معلومات كامله عن كل كليات العلوم فى مصر

بِسْــــــــــــــــمِ اﷲِالرَّحْمَنِ الرَّحِيم

ده موضوع شامل عن كل كلية العلوم من جميع جامعات الجمهورية هنتكلم فيه كل كليه علوم كليه كليه عن نظامها وكمان موادها ومجالات شغلها أقسامها والموضوع يتم تحديثه باستمرار واللى عنده سؤال يكتبه فى كومنت وهنرد عليه.

علوم الازهر

كلية علوم جامعة الازهر

البنات ليها كلية والولاد ليهم كلية .
بتحتوي على 4 شعب رئيسية ، وبتترتب على المجموع في الثانوية العامة 

الترتيب من الاعلي للاقل في التنسيق كالاتي:

1. العلوم الكيميائية 
2. العلوم البيولوجية 
3. الجيولوجيا 
4. فيزياء ورياضة

اولا شعبة الكيمياء : 

بندرس في اولي وتانية كيمياء بكل حاجة حاجة فيها وفي تخصص تاني بيبدأ من بعد سنة تانية بيبقي شعبتين كيميا خاصة وكيميا تطبيقية.

الفرق ما بين الكيمياء الخاصة والكيمياء التطبيقية : 

في اي جامعه تانيه عندهم نظام

ساعات معتمده وعندهم الاقسام الخاصه اعلي من التطبيقيه لانه اشمل واعم ومهتم بكله نظري وعملي وتطبيقي عندهم كله بيدخله لان مش بيجيب مجموع الخاص.. بينما فى الازهر العكس بقا ليه علشان تطبيقيه موادها غاليه فهما بيكتفو ب20طالب بس وطبعا احنا اول حاجة بنفكر فيها المستقبل وهنشتغل ايه وكدة ((مجالات العمل يعنى)) :

الكميائى يعمل فى ثلاث اماكن اساسيه:  فى اي مؤسسه انتاجيه وهى كميائى الانتاج او

فكميائى الانتاج هو المسئول عن متابعه المنتجات واصلاح العيوب الموجودة واكيد

المنتج ده خاص بالميميا زي مثلا الادوية والاغذية او البلاستيك 'الكيمياويات عموما

وبيستمر التخصص ده لسنة تالتة ورابعة..

الاوائل وفيه اوائل بتدخل خاصه لشمولها انما تطبيقيه فدي معمليه اكتر:

(المعمل او الجوده او البحث والتطوير والبتروكيماويات...)

كميائى المعمل : هو المسئول عن فحص المنتج باستخدام اجهزه معينه

كميائى الجوده : المجال الذى يرغب فيه الكثرين لانه يعتمد على نوعين النوع الاول

التحكم فى الجوده ويكون عباره عن جوده المصنع والتاكد من كل عمليه فى المصنع

بدايه من دخول المواد الخام حتى خروج المنتج بشكل سليم،، اما النوع الثانى توكيد

الجوده وهذا هو اعلى مراتب الجوده حيث يعمل على تطبيق المصنع لشهادات معينه

مثل الايزو وغير ذلك وتهيئه المصنع لمزيد من الشهادات وبذلك يكون عمله الاشراف على جميع اجزاء المصنع بما فيها الاداره العامه

كميائى البحث والتطوير: وهو قسم يتواجد فى الشركات العالميه او الكبيره ومهمته الاساسيه هو البحث فى تطوير انتاج الشركه.

فرص العمل بقي : المصانع تشمل جميع انواعها يعني مصنع شبسي. بيبسي . جلود.

اسمنت. ادويه. كهربا. ميه. حديد وصلب. عفريت ازرق (ف كله حته الكيميائي

راشق ) معامل التحاليل_مراكز البحوث والجودة والخ..

ثانيا شعبة العلوم البيولوجية : 

اصلا كلمة بيولوجي معناها دراسة كل

مايتعلق بالكائن الحي سواء انسان او حيوان او نبات او كائنات دقيقة والخ.. اي كائن حي على وجه الارض انت هتدرس عنه في بيولوجي .. انت بتتخصص بيولوجي من سنة اولي وسنة تانية في تشعيب تاني

1- بيولوجي كيمياء .

2- بيولوجي خاص .

الاعلي في التنسيق بيولوجي كيميا بمعني انك لو جبت تقدير عالي في سنة اولي متاح وفي تشعيب ثالث في سنة تالتة لو انت بيولوجي كيميا متاح ليك 5 اقسام وده ترتيبهم (لاحظ بيبقى مزدوج) ع حسب الاعلي في التقدير : (( ميكروبيولوجي كيميا ، حيوان كيميا ، نبات كيميا ، حشرات كيميا ، علوم بحار واسماك كيميا))

اما لو انت بيولوجي خاص متاح ليك 5 برده وبرده بناء ع التنسيق علي حسب

تقديرك يعني وهما (( ميكروبيولوجي خاص ، حيوان خاص ، نبات خاص ، حشرات

خاص ، علوم بحار واسماك خاص ( وده مش موجود الا في 3 جامعات ع مستوي

مصر كلها )))

ملحوظة : للاسف جامعة الازهر مفيهاش قسم كيميا حيوي

هنمسك كل قسم لوحده:

قسم ميكروبيولوجي 

وده بيهتم بدراسة الكائنات الدقيقة زي:

اولا الميكروبيولوجي اكلينيكية وده فرع من التحاليل الطبية خاص بدراسة الامراض

ثانيا الميكروبيولوجي التطبيقية و ده نقدر نشتغل منه في انتاج الادوية وخاصة

المضادات الحيوية وفي شركات المياه في تنقية الماء من البكتريا والفطريات وفي

البكتيريا والفطريات والفيروسات وفي منه تخصصين (البكتيرية والفيروسات) وهكذا تقدر تشتغل منه في معامل التحاليل شركات الاغذية في انتاج المواد الحافظة.

قسم حيوان 

بندرس س فيه كل حاجة متعلقة بالحيوان فسيولوجيا و تشريحيا وكل

حاجة وطبعا خلوا بالكو ان الانسان ارقي الحيوانات ع وجه الارض وبنشتغل منه

((في صل واللقاح ، والمراكز البحثية ومعامل التحا الخاصة بعلم الاجنة.. والخ))

قسم حشرات  

وده نشتغل في وزارة الزراعة_شركات مكافحة الافات وانتاج

المبيدات طبعا كل ده لو بيولوجي خاص انما لو انت بيولوجي كيميا كدة انت زودت فرصتك في الشغل اكتر لانك معاك حاجتين تشتغل بيهم وهما تخصص البيولوجي اللي معاك والكيميا.. يعني كل اللي احنا قولناه ده ومعاه شغل الكبميا اللي قولناه فوق .

( تحت شعار يابن المحظوظة يا فوزي)

ثالثا شعبة العلوم الجيولوجية :

التشعيب في من سنة تانية ((جيولوجيا كيميا او جيولوجيا خاص)) 

جيولوجيا كيميا بتكمل فيه لحد 4 وجيولوجيا خاص في تشعيب تاني من سنة 3 بينقسم ل3 اقسام وهما (جيولوجيا خاص_ جيو كيميا_جيو فيزيا)

رابعا شعبة فيزياء ورياضة : 

بتنقسم لشعبتين من اول سنة تانية

اولا شعبة فلك وارصاد جوية 

ودي شعبة متميزة بيها جامعة الازهر لانها مش موجدة الا في 3 جامعات ع مستوى مصر ، ودي ليها تشعيب تاني في سنة تالتة ياما فلك ياما ارصاد جوية .. شعبه الفلك والارصاد الجويه ممكن تاهللك انك تشتغل ف ( هيئه الاستشعار عن بعد ) وده مركز بحثي ... يعني اللي بيشتغل فيه بيسمي مساعد باحث 

( زي اللي شغالين فالمركز القومي للبحوث )

ثانيا شعبة الفيزياء والرياضة

هما باختصار اربعه اقسام وهم :

# فيزياء_حيوي : وده طبعا مجال العمل الخاص بيه هواخصائين أشعه وتشتغلوا

في مراكز الاشعه وممكن تشتغل في مجال الحمايه من الاشعاع وفي المستشفيات .

# فيزياء_خاصه : مجال العمل الخاص بيه في شركات الاسمنت والمراصد الجويه ومصانع الزجاج  - وممكن كمان تعملوا منه دبلومه فيزياء طبيه (طبعا بعد ما تاخدوا دبلومه فيزياء طبيه وتبقوا زي خرجين فيزياء حيوي ممكن تشتغلوا كمان في مجال الطاقه الذريه وفي مجالات كتير غير كده)

# علوم_الحاسب : وده مجال شغله بتكونوا مبرمجين.

# رياضة خاصة: وده هنا في مصر ملوش غير انكو تكونوا مدربين في شركات وهو ليه مجالات متعدده .. زى ممكن تتعينوا معيدين في الكلية او في مراكز البحوث.

"بالاضافة الي ان اي قسم من دول تقدر تشتغل بيه في مركز البحوث لان ده اصلا

شغلنا الاصلي والحقيقي"

ملحوظة : علوم الازهر بنات مفيهاش قسم جيولوجيا

علوم القاهره

علوم القاهره

كليه العلوم جامعه القاهره تعد من أوائل كليات العلوم على مستوى الجمهوريه وهى رابع كليه من حيث النشأه فى جامعه القاهره ويُذكر أن كلية العلوم جامعه القاهرة كانت قد حصلت علي الإعتماد في الفتره الأخيرة .

نظام التقديرات ايه ؟ النجاح من 60 ، مقبول 60 - 64 ، جيد 65 - 74 ، جيد جدا 75 - 84 ، امتياز 85 – 100

هى الجداول بتنزل امتى وازاى بعرف جدول محاضراتى؟

انت اللى بتختار موادك وانت اللى بتعمل جدولك هما بس بينزلولك على موقع الكلية المواعيد المتاحة لكل ماده انت بتختار المواعيد اللى انت عايزها وتظبط جدولك وتسجله على موقع الكليه وبتطبعه وبتمضى عليه وتخلى اى دكتور فى الجامعة يمضيلك عليه وتصوره نسخة تسلم الاصل للشئون والنسخه التانية تخليها معاك وطبعا الطلبة الاكبر منكوا هتساعدكوا فى عمل الجدول ده متقلقوش

ايه نظام الدراسه ؟

كل ماده من 100 درجه متقسمه كالاتى 10 درجات على الميدتيرم وبيكون بعد شهر ونص بالظبط من بداية الدراسة ، وبعد 3 اسابيع بيبدأ العملى وده عليه 30 درجه ، اسبوع او اتنين بالكتير ويبدأ امتحان الفاينل وده الامتحان اللى فى اخر الترم خالص ب 60 درجة ، بس ال 30 درجه بتوع العملى بالنسبه للرياضه لانها ملهاش عملى بيبقى فيه ميدتيرم تانى ب 20 درجه و10 درجات على الكويزات (امتحانات صغيرة بتتعمل فى السكشن).

( صورة 1 ) فيها المواد اللى لازم تختارها عشان تدخل القسم

( صورة 2 ) جميع مدرجات ومعامل الكلية ولازم تبقي معاك لحد ماتتخرج

( صورة 3 ) خريطة الكلية جوه الجامعة المبانى المظلله دى كلها تبع كلية العلوم

( صورة 4 و 5 ) دى شروط كل قسم عشان تدخله

( صورة 4 و 5 ) دى شروط كل قسم عشان تدخله

الشروط الجديده للقبول بالاقسام لعام 2017

الشروط الجديده للقبول بالاقسام لعام 2017

الموقع الرسمي للكلية :

رابط الموقع

 

علوم الاسكندريه  

علوم الاسكندريه

 نشأت كلية العلوم الاسكندريه عام 1942، وكانت من أولى الكليات التي تضمنتها جامعة الإسكندرية تضم تسعة أقسام موزعة على مباني الكلية هى ( الكيمياء - الكيمياء الحيويه - الرياضيات - الطبيعة - الجيولوجيا - علم النبات - علم الحيوان - علوم البيئة - علوم البحار).

