كيف تصبح أخصائى (دكتور) تحاليل طبية ناجح

بِسْــــــــــــــــمِ اﷲِالرَّحْمَنِ الرَّحِيم

هذا المقال يناقش الخطوات المطلوبة لكى تصبح اخصائى تحاليل طبية ناجح ومتميز كثيره لكن تكمن فى الفهم الجيد لما هو مطلوب منك لذلك اوضحنا فى هذا المقال من موقع « علومنجى دوت كوم »  كل ما هو مطلوب.

أفضل الأقسام

يفضل ان تكون خريج احدى الاقسام المزدوجة بالكيمياء مثل :

1. كيمياء - كيميا حيوية
2. كيمياء - ميكروبيولوجى
3. كيمياء - النبات
4. كيمياء - حيوان

وفى خبر جميل وهو افتتاح بكالوريوس جديد بنفس مسمى الدبلومه بكالوريوس العلوم في عملى الكمياء الحيوى والفسيولوجى بكليه العلوم بالاسماعيليه وهيدرس فيه مواد التحاليل المختلفه في الاربع سنين.

دبلومات التحاليل

الحصول على دبلومة فى الكيمياء الحيوية أو الميكروبيولوجى او هيماتولوجى من جامعة كويسة مثل جامعة الاسكندرية مثلا أو اى جامعة تتأكد من كفائة المناهج المقدمة وكفائة واهتمام الدكاترة المسؤلين عن تدريس هذة المناهج بشكل جدى وان يكون بداخلك الدافع للتعلم الحقيقى وليس الحصول على شهادة بأسهل طريقة ) بالدبلومة دى فقط يبقى تقريبا عرفت 65 % او اكثر من التحاليل الطبية ولكن يوجد فروع اخرى مهمة فى التحاليل الطبية مثل علم الطفيليات وعلم الفيروسات وعلم البكتريولوجى وعلم الدم لذلك حيث ان دبلومة الكيمياء الحيوية تشمل هذة المواد ولكن بشكل متواضع لذلك ( تستطيعى البحث عن دبلومة ميكروبيولوجى وايضا دبلومة امراض الدم من جامعة كويسة ) وبكدة يبقى اللميت بمعظم فروع التحاليل الطبية.

التدريب العملى 

ينقسم التدريب العملى  الى ثلاث اقسام

القسم الأول : 

لابد من التدريب فى مكان يعتمد بشكل رئيسى على الاجهزة البسيطة المتواضعة والعمل المنويل ( يفضل المعامل الحكومية  لمشاهدة حالات اكثر فى وقت قصير  والتركيز على كيفية سحب الدم من المرضى بمختلف اعمارهم (اطفال حديثى الولادة – رضع – اطفال – بالغين رجال ونساء – نساء ورجال مرتفعى الوزن حيث تجد اوردة لهم بصعوبة – رجال ونساء فى مرحلة الشيخوخة – استخدام جميع انواع السرنجات والبترفلاى والانابيب المختلفة وسحب الدم الشريانى …. الخ ) كيفية تحاليل البول ( من رأى من اهم التحاليل البسيطة التى قد تعطى صورة كاملة عن الجسم كلة مثل الكبد والكلى والسكر الدم واملاح البول وده تحليل البول كاملا بالصور من هنا ) كيفية اجراء تحليل البراز والطرق المختلفة فى الفحص وكيفية عمل مزارع البكتريولوجى وكيفية التعرف على الكائن المسبب للمرض بالطرق التعريفية المختلفة.

القسم الثانى : 

التدريب فى مكان كبير ومشهور يحتوى على الاجهزة الاتوماتيكية مثل

1. اجهزة عدد خلايا الدم
2. اجهزة الهرمونات ودلالات الاورام
3. اجهزة الفيروسات والاليزا
4. اجهزة ال PCR
5. اجهزة ال electrophoresis

لكى تزداد خبرة وكسر الرهبة فى التعامل مع الاجهزة الضخمة ومعرفة اهم شئ وهو معايرة الجهاز وكيفية عمل الكنترول ومتابعة الجهاز من ناحية دقة النتائج والتحكم فى الجودة

القسم الثالث: 

