المعلومات الكامله عن كليه علوم شبين الكوم جامعه المنوفية

بِسْــــــــــــــــمِ اﷲِالرَّحْمَنِ الرَّحِيم

 

أنشأت كلية العلوم جامعة المنوفية (بشبين الكوم) بتاريخ 16/11/1977 م بالمبنى الملحق بالمدرسة الثانوية الصناعية وكان بها 3 أقسام فقط (الكيمياء – الطبيعة – البيولوجي) وفي العام التالي بدأت الدراسة بألاقسام دى (الجيولوجيا – الرياضيات) أيضا وتم نقل الكلية الي المبنى الجديد بمجمع الكليات 1988-1989 و الكلية تطبيق نظام الساعات المعتمدة.

الاوراق المطلوبة للتقديم

1 - شهادة الثانوية + 2 صورة منها

2 - شهادة ميلاد كمبيوتر + 2 صورة منها

8 - 3 صور شخصية

4 - بطاقة الترشيح + صورة منها

5 - استمارة 6 جند من المركز التابع له [ للذكور فقط ]

6 استمارة 2 جند [ للذكور فقط ]

التخصص والتشعيب

• التخصص بيكون من سنه اولى على حسب درجه الكيمياء ف ثانويه عامه وبيكون اعلى قسم كمياء و بعد كدا كمياء و ميكرو على حسب التنسيق الداخلى للكليه.
• بيتعمل تنسيق داخلي حسب درجات الرياضة بتاعتك والفيزياء ، وبتكتب الاقسام الي عايز تخشها والكلية بتختارلك قسمك حسب التنسيق الي هما عاملينه. 

أقسام الكلية

اقسام طلبة علمى رياضة بالترتيب حسب تقديرات الكلية للدرجات:

1 - الرياضيات البحتة وعلوم الحاسب ( ودا بيعتبر اعلي قسم في شعبة رياضة )
2 - الفيزياء وعلوم الحاسب
3 - الجيوفيزياء (القسم دا بياخد من بتوع رياضة وبتوع علوم)
4 - الفيزياء
5 - الرياضيات البحتة
6 - فيزياء وعلوم الليزر

اقسام علمي علوم حسب الترتيب:

1 - كيميا اسبيشيال
2 - كيميا وميكروبايولوجي
3 - كيميا وحشرات
4 - كيميا جولوجيا
5 - نبات اسبيشيال
6 - الكيميا والفيزيا
7 - كيميا ونبات
8 - كيميا وحيوان
9 - الفيزياء وعلوم الليزر
10 - علم الحيوان
11 – الجولوجيا

12- الجيوفيزياء 

أقسام الكلية

بيتعمل برده تنسيق داخلي حسب درجات الكيميا والجولوجيا والفيزيا .... وتكتب الاقسام الي انت عاوز تخشها والكلية بتختارلك قسمك حسب التنسيق الي هما عاملينه.

نظام الدراسة

عندك في ال 8 تيرمات في ال 4 سنين ، التيرم 18 ساعة حد اقصي ... 12 ساعة حد أدني
طب يعني ايه يعني انا باخد مواد ب 18 ساعة ، يا آخد مواد ب 12 ساعة
طب مثلا انا اخد مواد وشيلت مواد ونجحت في مواد تانية ، بس جيت اشوف تقدير التيرم مثلا لقيته اقل من 60 % ، كدة يبقي انا متراقب ، طيب ايه متراقب دي؟ يعني التيرم الي بعد الي شيلت فى دا مينفعش تاخد اكتر من 12 ساعة اللي هو الحد الادني بتاعك.

موضوع ال 60 % والتقديرات:

انت لما بتاخد المواد وتمتحن فيها والنتيجة بتطلع بتجمع الدرجات وتقسمها علي 1800 الي هو مجموع درجات التيرم ، وبعدها بتضرب في 100 وبكدة بتكون حسبت النسبة المئوية بتاعتك.

فى اول الدراسة مطلوب منك شوية حاجات: فى اول السنة بالنسبة للنآس اللى معرفتش قسمها واسمها منزلش فى نتيجة الاقسـام:

دول يروحوا للشئون " صحيح السبت اجازة الشئون " تدور فى الملف بتاعها على ورقة الرغبات لو موجودة هتسلمها للأستاذ فوزي ف الشئون وهيتبلغوا بالقسم اللى قبلوا فيه.