شعب الكلية: 

1. بيولوجي 
2. جيولوجي 
3. علوم طبيعية 

شعب الكلية ببتقسم كالاتى

لطلبة علمي علوم: بيولوجي وجيولوجيا بتختارواحدة منهم وانت بتقدم

لطلبة علمي رياضة: علوم طبيعية وجيولوجيا بتختار واحدة منهم وانت بتقدم بردو

نيجي بقي للتخصص دة بيعتمد على تقديرك فى سنة اولي ولازم تكون كملت 30 ساعة معتمدة عشان تتخصص و35 ساعة عشان تخش تانية وعلي حسب شعبتك يعني لو انت:

1. بيولوجي ليك تتخصص: كيميا ، كيميا حيوي ، ميكروبيولوجي ، علوم بيئة ، حيوان ، نبات ، حشرات ، علوم بحار.

2. علوم طبيعية ليك تتخصص: كيمياء ، فيزياء ، فيزياء حيوي ، رياضة ، احصاء ، علوم حاسب ، علوم بحار فيزيائية.

3. جيولوجيا بيبقي ليك: كيميا اوجيولوجيا او جيوفيزيا

خلي بالك لو انت هتفكر في ( كيميا حيوي او ميكرو بيولوجي) لازم يبقي تقديرك جيد جدا

اما لو انت عايز كيمياء يبقي لازم تنجح في مادة الكيمياء العضوية ودي هتاخدها التيرم التاني ودي بتبقي اختياري يعني لو مش عايز كيميا متاخدهاش اما باقي الاقسام دي بتخشها باي تقدير عادي يعني خلاص اتخصصت رئيسي اول ما تخلص تانية بنتخصص فرعي ودة عشان يبقي معاك تخصصين فيزودا فرصك في الشغل والمواد اللي بتاخدها بتتقسم 70% عالرئيسي و30%عالفرعي يعني مثلا لو انت كيميا رئيسي ممكن تاخد كيميا حيوي او ميكرو او بيئة فرعي وتقدر تشتغل بالرئيسي وبالفرعي وهكذا

ملاحظة: أنه لا يزال “التقنية الحيوية” مغلقًا بسب الإمكانيات المحدودة للقسم لتحقيق الاكتفاء لطلبة التخصص الرئيسي.

الاقسام الخاصة: ودول قسمين عندنا بمصاريف 11000 جنية في السنة

1. الميكروبيولوجي الصناعية والكيميا التطبيقية ( Imac ).

2. جيولوجيا البترول.

ايه الفرق بين IMAC واني اتخصص كيميا رئيسي ميكرو فرعي اوالعكس ؟

هقولك ياسيدي في الـ IMAC هتاخد 50% كيميا و 50% ميكرو اما في العادي هيبقي 70% رئيسي و30% فرعي ، فرق بسيط فى الدراسة لكن فى الاخر ليهم نفس الشغل بعد التخرج.

مشكلة علوم اسكندرية ان ليها 4 مباني في مناطق مختلفة: 

 مبنى محرم بك: 

يشمل المقر الرئيسي للكلية ، ويدرس به طلاب السنوات النهائية لبعض التخصصات، ويضم المبنى المعامل التابعة لأقسام الرياضيات والطبيعة والجيولوجيا وعلم النبات وعلم الحيوان و علوم البيئة والكيمياء الحيوية.

مبنى الشاطبى: 

يقع بشارع أفلاطون ويحوي المباني التي أنشئت في بداية الستينات، ويخصص المبنى لدراسة السنوات الأولى والإعداديات، ويضم وحدة الحاسب الآلي و وحدة الميكروسكوب الإلكتروني.

مبنى طريق الحرية: 

يقع بطريق الحرية، ويضم قاعات للمحاضرات والمعامل التابعة لقسم الكيمياء، ويدرس بالمبنى جميع طلاب قسم الكيمياء.

مبنى الأنفوشي: 

يطل على الميناء الشرقي بجوار نادى اليخت، ويضم قاعات المحاضرات والمعامل التابعة لقسم علوم البحار.

هيجي عليك ايام هيبقى عندك هنا محاضرة و بعدين هناك سكشن و بعدين محاضرة في نفس المكان .. فتفضل بقى رايح جاي يا بطل و فلوسك تخلص على المشاريع  بس دي بالوقت هتتعود عليها.

بالإضافة إلى أن قسم الجيولوجيا يقوم بطرح مجلة كل شهر تابعة لإحدى الجمعيات الجيولوجية التابعة لمؤسسة أمريكية تسمى (الجمعية الأمريكية لجيولوجيين البترول بالإسكندرية)، وترجمتها The American Association of Petroleum Geologist.

أبرز خريجي الكلية:

    الاستاذ الدكتور احمد زويل الحاصل على جائزة نوبل للكيمياء

    الاستاذ الدكتور يوسف عز الدين عيسى الروائي الشهير

    الأستاذ الدكتورعصــام خميس إبراهيم نائب وزير التعليم العالي والبحث العلمي للبحث العلمي.

 الموقع الرسمي للكلية :

رابط الموقع

علوم طنطا

علوم طنطا

 تم إنشاء كلية العلوم بجامعه طنطا عام 1969 والتي كانت فى ذلك الوقت تابعة لجامعة الإسكندرية واستقلت عن جامعة الإسكندرية عام 1972 وحصلت على الاعتماد عام 2015-2016 وتعمل بنظام الساعات المعتمده.

تتكون من  3 شعب يتم التشعيب فيها من سنه أولى كالتالى:

• علوم طبيعية "علمى رياضه"
• بيولوجى وجيولوجيا " علمى علوم"

ومتاح لك تسجيل 18 ساعة معتمدة في الفصل الدراسي الاول والثاني .

التشعيب النهائى يتمفى سنه تانيه كالتالى:

 يجيب ان تجتاز 20 ساعة لتنتقل للمستوي الثاني .

( علوم طبيعيه ) : كيمياء ، علوم حاسب ، علوم مواد ، فيزيا ، احصاء ، رياضه

( جيولوجيا ) : كيميا جيولوجيا ، جيوفيزيا ، جيولوجيا خاص

( بيولوجى ) : كيمياء / كيمياء حيوي ، كيمياء حيوي ، كيمياء / ميكرو ، ميكرو ، كيمياء / نبات ، كيمياء / حيوان ، كيمياء / حشرات ، حيوان ، حشرات ، نبات ، فيزيا حيوي

الدخول للاقسام على حسب التقديرات

بالنسبة للأقسام الخاصة : 

في قسم جيولوجيا التعدين والبترول بمصروفات لطلاب علمى علوم وعلمى رياضة وتم افتتاحه سنه 2016 ، وفى الحقيقة احنا مش بننصح بالاقسام الخاصة :

--------------------( ليه مش بننصح بالاقسام الخاصة )-------------------

فى البداية برنامج البترول انشا برعاية شركات البترول وكان بيقدم فى خدمات مميزة للطلبة عن الاقسام العادية مثل الاتى:

(1) شركات الراعية بتدرب الطلبة عندها من سنة اولى وكل سنة حتى التخرج.

(2) بتطورلهم فى المناهج بحسب ما تراه مناسبا لسوق العمل.

(3) بتحطلهم كورسات انجلش من المعهد البريطاني.

(4) وجود مبني خاص للقسم ومعامل ومدرجات واجهزة حديثة خاصة للقسم.

وكل ده عشان الطلبة تكون مميزة عن غيرهم ويتخرجوا يكونوا مؤهلين لسوق العمل ويشتغل اغلبهم فى شركات البترول الراعية للقسم حسب العقد

وعلى الاساس ده القسم كان خاص ومميز ، وعلى اساس ده بردو الطلبة كانت بتدفع الفلوس للقسم عشان اول ماتتخرج تكون مؤهله للشغل اكتر من اى قسم وضامنه انها تشتغل فى شركات البترول دى

دلوقتى الوضع مختلف تماما ، كل الشركات الراعية مشيت نظرا لتدني مستوى القسم وكل المميزات دى راحت وتحول القسم من قسم خاص ومميز لقسم خاص فقط ، بقى القسم عادى زيه زي اى قسم تانى وفضلت الفلوس اللى بيدفعها الطالب لا مش بس كدا والفلوس دي  10 الف جنية + 10% زيادة كل سنة ، يعني اكتر من النص من غير خدمة او ميزة واحدة اضافية للطالب الدارس فى القسم عن الداراس فى القسم العادى

فالخلاصة ان قسم بترول مش حلو لانه بفلوس من غير اى ميزه ، لانك بتدرس مواد جيولوجيا وجيوفيزيا وبتشتغل نفس شغل اقسام جيولوجيا وجيوفيزيا وكيميا جيولوجيا فى الاخر ، يبقي ادخل قسم جيولوجيا او جيوفيزيا او كيميا جيولوجيا من الاول ووفر فلوسك!!

- طيب امال ايه لازمة الفلوس دلوقتى؟

مفيش ميزة واحدة بتاخدها ادام الفلوس اللى بتدفعها ، بتدرس مواد عادى جدا زيك زي اي قسم بس كدا

- هتقولى طيب مش بيدربونى فى سنة تالتة حتى ؟

هقولك اى قسم فى الكلية طلابه مينفعش يتخرجوا الا لما يدربوهم ، كل قسم ع حسب مكان التدريب ، يعني اقسام جيوفيزيا وجيولوجيا بيدربوا فى شركات البترول ، واقسام الكيمياء بتتدرب فى شركات الادوية وغيرها ، وده فى لايحة الكلية ، فميهاش ميزة لبترول او بيوتكنولوجى عن اى قسم تانى في الكلية

نفس الكلام لقسم بيوتكنولوجى بيدرس مواد من اقسام كيميا حيوي وميكروبيولوجي وحيوان وفى اختلاف فى بعضها وبيشتغلوا نفس مجالات الشغل فى الاخر!! اللهم الا لو مقرر انك هتشتغل بره مصر فليهم شغل تانى

فتخيل انت هتدفع اكتر من 50 الف جنية فى الكلية عشان فى الاخر تخرج تشتغل نفس شغل خريج قسم مدفعش فى حاجة!! وممكن لو القدر حكم تلاقى معاك فى نفس الشركة وبيشتغل نفس شغلك ساعتها هتتحسر ع الفلوس اللى دفعتها من غير لازمة !!! الا لو انت دافعها عشان حابب العلم وعايز تتعلم العلم ده

ملحوظة: لما تدخل بترول او بيوتكنولوجى هيقال دى اجهزة جايبنها بفلوسك 

*باقى اقسام الكلية شغالين على اجهزة من فلوس الحكومة وانت الوحيد اللى بتجيب اجهزة بفلوسك

*فباقى الاقسام بيتجبلها اجهزة للمعامل دي وظيفة الكلية مش وظيفة الطلبة انها تجيب اجهزة للمعامل 

خلاصة الكلام ده كله ان الاقسام الخاصة مش مميزة عن الاقسام الاخرى لانها بتدرس مواد مشتركة وبعض المقررات المختلفة ، وبعد التخرج بتشتغل نفس شغل الاقسام الاخرى فى النهاية.

