تكمله لسلسله "تجروبتى مع كليه العلوم" هحكى ليكم النهارده عن تجربه جديده لزميله لينا فى سنه رابعه قسم جيوفيزياء البترول جامعه عين شمس ... اتمنى تستفيدوا.
نقول بسم الله كدا ... انا مصطفى الحشاش (ده اسم العائلة مش صفة) .... حاليا انا داخل سنة رابعة جيوفيزياء البترول جامعة عين شمس.
1- تجروبتي مع علوم حكايتها طويلة اوى .. من تانية اعدادى وانا عايز ادخل علوم .
2- كان حلمى ادخل قسم فلك جامعة القاهرة بس مجموعى مجبش القاهرة ودخلت عين شمس واتصدمت لما عرفت ان مفيش فيها قسم فلك.
3- مكنتش أعرف ان فى علوم فضاء فى حلوان فقررت انى ادخل قسم جيولوجيا او جيوفيزياء .. الصدمة التانية ان فى تنسيق داخلى وكان مجموعى مش هيجيب القسمين دول .
4- سلمت امرى لله وقولت ادخل اى قسم وخلاص وبعدين عرفت ان فى قسم هيفتح جديد اسمه جيوفزياء البترول وانه قسم خاص وغالبا هيقبل اى حد يقدم .. فرحت جدا لانه اقرب حاجة للجيولوجيا اللى بحبها ودخلت القسم وفعلا القسم قبل كل الناس اللى دفعت "شخلل علشان تعدى".
5- دخلت القسم وجه وقت الصدمة التالتة بعد امتحانات الترم الاول .. هوبا شايل جيولوجيا (-_-) ... مادة التخصص واللى دخلت القسم علشان بحبها اساسا .
6- كنت بفكر احول من الكلية بس بعد النتيجة على طول كان فى ايفينت للدكتور رامى المعرى عندنا فى الكلية وده دكتور فى جامعة بيرن فى سويسرا ووكالة الفضاء الاوروبية ووكالة ناسا (التلاتة) قولت لما اروح احضر .. كان اول مرة يعمل ايفينت فى جامعة .. وحكى قصته انه خريج جيولوجيا كيمياء القاهرة وكان متخرج بجيد جدا وكان دايما بيشيل رياضة ولما اتخرج قدم على منحة فى سويسرا واتقبل وكمل دراسة هناك.
7- فى الايفينت ده قررت انى اكمل فى علوم ورجع ليا شغفى تانى بالفلك بس كنت حاسس انى بعيد عن المجال جدا بردو لانه مش موجود فى عين شمس عندنا .
8- فى بداية سنة تانية بدات اشارك فى نشاطات طلابية وعملت اول انترفيوا فى حياتى فى ال SEG واتقبلت .... اتعلمت فيها حاجات كتير جدا جدا وفى الترم التانى من سنة تانية دخلت تَجلّياتْ عالِمْ وفيها اتعلمت ازاى اعافر علشان احقق اللى فى دماغى وازاى اكون انسان ايجابى واغير الواقع اللى تم فرضه عليا غصب عنى.
9- خلصت سنة تانية بتقدير جيد جدا ومشيلتش مواد تانى من بعد اولى دخلت سنة تالتة وعدى الترم الاول بجيد جدا بردو وبدا الترم التانى .
10- سمعت عن ايفينت لفريق اسمه Astronomy club فى هندسة عين شمس قررت انى اروح احضر بما انى بحب الفلك.
11- عجبنى جدا شغل الشباب ومجهودهم فحبيت ان يبقى موجود نفس النشاط ده فى علوم وكلمت الشباب اللى مسؤولين هناك ولكن رفضوا والحمدلله انهم رفضوا .
12- قررت انى اعمل اللى فى دماغى واسس اول Student Chapter خاص بالفلك فى مصر وتابع للجمعية المصرية لعلوم الفلك وطبعا مش لوحدى .. لان ربنا رزقنى بمجموعة شباب شاركونى نفس الهدف والحلم والشغف بعلم الفلك ومنغيرهم مكنتش هقدر اعمل اى حاجة
ودلوقتى اسسنا الشابتر والافتتاح هيكون مع بداية الدراسة ان شاء الله .
ودى صفحتنا ESA Ain Shams University Student Chapter
13- بكدا بدات ارجع للمجال اللى بحبه تانى ونفسى اقدر اسافر واكمل دراسة برا فى الفلك مع الجيولوجيا والجيوفيزياء .
14- لحد دلوقتى الحمد لله ماشى تمام فى الكلية ومبسوط وسعيد جدا فيها وفاضل سنة .
15- مجال دراستى ممتع جدا بردو اللى هو الجيولوجيا وحاليا الحمدلله بتدرب فى اكبر شركة اسمنت فى الشرق الاوسط وتانى اكبر شركة اسمنت فى العالم .
كلية علوم كلية جميلة جدا وبتفتح ليك مجالات مش ممكن تتخيلها بس انت دور واسعى واتعب وهتلاقى.
يشكر فريق الموقع صاحب التجربه Mostafa Elhashash