طب لو دورت فى الملف وملقتش ورقة الرغبات:

سآعتها هتطلع للدكتور عمرو مسعد فى الدور التالت وتسأله عن القسم اللى انت قبلت فيه ويفضل تاخدوا معاكم وصل المصاريف الاصفر وبطاقة الترشيح " اثبات مش اكتر انكم مقيدين فى الكلية لو انطلب منكم " .

طب بالنسبة للناس اللي دخلت قسم معين وعاوزه تغير القسم دا:

ساعتها هتطلع للعميد تاخد منه طلب تحويل من القسم وتملاه وتسلمه لمديرة مكتب العميد تانى ، بس بشرط انك تكون جايب مجموع القسم اللى عاوز تحوله ، وساعتها ممكن تحضر على جدول القسم الجديد لحد ما نتيجة التحويل تظهر ان شاء الله .

طب بالنسبة لنتيجة التحويل دى هتظهر امتى:

على نصف الاسبوع اللى بعده باذن الله علشان الناس تنتظم وتحضر محاضراتها .

اول ما الجدول ينزل لازم تروح تسجل اسمك فى السكشن المناسب ليك:

يعني بتشوف جدولك والوقت اللي انت فاضي فيه وتسجل اسمك ... طيب ايه المواد العملي وايه المواد اللي هحجز ليها سكشن !!
دي كل المواد اللي ليها سكاشن

• "كيمياء عملية تحليلية وفيزيائية 1 (عملى تحليلي 1)" مكان الحجز الدور الاول - معمل كيمياء تحليلية.
• "عملى عضوى (1) " تسجل فى الدور الاول - معمل عملى عضوى (1)
• " ميكروبيولوجي عام " الدور الرابع - معمل الميكروبيولوجي عام
• "فيزياء تطبيقية 1 " الدور الثاني - معمل الفيزياء التطبيقية
• "جيوفيزياء 1 " تسجل فى الدور الثالث معمل الجيولوجيا
• "علم البللورات " تسجل فى الدور التالت معمل الجيولوجيا
• "مقدمة فى تسجيلات الابار " تسجل ف الدور التالت فى المعامل
• "الجيولوجيا الطبيعيه " تسجل فى الدور التالت معمل الجيولوجيا
• "جيولوجيا تاريخيه" تسجل فى الدور التالت معمل الجيولوجيا
• "تشريح و شكل خارجى" "قسم النبات " تسجل ف الدور الرابع فى المعامل
• "تقسيم مملكة نباتية" تسجل فى الدور الرابع فى المعامل
• " بيئة عامة" تسجل ف الدور الرابع فى المعامل
• " علم الوراثة" تسجل فى الدور الرابع فى المعامل
• " علم التشريح الداخلى" تسجل ف الدور الخامس ف المعامل
• " تصنيف حشرات" تسجل فى الدور الخامس فى المعامل
• "علم الشكل الخارجى" "قسم علم الحشرات " تسجل ف الدورالخامس فى المعامل
• " بيولوجيا حشرات" تسجل ف الدور الخامس فى المعامل
• " فسيولوجيا (1)" تسجل فى الدور الخامس فى المعامل
• " لافقاريات (1) "تسجل فى الدورالخامس فى المعامل
• " حبليات (1) "تسجل فى الدور الخامس فى المعامل

التسجيل للناس اللى مش عارفه تسجل ازاي:

 بتخشوا ع اللينك ده تختاروا المواد اللي عندكوا ف الجدول الموجه وبعدين تكتبوا الرقم القومي بتاعكوا فى اول الصفحه خالص وتحملوا الملف وبعدين تدخلوا علي اللينك ده "التسجيل و رفع الملف" وتكتبوا الرقم القومي تاني وتحملوا الملف اللي حملتوه من اللينك الاول.

طب هي سنه اولى ليها تسجيل ؟! اه ليها تسجيل و انت اللى هتسجل لنفسك ف البيت عن طريق النت طب أسجل ازاي طيب ؟!! بص يا سيدي ع الفيديو دا كويس و اتبع الخطوات و تسجيلك هيتم و بكل سهوله ... ممكن تعملهآ فى اى مكتبة برا المجمع مقابل اجر مادى ، بس يفضل تسجل لنفسك احسن بكتير .

طب بالنسبة للناس اللى جت تسجل وجالهم رسالة خطأ بان " الرقم القومى غير مسجل ":
متقلقشى خالص وكل اللى عليك يا سيدى انك تستنى د. عمرو مسعد والشئون لحد ما يرفعـوا كل الارقآم القومية بتاعتكم على السيرفر .