------------------------( انتهى )--------------------------

وشروط الاقسام تكون علي حسب تقدير اول سنه وفى التشعيب وانت لسه داخل اللي علمي رياضه بيدخل علوم طبيعية وعلمي علوم بيدخل بيولوجي وجيولوجيا وبتعتمد علي مجموع الثانويه والاحياء و بيكون في تنسيق داخلي و بيولوجي هي اللي بتاخد من المجموع الأعلى

وتقدر تحول من بيولوجي لـ جيولوجيا من غير اي شروط لكن العكس بيكون صعب الا لو في اماكن متوفرة و اقل من الحد الأدنى بنص درجة.

الموقع الرسمي لكلية العلوم جامعة طنطا: 

رابط الموقع

علوم المنصوره

علوم المنصوره

تم تأسيس كلية العلوم جامعة المنصورة عام 1969 حيث ضمت الكلية ستة أقسام أكاديمية هي الكيمياء – الفيزياء – الرياضيات – علم الحيوان – علم النبات و الجيولوجيا وأخذت الجودة ونظام الدراسه فيها هو الساعات المعتمده.

بالنسبه لدخول الاقسام

التخصص من سنه اولى على حسب مجموعك فى الثانويه العامه بنكتب 3 رغبات اقسام و الكليه بتنزل تنسيق و إن شاء الله كل واحد يدخل القسم اللى بيحبه و ياريت و إحنا بنكتب رغبات نكتب اللى كل واحد حاسس إنه هيمشى فيه مش مجموعى عالى و اختار القسم اللى واخد مجموع عالى و خلاص.

بالنسبة للمجموع يدخلنى ايه : 

فقسم كيمياء حيوي أعلى قسم وبعده ميكروبيولوجي وبعدين كيميا خاص ثم كيميا وحيوان وكيميا ونبات وبعدين ف الآخر علوم بيئة.

بالنسبه لطلبة علمى علوم لهم: 

( كيمياء حيوى - كيمياء حيوان - كيمياء نبات - كيمياء إسبيشيل ، ميكروبيولوجي ، جيولوجيا وعلوم البيئة ، جيوفيزياء ، بترول )

طلبة علمى رياضه لهم: 

(فيزياء حيوى ، فيزياء اسبيشيل ، الرياضه ، قسم الحاسب ، قسم جيوفيزياء ، جيولوجيا وعلوم البيئة ، بترول )

الأقسام الخاصة: 

(بترول - بتروكيماويات - بيوتكنولوجي ) ،لا تخضع للتنسيق الداخلي ، يكتفي بالحصول علي الحد الادني للقبول بكلية علوم.

الموقع الرسمي لكلية العلوم جامعة المنصورة :

رابط الموقع

علوم سوهاج

علوم سوهاج

كليه العلوم جامعه سوهاج تأسست عام ١٩٧٥ وتعمل نظام الدراسه فيها هو  نظام ترمين عادي مش ساعات معتمدة على الرغم انها كليه معتمده لكن الساعات المعتمده مش شغال فيها .

 

التخصص الفعلي بيبقي من سنه تالتة لكن في أولي بتختار من 3 حاجات زي شعب كده على اساساها بتدخل القسم .

  

((احنا عندنا 3 شعب رئيسية)) :

1. (علوم طبيعه) ودا بتتخصص فيه فى سنه تالته وفيه 3 أقسام: كيميا خاصة أو فيزيا أو رياضه

ودا غالبا المتاح الوحيد لطلاب علمى رياضه

2. (علوم بيولوجيه) وده بتتخصص فى سنه تالته وفيه 4 أقسام: ميكروبيولوجى وكيميا أو حيوان أو نبات.

3. (جيولوجيا) وده التخصص برضو فى سنه تالته وفيه 3 أقسام: جيولوجيا خاصة - جيوفيزيا - جيوليوجيا كيمياء ، مع العلم ان طالب علمى علوم لو جايب مجموع اى قسم يخشه براحته

طالب علمي علوم بيدخل اي قسم من الثلاثه الرئيسين لكن طالب علمي رياضه ممكن يدخل (علوم طبيعيه او جيولوجيا فقط) ودخول التخصص بالتقدير بتاع اولى وتانيه.

 الموقع الالكترونى للكليه 

رابط الموقع

علوم بورسعيد

علوم بورسعيد

جامعة بورسعيد هي احدى الجامعات الحكومية المصرية، انشئت الجامعة بقرار رئيس الجمهورية يوم 24/2/2010 بتحويل فرع جامعة قناة السويس بمدينة بورسعيد إلى جامعة مستقلة والكليه بتشتغل بنظام الساعات المعتمده .

علوم بورسعيد مفيش فرق بين علمي علوم وعلمي رياضه يعني طالب علمي علوم من حقه يدخل أقسام رياضه والعكس صحيح ود بسبب إن المستوى الأول بيكون عام والتخصص بيكون من المستوى التاني فيكون الطالب درس كل المواد وقدر إنه يختار القسم اللي هو بيحبها واللي هو شايف إنه هيقدر يمشي فيها.

بم ان الكليه بتعمل بنظام الساعات المعتمده أذا يتم تعريف الكورسات و المواد الدراسية التى تدرس بالكلية الى عدد ساعات معينة ، بمعنى أن كل مادة تكافئ عدد ساعات معينة ، فعلى سبيل المثال كورس "مملكه نباتيه" يكافئ ساعتين , و كورس "كهربيه ومغناطيسيه" يكافئ 3 ساعات.

و يسمح للطالب بأختيار الكورسات التى يدرسها خلال كل ترم و لكن بحد أدنى 15 ساعة و حد اقصى 25 ساعة بمعنى ألا يقل مجموع الساعات التى اختار الطالب المواد التى تكافئها عن 15 ساعة و الا تزيد عن 25 ساعة فى الترم الواحد. مثال لذلك اذا اختار الطالب كورس (1) = 2 ساعة ، وكورس (2) = 3 ساعات ، و كورس(3) = 4 ساعات ، يجمع ما اختاره الطالب و يجب ألا يقل المجموع عن 15 و ألا يزيد عن 25 ساعة.

بالطبع ليس للطالب الحرية المطلقة فمثلا لا يجوز ان يختار الطالب كورس " اناتومي " ، و هو لم يدرس مملكه حيونيه ، و هذا منطقى .

و معنى ذلك ان لكل مادة متطلبات تسجيل و متطلبات التسجيل هى الكورسات التى يجب أن تدرس قبل تسجيل كورس ما. حيث يكتب أمام كل كورس فى خانة متطلبات التسجيل (فى دليل الطالب) الكورسات التى يجب ان يدرسها الطالب قبل دراسة ذلك الكورس فى صورة اكواد، فلكل كورس رقم كودى، فمثلا، كورس "كيمياء عضويه" Ch142 و "الكيمياء الغيرعضويه والتحليليه" رقم كودى Ch121، فاذا كان هناك كورس ما له متطلبات تسجيل "كيمياء عضويه"، يكتب أمام ذلك الكورس فى خانة متطلبات التسجيل(فى دليل الطالب) كود Ch121.

يوجد لكل مجموعة من الطلبة مشرف اكاديمى مسئول عنهم و عن تسجيلهم للمواد و المشرف الأكاديمى هو عضو هئية تدريس بالكلية يقوم بتسجيل اختيار الطلبة للكورسات فى بداية كل ترم.

يتم الأعلان بقوائم تعلق غالبا بجوار شئون الطلبة فى تلك القوائم مكتوب أسم مشرف اكاديمى فى اعلاها، و تحته أسماء الطلبة الذى يقوم سيادته بالاشراف عليهم، و بعد أن يعرف كل طالب أسم المشرف الأكاديمى الذى يتبعه، عليه أن يتوجه اليه فى مقر مكتبه ليقوم بتسجيل المواد لديه 

طب الدراسه ايه بقي في المستوي الاول : 

دول بقي كلهم ياسيدي المواد الاجباري: بص يا سيدي بندرس حيوان ونبات وفيزياء بفروعها (حرارة_خواص مادة _مغناطيسية) وكيمياء بفروعها ( عضوية غبرعضوية فيزيائية) لغة (انجليزي) و رياضة (جبر وتفاضل)

نيجي بقي للمواد الاختياري: مواد مؤهلة لاقسام معينة في الكلية ( احصاء ، جيولوجيا ، تاريخ علوم)

بالنسبه لأقسام الكليه فهما 10 أقسام + قسم رياضه لسه مفتوح جديد

1. الكيمياء الصناعيه و التطبيقيه

ويدرس فيها المواد الصناعيه مباشره وبعض المؤثرات والعلاقات فى الصناعه ومن هنا تجد ان الكيمياء هى من اهم متطلبات سوق العمل لانها تدخل كل المجالات لذلك قامت الكثير من كليات العلوم بوضع التخصص المذدوج مع اى فرع اخر يعنى التخصص ومعاه الكمياء

2. الكيمياء الحيوية

وتدرس فيها جميع التفاعلات الخاصه بالكائن الحى وخصوصا جسم الانسان وهو من اقوى الفروع فى الكمياء وتفتح مجالات عمل للمتخصصين فيها مثل التحاليل والادويه والكمياء الطبيه

ومفهوم الكيمياء الحيويه يخرج منه الكثير من التخصصات الحديثه الجديده اللى كانت غير معروفه فى السابق مثل تخصص البيوتكنولوجى (التكنولوجيا الحيويه ) وهو التخصص المختص

بدراسه الكمياء الحيويه فى التطوير والتكنولجيا مثل تطبيقات DNA وتخصص الكمياء الاكلينيكه ( السريريه ) وهو علم الكمياء المسئول عن تشخيص الامراض وظائف الجسم المختلفه من كلى وكبد وقلب ودهون ومعادن وبذلك اصبح المفتاح او الحل السحرى لمن لم يستطيع ان يلتحق بكليات الطب البشرى ان يلتحق بكليه العلوم ويقوم بدراسه تخصصات التحاليل الطبيه عن طريق دبلومات وماجستير ( دراسات عليا )ويصبح اخصائى تحاليل طبيه

3. البيوتكنولوجى

تدرس فيه كل مايخص الحيوان والطفيليات من تشريح ومناعه وفسيولجى وسلوك وتقسيم و وراثه وعلم دم وأجنه وغيرهم ويختص ايضا بامراض الدم للتحاليل وغيره طبعا قسم ابحاث ومواد بحثيه

4. الميكروبيولوجي

ويختص بدراسه كل مايتعلق بالنبات من تشريح ومناعه وفسيولجى وسلوك وتقسيم و وراثه وغيرهم ويختص ايضا بدراسه الفيروسات وده مهم جدا زى الكمياء الحيوى ويختص بدراسه الكائنات الدقيقه

وطبعا لاننسى ان كل من هذه التخصصات مذوج مع الكمياء حتى يسهل وجود فرصه عمل

5. الفيزياء التطبيقيه

قسم خاص بالتجارب والقوانين والعلاقات الرياضيه والدوائر الكهربائيه

6. الرياضيات وعلوم الإحصاء

طبعا هو واضح من إسمه إنه بيختص بدراسة الإحصاء والتمثيل البياني واعتقد إنه بيكون مطلوب في أي شركه أو مؤسسه حكوميه أو حتى خاصه

7. تكنولوجيا المعلومات وعلوم الحاسب

وهوقسم مهم جدا ومطلوب في سوق العمل تقريبا جميع الشركات بتستخدم الكمبيوتر (يعنى فى فرصة كبيرة لخريجى القسم للعمل فيها) حتى شركات البترول بتاخد منها ممكن الواحد يشتغل فى السكرتارية لاى مكتب من مكاتب التوظيف محاماة مثلا وغيرة سنترالات المدارس"مدرس كمبيوتراو رياضة " وحاجات تانى كتير باختصار اى مكان بيستخدم الكمبيوتر يقدر يشتغل فية خريجى القسم

8. إدارة البيئه والرصد البيئي

ده قسم بيدرس اي حاجة ليها علاقة بالبيئة وعلوم الارض وزي الفلك وعلوم الفضاء

9. جيولوجيا البترول والغاز الطبيعي

هو قسم يختص بدراسه سطح الارض والتنقيب عن الغاز البترولي والمياه

10. علوم البحار

ده طبعا يختص بكل ما هو في البحار والمحيطات والأنهار من ثروه سمكيه وغيرها

11. رياضة

القسم ده لسه مفتوح من سنة 2016

الموقع الالكترونى للكليه:

رابط الموقع

علوم جنوب الوادى "قنا"

علوم جنوب الوادى "قنا"

تشمل كلية العلوم علوم جنوب الوادى بقنا الأقسام التالية (قسم الجيولوجيا - قسم الكيمياء - قسم الرياضيات - قسم الفيزياء - قسم النبات - قسم علم الحيوان).

