سلسله تجروبتى مع كليه العلوم (تاسع تجربه)

بِسْــــــــــــــــمِ اﷲِالرَّحْمَنِ الرَّحِيم

 تكمله لسلسله "تجروبتى مع كليه العلوم" هحكى ليكم النهارده عن تجربه جديده لزميله لينا كتبها وهو فى سنه رابعه قسم فيزياء وهو حاليا معيد وكانت بعنوان "جالي في التنسيق كليه العلوم ............ أدخلها ولا لأ ؟" ... اتمنى تستفيدوا.

مبروك لكل خريجي الثانويه العامه ومبروك لكل اللي دخلوا علوم وبالمناسبه اللطيفه دي ليكوا عندي كلمتين ... أولهم اراهن ان محدش دخل علوم بمزاجه ومحدش كان بيفكر فيها ولا بيحلم بيها وهو في ثانوي وكمان محدش كتبها رغبه اولى

1- كلنا كنا بنحلم بطب وصيدله وهندسه وعلاج طبيعي الخ الخ الخ ... علشان كلنا شايفين ان دي كليات القمه ... والبني ادم الايام دي بيتقيم وهو في ثانوي بمجموعه ودخل كلية ايه.

2- الكل شايف ان طب دي احسن كليه والكل شايف ان لو الواحد بقى دكتور يبقى خلاص المفروض ميعوزش اي حاجه من الدنيا لان كل حاجه هتكون اتحققت حتى اهالينا وأحنا صغيرين كان نفسهم كلنا نطلع دكاتره ... انا مش هققل ابدا من شان كلية الطب ولا الدكاتره بالعكس خالص دول فئه في المجتمع بجد تعبوا للي وصلوله وليهم مني كل تقدير واحترام ... انا بس اتكلمت عنهم على سبيل المثال عشان اوضح كلامي.

3- نرجع لموضوعنا.. حسيت بايه لما عرفت ان مجموعك وداك كلية علوم؟؟ ، خيبة امل مش كده؟؟ ، قالولك عليها صعبه؟؟ وله مصوا شفايفهم وقالولك يا حرام مالقيتش غير علوم؟؟

صدقني كلنا عشنا الاحساس ده ، بس ده علشان بنبص للدنيا من زاويه صغيره اوي ... اقصى طموحاتنا كلمة يا دكتور ... واقصى احلامنا نلبس بالطو ابيض ... منعرفش ان كلية علوم بجد كليه مهمه ... ومنعرفش ان خريج علوم زي الجوكر ... ممكن يعمل حاجات كتير اوي ... وممكن يشتغل في اماكن كتير اوي.

كلية علوم بتدرس اصل العلم

• بندرس التركيب الدقيق والمجهري والتشريحي للخليه اللي هيتكون منها عضو في جسم الانسان((في اقسام البيولوجي)) ... والعضو ده الدكتور هييجي يكمل دراسه علشان يعرف يعالجه.
• بندرس تركيب جهاز مثلا زي بتاع الاشعه ((في اقسام الفيزيا)) ... علشان ييجي الدكتور يستخدم الجهاز ده.
• بندرس طبقات الارض والصخور((في اقسام الجيولوجيا)) ... علشان ييجي المهندسين يعرفوا اماكن الميه والارض اللي تنفع تتبنى.

كل دي امثله بسيطه اوي علشان اعرفكوا ان طالب كلية العلوم بيدرس العلم البحت ... اللي بقية العلوم بتبني فرائضها عليه ... يعني علوم هيا الاساس.

• كمان شوفوا تخصصات الكليه الكتيره واقسامها المتنوعه بتدي فرصه كبيره اوي في مجالات شغل كتير ... ممكن خريج علوم يشتغل في معامل التحاليل وممكن في مصانع الاسمده والكمياويات والالبان والمنظفات ... وممكن يشتغل في شركات البترول ... وممكن يشتغل في مجال الكمبيوتر والبرمجه ... وممكن يشتغل في التدريس ... بجد حاجات كتييييير اوي اوي

بامانه كلية علوم دي كليه حلوه اوي ... حاولوا تتعلموا فيها بجد علشان لما تتخرجوا هتختاروا وظايفكوا مش وظايفكوا هيا اللي تختاركوا

واهم من الوظيفه ... اننا نتعلم بجد ونكون فاهمين وعارفين الحياه ماشيه ازاي ... محدش يضحك عليكوا ويقول علوم صعبه (علوم فيها الصعب والسهل زيها زي اي كليه) وعلى فكره كلمة صعب دي احنا اللي اخترعناها واحنا اللي صدقناها واحنا كمان اللي هنتغلب عليها ونمحيها ان شاء الله.

مره تانيه الف مبروك عليكو الكليه وربنا يوفقنا كلنا

يشكر فريق الموقع صاحب التجربه أسلام فرج