محاولة التدريب او العمل فى معمل خاص لمعرفة الجانب الادراى للمعمل وكيفية التعامل مع المرضى ومعرفة كيفية استقبال المريض وتحضيرة قبل اجراء التحاليل والاحتياطات المطلوبة قبل اجراء اى تحليل ( ومعرفة كيفية التعامل فى حالة الخطاء فى النتيجة او الخطاء فى عينة او العينة لم تكفى وكيفية التعامل مع غضب المريض لاى سبب ) واخذ بعض المعلومات عن حالته التى قد تساعدك فى اجراء التحاليل والتى قد تعطيك صورة كاملة عن المريض وقد تجعلك تطلب فحوصات اخرى تبعا لشكوى المريض وحالتة ( وهذا الجانب مهم جدا جدا يجعلكى من مجرد شكوى المريض مع مرور الوقت معرفة بسهولة ماهى الفحوصات المطلوبة وما هو الخلل واى النتائج سوف تكون غير طبيعية ) وكيفية التعامل مع شركات الكيمياويات والمناديب والاجهزة والاسعار.

• لاتعطى المريض اى نتيجة غير طبيعية قبل التأكد منها واذا لزم الامر اعادة التحليل فلا تتردد ( حفاظا على سمعة المعمل ) والتأكد من التاريخ ومطابقة النتيجة لشكوى المريض ومحاولة القرائة النظرية عن سبب هذا الخلل قبل تسليم النتيجة للمريض حيث تكون مستعد للرد على استفسارات المريض او حتى استفسارات الطبيب المعالج.
• الحصول على دورات فى اللغة الانجليزية ( التأهيل للحصول على التويفل الدولى التى تساعدك فى الحصول بسهولة على منحة دراسية خارج مصر ) ومهارات الكمبيوتر المختلفة والحصول على الدورات الطبية المعتمدة ( مثل دورات فى مكافحة العدوى وفى تحكم الجودة وفى ادراة المختبرات الطبية وفى علم الادوية …. الخ ) المختلفة والتعليم الطبى المستمر وحضور المؤتمرات والندوات الطبية ومتابعة القنوات الطبية والبرامج الطبية المختلفة على التلفزيون
• لاتنسى الاستمرار فى الخطوات الادراية الخاصة بالتسجيل فى النقابة ( الفاشلة ) بمجرد الحصول على الدبلومة للحصول على الاوراق المطلوبة للحصول على مزاولة المهنة من وزارة الصحة والحصول على لقب "دكتور تحاليل طبيه" من النقابه نفسها (وكان فى الماضى اى قبل 2017 لابد من رفع قضية خاصة بفتح معمل تحاليل ) ولاتنسى فى هذا الزحام القرائة الكثيرة ومتابعة الجروبات الطبية والبحث الكثير على الانترنت لساعات طويلة للحصول على معلومة طبية ولو صغيرة جدا بالاضافة الى استكمال باقى الدراسات العليا – الماجستير والدكتراة.
• البحث عن عمل خارج مصر ( للاسف ) او منحة دراسية خارج مصر لاستكمال الدراسات العليا الماجستير والدكتوراة فى حالة مواجهة صعوبات للحصول على الوظيفة المرموقة والدراسات العليا داخل مصر.

تكوين المعمل

ابدأ فى تكوين معملك الشخصى بنفسك كالتالى

أولاً: أنت الميزانية عامله إيه ؟ ده مربط الفرس ليييييه؟؟

لأن لو الميزانية مفرفشه: 

أختار أفخم مكان فى البلد (عشان أكيد حيكون إيجاره عالي وأنت طبعا الميزانية مفرفشه ) وياريت يكون فى وسط المدينة ولو في الإمكان قريب لأكبر تجمع دكاترة ولو في الجون يكون مع ده كله جنب مركز أشاعه .

طب لو الميزانية تعبانه: 

حاول تكون قريب قدر الإمكان من كل الحاجات اللي فاتت دى.

المكان

ياريت يكون أرضى أو دور أول (عماره جديدة يكون أحسن) على الأقل 3 غرف وصاله وحمام عشان ميتلككوش في الترخيص بتاعه المعمل ولو كان بيطل على الشارع الرئيسي يكون خير كبير ولازم التهوية تكون جيده والمياه والصرف مفيهمش مشاكل وغرفة المعمل بها حوض للغسيل.