  

هناك تخصص فى سنه أولى كالتالى

1- طلبة علمي علوم : 

بتتخصص بيولوجي او جيولوجي ، وبعد كدا بتتخصص اكتر في سنة تالتة.

2- طلبة علمي رياضة: 

بتدخل علوم طبيعية و فيزيائية ، بتتخصص اكتر من سنة تانية في كيمياء سبيشيل ، رياضة ، فيزيا.

هناك تخصص فى سنه تانيه كالتالى

1. ( بيولوجي ) : 

كيميا / ميكروبيولوجي ، كيميا / حيوان ، كيميا / نبات ، حيوان منفرد ، نبات منفرد - حشرات سبيشيل ، كيميا اسبيشال وشرط اجيب جيد جدا فى الكيمياء ترم اول وتانى.

2. ( جيولوجيا ) : 

جيولوجيا اسبيشيل وجيوفيزيا وجيولوجيا وكيميا مزدوج

جيولوجيا من علوم ورياضه.

3. ( علوم فيزيائيه ): 

فى تشعبين تشعب فى تانيه قسم رياضه / فيزياء ، قسم كيميا / فيزياء.

فى سنه ثالثه التشعب بيكون كالتالى

1. قسم كيماء وفيزياء بيتشعبوا كيمياء اسبيشل وفيزياء عامه وفيزياء تطبيقيه

2.قسم فيزياء ورياضه التشعب بتاعهم بيكون رياضه - حاسب الى – فيزياء و كيمياء - فيزياء الكترونات

ملحوظه: بتقدر تحول من قسم لقسم بس تكون جايب تقدير.

الموقع الالكترونى للكليه:

رابط الموقع

علوم اسوان

علوم اسوان

 

أنشئت كلية العلوم بأسوان ضمن فرع جامعة أسيوط بأسوان سنة ١٩٧٥ وتعمل بنظام قديم وليس ساعات معتمدة.

 

سنة اولى بيختاروا ما بين اربع رغبات هم: 

((علوم طبيعية ، بيولوجية ، بيئية ، جيولوجيا))

علمي علوم متاح ليهم: علوم طبيعية وجيولوجيا وبيولوجي وبيئة

علمي رياضة متاح ليهم: علوم طبيعية وجيولوجيا

بالنسبة لدخول الاقسام بيبقى بدرجات المواد غالبا يعني علوم طبيعية بناء على درجة الكيمياء .. وبيولوجي يبقى الأحياء وجيولوجيا الجيولوجيا يبقى الأحياء وجيولوجيا

( علوم طبيعية ):

سنة اولى: بتدرس مواد الكيمياء والرياضيات والفيزياء

سنة تانية: تتفرع ما بين قسمين فيزياء ورياضيات أو فيزياء وكيمياء

سنة ثالثة: بتوع فيزياء وكيمياء بيكملوا في قسم كيمياء سبيشيال ، اما فيزياء ورياضة بيتفرعوا لاقسام فيزياء او رياضة او حاسب

( علوم بيولوجي ):

اولى وتانية الدراسة بيولوجي عامة وبيتفرعوا في سنة 3 ((كيمياء حيوان وكيمياء نبات وكيمياء ميكرو وحيوان سبيشيال ونبات سبيشيال))

( علوم بيئية ) : 

فرصة التميز فيه كويسة لان عددهم قليل

( جيولوجيا ) :

في سنة ثالثة بيتفرعوا ((جيوفيزياء وجيولوجيا سبيشيال وجيولوجيا وكيمياء))

بالنسبة للتدريب الكلية بتدينا جوابات في سنة 2 اختياري وفي 3 اجباري والأماكن احنا اللي بنختارها

الموقع الالكترونى للكليه:

رابط الموقع

علوم بنى سويف

علوم بنى سويف

 

تأسست كلية العلوم بني سويف سنة 1984 وكانت تتبع جامعة القاهرة كفرع لها ببني سويف حتى استقلت سنة 2005 وتشتمل على اربعة مدرجات كبيرة (سعة 500 طالب) و7 قاعات تدريسية 20 معمل طلابي موزع علي الاقسام العلمية المختلفة  وقاعة للسيمنار ومبني اداري و اخر للمخازن ومبني الفيزياء و معمل مركزي ونظام التدريس فى الكليه نظام ساعات معتمدة.

عندنا 4 اقسام في سنة اولي

1. بيولوجى كيمياء
2. كيمياء / فيزياء
3. جيولوجيا كيمياء.
4. رياضه فيزياء

بالنسبه لطالب علمى علوم بيدخل اول 3 شعب: 

بيولوجى ، كيمياء فيزيا ، جيولوجيا كيمياء . ومترتبين حسب المجموع اعلاهم بيولوجي كيمياء واقلهم جيولوجيا كيمياء

اما بالنسبه لعلمى رياضه 

قسم واحد بس وهو رياضه فيزياء بس اتحاد طلاب الكليه بيتدخلوا منعا لظلم طلبه رياضه وبيدخلوا اول 20او15طالب من علمى رياضه ع حسب المجموع قسم كيميا فيزيا وال15 التانيين ف المجموع بيدخلوا جيولوجيا كيمياء والباقى بيكمل رياضه فيزياء..

التخصص النهائي من سنة تانية

(قسم بيولوجي كيمياء ) فيه 3 اقسام :

كيميا / كيميا حيوي وده شروطه جيد جدا ترم اول

كيميا / حيوان و كيمياء / نبات شروطهم النجاح في مادة التخصص وهي ياما الحيوان أو النبات أو جيد جدا ترم تاني في مادة الكيميا وبأقصي حد 50 طالب.  

( قسم كيمياء فيزياء ) بينقسم لقمسين :

1. كيميا خاص وده نفس شروط كيميا كيميا حيوي

2. كيميا فيزيا وده اللي ربنا موفقوش في كيميا خاص بيدخل كيميا فيزيا :D

( قسم كيميا جيولوجيا ) بينقسم لقمسين :

1. جيولوجيا خاص وده شروطه انك تكون جايب جيد جدا جيولوجيا ترم اول وترم تاني

2. جيولوجيا كيميا

( قسم رياضه فيزيا ) وبينقسم إلى: 

فيزياء خاص ورياضة خاص وفيزيا /رياضة وعلوم حاسب

توزع مبانيها كالآتي:

(1) مبني الاساسي للكلية وهو اربع ادوار ويشمل اقسام الكلية والادارة العليا و المعامل

(2) مبني الاداري (1) ويشمل مخازن الكلية

(3) مبني اداري (2) ويشمل بعض الادارات و المعمل المركزي

(4) مبني اداري (3) ويشمل باقي الادارات مع معمل ICDL

(5) مبني وحدة النانو تكنولوجي

(6) مبني قسم الفيزياء

الموقع الالكترونى للكليه:

رابط الموقع

علوم دمياط

علوم دمياط

 موقع الكلية: دمياط الجديدة شارع الصعيدي بجوار مركز المدينة

الكلية بنظام اللائحة القديمة مش ساعات معتمدة ولكن بعد ما اخدنا الاعتماد السنة دى الادارة قالت ان الساعات هيتطبق قريب ممكن من اول الدفعة دي او اللي بعدها

( الاقسام المتاحة لعلمي علوم )

( الاختيار الاول )

أولى وتانية بيدرس بيولوجي ، بعد كدا (كيميا حيوي أو حيوان أو نبات أو ميكرو أو حيوان وكيمياء

أو نبات وكيميا أو حشرات).

( الاختيار التاني )

أولى بيولوجي ، تانية جيولوجيا ، تالتة (جيولوجيا أو جيولوجيا وكيميا *مش جيوكيميا*).

(اقسام علمي رياضة *طبيعة* )

- أولى علوم طبيعية : تانية كيميا وفيزيا ، كيميا خاص ، كيميا وفيزيا

- أولى علوم طبيعية : تانية رياضة وفيزيا ، بعد كدا بتتخص فى: رياضة ، فيزيا ، رياضة وحاسب ، احصاء وحاسب ، فيزيا وحاسب

- أولى وتانية وتالتة بتدرس علوم بيئة بعد كدا بتدرس بحار

نظام الدرجات النجاح في المادة من %60 ، وفي 63 درجة رفع في السنة عالترمين

في المادة العملية الرفع من %50 ، والمادة النظري الرفع من %45 ، اللي بيشيل 3 مواد بيسقط.

الامتحان عليه 90 في المية من الدرجة واعمال السنة بالحضور بالشيتات بالميدترمات عليها

الامتحانات 10% بس ، العملي غالبا زى النظرى

- الدراسة في اولى انجليزى ماعدا الفيزياء و الجيولوجيا ، بعد كدا التخصص كله انجليزي.

علوم كفر الشيخ

علوم كفر الشيخ

كلية العلوم  جامعة كفر الشيخ هى كليه حديثه الانشاء تم إنشائها بتاريخ 22/4/ 2009 وتحتوى على الأقسام التالية (قسم الرياضيات -- قسم الفيزياء -- قسم الكيمياء -- قسم علم الحيوان -- قسم علم النبات -- قسم  الجيولوجيا) وقد انتقل الي العمل بالكلية جميع اعضاء هيئة التدريس والمدرسين المساعدين والمعيدين الذين كانوا يعملون بالأقسام العلمية بكلية التربية بكفر الشيخ وبتعمل بنظام الساعات المعتمده.

 

التخصص بيكون من سنه اولي

كل اقسام الكلية اسبيشيل وهما 6 اقسام:

1. كيمياء
2. فيزياء
3. نبات
4. حيوان
5. رياضيات
6. جيولوجيا
7. والسنه دي الادارة هتضيف عليهم قسم جديد وهو (كيمياء حيوي).

القبول في الاقسام كلها بالمجموع الكلي في ثانوي ما عدا قسم كيميا عشان عليه اقبال فبيعتمد على درجة الكيمياء ولازم عشان تدخله تكون جايب اكتر من 58 درجه في ثانوي.

- درجه كل ماده بتكون من 100 درجه والنجاح بيكون من 60 .

- وبيتقسموا (( 70 نظرى و 20 عملى و5 شفوى و5 ميد تيرم)).

