دبلومة الكيمياء الحيوية التحليلية علوم شبين الكوم جامعة المنوفية

بِسْــــــــــــــــمِ اﷲِالرَّحْمَنِ الرَّحِيم

لو أنت طالب لسه مخلص علوم وعاوز تشتغل في التحاليل الطبية وهداك الله علي ان تكمل دبلومه في الكيمياء الحيوية فى كلية علوم شبين الكوم جامعة المنوفية ، جمعنا لكم فى هذا المقال من موقع « علومنجى دوت كوم » كل ما يخص الدبلومة من المصروفات وميعاد التقديم والاوراق المطلوبة للتقديم وغيرها كتير من المعلومات.

قرار هام لعام 2021

غير مسموح لطلاب المجندين بالانضمام إلى الدبلومات فى شبين حيث لابد من تقديم جواب الاعفاء او نهائة الخدمة العسكرية.

2021/2020

ميعاد التقديم

التقديم فى نص شهر 8 حتى نص شهر 9. 

التقديم لهذا العام 2021/2020 هيكون بداية من منتصف شهر اغسطس حتى آخر شهر سبتمبر.

أعلان دبلومة الكيمياء الحيوي لعام 2021

الاوراق المطلوبه

1- عدد 2 صوره البطاقه الشخصيه (الرقم القومى) .
2- شهاده الميلاد كمبيوتر " اصل – صورة".
3- شهاده التقدير 4 سنوات (شهادة بيان الدرجات) "أصل –صورة" .
4- عدد 7 صور شخصيه .
5- شهاده التخرج "أصل وصورة".
6- أفادة تسجيل على النت "رابط التسجيل الالكترونى أو  رابط آخر".
7- موافقه جهة العمل او اقرار بعدم العمل.
8- اصل شهادة تأديه الخدمه العسكريه او الاعفاء منها (صوره شهادة التجنيد).
9- عدد 2 ملف بلاستيك.
10- شهادة البكالريوس المؤقته.
11- أستمارة الكشف الطبى من الادارة العامه للشؤن الطلابيه "الادارة الطبية"
12- شراء ملف من ادارة الدراسات العليا بالكلية. 

 الكشف الطبى بيتعمل من الادارة الطبيه وأول سنه يتنفذ كانت فى 2017 ، وبتخلصها من الادراه الطبيه عند كلية تربيه فى البر الشرقى وبتدفع 200 جنية طوابع زى اللى فى الصورة اللى تحت. 

وهتسأل على مدرج الاحتفالات فى الدور الارضى لان هو دا اللى هتحضر فية المواد بتاعه الدبلومة.

تعليمات هامة

• هتوصل الكليه هتطلع الدور الرابع عند شئون الدراسات العليا هتاخدوا اذن دفع تنزل بيه تدفع فى الخزنة فى الدور الارضى (200 جنية مقابلة + 150 لسحب الملف) وهتطلع تانى تسحب ملف التقديم (كده أنت طلعت الدور الرابع و نزلت الارضى ثم طلعت الرابع ثاني و على رأي المثل "ياطالع التاني مسيرك تنزل تاني") وبيكون فيه شهاده صحيه بتخلصها من الادراه الطبيه عند كلية تربيه فى البر الشرقى ولازم تروح بدرى شويه قبل الساعه 1 علشان تخلص كله فى يوم واحد ... ماينفعش اي مكان تاني غير الادراه الطبيه ومواعيدها من 9 ل 1. 
• بالنسبه للتقديم فيه أفادة تسجيل على النت "رابط التسجيل الالكترونى أو  رابط آخر" بتطبعها وتجبها وانت جاى أو بتروح تسجل وتطبع فى اى مكتبة جنب الكليه عادى ب 5 او 10 جنيه. 
• تمهيدي كيمياء حيوي كان قفل سنة 2018-2019 في كلية علوم شبين الكوم جامعة المنوفيه. 
• الناس اللى مطلعتش لسه الشهاده ومش معاهم غير افاده فهما قالوا مش هيقبلوه بتعليمات من العميد فلازم العميد يتواصل مع رئيس الجامعه علشان يقبلوا الافادات وهتكتب تعهد على نفسك انك تسلم الشهاده وده برضه كلام رئيس قسم الكيمياء. 
• لازم شهاده التخرج يكون فيها النسبه المئويه للتقدير بتاعك والإ هتترفض. 