الأجهزه

لو الميزانية مفرفشه يستحسن انك تبدأ بـــ

1- جهاز عد خلايا (Cell counter))) : وده فى فروق جامدة في الأسعار

• ممكن يكون صيني ويتراوح من 40 ل 50 آلف جنيه
• ممكن يكون سويدي وده بحوالي 50 آلف جنيه
• ممكن يكون أمريكي sysmex وده فى حدود 90 آلف إلى 250 آلف على حسب البارمتر والإمكانيات.

2- جهاز كيمياء الدم : ومنه أنواع كتييييير بداية من الكلروميتريك إلى الكينيتك منه تيوب وكفيت ومنه سكشن إلى الأوتوميشن الأسعار على حسب نوع الجهاز وعدد الفلاتر والاوبشن اللي فيه يبدأ السعر من 8 آلاف إلى 60 آلف وأكتر.

3- جهاز البروثرومبين : من 6 إلى 10 ألاف.

4-جهاز الإليزا : نفس الكلام اللي على جهاز الكيمياء.

5-جهاز العناصر : فى حدود 15 آلف.

6- جهاز الكازا أو عد السائل المنوي بالكمبيوتر : في منه صيني في حدود 50 ألف وفى منه أمريكي فوق ال100الف.

7- جهاز Turbedymatry وده فى حدود 10 آلاف.

8- فرن تعقيم + حضانة + جهاز طرد مركزي دول من ألف واحد إلى 5 الآلف على حسب النوع.

9-ميكروسكوب: معاك من الصيني (107) وده فى حدود 1100 وممكن اعلي من كده لو كان امريكى يوصل لحد 4 آلاف.

طيب لو الميزانية بعافية شويه يبقى تختصر وكفايه قوى :

1- جهاز كيمياء فى حدود 15 آلف جنيه

2- جهاز بروثرومبين فى حدود 7 آلاف جنيه

4- حضانة + فرن + سنترفيوج كــــــــــــــــــــــــــــــل ده بألف جنيه

5- ميكروسكوب 107 صيني ب 1100

للعلم! الأسعار دى قديمة على 2018 لكن جارى اضافة الأسعار الجديدة وكمان الأجهزة الجديدة.

للعلم! يوجد لكل ده تقسيط ممكن تدفع 10 آلاف وتقسط الباقي (بس نصيحة أبعد عن القسط وغنيله).

توضيح بعض الاشياء المهمه وتكمله لما سبق:

أولا : بصوا موضوع انى افتح معمل ده لازم افكر الاول انا هفتحه فين:

لو في قريه يبقى أركز أولا على الكثافه السكانيه ثم بعد كده وجود الدكاتره.

لو فى مدينه يبقى أركز أولا على الدكتور ثم الدكتور ويسلام لو كان باطنه او نسا وولاده…. وتبقى والدتك دعيالك لو تفتح جو مركز طبى كبير كبدايه وبعد اما توقف على رجيلك ابقى افتح فرع لواحدك بس خلى بتاع العياده شغال تمام.

ثانيا : انا بقى هعتبر انك فعلا قررت تفتح معمل لذلك وان شاء الله هقول كل حاجه تيجى فى افكاركم فى باقى الموضوع.

1- الاسم لازم يكون سهل وبسيط ويتناسب مع الوسط اللى هو فيه وتكون بتفكر ادام انه ممكن يكون ده بدايه سلسله .

2- مكان المعمل لازم يكون سهل الوصول اليه ومميز فى مكان يسهل وصفه.

تقسيمة المعمل

المعمل نفسه بقى هقسمه لكذا جزء:

أولا الاجهزه:

1. جهاز سنترفيوج ( 6 عين صينى ) بحوالى 280 الى 300 جنيه.
2. ميكرسكوب صينى بعدستان 1100جنيه.
3. وتر باس زجاجى بحوالى 385 جنيه .
4. عدد اتنين ببته او ماصه الكترونى واحده ثابت عشره ودى بـ 175 جنيه والتانيه متغيره من رقم 100 ميكر الى 1000 وعلى فكره ممكن تنزل بيها لحد 25 ميكرون ودى ب 320 جنيه.
5. جهاز سرعه ترسيب وانا بسميه جهاز وهو عباره عن ( 6 ماصات زجاج متعلقين فى استاندا استالس) وسعر الانابيب + الاستاندا حوالى 18+ 65 اجمعوا كده وشوفها كام وطبعا هتجيبوا محلول سرعه ترسيب ب 10 جنيه.
6. فى اختراع تانى بس مكلف حبتين لسرعه الترسيب وهو الجهاز بيبقى فيه المحلول ويدوب بتحط فيه الدم وتعلقه فى الانبوبه الخاصه بيه فقط الانبوبه عامله حوالى 2 الى 5 جنيه.
7. شريحه عد دم صينى 45 جنيه أوالمانى ب120 جنيه .
8. تايمر 15 جنيه وراك انابيب 15 جنيه وتورنكيه ب15 جنيه طبعا هات الكميه اللى انت عايزها من كل نوع.
9. حضانه او فرن حرارى هتستخدمه كحضانه بحوالى 440 الى 500 جنيه
10. جهاز الكيماء وده اللى هيحدده اولا رات الشغل وبعد كده مقدرتك الماديه يعنى هقولك اجهزه محترمه وشغلها دقيق بس الفرق بتاع الائتمان فى السرعه فى النتائج.
11. فيه جهاز اسمه اوكتا او بايو استك ده ب 2300جنيه ……. الابل بحوالى 2500جنيه ……. الجنواى بحوالى 5000 جنيه .
12. الربونك الكيوفته  بحوالى من 7 الى 8 الاف جنيه ….. والنوع التانى منه اللى هو كيوفته وسكشن ده 11 الف جنيه .
13. وفيه عندك الاربا وده ب 16.. الى 17 الف جنيه وده اخر جهاز انصح بيه لان بعد كده يبقى بيهزر.

اهم حاجه فى جهاز الكيماء عايز دكتور صاحى للجهاز ويعرف امتى الجهاز قراءته صح واما مثلا فيه ضعف نور والقراءه مش دقيقه ويعرف يصفر الجهاز كويس انه يصفره بالماء المقطر ويرجع يحط الماء تانى لو ادى صفر يبقى تمام ادى اى قراءه يبقى يصفر تانى بس.

ثانيا المحاليل : 

فى المحاليل يحبذ انك متكترش لحد ما تعرف ايه اللى المكان بيتسحب فيه اكتر تمام.