الموقع الالكترونى للكليه:

رابط الموقع

علوم المنوفيه

علوم المنوفيه

أنشأت كلية العلوم جامعة المنوفية (بشبين الكوم) بتاريخ 16/11/1977 م بالمبنى الملحق بالمدرسة الثانوية الصناعية وكان بها 3 أقسام فقط (الكيمياء – الطبيعة – البيولوجي) وفي العام التالي بدأت الدراسة بألاقسام دى (الجيولوجيا – الرياضيات) أيضا وتم نقل الكلية الي المبنى الجديد بمجمع الكليات 1988-1989 و الكلية تطبيق نظام الساعات المعتمدة.

 

اقسام طلبة علمى رياضة بالترتيب حسب تقديرات الكلية للدرجات:

1 - الرياضيات البحتة وعلوم الحاسب ( ودا بيعتبر اعلي قسم في شعبة رياضة )

2 - الفيزياء وعلوم الحاسب

3 - الجيوفيزياء (القسم دا بياخد من بتوع رياضة وبتوع علوم)

4 - الفيزياء

5 - الرياضيات البحتة

6 - فيزياء وعلوم الليزر

التخصص بيكون من سنه اولى و حسب درجه الكيمياء ف ثانويه عامه وبيكون اعلى قسم كمياء و بعد كدا كمياء و ميكرو على حسب التنسيق الداخلى للكليه.

بيتعمل تنسيق داخلي حسب درجات الرياضة بتاعتك والفيزيا ، وبتكتب الاقسام الي عايز تخشها والكلية بتختارلك قسمك حسب التنسيق الي هما عاملينه.

اقسام علمي علوم حسب الترتيب:

1. كيمياء اسبيشيال
2. كيمياء وميكروبايولوجي
3. كيمياء وحشرات
4. كيمياء جولوجيا
5. نبات اسبيشيال
6. الكيمياء والفيزيا
7. كيمياء ونبات
8. كيمياء وحيوان
9. الفيزياء وعلوم الليزر
10. علم الحيوان
11. الجولوجيا

بيتعمل برده تنسيق داخلي حسب درجات الكيميا والجولوجيا والفيزيا .... وتكتب الاقسام الي انت عاوز تخشها والكلية بتختارلك قسمك حسب التنسيق الي هما عاملينه

ايه هو بقي النظام الدراسة ؟

عندك في ال 8 تيرمات في ال 4 سنين ، التيرم 18 ساعة حد اقصي ... 12 ساعة حد أدني

طب يعني ايه يعني انا باخد مواد ب 18 ساعة ، يا آخد مواد ب 12 ساعة 😃

طب مثلا انا اخد مواد وشيلت مواد ونجحت في مواد تانية ، بس جيت اشوف تقدير التيرم مثلا لقيته اقل من 60 % ، كدة يبقي انا متراقب ، طيب ايه متراقب دي؟ يعني التيرم الي بعد الي شيلت فى دا مينفعش تاخد اكتر من 12 ساعة اللي هو الحد الادني بتاعك.

موضوع ال 60 % والتقديرات:

انت لما بتاخد المواد وتمتحن فيها والنتيجة بتطلع بتجمع الدرجات وتقسمها علي 1800 الي هو مجموع درجات التيرم ، وبعدها بتضرب في 100 وبكدة بتكون حسبت النسبة المئوية بتاعتك.

 الموقع الالكترونى للكليه:

رابط الموقع

علوم اسيوط

علوم اسيوط

تم انشاء كلية العلوم بجامعة أسيوط سنة 1957م وكان عدد الطلاب الملتحقين بها في ذلك العام 198 طالباً وطالبة وعدد أعضاء هيئة التدريس فيها 13 عضواً وعدد المعيدين اثنين فقط وتخرج من الكلية حتى الآن سبعة وأربعون دفعة بتطبق نظام الساعات المعتمده يعني لازم تاخد 138 ساعه ولازم معدلك يكون اكتر من 2 عشان تتخرج .

 

فى اولي علمي علوم وعلمي رياضه بيدرسوا نفس المواد والتخصص من تانيه.

مواد الفرقه الاولي:

الترم الاول : رياضه 1 ، فيزيا 1 ، كمياء 1 ، لغه 1 ، حقوق انسان

وتختار مادتين من دول : جيولوجيا ، حيوان ، نبات ، حاسب الي

الترم التاني : رياضه 2 ، فيزيا2 ، كمياء 2 ، لغة 2 ( وشرط انك تدرسهم انك تعدي فيهم الترم الاول) وماده ثقافيه وبالاضافه المادتين الباقيين من الترم الاول من دول : جيولوجيا ، حيوان ، نبات ، حاسب الي.

الاقسام المتاحه في الكليه:

1. رياضيات
2. علوم حاسب
3. فيزياء
4. جيولوجيا
5. حيوان
6. جيوفيزياء
7. نبات
8. ميكروبيولوجي
9. كيمياء سبيشيال (عشان تدخله محتاج جيد جداً في اولي وجيد جداً في الكيمياء 2 )
10. حشرات
11. كيمياء / جيولوجيا
12. كيمياء / حيوان
13. كيمياء / ميكروبيولوجي ( جيد كمياء2 وجيد نبات )
14. كيمياء / فيزياء

بالنسبه للتخصصات:

- جميع الاقسام متاحة لطلبة علمي علوم

- علمي رياضه متاح ليه جميع الاقسام ماعدا:

نبات ، ميكرو ، كمياء / ميكرو ، حيوان ، كيمياء / حيوان ، حشرات

- التخصص من سنه تانيه اللى عايز قسم بيدخله ماعدا الاقسام المطلوب فيها تقدير اللى قولناها

الاقسام الخاصه:

- كيمياء صناعيه

- جيولوجيا بترول

ودول بتدخلهم من اولي بس احنا مش بننصح بيهم لان ليهم نفس شغل اقسام جنيرال سواء جيوفيزياء وجيولوجيا او كيميا حيوان وميكرو.

الموقع الالكترونى للكليه

رابط الموقع

موقع التسجيل الالكترونى للطلبه

رابط الموقع

علوم  قناه السويس - الاسماعليه

علوم  قناه السويس - الاسماعليه

أنشئت جامعة قناه السويس عام 1976 وتطبق كلية العلوم جامعة قناه السويس نظام الساعات المعتمدة واخدت الاعتماد السنة دى 2016 ، و دراسة اغلبية المواد باللغة الانجليزية وستصبح جميعها بالانجليزى بعد الحصول على الجوده والاعتماد .

الاقسام:

1. أقسام علمى رياضة: رياضة ، حاسب ، جيوفيزياء
2. أقسام علمى علوم: علم الحيوان ، نبات ، ميكروبيولوجى ، علوم بحار
3. أقسام مشتركه لعلمي علوم ورياضه: كيمياء ، جيولوجيا ، فيزياء ، بترول ومياة (بمصاريف)

- اختيار القسم من اول سنة على حسب مجموع الثانوية زائد ماده متعلقه بالقسم او اتنين

مثلا قسم الكيمياء بيجمعوا مجموع الثانويه + ماده الكيمياء بتاعت 3 ثانوي

قسم الفيزياء مجموع الثانويه + ماده الفيزياء

قسم الجيولوجيا مجموع الثانويه + ماده الجيولوجيا لعلمي علوم وماده الرياضه لعلمي رياضه

قسم الجيوفيزياء مجموع الثانويه + ماده الرياضه والفيزياء

قسم حيوان ونبات وميكرو وبحار مجموع الثانويه + الاحياء

قسم الرياضه والحاسب مجموع الثانويه + الرياضه

-الاولويه لاصحاب المجاميع العاليه في دخول اي قسم

سنة اولى بندرس مواد عامه + ماده او اتنين من القسم

وأظن ان النظام اللى متطبق حاليا بعد الاعتماد هو بيكون القبول في الاقسام عن طريق كتابة رغبات و بيتم عمل تنسيق داخلي وبتظهر نتيجته غالبا اول يوم في الدراسة ، و من هنا يبدأ الطالب في التوجه الي قسمه و يبدأ في التسجيل لمواده .

جامعة قناه السويس

 

 الموقع الرسمي لكلية العلوم جامعة قناه السويس :

رابط الموقع

علوم دمنهور

علوم دمنهور

كليه العلوم جامعه دمنهور كانت تابعه لكليه العلوم جامعه الاسكندريه حتى عام 2013 تقريبا وبعدها اصبحت مستقله وتعمل الكليه بنظام الساعات المعتمده.

  

فى تشعيب بيتم فى سنه اولى كالتالى

- بالنسبه علمى رياضة : متاح لهم اقسام طبيعة

- بالنسبه علمى علوم : متاح لهم اقسام بيولوجي وجيولوجيا

التخصص النهائى بيكون من سنه تانيه على اساس تقديرات سنه اولى كالتالى

اقسام طبيعة:

كيمياء / فيزياء ، رياضة / فيزياء ، فيزياء / رياضة ، رياضه / منفرد

وفي سنة تالتة ممكن تتخصص كيمياء منفرد او فيزياء منفرد

اقسام بيولوجى:

كيمياء حيوي ، كيمياء / ميكروبيولوجى ، كيمياء / حيوان ، نبات / كيمياء ، حيوان / كيمياء ، كيمياء / ميكروبيولوجى.

وفى سنة تالتة ممكن تكمل فى نفس القسم أو تتخص كيمياء منفرد لو جبت أمتياز فى تانيه.

* كيميا منفرد بتبقي من تالته الترم التاني بتقدير فوق ال ٣.٣٣ يعني جيد جدا مرتفع حوالى 80% والتنسيق بيتغير كل سنة.

 الموقع الالكترونى للكليه:

رابط الموقع

علوم بنها

علوم بنها

كلية العلوم جامعة بنها أنشأت فى 1981 وكانت تابعة لجامعة الزقازيق وأصبحت الجامعة مستقله سنة 2005 وتضم الكلية سبعة أقسام علمية هي قسم الرياضيات و قسم الفيزياء و قسم الكيمياء و قسم الجيولوجيا و قسم النبات و قسم علم الحيوان و قسم علم الحشرات وتحتوى على 22 برنامج أكاديمي وتطبيق نظام الساعات المعتمدة وتقوم الكليه بتدريس العلوم الأساسية لمختلف كليات الجامعة من (الحاسبات والمعلومات – التربية - الطب البيطري) .

- بتطبق نظام الساعات المعتمده زى اغلب جامعات الجمهوريه لكن لازم تاخد 140 ساعه ومعدلك يكون اكتر من 2 عشان تتخرج .

- فى اولي علمي علوم وعلمي رياضه بيدرسوا نفس المواد + ماده تخصص.  

- التخصص من اولي علي حسب نتيجك في الثانويه العامه ، لكن دخولك القسم نفسه من سنه ثانيه.

علوم بنها

 

مواد سنه اولي:

الترم الاول : رياضه 1 فيزيا 1 كمياء 1 حاسب 1 لغه 1 - كيمياء تطبيقيه - فيزيا تطبيقيه

وتاخد ماده من دول حسب القسم اللي هتدخله : جيولوجيا ، حيوان ، نبات، حاسب الي - حشرات

الترم التاني : رياضه 2 فيزيا2 كمياء 2 حاسب 2 (شرط عشان تدرسهم انك تعدي فيهم)

وحقوق انسان وتغذيه صحيه

الاقسام المتاحه في الكليه:

- رياضيات

-علوم حاسب

- فيزياء

- جيولوجيا

- حيوان

- جيوفيزياء

- نبات

- ميكروبيولوجي

- كيميا سبيشيال

- حشرات

- كيمياء / جيولوجيا

- كيمياء / حيوان

- كمياء / فيزياء

- جيولوجيا / فيزياء

التخصص:

- جميع الاقسام متاحة لطلبة علمي علوم ماعدا رياضه وعلوم حاسب وفيزيا.

