ازاي اكون خلفية علمية (بنية معرفية)

بِسْــــــــــــــــمِ اﷲِالرَّحْمَنِ الرَّحِيم

هنا ستتحول من مجرد شخص عادى الى باحث علمي "هنا الفارق بين المتخصصين و غيرهم" هذه المرحلة تعتبر هى الأطول فى المشاريع البحثية واذا افترضنا أنك ستستغرق عاما كاملا من أجل انهاء مشروعك البحثي فإنه من المحتمل أن تستغرق مرحلة الخلفية العلمية مدة لا تقل عن 8 أشهر!

طب يعني اية خلفية علمية ؟

دي الخطوة اللي بيبدا عندها التحول ...

•   من شخص عادي --- الى باحث
•   من واحد بيشوف الامور  بشكل سطحي --- الى واحد بيشوف الامور بشكل علمي
•   من واحد بيقرا و خلاص --- لوحد بيقرا بعمق و بيفهم
•   من واحد بيجمع معلومات و يرصها تحت بعضها و خلاص --- لواحد بيجمع المعلومات و يحللها  و يستنتج منها المعلومات اللي هوة عايزها
• من واحد بيسمع الاشاعات و يصدقها --- لواحد لازم يدور على المصدر العلمي الصحيح لاي معلومة.

طبعا التحول دة مش بزرار سحري  ....  دية حاجات لازم انت تعملها والخلفية العلمية بتتكون من حاجات مهمة جدا بيحصلوا فيها  :

الحاجة الاولى

اية هية الابحاث السابقة المرتبطة بموضوع بحثك و ناخد بالنا  من حتة مهمة (( بقولك المرتبطة بموضوع بحثك ... و ليس في بحثك ))  علشان في ناس بتقول البحث بتاعي جديد .. ازاي اجيب ابحاث سابقة فية ...

طيب  نضرب مثل 

موضوع بحثك بيتكلم على الاستفادة من الاملاح الزائدة في التربة .... يبقى لازم تعرف الابحاث السابقة اللي بتتكلم في  :

• انواع الاملاح
• كيفية استخلاص الاملاح
• الاملاح الضارة و المفيدة
• الاملاح التي تدخل في الصناعات
• هل التربة بتحتاج املاح للزراعه ( يعني لو نقيت التربة من الاملاح هل هتبقى صالحة)
• و حاجات كتير جدا لازم تقرا فيها

الحاجة التانية 

اية هية النظريات و المعادلات و آليات العمل  المرتبطة بموضوع بحثك و اللي انت هتعتمد عليها في بحثك

مثلا : ما ينفعش انك تدرس علاج مرض السرطان من غير ما يكون عندك معلومات عن انواعة و طرق علاجة و انتشارة  (( و دة الفرق بين العالم و الجزار ))

مثال تاني : ما ينفعش تعمل تعديلات على موتور العربية من غير ما يكون عندك معلومات عن قوانين الطاقة و الحركة ( و دة الفرق بين الاسطى بلية  و الفيزيائى "أو المهندس") 

الخلاصه : عليك أن تجمع كل المعلومات الممكنة من كافة المصادر الموثوق بها مثل الأوراق البحثية، المراجع، لقاءات الخبراء و المتخصصين، الكورسات الأونلاين، و المقالات العلمية.

لكن تذكر الحكمة القائلة

العلم فى الكراس و ليس فى الرأس! عليك أن تدون كل هذه المعلومات و تقوم بحفظها، لا تعتمد على الذاكرة فقط ، لذا عليك استخدام دفتراً للملاحظات من أجل كتابة المعلومات الهامة و المصادر التى تستعين بها فى هذا البحث.