1. محلول السكر وفيه نوعان منه الاول بيتحل وده ب 18 جنيه والتانى جاهز وبرده ب 18 جنيه.
2. محلول الدرابكن بتاع الانيما وده ب43 جنيه.
3. محلول البولينا وده ب75 جنيه.
4. محلول الكرياتنين وده 55 جنيه  وده بيحتاج محلول معاه اسمه تسا ب17 جنيه ومحلول الصفراء وده 57.
5. محلول الزلال وده ب35.
6. طبعا الانزيمات بتاع الكبد الاتنين ودول كل واحد فيهم ب 72 جنيه وهما بيحتاجوا محاليل معاهم زى هيدوكسيد الصوديوم ب15 جنيه.
7. محلول اليورك اسيد وده انواع كتيره من 14 الى 20 جنيه للفايل.
8. محلول صفائح دمويه ب 10 جنيه ومحلول عد ابيض ب 10 جنيه واديتا بـ 10 جنيه علشان تحطها فى انابيب السحب ده لو هتشتغل كده لو عايز تجيب انابيب جهازه الانبوبه ب 50 قرش.
9. هتجيب 2 كيس تبس اصفر ب 30 جنيه و2 كيس تبس ازرق ب 30 جنيه وكيس انابيب وزر مان فيه 1000 انبوبه ب 35 جنيه وهتجيب غطاء انابيب الغطاء ب 4 قروش فى العدد اللى انت عايزه.
10. طبعا هتجيب لاتكس aso_crp_rf الواحده منهم ب 65 جنيه
11. طبعا فصيله الدم والار اتش وهما تلاته كل واحده ب 17 جنيه
12. لو هتزرع عندك هتجيب اطباق زجاج صغيره ومتوسطه الحجم وهتجيب دسكات الدسك عامل حوالى 7.5 وطبعا الميديا وخاصه الكلد ودى مش غاليه بحوالى 17 جنيه ودى خاصه بالبول ومزرعته
13. كروت الحمل الكارت بحوالى 2 الا ربع للكارت شوف انت الكميه براحتك
14. كروت فيرس س باى دوت وتراى دوت ممتازه العلبه عشر كروت من 100 الى 125 .
15. كروت فيرس ا كويسه برده الكارت بحوالى 11 جنيه وبرده كروت ب كويسه الكارت 3 جنيه.
16. هتجيب راك  انابيب سيوله جهازه وراك انابيب اديتا جاهزه( علشان pcr)  الانبوبه بحوالى من 48 الى 50 قرش احسب بقى يبقى الراك بكام علما ان فى راكات 100 انبوبه وراكات 50 انبوبه
17. محلول السيوله هات فايل 8 مل 44 جنيه كويس
18. كبات معقمه للمزارع الكب ب 50 قرش وكبات للبول والبراز 100 ب 10 جنيه .
19. علبه لزق مدور او دكتور ايد ب 7 جنيه وهاتلك برده كحول او مسحات كحوليه الازجاجه ب 4 جنيه او علبه المسحات ب 7 جنيه+ القطن
20. هات محلول الكلوستيرول والدهون الثلاثيه وانت جاى تشترى قوله هات الحاجه اللى بترتبط بالصلاحيه مش الحاجه اللى شهر بعد الفتح هتبوظ منك فى النوعين دول وهما من 15 الى 22 جنيه للفيال.
21. شرائح زجاجيه للفحص العلبه ب 3 ونصف وطبعا كفر متجبش من الفردى هات 4فى 1 ب 5 جنيه كويسه + شرائط فحص ثلاثيه ب28 بتبين الزلال والوسط والسكر او كامله بحوالى 70 جنيه .
22. كرتون سرنجات 3 سم ب 65 جنيه فيها 300 سرنجه+ كرتونه سرنجات 5سم بنفس التمن او 70جنيه.
23. انابيب زجاجيه كبيره وليكن 8 علشان عمل الانزيمات الانبوبه بجنيه+ انابيب زجاجيه صغيره علشان السيوله الواحده ب 15 قرش.
24. ماسك + صبغه افلام لصوره الدم الاتنين ب12 جنيه.

ثالثا مكونات المعمل:

1. اولا عايز كراسى استقبال جلد الكرسى بيبدا من 40 و55 و65 جنيه.
2. مكتب لحضرتك فى فرفه السحب وده حسب امكانياتك فى عموله وده غالى وفى حاجات جاهزه من 400 جنيه.
3. تريبزه علشان تحط عليها ادوات السحب وكرسى سحب من 100 جنيه وانت طالع .
4. بره فى الاستقبال لو هتجيب استقبال يبقى لازم كونتر ولو هتكتفى ببنوته كده تحاسب والكلام المعروف زى العياده يبقى مكتب صغير جاهز فى حدود 250 جنيه .
5. عدد 3 مراوح سقف 300 جنيه لو تكييف بيبدا من 1500 جنيه.
6. طابعه بـ 575  جنيه اتش ب ليز 1102 .
7. لاب توب او كبييوتر فى حدود 1000 او 1500 لو لاب توب .
8. باسكت الزباله فى كل حته حاجه مهمه جدا الواحد ب15 جنيه .

رابعا دعايه:

حاجتين:

1. الفلدرات ودى حاجه شيك جدا بس غاليه حبه بس صراحه وجهتك عند الطبيب والمريض  وده 1000 فولدر ب 1300 جنيه.
2. الاظرف 1000 بـ 100 الى 120 جنيه .
3. هتعمل 2000 ورقه دعايه للمعمل ب حوالى 50 جنيه .
4. يافطه محترمه مضيئه بتبدا من 400 جنيه .

خامسا لقب دكتور:

حالياً تم اقرار لقب دكتور لخريجي كليات العلوم المتخصيين في المجال الطبي او ما يعرف بالدكتوراه المهنيه تقدر تعرف تفاصيلها

رابط المقال

تقريبا كده 90 فى الميه من اساسيات المعمل ويارب يكون ده مساعده لكل أخصائى تحاليل محتاج مساعده فى الموضوع ده وربنا يوفقكم جميعا للخير والصواب.

فريق الموقع بيشكر د/ ياسر أحمد طه إسماعيل