- بالنسبه لعلمي رياضه فمتاح له جميع الاقسام ماعدا نبات ، ميكرو ، كمياء ميكرو ، حيوان ، حيوان وكيمياء ، حشرات.

 

 الموقع الالكترونى للكليه:

رابط الموقع

علوم الزقازيق

علوم الزقازيق

 

تعتبر كلية علوم جامعة الزقازيق من أهم كليات الجامعة وأقدمها وقد أنشئت الكلية عام 1974  وتضم الكلية عدد 7 أقسام  والكلية تقع داخل مقر الجامعه الرئيسي و نظام الكليه هو نظام الساعات المعتمدة.

  

سنه أولى بتكون دراسه عامه والتشعيب بيكون من سنه تانيه وبيتعمل تنسيق داخلي بيعتمد على المعدل التراكمي للطلبه في سنه أولى بيتم كتابه رغبات وبناء عليها التنسيق ، والتدريبات في الكليه متاحه من سنه تالته.

تعديل المسار -:يمكن للطالب بعد نهاية السنة الدراسية الثانية ان يغير تخصصه ، فـ كل قسم يحتوي علي عدة تشعبات و عند التخصص تتشعب باحدي هذه التخصصات ، و تعديل المسار يتيح لك ان تنقل من شعبة لاخري و لكل في نفس القسم .

و يمكنك الاطلاع علي اللائحة المطبقة بالكلية من خلال هذا الرابط

يدرس الطالب 5 مواد  في السنة الأولي و كل مادة تساوي 3 ساعات معتمده ، اي يسجل الطالب 15 ساعة معتمدة للترم ، و تحسب المادة من 100 درجة و يكون التقدير كالتالي :(85 – 100)  امتياز و يعادل (3.5 – 5)  نقاط(75 – 84)  جيد جدا و يعادل ( 2.5 – 3.4) نقاط (65 – 74) جيد و يعادل (1.5 – 2.4) نقاط (60 – 64) مقبول و يعادل (1 – 1.4) نقاط و الطالب الذي يحصل علي أقل من 60 درجة في المادة يكون راسب .

مواد السنة الاولي

الفصل الدراسي الاول

كيمياء عامة (ك101)

مورفولوجي وتشريح نبات (ن101)

مقدمة في الخلية والاجنة و تصنيف الحيوان (ح101)

اساسيات جيولوجيا (ج101)

رياضة عامة (ر105)

الفصل الدراسي الثاني

كيمياء عامة (ك102) ، ولكن يشترط النجاح في مقرر (ك101) اولا

تقسيم المملكة النباتية وفسيولوجي عام (ن102)

مقدمه في علم الانسجة وفسيولوجيا الحيوان (ح102)

اساسيات جيولوجيا (ج102)

فيزياء عامة (ف102)

السنة الـلى فاتت نزلت لايحة جديدة بأقسام أضافيه وجديده مش موجوده في كل الجامعات .

( الأقسام الأساسيه هم 6 أقسام )

1. قسم الكيمياء ويتبعه برامج : كيمياء سبيشيال ، كيمياء / كيمياء حيوي ، كيمياء / علوم حاسب.
2. قسم الفيزياء: فيزيا سبيشيال ، كيميا / فيزيا ، فيزيا / فيزيا حيوية ، فيزيا / علوم حاسب.
3. قسم النبات: نبات ، تقنيه حيويه ، ميكروبيولوجى ، كيمياء / ميكروبيولوجى ، كيمياء / نبات.
4. قسم الحيوان: حيوان، حشرات ، استزراع مائي ، علوم بيئة ، كيمياء/حيوان ، كيمياء/حشرات
5. قسم الرياضة: رياضة ، علوم حاسب ، رياضة/علوم حاسب ، رياضة/احصاء ، رياضة/فيزيا
6. قسم الجيولوجيا: جيولوجيا ، جيوفيزياء ، جيولوجيا البترول والمياه ، كيمياء / جيولوجيا.

اتكلمنا عن المواد الدراسيه و مجالات عمل الأقسام المشتركه في كل الجامعات لكن قسم الاستزراع مش مشترك وجديد 

( مواد قسم الاستزراع المائى) : 

بيولوجى وتصنيف فقاريات ولافقاريات ، كيميا عضويه ، حشرات عام ، كيميا العناصرالانتقالية ، ديناميكا حراريه ، ميكروبيولوجى ، فسيولوجى الحيوان عام ، كيميا المياه ، استزراع وإنتاج الأسماك ، طفيليات وأمراض الأسماك ، تكنولوجيا حيويه.

( مجالات عمل القسم ): 

المزارع السمكية و المراكز البحثية وغيرها.

( مواد قسم البيوتكنولوجى ): 

ميكروبيولوجي عام ، هرمونات نباتيه ، بيولوجى وتصنيف اللافقاريات والحبليات ، كيميا عضويه ، تصنيف زهرى ولا زهرى ، بيولوجى ، حشرات عام ، تكنولوجيا التغذيه ، هندسه وراثيه ، أحماض نوويه ، احصا حيوى ، كيميا العناصر الانتقالية.

( مجالات عمل القسم ) : 

نفس مجالات عمل اقسام حيوي وميكرو وحيوان

والقسم ده موجود بمصاريف خاصة بجامعات اخرى ، لكنه فى الزقازيق والسويس وغيرها بدون مصاريف خاصة

دى صوره تخطيطيه للكليه

 

الموقع الرسمي لكلية العلوم جامعة الزقازيق :

رابط الموقع

علوم عين شمس "بنين"

علوم عين شمس "بنين"

ملحوظه: علوم عين شمس تبدأ تطبيق نظام الساعات المعتمدة بداية من العام الدراسي 2017

 

سنة اولى فيها 4 تخصصات: 

1. جيوفيزياء 
2. جيولوجيا 
3. بيولوجي 
4. طبيعية

(1) جيوفيزيا وجيولوجيا: أي حد ممكن يدخلهم و ليهم تنسيق (بيعتمد على مجموع ثانوي) بياخدو اعلى مجاميع في ثانوية عامة نظرا لأن عدد القسمين بيكون اقل من القسمين التانيين

(2) علوم بيولوجية: لعلمي علوم بس

(3) علوم طبيعية: لعلمي علوم وعلمي رياضة

والقسمين دول بياخدو بالأختيار مش بتنسيق داخلي اللي انت بتختاره بتدخله

كدا خلصنا سنة اولى والحمدلله كانت سنة حلوة بصراحة ..

سنة تانية:

(1) بالنسبة لجيوفيزياء فهم بيفضلو جيوفيزيا على طول (طول الاربع سنين)

(2) بيولوجي: القسم بيدخله علمي علوم

نبدأ بقي من الاول خالص ونتخيل سوا لما تكتب في (ورقة رغباتك) بيولوجى ويجيلك ..

الرحلة هتبتدي في سنة اولى 

هتدخل تاخد في الترم 7 مواد كمبيوتر ولغة وكيمياء (فيزيائية وعضوية وغيرعضوية) ، فيزياء ، رياضة ، نبات ، حيوان ، ميكروبيولوجي ، الفيزياء والرياضة هتدرسهم في سنة اولى ترم اول وتاني ، وفي سنة تانية هتدرس الترم الاول فيزياء والترم التاني رياضة ، وخلاص مش هتشوفهم تاني بعد كده ، سنة تانية هتدرس نفس المواد بتاعة اولى بالاضافة لمادتين جداد الي هما الكيمياء الحيوية والحشرات ، في خلال رحلتك في السنتين الاولى هتكون جمعت قدر كويس من المعلومات عن كل قسم وقدرت تحدد ميولك علشان تبدا رحلة التخصص في السنتين التالتة والرابعة

( الاقسام والتخصصات ) :

وانت داخل سنة تالته هتختار تخصص من 10 تخصص وهما :

الخاص: الميكروبيولوجي ، الكيمياء الحيوية ، النبات ، الحيوان ، الحشرات.

المزدوج: كيمياء/ميكروبيولوجي ، كيمياء/كيمياء حيوي ، كيمياء/نبات ، كيمياء/ حيوان ، كيمياء/حشرات.

قسم فيزيا حيوي (بيوفيزياء): 

ده بتتخصص فيه من تانية بيولوجي و تكمل فيه ده بياخد 10 طلاب بس ، اكتر 3 متميزين من بيولوجى واكتر7 متميزين من علوم طبيعية بحد ادنى جيد جدا ، بتدرس مواد ليها علاقة بالفيزياء والمواد البيولوجية ، الترم الاول هتاخد (نبات ، حيوان ، فيزياء ، فيزياء حيوى ، كيمياء عضوية ، تكامل محدد)

(3) علوم طبيعية:

سنة تانية بالنسبة لك هيكون عندك 4 خيارات: رياضيات ، كيميا ، فيزيا ، كيميا/فيزيا

في حالة انك كيمياء/فيزياء: يبقى هتكمل كدا تالتة ورابعة

رياضيات: فى تخصصات هتكملهم فى تالتة ورابعة احصاء/حاسب ، بحتة حاسب ، بحتة تطبيقية

كيمياء: هتاخد فى تالتة ورابعة ( كيميا تطبيقية او كيميا سبيشيل)

فيزياء: تالتة ورابعة تختار حاجة من الكترونيات ( فيزياء مواد ، فيزياء حاسب ، فيزياء سبيشيل)

( قسم الجيولوجيا ) 

بياخد عدد قليل وليه تنسيق داخلى فى الكلية ، يعنى لازم تكون جايب مجموع معين عشان تخشه " نفس فكرة تنسيق الثانوية العامة "

الجيولوجيا بتاعة الكلية او القسم اكبر بكتير من الجيولوجيا اللى بتتاخد فى الثانوية العامة ، جيولوجيا الثانوية العامة هى 20 صفحة من اول كتاب بتاخده فى الترم الأول فى سنة أولى

بتدخل القسم أول سنة بتبقى قسم جيولوجيا

أول ترم بتاخد ( جيولوجيا - كيمياء - فيزياء - حيوان - رياضة ) ، الترم التانى نفس اسماء المواد

عديت فى سنة اولى بتتقسم فى سنة تانية لحاجتين: جيولوجيا سبشيل ، وجيولوجيا جيوفيزياء

جيولوجيا سبشيل بيتقسم فى سنة تالتة لناس بتكمل جيولوجيا سبشيل وناس بتخش جيولوجيا جيوكيمياء .. ( جيولوجيا سبشيل بياخد من تقدير معين وبياخد 3 او 4 )

جيولوجيا جيوفيزياء بيكمل زى ما هو لحد ما يتخرج إن شاء الله ..

