١- القانون بيقول ان التأمين الصحي اجباري على كل المواطنين سواء يعمل او عاطل رجل او امرأه طفل او شيخ و الدوله هتدفع عن غير القادرين ( وطبعا في نظر الدوله الشعب كله قادر و معاه فلوس ) و كمان العاطل و اللي مش لاقي شغل غصب عنه هيدفع عنه من يعوله يعني من الآخر كده كله هيدفع و كله غصب عنه هيدخل في التأمين لأنه إجباري على كل المواطنين
٢- في بنود القانون بيعتبر المعمل منشأه طبية ( بما يخالف كل القوانين لأن المعمل مش منشأة طبية أصلا ده منشأة صحية) و بذلك لن يدير المنشأة الطبية الا طبيب و بذلك المعمل الذي لا يديره طبيب لا يدخل تحت هذا القانون ومن ثم ليس من حقك أبدا التعاقد مع الشركة و دخولك ضمن معامل التأمين الصحي ( اللي هي لكل المواطنين مش لشريحه معينه ) و بالتالي حضرتك مش هتلاقي مريض ييجي يحلل عندك لأنه ببساطه مؤمن عليه و هيروح للمعمل المتعاقد مع التأمين لأنه هيدفع ٢٠% فقط من إجمالي المبلغ فإيه اللي يجبره ييجي لحضرتك يدفع ١٠٠ جنيه وهو هيدفع في المعمل اللي جنبك ٢٠ بس ( ده أصلا لو سابوك فاتح ).
٣- في بنود القانون يوجد لجنة مشتركه من نقابات المهن الطبية هي المنوطه بوضع الشروط اللازم توافرها في المنشآت الطبية ( معامل و عيادات وغيرها ) لدخولها و قبولها للتعاقد مع التأمين و بكده مفيش ولا عياده او معمل او مستشفى او اي مكان يقدر يتعاقد مع التأمين الا لو طبق هذه الشروط و استوفى لاشتراطات هذه اللجنه
طيب الكلام حلو اوي لحد هنا فين المشكله بقى
المشكله حضرتك انهم معبروش نقيب العلميين ولا النقابة و حطوا كل الناس في اللجنه دي ما عدا البيه نقيب العلميين و هو قاعد بيتفرج و يقولك ملناش دعوه ( ملناش دأعوه يا مهيي هنا كل واهد في هالو ).
٤- ايه اللي يخلي معمل مطابق للشروط يوافق أصلا انه يتعاقد مع التأمين و ياخد ٢٠ % بس من قيمة التحاليل
أينعم هو هياخد ال ٨٠ % الباقيين من الحكومه و ابقى قابلني طبعا لو الحكومه دفعت و حتى لو دفعت ابقى قابلني لو دفعت في الميعاد و لم تسوف و حتى لو دفعت في الميعاد وكله تمام هياخدهم منك تاني بالضرايب و التأمينات و .... الخ لأنك ببساطه تحت عينه وعارف كل مليم دخل معملك
نرجع للسؤال ايه يخلي معمل يوافق على التعاقد ده ؟؟
ان الحكومه بمنتهى البساطه تنزل تقفلك كل المعامل اللي في المنطقه و الغير مستوفية للشروط (الشروط موضوعه من اللجنه التي لا تمثلك و لا تواجد فيها للعلميين) و بكده يقولك انا بخدمك اهو و بقفلك المعامل علشان تشتغل لوحدك و دخلك يزيد و المريض مش هيلاقي غيرك يحلل عنده
يعني سيادتك يا اما تستوفي الشروط و تدخل في التأمين و الحكومه تسرقك يا اما تقفل معملك.
فيه نقاط كتيره اووووووووي و لكن انا شرحتلك أقرب حاجه هتفهمها و تحس بخطورتها.
