كلمه موجهه لطلبه الفرقه الاولى

بِسْــــــــــــــــمِ اﷲِالرَّحْمَنِ الرَّحِيم

فى العدد الاول من مجله علومنجى دوت كوم ده بنناقش كل طالب  جديد لسه داخل كليه العلوم بننصحه وكمان بنفهمه انها مش كليه سيئه وكمان ان ليها عمل مش زى ما المجتمع صورها ليه وكمان بنوضحله ان كلنا معاه ويقدر يستفسر عن اى شئ.

انا زيي زي اي حد فيكم كلنا من الصعب ان حد فينا يكون كان نفسه يدخل علوم (فى بلد مش بتعرف يعنى ايه علوم بالاضافه اننا دايما حاطيين ادمنا موضوع الشغل على الرغم من انه رزق مش اكتر لكن فى عدد قليل جدا تقدر تقول داخل بمزاجه وعدد مش كبير حب الكليه بعد ما دخلها) لكن بعد ده كله هنا فى مصر كانت و ما زالت كليه الي رقصوا علي السلم الي كان نفسهم يدخلوا ما يسمي في مجتمعاتنا المتخلفه بكليات القمه و تفوقوا في الثانوي بس مجموعهم ما ساعدهمش فبدأوا يدوروا علي بدايل فملاقوش غير علوم و هنا اول نصيحه انك لازم تقتنع ان دي كليتك الي ربنا قسمهالك و ان فيه خريجين علوم كتيييييير جدا بيتحسدوا من خريجين كليات القمه علي شغلهم و مراكزهم و مرتباتهم و كمان كل الطلبه داخلين تقريبا بنفس المجموع يعني المستويات متقاربه جدا فمافيش ما يمنع من التفوق و انك تكون من المعيدين و الدكاتره في كليه العلوم و اعتقد هتكون كده افضل من اي دكتور عادي خريج طب او صيدله طبعا بس ازاي ده يحصل ؟؟ هنا هتلاقي ان الي تقبل بسرعه كونه دخل علوم و ما اعتبرش ده فشل و ركز في كليته و ماضيعش وقته في التحسر علي كليات القمه هو الي بيقدر يتفوق لكن الي مخلي علوم بيتقال عليها انها صعبه ان الطلبه عقبال ما بيرضوا بالامر الواقع بيكون فات فتره من الترم و بيحاولوا يلموا الي فاتهم مبيلحقوش فبنلاقي نسبه سقوط مش قليله بعكس طلاب ما يسمي بكليات القمه الي داخلين مبسوطين بكلياتهم بيركزوا من الاول.

كان في سؤالين بتسألهم من 90 % من الطلاب الي كنت بستقبلهم في الكليه : الاول ازاي اقدر احول من علوم لصيدله بعد سنه تانيه؟؟ و التاني ادخل قسم ايه علشان افتح معمل تحاليل؟؟

كان السؤالين بيني و بينكم بيضحكوني جدا ليه؟؟؟ علشان لو ركزتوا فيهم هتلاقوا اللي بيسأل مازال متعلق بكونه يبقي دكتور حتي بعد ما دخل علوم لانه اتزرع جواه من صغره ان الي مدخلش طب او صيدله او اسنان او هندسه يبقي فشل في التعليم و ان ابن خالته الدكتور فلان احسن منه .

انا عارف ان معظمكم دلوقتي مستني الاجابه علي السؤالين دول برضه ... الي اقدر ائكدهلكم ان انا و كتيييييييييييير جدا من زمايلي لو رجع بينا الزمن تاني و كنا جايبين 100 % هنختار علوم بكامل ارادتنا لكن هيتغير طموحنا فى الميل لاقسام علوم مش اكتر و ده ما يمنعش ان ناس كتير جدا برضه ممكن تقول عكس كده بس ده راجع لتوفيق ربنا اولا ولشخصيه الانسان و محاولته انه يدور و يتعب و يطور نفسه.

و لازم كلنا نكون عارفين ان علوم في اي دوله تحترم نفسها هي الكليه رقم واحد و ان سبب تخلف دول العالم الثالث (الشرق الاوسط كله) هو عدم الاهتمام بالكليه دي فلازم تكونوا فخوريين بكليتكم الي هيجي اليوم قريب جدا ان شاء الله و تاخد دورها بجد في نهضه مصر.

اما بالنسبه للاقسام و نظام الكليه فسامحوني مش هقدر اتكلم عنه كتير لكن نصيحتي المتواضعه هي حاول تتخرج من الكليه و معاك كيمياء في تخصصك سواء سبيشيال او مزدوج مع احترامى الشخصى لباقى الاقسام و جميع اقسام الكليه بتأهلك لده مع ان سوق العمل فعليا مش بيفرق اوي بين اقسام الكليه زي ما كنا فاكرين .

لازم تقول لنفسك الاتى انا بذاكر واتعلم مش علشان الفلوس بس ,الفلوس هاتيجي هاتيجي لكن خليها هي اللي تجيلك مش انت اللي تجري عليها,احنا بنذاكر وندخل احسن الكليات علشان نتعلم ,تعرف ان معظم العلماء لا يملكون المال ولكنهم يمكلكون علما لا يشترى بمال الدنيا ,العلم في حد ذاته غاية نبيلة وليست وسيلة لكسب المال مع ان المال هايجي لغاية عندك يا سيدي ما تقلقش.

و فيه جمله مش بنساها ابدا قالتها دكتوره خلوها قدامكم دايما: 

"لازم الواحد يعتبر نفسه لاعب في الالعاب الاوليمبيه هدفه هو تحطيم الارقام القياسيه و ليس الحصول علي المركز الاول بس علشان لو فشل يحصل علي المركز الاول بدون تحطيم الرقم القياسي".

و فيه جمله مش بنساها ابدا قالهلنا دكتور خلوها قدامكم دايما: 

"أعرف شئ عن كل شئ وكل شئ عن شئ"

طبعا لو حصلتلك ظروف ومقدرتش تذاكر من الاول هتعمل ايه (خبره طالب ):

بص يا سيدي اول شيء لازم تحاول تبدأ تذاكر وتكون من جواك مقتنع ان الوقت ماضعش ولا حاجه ممكن اعوض اللي فات بس بمجهود زياده وانك ما تضيعش اي وقت تاني اما بالنسبه للي فاتك ممكن تجيب المحاضرات من حد من زمايلك وتصورها وتذاكر لوفيه حاجه مش واضحه معاك راجع المعيد اللي بيديك في السكشن وصدقني هيساعدك ده لو كنت خايف تسأل دكتور الماده نفسه وانا هقولك ان خوفك ده ناتج من انك خايف انه يسالك في اللي فات وما تعرفش ترد بس صدقني لو احنا بنذاكر اول باول ونرح للدكتور بتاع الماده بعد كل محاضره نساله عن اللي احنا مش فاهمينه هيكون مبسوط "مش لاننا نش فاهمين " بس لانه بيحس ان فيه ناس متابعه معاه المنهج وان تعبه في المحاضرة مش بيروح بلاش.

"يعني حاولوا كلكم ترفعوا من سقف طموحكم و مرحبا بكم في كليه العلوم"

 (^_^)