كدا خلصنا التشعيب بتاع الكلية نخش على الاقسام

 ( قسم الحيوان )

اهم المواد اللى هندرسها فى القسم (على مدار السنتين) : بندرس موآآد كتيير يدرس الانسان وكل ما يتعلق بالمملكه الحيوانيه فيدرس الفسيولوجى (علم وظائف الاعضاء) والامبريولوجى (علم الاجنه) والهيماتولوجى (علم امراض الدم) والسيريولوجى (علم المناعه) والاناتومى (علم التشريح) والباراسيتولوجى (علم الطفيليات) والهستلولوجى (علم الانسجة) البيولوجي بتاع الحيوان والفقاريات و اللافقاريات وعلم الوراثه وعلم الانسجه ، وعلم البيئة والتوصيف وعلم سلوم الحيوان ، علم الوراثة الخلوية ، علم الغدد الصماء ، الايض ، البيولوجيا الاشعاعية ، التطور ، علم التشريح المقارن ، بيئة حيوانية ، بيئة ميآه عذبة ، اوليات حيوانية متقدمة ، المصايد السمكية ( وبتتعلم فيها ازاى تعمل مزرعة سمك ) ، علم تشوهات الاجنة ، الكـآنسر(دراسة السرطآن ) ، دراسة دورة كريبس بالتفصيل ، حيوآنات ، البيئة المصرية ، المحميآت الطبيعية دى معظم المواد اللى هندرسهآ فى الحيوآن ، هو فى تآنى اكيد غير ده ^_^ بالنسبة للدبل بقى بالآضآفة لموآد الكيمياء : الفيزيائية والكهربية ، العضوية وغير العضوية ، التفريق اللوني هي طريقة لفصل وتنقية المواد الكيميائية المختلطة ، علم التآثر بين الاشعاع طرق التحلية المختلفة ، الكاربوهيدرات

الفرق ما بين اسبيشيآل ودبل :

عمومآ اللى بيخش اسبيشيآل بيكون عايز يتعين فى القسم .. الفرق مآبينهم بسيط جداا فى مواد قليلة اووى على مدار السنتين فى اسبيشيأل بيدرسوآ كورس #كيميآ_حيوى وبيدرسوا من 2 الى 3 كورسآت صغيرين زيآدة عن الدبل فى الزوو الدبل بيتعين منه نآس على القسم برده زى الاسبيشيال بس هما بيشوفوآ اعلى تقدير تقدير على مستوى الشعبتين وبيتعينوآ ممكن عدد اللى جايبين تقدير اعلى فى اسبيشيال يكون اكتر من الدبل وسآعتها بيتعينوا من اسبيشيآل بس الدبل طبعآ افضل بكتير لانك بتمسك العصآيا من النص .. ممكن تشتغل بالكيمياء وممكن تشتغل بالحيوان بيتعين كآم وآحد فى القسم : بتختلف من السنة للتآنية بس بتكون فى حدود اربعة او خمسة للقسم والقسم كبيير جداا وممكن يتعين نآس كتير

شروط القسم: متغيرة من سنة لسنة ، الحيوآن اسبيشآل: تقدير عام جيد وتقدير جيد جدا على الاقل (على مستوى الترمين ) فى مآدة التخصص الحيوآن والكيمياء : بدون شروط ، بس اهم حاجة بدون تخلفات فى مادة التخصص علم الحيوان بحد اقصى 60 طآلب والعدد متغير من سنة لسنة.

( قسم رياضة )

شروط دخول القسم : سابقا لا يوجد شروط لدخول القسم

حاليا فى كلام ان د/عبد العزيز رئيس القسم هيخلى فى شروط و هى نجاح فى مواد الرياضه

المواد التى يتم دراستها فى سنه تانيه

الترم الاول : استاتيكا من 75.. ديناميكا من 100 .. جير خطى من 100 .. تحليل رياضى من 150 .. فيزياء من 150

الترم الثانى : ديناميكا تحليليه من 100 ..معادلات تفاضليه من 100 ... فيزياء من150 .. كهرومغناطيسيه من 75 ... هندسه و احصاء من 125 حاسب من 50 و الحاسب معمل فقط و يتم دراسه برنامج ال matlab و الvisual basic ، في مواد الحاسب بندرس لغة برمجة C++ من البداية للنهاية , لغة الجافا في السنة الرابعة , قواعد البيانات , نظام التشفير وفك الشفرة ,ألية عمل الأجهزة كبرمجة , اللغات البدائية ( ما قبل الكمبيوتر ) , الألجورزمات

--------------------( وظائف خريج قسم الرياضيات )--------------------

1-الاوائل بيتعينوا معيدين فى الكليه

2-تقديرات امتياز و جيد جيدا اللى متعينوش فى الكليه يتقبلوا معيدين فى الجامعات الخاصه

3- هيئات الأرصاد الجويه

4- مراكز الإحصاء والمتابعه

5- مجالات عمل الحاسب الألي

6- مدرس حاسب

7- مدرس رياضيات

8- خبير إحصائي في جهاز التعبئة والإحصاء

9- محلل بيانات

10- باحث

11- في البنوك

12- مسؤول قواعد بيانات في أي مكان

13- الشغل كمبرمج في شركات الكمبيوتر

نصيحة :ما تكتفيش بدراسة الكلية عشان احنا متأخرين أوي في الكلية عن باقي الشعوب اتعلم لوحدك ع النت استفيد بوقتك عليه اليوتيوب مليان كورسات بس ما تقولش كفاية عليا الي باخده في الكلية

الشغل في القسم ده بالكفاءة مش بالتقدير .. في ناس معهاش شهادة اصلا و بتتعلم اونلاين بس و بتشتغل.

--------------------( أنتهى )--------------------

(قسم كيميا / فيزياء ): 

لا يوجد شروط للقبول بالقسم

التشعيب جوه القسم بيكون ازااي ؟؟

مفيش تشعيب اول ما تبقي فيزيا كيميا هتتخرج و انت فيزيا كيميا برضو

هدرس ايه فى القسم ده ؟

هتدرس مواد كيميا و فيزيا و رياضه مادة حاسب تيرم اول و نفس الكلام الترم التاني مع استبدال الحاسب بمادة جيولوجيا ، سنه تالته ورابعه بتدرس كل تيرم 3 مواد فيزيا و 3 مواد كيميا

( مجالات العمل ) : بيشتغل نفس شغل قسمي الكيمياء والفيزياء

( قسم الكيمياء الحيوية ):

من امتع الاقسام في الكلية , بيدرس كل حاجة عن كيمياء وبناء الجسم وكل تفاعل حيوي بيتم .

شروط القبول في القسم : بتختلف كل سنة على شكل العرض والطلب واقبال الطلبة على دخول القسم او لا .. وغالبا بتكون تقدير عام جيد وتقدير جيد على مستوى الترمين في مادة التخصص "الكيمياء

الحيوية " والعدد حوالي 60 الى 70 طالب والعدد قابل للتغيير من سنة للتانيه ..

التعيين للقسم: التعيين بيكون الاتنيين الاوائل "اواكتر حسب حاجة القسم" سواء من خاص او مزدوج

 ( المقررات الي هتدرس خلال السنتين ): أيض الدهون ، أيض المواد غير العضوية ، كيمياء الغذاء ، فيتامينات،إنزيمات ، أيض السكريات والطاقة ، كيمياء الأمراض (موضوعات مختارة) ، سوائل بيولوجية، طرق تحليل دقيقة وكروماتوجرافى ، بيولوجيا جزيئية وهندسة وراثية ، سوائل بيولوجية ووظائف حيوية ، شوادر حرة ومضادات أكسدة ، بيولوجيا بيئية وبيولوجيا الإشعاع ، مناعة وبيولوجيا الأورام ، تكنولوجيا حيوية وضبط الجودة ، كيمياء حيوية نباتية وفيروسات .

بالنسة للاقسام المزدوجة هيدرسوا بعض المقررات دي بالاضافة لفروع الكيمياء الي هي " العضوية والغير عضوية والفيزيكال " وما يندرج تحتها من فروع ..

( قسم فيزياء ):

عددوا دايما صغير وكلهم عارفين بعض التخصص بيكون من سنه تانيه بعد ما بيكون في اولى علوم طبيعيه واخد فكره عن الفيزيا اصلا في تانيه بتكون فيزيا عامه بيبقى الترم الاول ٥ مواد والتاني ٦ الترم الاول بناخد فيه circuit, electrostatic , optics, computer على خفيف

كده طبعا ده غير مواد الرياضه فالترمين لان احنا عارفين ان الرياضه والفيزيا جزء لا يتجزا من الاخر نيجي بقا ع الترم التاني بناخد magnetism , waves , modern , heat , بتبقى زي تأسيس وفكرة عامه قبل التخصص بتيجي بقا تدخل تالته بيبقى عندك اربع اقسام الاول special وده بيتطلب نجاح كل مواد فيزيا لانو بيدرس كل الفروع وبيبقى عندك معملين في الاسبوع وبيتاهد منها معيدين التاني material ودي بتدرس المواد باستفاضه وبتاخد الناس اللي جايبه اعلى درجات وبتاخد معيد واحد بس التالت electronics ودي بقا من اسمها تعتمد ع الكهربا وبردو بتاخد معيد واحد بس وبردو نسبة المعيدين نسبيه ع حسب حاجه الكليه فالوقت بتاعك واخر قسم ده فيزيا حاسب وده ملوش شروط قسم محترم بيحتوي الناس اللي شايله فيزيا عادي بس عايزه حد بقى غاوي حاسب عشان هتعيش مع البرمجه والاكواد والتخصص اللي بتدخلوا في تالته هو نفسه اللي هتكملوا في رابعة

( قسم الميكروبيولوجي ): 

يعتبر من الاقسام المميزة في الكلبية ومن احدث الاقسام واجددها , الدراسة ليها علاقة بالكائنات الدقيقة زي البكتيريا والفيروسات والطفيليلت , بيضم شعبتين الأولى

شعبة الميكروبيولوجي/ كيمياء " المزدوجة ", والشعبة الخاصة "الميكروبيولوجي "

الي بتدرس الميكروبيولوجي بصفة أساسية ومقررات مكملة فى الكيمياء والفيزياء

الحيوية والطفيليات والبيولوجيا الجزيئية والكيمياء الحيوية وفسيولوجيا الحيوان.

 ( المقررات الي بيتم دراستها ) : الميكروبيولوجيا التطبيقية وتشمل الميكروبيولوجيا البيئية وميكروبيولوجيا الأغذية ، الميكروبيولوجيا الأساسية وتشمل البكتريا والفطريات والفيروسات

الميكروبيولوجيا الصناعية والميكروبيولوجيا الطبية وتشمل البكتريا الطبية

والفيروسات الطبية والفطريات الطبية وعلم المناعة ، فسيولوجيا الكائنات الدقيقة و الأيض الميكروبى و التحولات الميكروبية والهندسة الوراثية والتلوث البيئي وتقسيم البكتريا والتحكم فى الكائنات الدقيقة.

 ( شروط القبول للقسم ) : الشعبة الخاصة بتشترط عدد قليل 10 طلاب والشعبة المزدوجة 40 طالب والاولوية للطلبة الاعلى تقدير الي عايزين يدخلوا القسم .

( قسم النبات ) :

يعتبر من اقدم الاقسام في الكلية بيدرس كل ما يخص عالم النبات من جوه ومن بره بشكل تفصيلى بالإضافة إلى دراسة الظروف المحيطة والمؤثرة على النبات وعلاقات النبات بالنبات والحيوان والحشرات و الإنسان.

 ( بعض من المقررات الي هيتم دراستها ) :

تصنيف النباتات , طحالب , ارشيجونيات , وفسيولوجيا النبات , خلية ووراثة , البيئة بالنسة للاقسام المزدوجة هيدرسوا بعض المقررات دي بالاضافة لفروع الكيمياء الي النباتية ,ا لارشيجونيات , الحفريات ، الكيمياء هي " العضوية والغير عضوية والفيزيكال " وما يندرج تحتها من فروع ..

 ( شروط القبول في القسم ):

غالبا القسم المزدوج مش بيشترط عدد ولا تقدير , والقسم الخاص بيشترط تقدير عام ، جميع الشروط قابلة للتغيير من سنة للتانية ,جيد في مادة النبات ، التعيين بيكون الاتنيين الاوائل او اكتر حسب حاجة.