التسجيل على النت (التسجيل الالكترونى): 

من خلال هذا الرابط و هذا الرابط

مصاريف الدبلومة

إجمالى 6000 جنية لعام 2019/2020 (بالصلاة على النبى).

1. مصاريف التقديم: 590 جنيه (مصاريف مقابله شخصيه "200 جنية" + ملف التقديم "150 جنية" + كرنيه "35 جنية" + رسوم دخول امتحان "5 جنية" + رسوم كشف طبى "200 جنية").
2. مصاريف الدبلومة: كانت بـ 3788 جنية فى عام 2020/2019 .
3. مصاريف الكتب: 700 جنية كتب الكيمياء فقط ومش هتعمل المقابلة مع دكتور إبراهيم طنطاوى او غيرة غير لما تدفعهم ، وفى مصاريف لكتب تانية زى كتاب الميكروبيولوجى وكتاب الاحصاء وكتاب الطفيليات وكتاب التحاليل الوراثية وكتاب الانجليزى وبنك اسئلة ترم اول وبنك اسئلة ترم تانى بحوالى الف جنية.

للعلم! المصاريف بتندفع كامله وانت بتقدم ومفيش تقسيط أو تاخير لحد القبول لان طالما ملفك اتسلم فانت كدة غالبا قبلت ، مصاريف الدبلومة كانت فى 2018/2019 بـ 3500 جنيه فى السنه.

مصاريف الدبلومات لعام 2020

طابع كشف طبى

هل الدبلومه معتمده

اه معتمده (معتمده يعنى معتمده من وزاره الصحه وتقدر تاخد الترخيص من غير قضيه.)

الدبلومات المعتمدة فى الكيمياء الحيوى والميكروبيولوجى

الاقسام المطلوبة

الدبلومه لطلبة كيمياء مزدوج مع بيولوجى (كيمياء حيوى, كيمياء/ميكرو , كيمياء/نبات , كيمياء/حيوان , كيمياء/حشرات) .
متاحة لكيمياء اسبشيل ياخد الدبلومه
بالنسبه لكيمياء- فيزياء (مش معاك تخصص بيولوجى) متاح ليك تاخدها فى شبين الكوم وهتاخد الترخيص عادى.

بالنسبه لخريجى كليه زراعه بياخدوا امتياز فقط ومأخدوش من زراعه سنه 2020/2019 ، لكن طب بيطرى وصيدله ﻻزم يجيب شهاده خبره انه اشتغل قبل كده فى التحاليل وان الدبلومه دى هتفيده فى شغله.

للتواصل والأستفسار

رقم تليفون شئون علوم شبين

رقم أ/ أبو المجد

رقم دكتور إبراهيم طنطاوى (رئيس قسم الكيمياء - والمسئول عن دبلومة الكيمياءالحيوى): 01096726008

رقم دكتور أمين العدوى: 01002660560

رقم دكتور عبد العزيز : 01002948478

ت: 0227921085
ت: 0227921091
علشان تبقي تتصل وتسأل

السكن الجامعى لطلبة الدبلوم

تنويه لعلوم دمنهور

لو أنت طالب لسه مخلص علوم جامعة دمنهور:

شبين مش موافقين بالافاده اللى فيها GpA فالطلبة وكلموا د.المغربي وهم هناك وقالهم انه كلم العميد هناك وكدا والعميد اتأخر زمايلنا دخلو للعميد من شويه وقال نجيب افاده من الكليه مختومه بالنسبه المئوية مش الجي بي اي + بيان درجات من الكليه معتمد مختوم وممضي لحين استخراج الأصول شهاده التخرج وبيان الدرجات ونقدم بيها عادي .

التقدير المقبول

تقدير بيبقى على حسب العدد اللى مقدم وتقديرهم لكن غالبا بيبقى من جيد جدا.

