للمغتربين "أكلات سهل تعملوها وأنتوا واقفين" -علومنجى دوت كوم-

بِسْــــــــــــــــمِ اﷲِالرَّحْمَنِ الرَّحِيم

اتكتبت عليك الغربة مش لاقي حد “يستتك” ويعملك اللي أنت عايزه؟ بتخاف من وقفة المطبخ ولا بتعرف تسلق بيضة أصلا؟.. متخفش احنا في ضهرك وهنقولك على أكلات سريعة هتعملها في أقل من ربع ساعة ويمكنكم ذلك أما باستخدام بوتجاز كما فى مدن الطالبات او سخان كهربى "غالبا سعره 15 جنيه" كما فى مدن الطلاب.

الراعي الرسمي

فى سنة أولى جامعة الراعى الرسمي لأكل المغتربين «الجبنة» .. بعد ما تخلص الكلية أول حاجة هتقابلك هو «السوبر ماركت» تشتري علبة جبنة كبيرة وكيس شيبسي ، ولو الميزانية تسمح ربع «لنشون» مش هيخسر وبعد روتين الجبنة اليومي تجيلك «الإندومي» وهي الحل الأمثل والبديل السريع للجبنة لو زهقت يعني وباستخدام السخان بتاع المياه هتعمل أحلى اندومى.

إنت ممكن تعمل أكلات خفيفة وتحس نفسك ولا أحسن شيف زي الأكلات دي:

التونة

ليك بالتونة أكتر من أكلة .... التونة ساندوتش بس ، حط التونة فى طبق وقلبها كويس وعليها شوية فلفل أسود وممكن لمونه وممكن برضو تضيف طماطم متخرطه وفي ناس بتحب تحط زيتون أو شيبسي وممكن تعمل التونة بالخص والمايونيز والكاتشب بيكون حلو وسهل بس المهم صفى الزيت إللي بيكون جاي معاها.

أرز بالتونة ، كوباية رز بعد ما تغسلها كويس هتحط على السخان معلقة زيت أو سمنة فى طبق وبعدها هتحطلهم الرز وعليها كوبايتين مية هيغلي الرز غلوتين وبعدين توطي النار وإنت حاطط غطي الطبق .. هيستوي ، اغرفه في الطبق وبعدها صفي التونة خالص من الزيت وحطها عليه وقلب وعيش.

سلطة فاصوليا

كلها 5 دقايق على السخان وتخلص وهي كالتالي: حلة بمية مغلية حط فيها الفاصوليا لحد ما تستوي ، بعدها حضر طبق كبير فيه ملح وفلفل أسود وخل وزيت وفلفل أخضر وكمون وبعد ما تستوي الفاصوليا حطها في الطبق وممكن لو بتحب التوم تحط فص واحد أو اتنين.

أما الكبدة

مفيش أسهل منها طاسة سخنة اغسل الكبدة بمية الحنفية وحط على الطاسة توم كتير بمعلقة زيت وبعدها حط الكبدة ومعاها وملح وفلفل أسود وشطة وقلب كتير وفي الآخر عصرة لمون وبالهنا والشفا.