 ( مجالات العمل ) :

نفس المجالات هتكون متاحة لخريج القسم المزدوج الي ممكن بشتغل بالكيمياء

وكمان مراكز البحوث ووزارة الزراعة والمؤسسات والشركات الزراعية ..

( قسم كيمياء / حشرات او حشرات منفرد ):

القسم واضح من أسمه أن التعامل كله مع الحشرات من أول شكلها الظاهري وتصنيفها و الطريقة اللي البيئة بتأثر بيها عليهم مروراً بدراسة جسم الحشرة من جواه في التشريح

أيوا بيشرحوا صراصير وبعدين بيدرسوا بقي أنهي حشرات بستفيد منها إقتصادياً وإزاي أربيها وأنهي حشرة مضرة إقتصادياً وأزاي أعملها مكافحة بكل الطرق والحشرات اللي بتنقل أمراض للأنسان والحيوان وبرضو إزاي أعملها مكافحة وكمان كورس سموم وخلية وجينات و بيولوجيا جزئية ، في حالة انك كورس مزدوج بتدرس مواد الكميا جنبهم

 ( الشغل ): خريج القسم مبدأياً بيقي باحث في مركز البحوث ، مراكز المصل واللقاح ، وزارة الأثار ، مركز بحوث الحشرات الطبية ، مركز بحوث الصحراء ، وله نفس شغل قسم كيمياء.

معلومات سريعه عن علوم عين شمس :

1. موجودة فالعباسية مش ف عين شمس
2. كانت ارض تابعة لقصر الملك فاروق (الزعفران حاليا)
3. فيها معامل كانت اسطبلات خيول ايام عهد الاحتلال البريطانى
4. شكلها متغيرش من حوالى اكتر من 40 سنة
5. خرج من معاملها المادة اللى منعت النابلم من الانفجار فى حرب 73
6. يوجد بها افضل دكتور جامعى على الأطلاق (د/محمد السيد طنطاوى)
7. بتعمل كل سنة فان داى يوم تاريخى لا ينسى
8. بييجى ليها طلبة حقوق واداب يقعدوا فيها عشان الهدوء
9. فيها متحف جيولوجيا ومتحف حيوان (فيه حيوانات محنطة )
10. اشهر شهيدين فيها (محمودالكردى) و محمد نجم رحمة الله عليهم
11. فيه قدام الكلية اكبر شجرة معمرة فجامعة عين شمس
12. ليها جزء تانى (بنات فقط) اسمه علوم بنات عين شمس فى مصر الجديدة
13. البالطو فيها هو الزى الرسمى
14. فيها مكتبة عملاقة
15. ارخم ناس ممكن تتعامل معاهم (شئون الطلبة والخزنه )
16. اشهر مكان فيها هو الاسكوير
17. ريحة الكيماويات هى اول حاجة هتاخد بالك منها اول ماتدخلها
18. بها اربع مدرجات كبيرة  (نوح وهلال ) (حجازى وحماد)
19. من أشهر دكاترتها

• د/ ماجد شفيق (الكل يخرس ف محاضرته )
• د/ فتحى الشحات (ابسااااااااااى)
• د/ عادل طه (برنس قسم رياضيات)
• د/ صلاح ابوالعينين و د/سيد ثابت (الاساطير)
• د/ مصطفى خليل (الأب الروحى )
• د/ محمد صبرى عبدالمطلب (العالم الجليل)
• والدكاترة الشباب المحترمين جدا د/محمد امين و د/ وائل ابو المجد
• د/بيومى (الأسوء على الإطلاق)  و د/تريز و د/للى
• والمعيدين المحترمين د/مجدى الطويل
• د/محمود فوزى و د/ عمرو بيومى
• و د/ احمد رضوان

علوم عين شمس بنات

علوم عين شمس بنات

زي ما انتو شايفين كدا في الصورة .. كلية الأداب و العلوم و التربية

و دا لأنه الكلية دي عبارة عن جامعة مصغرة فيها 3 كليات .. و للبنات بس اكيد

كلية الجمال الحب كله .. اه هاخدها كلها مدح اصلا الكلية كلها مميزات ؛ لو اتكلمنا عليها من هنا لبكرا مش هنخلص بصراحة

المهم :

اولا الكلية ماشية بنظام الساعات المعتمدة ؛ التخصص فيها من اول سنة .

الدخول للأقسام بيعتمد على درجات ثانوي لو انتى علمى علوم مثلا هتكتبى أقسام بيولوجى او طبيعه اللى متاحه ليكى بالترتيب حسب الأولوية بالنسبه ليكى كل قسم ليه شروط ودخوله بيعتمد على درجه مواد معينه من ثانوي زى ( كيمياء ، فيزياء ) بيعملوه تنسيق وبيقبلو الطالبات على أساسه ؛ ومن الاقسام الحلوة والمختلفة اللى فيها قسم كيميا حيوي و تغذية هنكلم عنه بعد شوية مع الاقسام الموجودة .

الكلية تابعه لكليه عين شمس بس هي مستقلة عنها يعني تبعها بس مش تبعها .

الحرم الجامعي فيه 3 كليات علوم و اداب و تربية ؛ و حمام سباحة اه وربنا .. لا وفيها جيم كمان بنات بقى ولازم ندلعهم .

الكلية طبعا بنات بس ؛ الدكاترة و المعيدات أغلبهم دكتورات الكلية موجودة في مصر الجديدة ؛ عند شارع اسماء فهمي و موازية لشارع المرغني - اسماء فهمي هي الي اسست الكلية - كمان عندها محطة مترو خاصة بيها .

اما بالنسبة للاقسام الموجودة :

1. كيمياء حيوية و تغذية : 

مجال شغله كبير جدا ؛ انا مش هتكلم عن مجالات شغل لان احنا اتكلمنا عليها ف عين شمس اما بالنسبة للتخصص التاني الي هو تغذية ف ليه مجالات تانية من ضمنها اخصائية تغذية و الشغل في المراكز البحثية و معاهد التغذية و المشاركة في الرقابة الغذائية و الصحية زي معامل وزارة الصحة و مصانع الاغذية ؛ كمان ممكن في التخطيط الغذائي في المؤسسات الكبيرة زي المدن الجامعية و المؤسسات العمالية . كمان حاجة ممكن تشتغل كمحررة صحفية في مجلات التغذية . و حجات كتير جدا جدا جدا . لان التخصص ده مهم جدا والقسم ده فريد مش موجود ف أي كلية تانية لانه بيدرس حيوي و تغذية في نفس الوقت ده اعلى قسم فى الكلية .

(الاقسام الاخرى ): 

كيمياء و حيوان - حيوان سبيشيل - كيميا و نبات - فيزيا حيوي – رياضيات – ميكروبيولوجي وكيميا – فيزيا اسبيشيال– رياضيات و فيزيا – فيزيا و كيميا – فيزيا وحاسب – كيميا سبيشيل – ملابس و نسيج .

علوم حلوان

علوم حلوان

تأسست كلية العلوم عام 1980، وكانت انطلاقة كلية العلوم عام 1995 حيث تم تأسيس باقى أقسامها العلمية: قسم النبات والميكروبيولوجى – قسم علم الحيوان والحشرات – وقسم الجيولوجيا، وقدمت الكلية 23 برنامجاً تعليمياً فى مرحلة البكالوريوس و41 برنامجاً تعليمياً فى مرحلة الدراسات العليا وتعمل الكليه بنظام الساعات المعتمدة .

 

فى سنة اولى بتدخل وبتتقسم على حسب 3 شعب براحتك هم: 

1. العلوم الفيزيائية.   
2. علوم الارض.   
3. علوم بيولوجية.

وكل شعبة فيهم بيتشعبوا لاقسام متعددة بتخصصات كتير ، التشعيب فى سنة تانية على اساس تقديرك فى سنة اولى

 في قسم علوم فيزيائية وعلوم ارض التشعيب بيكون فى سنة تانيه اما بيولوجى  بتتخصص فى اقسامه فى سنة تالته كالتالى :

1. ( علوم فيزيائية )

لما تيجى تطلع سنة تانية بتتخصص فى ( كيمياء او فيزيا او رياضة )

الكيمياء شرطها عشان تدخلها انك تنجح فى مادة الكيمياء فى سنة اولى

فيزيا ورياضة مالهمش شروط

قسم فيزياء بينقسم لاقسام متعددة: علوم حاسب ، فلك ، فيزياء منفرد ، علوم الفضاء ، فيزياء حيوية وطبية (بيوفيزياء).

2. ( علوم ارض )

ده فى سنة تانية ممكن تختار اما جيوفيزيا او جيولوجيا ومالهمش شروط

مجالات شغلهم ف البترول و الحفر والتعدين (القسمين).

3. ( علوم بيولوجية )

بتتخصص ف اقسامه من سنة تالته

اقسامه اللى مالهاش شروط: كيميا / نبات ، نبات خاص ، كيميا / حيوان ، حيوان خاص

الاقسام اللى لها شروط: كيميا / كيميا حيوى ، كيميا حيوى / ميكروبيولوجى ، ميكرو سبيشل

4. قسم البيوتكنولوجى :

التخصص من سنة اولى ومصاريفه 8 آلاف فى السنة تقدر تدخله من علمى رياضه او علوم وبيشتغل نفس شغل حيوي وميكرو وحيوان.

ملحوظه: 

علوم حلوان معظم الناس بتروح بالمترو ولو عندك مشكلة مع المترو .. فالمترو الجديد المكيف دا هيخليك تبات في المترو .

الموقع الالكترونى للكليه :

رابط الموقع

علوم المنيا

علوم المنيا

 

أنشئت كلية العلوم جامعه المنيا سنة 1973 وبدأت الدراسة بطلاب الفرقة الاولى (156طالب وطالبة) وكان عدد الخريجين للدفعة الأولى ( 74) طالبا وطالبة عام 1977 وتم منح أول درجة ماجستير في العلوم من الكلية في شهر فبراير في الكيمياء عام 1978  والكليه بتطبق نظام الساعات المعتمده لكن هنا لازم تخلص 140 ساعه.

التخصص (التشعيب) بيبقى فى سنه اولى وبيكون تبعا لمجموع الثانويه العامه وبيكون كالتالى: كل طالب بيكتب الرغبات ويسلمها لمكتب التنسيق في الكليه بعد التقديم علي طول وفي اول اسبوع في الدراسه بيعرف هو هيتخصص ايه.

( طالب علمي علوم بيرتب الاقسام دي حسب رغبته ):

كيمياء ، كيمياء حيوى ، كيمياء / حيوان ، حيوان منفرد ، نبات منفرد ، ميكروبيولوجى ، جيولوجيا ، جيولوجيا البترول.

( طالب علمي رياضه بيرتب الافسام دي حسب رغبته ):

رياضيات ، رياضيات / حاسب ، فيزياء ، فيزياء / حاسب ، كيمياء ، جيولوجيا البترول ، علوم الحاسب ، جيوفيزياء ، كيمياء / فيزياء

ومكتب التنسيق في الاخر بيختار لكل طالب رغبه من الرغبات اللى هو مرتبها حسب مجموع الثانويه العامه فقط من غير اي شروط تانيه والاوليه حسب ترتيب الرغبات.

بس عادتا قسم كيمياء حيوى بياخد من مجموع عالي ف علمي علوم وقسم علوم حاسب بياخد بردو من مجموع عالي في علمي رياضه .

الموقع الالكترونى لكليه العلوم:

رابط الموقع

 موقع نتائج الكليه :

رابط الموقع