زي ما قولنالكوا قبل كدا ان احنا هنوفر كل الأدوات المطلوبه وكمان البالطو ف مكتبه ودي الأدوات المطلوبه لكل قسم وكمان بالأسعار "دى اسعار 2017-2018":

ادوات قسم كيميا اسبيشيل

6 انابيب إختبار "test tube " الواحده ب 75. قرش مش جنيه
حامل انابيب ب 5 جنيه
فرشه انابيب ب 1 جنيه
ماسك انابيب ب 2 جنيه
ماصه زجاج 10سم "pipette" ب 8.50 جنيه
دورق مخروطي " flask" ب 15 جنيه
كأس "beaker " ب 10 جنيه
سحاحه "burette" 50 مل ب 12 جنيه ودي بتستخدموها ف الترم التاني
والأهم من ده كله الجونتي طبعا "جلافز" الواحد بيكون ب 1. 5 جنيه والعلبه كلها ب 35 جنيه .

بالنسبه للأقسام المزدوجة

هتجيب كل أدوات الكيمياء اللي فوق دي ماعدا السحاحه لسه هتحتاجها ف تانيه أن شاء الله

ادوات حيوان وحشرات

اداوات تشريح ب 45 جنيه
علبه دبابيس تثبيت
وبكره خيط من عندكوا ف البيت عادي هتحتاجها بسيط جدا

أدوات ميكرو ونبات

موس وده ب 1 جنيه
علبه شرايح وكمامه
بالنسبه للبالطو فيه 3 أنواع وع حسب ما تحب بقا
نوع ب 75
نوع ب 60
نوع ب 45

رأى الطلاب

أقسام كليتنا بتتحدد من أول سنه غير معظم كليات علوم اللي بيتخصصوا في تالتة او تانية ، عـ حسب درجتك ف الثانوية و درجة الكيميا بصورة خاصة ..
الأقسام المسيطرة عندنا هي : ف المرتبة الأولي قسم كيميا " اسبيشيال " ..
بعدها باقي الأقسام المزدوجة للكيميا زي " كيميا وميكرو ، كيميا وحيوان , إلخ .. ، معندناش قسم biochemistry ..
وكل قسم من الأقسام المزدوجة دي بيختلف عن التاني ف نص المحتوي الدراسي تقريباً ..
نظآم الكلية بتاعتنا يطلق عليه .. " نظام الساعات المعتمدة " يعني إيه؟؟ هتعرف ان شاء الله ف أول أسبوع ف الكلية .. اقرا عنه وهتفهمه وهتفهمه اكتر في اول اسبوع في الكلية ان شاء الله ..
التقدير عندنا تراكمي .. يعني الترم الأول مهم جداً لإنه يعتبر الاساس و القاعدة الـ هيتبني عليها تقديرك بعد كدا ، فشد حيلك من الأول ..
اول ترم ف الكلية بيبقي الجدول عندك إجباري ، لكن بداية من الترم التاني إنت الـ بتحط جدولك بنفسك ، يعني ممكن تاخد جدول مختلف عن زمايلك عادي .. بس أكيد هتحطه بعقل وتوازن بين صعب وسهل ..
أول أسبوع ف الكلية بيبقي عبارة عن حفلات " welcome party " محاوله منهم انهم يحببوك ف الكلية و يعرفوك نظامها ..
بعض من كيانات و أُسر الكلية هي الـ بتبقي مسئولة عـ الحفلات دي .. الدراسة عندنا عامةً بتبدأ من تاني اسبوع ، فوت إسبوعين أو تلاتة هتلاقي نفسك عندك ميد ترم شفوي شيتات فاينال عملي فاينال نظري ، فمش هتحس بالوقت من الأخر فحاول تاخدها جد من الأول .
صوابعك مش زي بعضها ، عندنا دكاترة حلوة ودكاترة وحشة ، مواد تقريباً سهلة ومواد صعبة , فيه دكاترة هتسمحلك انك تناقشها وتقول رأيك وتسمعك ، دكاترة تانية هتحرجك ..
واحدة واحدة هتعرف نظام كل دكتور ..
الكلية جميلة وسهلة لو إهتميت ، صعبة و هتغيب فيها 10 سنين لو اهملت

 الموقع الالكترونى للكليه  

http://mu.menofia.edu.eg/sci/Home/ar