هنوضحلك أبرز المواقف التى تعرض لها طلاب سابقون والذين يقدمون بعض النصائح التي تفيد طالب سنة أولى جامعة للتأقلم مع الحياة الجديدة ، فبمجرد ظهور نتيجة تنسيقك ومعرفتك للكلية التي التحقت بها خارج حدود محافظتك وأخذك القرار بالعيش في المدينة الجامعية لملائمتها ظروفك وإمكانياتك عليك الانتباه من بعض الأمور.
أول يوم .. أصعب يوم
فى أول يوم لذهابك للمدينة «يوم التسكين» يعتبر أكثر يوم مرهق متعب نتيجة الزحام وكثرة عدد الطلاب الوافدين ، لذلك ينصحك أحد الطالبات اللى قابلك «متروحيش أول يوم مهما كانت الظروف».
الأدوات الشخصية
عليك جلب كافة أدواتك الشخصية وتتجنب استخدامها مع شخص آخر.
الاتفاق على مكانك
فى البداية اتفق بينك وبين زميلتك بالغرفة على متعلقاتك «السرير والدولاب والمكتب» حتى تتجنبي المشاكل من البداية.
التزم بمواعيدك
لابد من الالتزام بالمواعيد الخاصة بالمدينة الجامعية حتى لا يتم إنذارك أو يتم إخلاءك وطردك فأنتي لا تستطيعين التأخر عن الساعة 8 وإذا كان لديك تدريب أو شىء ضروري سيتسبب في تأخيرك لابد من تقديم طلب مختوم من الكلية بمعرفة ولي الأمر.
اطبخي لنفسك
أغلب الطالبات بيعانوا من سوء الطعام بالمدن الجامعية فمشكلة الأكل من أبرز المشاكل التي سوف تواجهن لذلك ينصحك الطلاب السابقين إما شراء الأكل من الخارج أو طبخه في المدينة بنفسك أو الاعتماد على الوجبات السريع «كالتونة والجبنة والمعلبات».
تكيفي مع الوضع الجديد
الوضع الجديد مقلق مع بدايته فكرة مشاركتك كل شئ مع أشخاص فى الغرفة يجعلك متوتر خصوصا إذا كانت طريقتكم وطبيعة تصرفاتكم مختلفة ، تكيفي مع وضعك الجديد من خلال تقبلك له ، وإقامة شبكة علاقات وأصدقاء يفيدوك في تحمل ظروفك.
شبكة الصحاب
الصداقة من أكثر الأشياء التى يسعى إليها الجميع ، خصوصا في مكان بعيد عن حياتك لمعتادة لأن الإنسان بطبيعته لا يستطيع العيش بمفرده.
الطالبة إيمان غالى تقول «اعملى صحاب كتير ، هتنفعيهم وهينفعوكي ، وهيسهلوا عليكى المدينة ، وياريت تسكنى مع واحده عارفاها خصوصا اللى مبتعرفش تتأقلم مع حد غريب ، أما الناس اللى زى اللى بيتصحبوا على العفريت عمرها ما هتفرق هتقعد مع مين».
استبدل وسائل الترفيه
انسى فكرة أنك تتفرجي على تلفزيون أو يكون فى مجال للترفيه بس ممكن يكون فى بديل وتستبدل التلفزيون باليوتيوب وممكن تتصفح بعض مواقع التواصل الاجتماعي لمتابعة الأخبار.
خد بالك من السرقة
أهم حاجة خدي بالك من متعلقاتك الشخصية والفلوس اللى معك لأنك ممكن تتعرضي للسرقة فحاولي أنك تضعي متعلقاتك المالية بأمانة المدينة أو تتركها مع أحد الزملاء الموثقين بهم ولا تتركي أشياءك الثمينة داخل غرفتك دون التأكد من غلق الغرفة جيدا.
انسى كلمة خصوصية
كلمة خصوصية فى المدينة ابعدي عنها لأنك غالبا هتتعاملي مع أشخاص ممكن يستخدموا حاجتك.
الطالبة ولاء عبد المنعم توضح قائلة: «فكره التدخل فى خصوصيتى ده وارد ، لأنى في مدينة وهى مش أوضتى لوحدى ، فبلاش تتنكى لأن دى أوضتك وأوضه صحابك وصحاب البنت اللى معاكي».
ابتعدي عن الموظفين
بعض المشرفات في المدينة طريقة تعاملهن لن تستطيعي تحملها ، فضع حدودا من البداية حتى لا تصلي لمشكلة فى النهاية.
الطالبة دينا عبدالله تروي موقف حدث بينها وبين أحد المشرفات : «وأنا في سنة تانية كان في مشرفة أسلوبها مش كويس ، وشتمتنى علي حاجة بسيطة ودائما ما كانت تشتم الطالبات ، ولما قررنا نعمل شكوى مكانتشي هتفيدنا علشان كدا ابعدي عن الموظفين واشتري دماغك».
إياكى والانطلاق
خلى بالك من فكرة إنك تنطلقى فى المدينة في وجود موظفين ، لأنك فى الأغلب هتتصدمى بشخص ما أثناء مرورك في أحد الطرقات ، وإيمان غالى بتنصحك «لازم تاخدي بالك من تحركك بحرية في المدينة أو تخرجي بالبرمودة أو باللبس الطبيعي اللى البنات بيلبسوها فى البيت لأن هتتفاجئ بأحد الموظفين قدامك في الطرقة».