ده رأى د أحمد سامى محمد :
للناس للي بتسال ع قانون التامين الصحي -ابسطهالكم-هو اغلب الشعب المصري بيجيب الزيت والسكر من التموين صح! طيب ليه غالبا مش بتروح تجيبهم من مكان تاني ويسيب التموين ! نفس الحال هيبقي في قانون التامين الصحي بالظبط التحاليل في الاماكن المتعاقده معاه هتبقي بسعر 10% من سعرها الحالي ومش بس كده لا ده الاماكن الخاصه الكبيره هتدخل جواه طيب ليه المريض يروحلك واصلا فيه اماكن خاصهمتعاقده مع التامين وسعر التحاليل فيها 10% من سعرك يعني مثلا البول والبراز لو كل واحد فيهم بعشره جنيه هما هيعملو كل واحد بجنية - طيب ليه المريض يدفعلك انت عشريين جنيه بول وبراز طالما عنده مكان خاص ومتعاقد مع التامين هيعملهم باتنين جنيه فقط. نسيت اقلك انه نظام اجباري كل مواطن هيدفع في الدوله 1400 جنيه في السنه وللي مش شغال ابوه هيدفعله وللي متجوزه جوزها هيدفعلها بنسب من مرتباتهم.
ده رأى د شريف عطية:
مش بالسهولة الي انت متخيله ده , اولا الارزاق على الله
بالنسبه لموضوع التامين على المواطن علشان يمشي صح محتاج عشر سنين على الاقل ترتيبات ومش مسئلة معامل فقط حتى الاطباء ايه الي يخلي مريض يكشف عند اخصائي بـ 10 جنيه و مايكشفش عند استشاري مثلا بـ 20 جنيه , معنى كده الاطباء يقعدوا في بيوتهم ؟؟
وكمان في شركات تامين كتيره جدا ماتدفعش للمعامل الا بطلوع الروح ما بالك بالحكومه
انا عندي معمل و بقولكوا ماتشغلوش بالكم.
للعلم!
القانون خلاص اتوافق علية من مجلس الشعب يوم 18 ديسمبر 2017 واتوافق علية من رئيس الجمهورية وهو قيد التنفقذ خلاص وبالفعل اعتبر المنشآت الطبية: زى المستشفيات والمراكز الطبية والوحدات الصحية والإسعاف والمستوصفات والعيادات والمختبرات ومراكز الأشعة وبنوك الدم وكافة المرافق الصحية سواء الحكومية أو غير الحكومية عدا التابعة للقوات المسلحة ودة نص القانون وامس الاربعاء الموافق 3-7-2018 نفت وزارة الصحة ما تردد عن تأجيل تطبيق قانون التأمين الصحي الشامل لأجل غير مسمى.
معمل التحاليل الطبيه ف القوانين عباره عن منشأه ايه بالضبط ؟؟؟
منشأة صحية زي الصيدلية برضه منشأة صحية وليست منشأة طبية وده فى قانون ٣٦٧ لسنة ١٩٥٤ في شأن مزاولة مهن الكيمياء الطبية والبكتريولوجيا والباثولوجيا وتنظيم معامل التشخيص الطبي ومعامل الأبحاث العلمية ومعامل المستحضرات ... الطبية يديرها طبيب والصحيه؟؟ يديرها من هو مؤهل لإدارتها و مستوفي لشروط حق الإدارة زي الصيدلية يديرها صيدلي غير موظف حكومي والنظارات الطبية ( منشأة صحية ) يديرها المؤهل لها والعيادة البيطرية و الصيدلية البيطرية يديرها من هو مؤهل لها وهكذا.
ده رأى نقابة الاطباء فى مشروع قانون التأمين الصحى الشامل الجديد:
يقر القانون الجديد مبدأ "التعاقد" مع المستشفيات الحكومية متى إجتازت معايير الجودة .. و ليس ضم المستشفيات الحكومية ورفع مستوى الجودة فيها بكل السبل كأمر حتمي حتى لا يفقد الشعب المستشفيات التي بناها بماله عبر عشرات السنين .. والمستشفيات التى ستخرج من التعاقد لن تحصل على أى تمويل وسيتم غلقها بالطبع و عندما تصبح السيطرة للقطاع الخاص سيفرض أسعاره و بالتالي سيتم رفع نسب الإشتراك و المساهمات و بذلك نجد أنفسنا في النهاية أمام مشروع تأمين صحى "إجتماعى المظهر تجارى الجوهر" يتمتع بالقدرة على إشراك المواطنين إجباريا لجمع الإشتراكات و المساهمات و كذلك نصيب الصحة في ميزانية الدولة و توجيهها لصالح القطاع الخاص وهى الخطوة الأولى على طريق خصخصة القطاع الصحى فى مصر.
هو حلو.. ووحش ف نفس اللحظه... يعني انه ما يدعم المستشفيات الحكوميه دي كارثه... لكن حلو انه هيبقي في رقابه علي المهزله الصحيه ف مصر
ردحذف