• حاليا فى 2019 الحد ادني للتقديم كان من 78%. 
• فى 2018 الحد ادني للتقديم العميد رفعها تاني لـ 79%. 
• فى 2017 اخدت من جيد جدا (78% لان عدد اللى مقدمين كتير).
• فى 2016 اخدت من جيد .

غالبا التقديم بيقبل مباشرتا طلبة الامتياز اى جامعه غير شبين (طبعا لا يكون من سكان المنوفيه) وللمقيمين فى المنوفيه سواء (امتياز او جيد جدا او جيد).

صحيح الناس اللى بتتكلم عن موضوع تغيير البطاقة للي نسبته مش جايبة 79٪ مقلوش هيتقبل ولا لاء :

لو ركزت هتلاقيهم بيقولوا ابناء جامعه المنوفيه مش من محافظه المنوفيه يعني كدة اللي يغير بطاقة للمنوفية مش هيتقبل برضو طالما مش جايب 79%.

طريقة الوصول للجامعة

القاهرة وضواحيها:

رمسيس , موقف عبود , عربيات شبين , تنزل في الموقف , وتاخذ مواصلات تجارة جامعة قصر , "تنزل مجمع كليات" , ع شمالك هتلاقي باب الجامعة أول كلية هي علوم , تدخل وتطلع الدور الرابع شؤون الدراسات العليا , تاخذ نفسك !

الاسكندرية:

أفضل حاجة قطر وتنزل بركة السبع ومنها تركب شبين الكوم هتنزلك عند مجمع الكليات.

موقف الأسكندرية , عربيات شبين , تنزل في الموقف , وتاخذ مواصلات تجارة جامعة قصر , "تنزل مجمع كليات" , ع شمالك هتلاقي باب الجامعة أول كلية هي علوم , تدخل وتطلع الدور الثالث شؤون الدراسات العليا , تاخذ نفسك !

البحيرة:

أفضل حاجة قطر وتنزل بركة السبع ومنها تركب شبين الكوم هتنزلك عند مجمع الكليات.

مرحلة الانتظار

كده أنت قدمت و مش عارف هتتقبل وله لا ، طبعا الكلام ده للناس اللي تقديراتها ضعيفة
حاول تقشر بصل أو توم أصعب و يأخذ وقت ولما تخلص المدة في يوم 15 / 9 الساعة 9 صباحا اتصل ع الجامعة وابدا الأسئلة :
أنا قبلت و لا لا ؟
الدراسة تبدأ أمته ؟
الغياب نظامه ايه ؟

نظام الحضور

الحضور 3 ايام فى الاسبوع غالبا
يوم عملى وده مش موجود
ويومين نظرى يعنى الدراسه
يعنى يومين بس فى الاسبوع

للعلم! الحضور مش ضرورى لو انت عندك شغل او جيش بس لو تقدر تحضر هتستفاد ولو انت حاليا فى الجيش او بتشتغل هتجيب ما يثبت ده ، بس اهم حاجة انك تسلم الشيتات. 

نظام الدراسة

سنه دراسيه عاديه 

الترم الاول امتحاناته فى شهر واحد والتانى فى شهر 5

 ولو ﻻ قدر الله شيلت 8 ساعات يعنى 800 درجه الدبلومه بتتلغيلك خالص ... غير كده بيكون ليك دور تانى عادى وبيكون ايامه ورا بعض يعنى هتخلصه فى اسبوع.

ملحوظه: الناس اللى هتترشح ظابط احتياطى صعب انك تنزل ﻻمتحانات الترم التانى علشان مبيرضوش فى الجيش ﻻن اول 6 شهور دول صعب فيهم اجازات.

مرحلة بداية الدراسة :

انزل في بداية الترم الأول أكتب الجدول وعدي ع الشؤون شوف الكارنيه وأتعرف ع الناس مش علشان حاجة والله ! بس علشان دول هيظبطوك ع الآخر وامشى بمبدأ "فيد واستفيد" بس المشكله هنا انك مش هتفيد طبعا .