تبادل الخبرات
فكرة وجود مكان يتجمع به أشخاص فى عمرك ، تعطى فرصة لك للاستفادة من خبرات الآخرين أو الموهبة التى تعمل على خلق جو جديد مثل الغناء.
المدينه عبارة عن دولة بمفردها لتبادل كافة الخبرات والثقافات استغليها وخليها احسن فترة في حياتك.
لمغتربات أولى جامعة دول كمان بعض نصايح اللي قبلك :
طول عمرنا بنحلم نخلص الثانوية ونطير على باب الكلية سايبين ورانا هم المذاكرة والضغط وبعبع عنق الزجاجة لكن مع البنات الوضع مختلف بتشوف أنا حياتها هتبتدي أول ما تحط رجليها على باب الجامعة وبعد ما تكتشف الفتاة أن كليتها مكانها خارج سور طفولتها وبرائتها وأنها هتبعد عن صحابها وأهلها في سبيل إنها تحقق ذاتها بتواجه صعوبات من أول البيت لحد ما تتخرج علشان كده بنقدملك نصائح مغتربات سبقوكي و اتمنوا لو حد قالهم الكلام ده قبل دخول الجامعة…
الصحاب
يارا محمد بتقولك «اختاري صحبتك اللى شبهك لأنك هتقعدي معاها فترة طويلة ولو كان اختيارك غلط من الأول ده هيأثر علي نفسيتك وممكن يخلوكي تكرهي الكلية».
أما وولاء عبد المنعم بتنصحك بأنك توسعي دايرة معارفك «حاجة حلوة وأقوى لو حصلت من سنة أولى، متقتصريش علي صحاب قليلين، حاولي يكون ليكي زمايل كتير ومعاملتك معاهم حلوة لأنهم هيفدوكي وكمان لأن مش هتعرفوا تعيشوا لوحدكم وتقفلوا علي نفسكم».
لكن إسراء جمال كان ليها وجهة نظر مختلفة شوية وقالت «أهم حاجة الصحاب هتقابلوا ناس كتير الحلو والوحش، ما تدوش الأمان لأي حد على طول، الكويس هتكمل معاكي والوحشه ابعدي عنها واتعلمي من التجربة، ولو اختارتي صاحب غلط في غربه هتبقي بتضيعي نفسك لازم تكوني حريصة زيادة عن اللزوم، لأنك هتبقي نسخه منها هتعملي نفس اللي بتعمله».
الميزانية والتعامل بها
يارا بتأكد على الميزانية وبتقولك «حسب ميزانيتك قسمي الفلوس جزء للأكل و جزء لمصاريف الكلية وجزء للمواصلات ولازم تخلى معاكي فلوس على جمب احتياطى للظروف الطارئة».
وكمان بينصح الطلاب السابقين، «أن الميزانية بتختلف من شخص للتاني فأهم حاجه فيها إنك ترتبي أولوياتك أولا مصاريف الكلية ثانيا المصاريف الشخصيه من تنقلات وكده، ثالثا مصاريف للطوارئ لازم يبقي معاكي فلوس زيادة شايلاها علي جنب، ومصاريف الترفيه والفسح».
حافظي علي اللى اتربيتي عليه
يوستينا ميشيل بتأكد «أهم حاجة تحافظي على تربيتك و فكري نفسك كل شوية بالمبادئ إلي اتربيتي عليها و أن الثقة اللي أهلك أدوهالك دي امتياز مش أي حد بياخدها فلازم تبقى قدها».
كما شدد الطلاب السابقين على ضرورة بناء الثقة بينك وبين أهلك وتحافظي عليها لأن ضميرك في الجامعة هو الرقيب عليكي «مش أهلك».
وهم الغربة
ينصح الطلاب السابقين مغتربات أولى جامعة «ماتستسلمش لأي مشكلة أو مرض شجعي نفسك دايما أنك بتعملى حاجة مختلفة وماتعشيش وهم أن الغربة مره بالعكس ده أعظم درس».
استمتعي بهدفك
واضافت يارا محمد «طالما قدامك هدف اسعي إنك تحققيه واستمتعي بده طبيعى في الأول ما تتأقلميش واختاري أولوياتك بس ما تعديش يوم غير لما تستمتعي بيه على كل المستويات لأنها أجمل أيام فعلا لو ما استمتعوش هتندموا».
الأكل
أشارت ولاء أن الأكل هو أكتر حاجة بتهم البنات ودايما بيحبوا يجربوا كل جديد «نصيحة مني ابعدي علي قد ما تقدري من أكل الشارع والفاست فود واعملى أكلك بنفسك أوقضيها تونة».
الثقة بالنفس
وأضافت إسراء «أهم حاجه يكون لدى الطالبات المغتربات بالعام الجديد يثقون بأنفسهم وأنهم مش أقل من أي حد، معظم الناس في القاهرة بيبصو للمغتربات على أنهم ناس مش متحضرة وماينفعش يتعاملو معاهم وأنهم ما يعرفوش حاجه في الدنيا، وده مش صح بمجرد أنك تتعودي وتثقي في نفسك بسهولة هتغيري وهتتأقلمي بسرعة».
الاعتماد على النفس
هتتعذبي كتير في الأول حاولي تعتمدي علي نفسك في كل حاجه وحاولي أنك تتعرفي علي الأماكن في المحافظة الي انتي فيها وانسي كلمه انك مغتربه ومتعرفيش حاجه اتعاملي كأنك في بلدك.
هل في ميدينة جامعية اولي
ردحذف