الموضوع ده يهم كل شخص وملهوش اى علاقه بالسياسه .... ده مجرد موضوع بزنس وزى ما بيقولوا المصريين هم اللى ضحكوا على امريكا .... الموضوع ملخصه عن ايه اللى ممكن كطالب استفيده من السفاره الامريكيه فى القاهره بمعنى اخر ((ازاي تستفيد من السفارة الأمريكية ف مصر؟)).
صلى بينا ع النبي كدة الأول كنا اتكلمنا ف قبل كده عن ازاي تتعلم انجليزي صح واحنا بنقولك أن السفارة الأمريكية من اكتر الاماكن اللي ممكن تستفيد منها في الموضوع ده.
طب ازااااااي؟؟!!
انا اقولك بس انت عد معايا
1- لو بتتعلم انجليزي وحابب تطبق عملي :
كل يوم أربعاء السفارة بتعمل محادثات مع ناس أمريكيين عن مواضيع مختلفة وأي حد يقدر يحضرها ببلاش بس بشرطين هنقولهم ف الآخر.
2- فى الأيام العادية تقدر تروح وتعمل محادثة برضو مع ناس مصريين بس هتلاقي فيهم ناس جامدين جدا.
3- زهقت من الكنبة والبلكونة والسرير ولعب البلايستيشن وحابب تتفرج ع افلام اجنبي بترجمة انجليزي وسماعات عالية آخر حاجة ، هتروح تلاقي الناس هناك عندها افلام اجنبي طازة وشاشات عالية تنين وسماعات وكدزة، وللأسف كمان ببلاش .
4- عمرك ما لعبت ع الاكس بوكس وطول عمرك تسمع عنه بس زي حالاتي، هتلاقيه هناك وببلاش برضو.
5- عندك بحث وعايز نت سريع ما يفقعكش، الناس هناك جايبين وصلة نت سريعة ( تقريباً شادين سلك من أمريكا) وشوية أجهزة apple على قدهم كدة، وعلى فكرة... ببلاش برضو .
6- بما أن الناس هنا في تعداد المثقفين وممكن كتير يكون بيدور على كتب أدب انجليزي أو تاريخ أو اجتماع أو تنمية أو أي بتنجان، الليلة دي كلها هناك ببلاش، لا وايه كل الكتب اصلية.
7- فاضي ومش وراك أي حاجة وعايز تلعب شوية انت واخوك أو انتي واختك ومش حابين الاكس بوكس، هتلاقي هناك طن العاب ذكاء وحروف متقاطعة وشوية العاب معرفتش حتى اسمها، وكله بالانجليزي.
8- عايز تسمع محادثات انجليزي بهاند فري وجهاز audiobook مليان محادثات مختلفة، هتلاقيه هناك.
9- طيب ليك ف جو الايفينتس والمحاضرات والاجتماعات ، هتلاقيه هناك محاضرات عن مختلف المواضيع من تعليم ف الخارج ومنح وووووو.
خد التقيلة :
تقدر تستعير كتاب التحضير للتوفل TOEFL اللي هو مش عارف بكام ميت جنيه ومعاه الاسطوانة بتاعته كمان
# أسئلة شائعة بعد البوست ده
هي المواعيد بتاعتها امتى ؟
كل يوم من الأحد للخميس من 10 ص : 4 م
هو في شروط عشان أدخل؟؟!!
اه
1- اول حاجة يكون معاك البطاقة الشخصية مش مكسورة أو منتهية أو يكون معاك باسبور.
2- ميكونش معاك أي شيء اليكتروني غير الفون اللي هتسيبه هو والهاند فري ع البوابة برة قبل ما تدخل، غير كدة بقى سواء فلاشة، شاحن، لاب، اي بود، أي بتنجان بينور حتى لو قصافة ظوافر مش هتدخل بيها.
طب لو نسيت وجبت معايا فلاشة أو أي حاجة من الممنوع ده ؟!
أولا لو قلبت شامبانزي إفريقي خليك متأكد ان الأمن مش هيدخلك، بس هتلاقي قدام السفارة بتديله الحاجة وهياخد فلوس لحد ما تخرج، وخلي بالك الفلاشة ب 5 جنيه عشان هيقولك عشرة، قوله انا داخل المكتبة.
ايه هي شروط المحادثة اللي انت قلت عليها فوق؟!
شرطين ، أولهم انك تكون عامل كارنيه عضوية في المكتبة بتاعة السفارة ، ازاي؟؟؟ عادي بتروح أي يوم قبل الساعة 12 وتقول للريسيبشن عايز اعمل كارنيه ، هيقوم رازعك صورة زي بتوع البطاقة وتستلم الكارنيه ف نفس اليوم .
تاني شرط انك تكون حاجز المحادثة عن طريق الميل ، ودي سهلة ، انت اول ما تدخل قول للريسيبشن عايز اعرف شروط المحادثة هيديك ورقة فيها كل حاجة.
ينفع استعير كتب أو أسطوانات افلام أو كتاب صوتى؟!
اينعم بس لمدة أسبوع ، وممكن تجدد أسبوع كمان عن طريق الميل أو رقم الأرضي بتاع المكتبة ، هتلاقيه ف ورقة الارشادات هناك.
طب لو نفضت بعد المدة ؟!
اليوم الزيادة ب خمسة جنيه تقريباً , والساعة بخمسة جنيه والحسابة بتحسب .
>> يعني اول ما اروح اعمل ايه بقى؟!
بص يا صديقي هتسال ع البوابة عايز أدخل المكتبة
تمام ( IRC ( information resources center
وتعتبر انك داخل سفارة الحاج أو الحاجة عجبك فلم ناس مشغلاه وفي مكان جنبهم ، شدلك كرسي وسماعة من ع الترابيزة واتفرج، عايز تلعب أدخل العب ، عايز كمبيوتر، الجهاز الفاضي اشتغل عليه
انطلق يعني .
استنى استنى انت عرفت العنوان فين؟
أقرب مكان ليها محطة مترو السادات و سعد زغلول أو الأوبرا أنزل وقول عايز اروح السفارة الأمريكية ، هتمشي شوية صغيرين ما تخافش وهتدخل من ناحية الكورنيش
أمانة عليك : انك تنفع عشرة أو أكثر بالكلام ده سواء بالشير أو أنك تاخدهم معاك أو تحكيلهم أو أي طريقة، المهم علم عشرة.