مرحلة الترم الأول:

• هاتلك كشكول محاضرات ب 25 جنيه
• اشتري الكتب بحوالي 500 جنيه
• ملحوظة : في مادة عملي واحدة هي طفيليات 30 شريحة (تعرف مع كمنتات).

تنويه! لا تستعجل في تصوير الورق من المكتبات و حاول تحصل ع ورق جديد أفضل + الامتحانات السابقة هامة جدا حوالي 70 % من أي امتحان من الامتحانات السابقة.

امتحانات الترم الأول: حاول في 15 يوم الامتحانات تركز بس في المذاكرة من مصدر واحد "إما ورق أو مذكرة".

مرحلة الترم الثاني: 

شوف نتيجتك ومتستعجلش وأبدا في المعركة كما في الترم الأول.
مرحلة الامتحانات النهائية: حاول تعمل 15 يوم لـ الامتحانات فقط
آخر يوم امتحانات: ودع الناس اللي مش هتشوفها تاني لو عاوز تخطب الحق نفسك علشان مش هتشوفها تاني و يمكن متلاقيش زيها و تندم. 

المواد الدراسية

الترم الأول

• كيمياء حيوى متفدمة 
• طفيليات تشخيصية (باراسيتولوجي)
• الأنزيمات
• دور العلماء
• انجليزى
• ميكروبيولوجى

الترم الثاني

• أجهزه معملية
• إحصاء حيوى
• تحاليل وراثية
• مضادات حيوية
• هرمونات

مقررات دبلومه الكيمياء الحيوى

مقررات دبلومه الميكروبيولوجى

استخراج الإفادة والشهادة

1- الافادة: 

بعد النتيجة ما ظهرت وعرفتها وطبعا طلعت من الأوائل أو الأواخر مش هتفرق كتير فوت 10 أيام وفى اليوم الموعود أصحي الصبح بدري يعني على 9 كده وأتوكل ع الله وأنزل الجامعة ، اطلع الدور الثاني عند وكيل الكلية أدخل ع السكرتيرة وقولها عاوز الإفادة طبعا هتدفع فلوس فى الخزنة وبعدين تختمها وتاخدها وتروح .

للعلم! ممكن تعمل كارنية النقابة بالإفادة . 

2- الشهادة: 

تقريبا بعد النتيجة بشهر وشوية ومتنساش تاخد صور وتنزل برضو بدري تاخد إذن دفع رسوم إستخراج شهادة ” شوف إنت هتحتاج كام واحدة تقريبا الواحدة تصرف 30 جنيه طوابع وخلافه بتدفع ف الخزنة وتطلع تسلمهم ف الدور التالت تستني شويه هتاخد دوسيهك اللي إنت قدمت بيه بس من غير شهادة الدبلومة هتروح وتيجي بعد 3 أيام تاخد شهادة دبلومتك.

شكلها حلو بس مش عارف ليه مش هتحس إنك فرحان بيها زي ما فرحت بالبكالريوس يمكن عشان كده إنت إتخرجت رسميا.

كارنية النقابة والبطاقة

هتجيب دوسيه بلاستيك وتحط فيه الآتي :

1. صورة شهادة الدبلومة أو إلإفادة
2. أصل شهادة البكاليريوس
3. فيش جنائي موجه لنقابة المهن العلمية
4. حوالي 6 صور شخصية حديثة
5. إستمارات بطاقة شخصية فاضية ” هقولك ليه بعدين”
6. صور بطاقتك الشخصية

تدخل تملي الإستمارة وتسلم الدوسية وتدفع حوالي 380 جنية وتاخد وصل إستلام بعد شهر وشوية .

إستمارات البطاقة الفاضية تختمها وطبعا هتدفع فلوس علشان الختم علشان تقدر تغير المهنة من طالب الي أخصائي تحاليل طبية مع “إيقاف التنفيذ” وبعدين تاخد أستمارات البطاقة وتروح السجل المدني التابع له وتقولهم:

أنا عايز أغير المهنة ، بعد 20 يوم هتستلم البطاقة والمهنة الجديدة ”أخصائي تحاليل طبية” وبعد 20 يوم كمان تاخد الكارنية.